ನಾಲಿಗೆ ಹಿಡಿತದಲ್ಲಿರಲಿ: ಇರಾನ್ ಪರಮೋಚ್ಛ ನಾಯಕನಿಗೆ ಟ್ರಂಪ್ ಎಚ್ಚರಿಕೆ!

ಇರಾನ್-ಅಮೆರಿಕ ನಾಯಕರ ನಡುವೆ ಮತ್ತೆ ಶುರುವಾದ ವಾಕ್ಸಮರ| ಇರಾನ್ ಪರಮೋಚ್ಛ ನಾಯಕನಿಗೆ ಮಾತಿನ ಛಾಟಿ ಬೀಸಿದ ಅಮೆರಿಕ ಅಧ್ಯಕ್ಷ| ಫ್ರಾನ್ಸ್, ಬ್ರಿಟನ್, ಜರ್ಮನಿ ರಾಷ್ಟ್ರಗಳು ಅಮೆರಿಕದ ದಾಸ ಎಂದ ಅಯುತೊಲ್ಲಾ ಅಲಿ ಕಮೇನಿ| ಮಾತಿನ ಮೇಲೆ ಹಿಡಿತವಿರಲಿ ಎಂದು ಎಚ್ಚರಿಸಿದ ಡೋನಾಲ್ಡ್ ಟ್ರಂಪ್|

ವಾಷಿಂಗ್ಟನ್(ಜ.18): ಇರಾನ್-ಅಮೆರಿಕ ನಡುವಿನ ಯುದ್ಧೋನ್ಮಾದ ತಣ್ಣಗಾಗಿದೆ ಎಂದು ನಿಟ್ಟುಸಿರು ಬಿಡಬೇಕು ಎನ್ನುವಷ್ಟರಲ್ಲೇ, ಇರಾನ್-ಅಮೆರಿಕದ ಪರಮೋಚ್ಛ ನಾಯಕರ ನಡುವೆ ಮತ್ತೆ ಮಾತಿನ ಸಮರ ಶುರುವಾಗಿರುವುದು ಆತಂಕ ಮೂಡಿಸಿದೆ.

ಬ್ರಿಟನ್, ಫ್ರಾನ್ಸ್ ಹಾಗೂ ಜರ್ಮನಿ ರಾಷ್ಟ್ರಗಳು ಅಮೆರಿಕದ ದಾಸರಾಗಿರುವುದು ದುರಂತ ಎಂದು ಇರಾನ್ ಪರಮೋಚ್ಛ ನಾಯಕ ಅಯುತೊಲ್ಲಾ ಅಲಿ ಕಮೇನಿ ಗುಡುಗಿದ್ದಾರೆ.

ಇರಾನ್-ಅಮೆರಿಕ ನಡುವಿನ ಬಿಗುವಿನ ವಾತಾವರಣದ ಸಮಯದಲ್ಲಿ ಈ ಮೂರು ಯುರೋಪಿಯನ್ ರಾಷ್ಟ್ರಗಳು ಅಮೆರಿಕದ ಪರವಾಗಿ ನಿಂತಿದ್ದನ್ನು ಖಂಡಿಸಿರುವ ಕಮೇನಿ, ದುಷ್ಟ ರಾಷ್ಟ್ರದ ದಾಸರಾಗಬೇಡಿ ಎಂದು ಹರಿಯಾಯ್ದಿದ್ದಾರೆ.

ಇನ್ನು ಇರಾನ್ ಪರಮೋಚ್ಛ ನಾಯಕರ ಹೇಳಿಕೆಗೆ ಕೆಂಡಾಮಂಡಲವಾಗಿರುವ ಅಮೆರಿಕ ಅಧ್ಯಕ್ಷ ಡೋನಾಲ್ಡ್ ಟ್ರಂಪ್, ಆಡುವ ಮಾತಿನ ಮೇಲೆ ಹಿಡಿತವಿರಲಿ ಎಂದು ಎಚ್ಚರಿಸಿದ್ದಾರೆ.

ಈ ಕುರಿತು ಟ್ವೀಟ್ ಮಾಡಿರುವ ಡೋನಾಲ್ಡ್ ಟ್ರಂಪ್, ಅಮೆರಿಕ ಮತ್ತು ಯುರೋಪ್ ಕುರಿತು ಹಗುರವಾಗಿ ಮಾತನಾಡುವುದನ್ನು ನಿಲ್ಲಿಸಬೇಕು ಎಂದು ಕಮೇನಿ ಅವರನ್ನು ಒತ್ತಾಯಿಸಿದ್ದಾರೆ. 

ಇರಾನ್ ಆರ್ಥಿಕತೆ ಕುಸಿಯುತ್ತಿದ್ದು, ಆ ದೇಶದ ಜನ ಸಂಕಷ್ಟದಲ್ಲಿದ್ದಾರೆ. ಇವುಗಳಿಂದ ಜನರ ಗಮನ ಬೇರೆಡೆ ಸೆಳೆಯಲು  ಇರಾನ್ ನಾಯಕರು ನಾಟಕವಾಡುತ್ತಿದ್ದಾರೆ ಎಂದು ಟ್ರಂಪ್ ಹರಿಹಾಯ್ದಿದ್ದಾರೆ.