ಕೊರೋನಾ ತಗುಲಿಸಲು ಸ್ಪರ್ಧೆ, ಬಂಪರ್ ಬಹುಮಾನ: ಪಾರ್ಟಿ ಆಯೋಜಿಸಿದ ವಿದ್ಯಾರ್ಥಿಗಳು!

ಅಮೆರಿಕದಲ್ಲಿ ಕೊರೋನಾ ಸೋಂಕು ತಗುಲಿಸಲು ಸ್ಪರ್ಧೆ!| ಪಾರ್ಟಿ ಆಯೋಜಿಸಿದ ವಿದ್ಯಾರ್ಥಿಗಳು| ಸೋಂಕಿತರ ಜತೆ ಸೋಂಕು ಇಲ್ಲದವರು ಭಾಗಿ| ಯಾರಿಗೆ ಮೊದಲು ಸೋಂಕು ತಗಲುತ್ತೋ ಅವರಿಗೆ ಬಹುಮಾನ

ನ್ಯೂಯಾರ್ಕ್(ಜು.05): ವಿಶ್ವಾದ್ಯಂತ ಕೊರೋನಾ ವೈರಸ್‌ ಆತಂಕ ಮೂಡಿಸಿದ್ದರೆ ಅಮೆರಿಕದ ಕೆಲ ಹುಡುಗರಿಗೆ ಇದು ಚೆಲ್ಲಾಟವಾಗಿದೆ. ‘ಯಾರಿಗೆ ಮೊದಲು ಕೊರೋನಾ ಬರುತ್ತೆ?’ ಎಂಬ ಸ್ಪರ್ಧೆಯ ಪಾರ್ಟಿಯನ್ನು ಅಮೆರಿಕದ ಟಸ್ಕಲೂಸಾ ಎಂಬಲ್ಲಿ ವಿದ್ಯಾರ್ಥಿಗಳು ನಡೆಸಿದ ಘಟನೆ ಬೆಳಕಿಗೆ ಬಂದಿದೆ.

‘ಉದ್ದೇಶಪೂರ್ವಕವಾಗಿ ವಿದ್ಯಾರ್ಥಿಗಳು ಪಾರ್ಟಿ ನಡೆಸಿದ್ದಾರೆ. ಪಾರ್ಟಿ ಸಂಘಟಕರು ಕೊರೋನಾ ಪಾಸಿಟಿವ್‌ ಅತಿಥಿಗಳನ್ನು ಆಹ್ವಾನಿಸಿದ್ದಾರೆ. ಕೊರೋನಾ ಸೋಂಕಿತರ ಜತೆ ಕೊರೋನಾ ಬರದವರು ಪಾರ್ಟಿಯಲ್ಲಿ ಪಾಲ್ಗೊಳ್ಳಬೇಕು. ಅದರಲ್ಲಿ ಯಾರಿಗೆ ಮೊದಲು ಕೊರೋನಾ ಸೋಂಕು ತಗುಲುತ್ತದೋ ಅವರಿಗೆ ಬಹುಮಾನ ಎಂಬುದು ಪಾರ್ಟಿಯ ಧ್ಯೇಯ’ ಎಂದು ನಗರದ ಮೇಯರ್‌ ಸೋನಿಯಾ ಮೆಕಿಂಸ್ಟ್ರಿ ಹೇಳಿದ್ದಾರೆ.

‘ಪಾರ್ಟಿಗೆ ಬಂದವರು ಪಾಟ್‌ ಒಂದರಲ್ಲಿ ಹಣ ಹಾಕಬೇಕು. ಆ ಹಣವನ್ನು ಕೊರೋನಾ ಮೊದಲು ಬಂದವರಿಗೆ ಬಹುಮಾನ ನೀಡಲಾಗುತ್ತದೆ’ ಎಂದು ಆಯೋಜಕರು ಹೇಳಿದ್ದರು ಎಂದು ಮೇಯರ್‌ ತಿಳಿಸಿದ್ದಾರೆ. ಈ ಆಯೋಜಕರ ವಿರುದ್ಧ ಕ್ರಮ ಜರುಗಿಸುವ ಹೇಳಿಕೆಯನ್ನು ಅವರು ನೀಡಿಲ್ಲ.