ಟೋಕಿಯೋ 2020: ಅನ್ಯಾಯವಾಗಿದೆ ಎಂದು ರಿಂಗ್ನಲ್ಲೇ ಕುಳಿತು ಪ್ರತಿಭಟಿಸಿದ ಬಾಕ್ಸರ್..!
ಸಾರಾಂಶ
* ಟೋಕಿಯೋ ಒಲಿಂಪಿಕ್ಸ್ನಲ್ಲಿ ರೆಫ್ರೀ ವಿರುದ್ದ ಅಸಮಾಧಾನ ಹೊರಹಾಕಿದ ಫ್ರಾನ್ಸ್ ಬಾಕ್ಸರ್ * ರೆಫ್ರಿ ತೀರ್ಮಾನ ಖಂಡಿಸಿ ಬಾಕ್ಸಿಂಗ್ ರಿಂಗ್ನಲ್ಲೇ ಕುಳಿತು ಪ್ರತಿಭಟನೆ * ಜಾಗತಿಕ ಮಟ್ಟದಲ್ಲಿ ಗಮನ ಸೆಳೆದ ಫ್ರಾನ್ಸ್ ಬಾಕ್ಸರ್ ಪ್ರತಿಭಟನೆ
ಟೋಕಿಯೋ(ಆ.02): ಟೋಕಿಯೋ ಒಲಿಂಪಿಕ್ಸ್ ಕ್ರೀಡಾಕೂಟದ ಬಾಕ್ಸಿಂಗ್ ಸ್ಪರ್ಧೆಯ ಕ್ವಾರ್ಟರ್ ಫೈನಲ್ನಲ್ಲಿ ಅನರ್ಹಗೊಂಡ ಬಳಿಕ ಫ್ರಾನ್ಸ್ನ ಹೆವಿವೇಟ್ ಬಾಕ್ಸರ್ ಮೌರದ್ ಅಲೀವ್ ತಮಗೆ ಅನ್ಯಾಯವಾಗಿದೆ ಎಂದು ರಿಂಗ್ನಲ್ಲೇ ಕುಳಿತು ಪ್ರತಿಭಟನೆ ನಡೆಸಿದ್ದಾರೆ.
ಭಾನುವಾರ ಬ್ರಿಟನ್ನ ಫ್ರೆಜರ್ ಕ್ಲಾರ್ಕ್ ವಿರುದ್ಧ ನಡೆದ ಪಂದ್ಯದಲ್ಲಿ 2 ಸುತ್ತು ಪೂರ್ಣಗೊಳ್ಳಲು 4 ಸೆಕೆಂಡ್ ಬಾಕಿ ಇದ್ದಾಗ, ಉದ್ದೇಶಪೂರ್ವಕವಾಗಿಯೇ ಎದುರಾಳಿಗೆ ತಲೆಯಿಂದ ಪಂಚ್ ಮಾಡಿದ ಎಂಬ ಕಾರಣಕ್ಕಾಗಿ ಅಲೀವ್ನನ್ನು ಪಂದ್ಯದ ರೆಫ್ರಿ ಅನರ್ಹಗೊಳಿಸಿದರು. ಇದರಿಂದ ಫ್ರೆಜರ್ ಕ್ಲಾರ್ಕ್ ಸೆಮೀಸ್ಗೆ ಅರ್ಹತೆ ಪಡೆದು ಟೋಕಿಯೋ ಒಲಿಂಪಿಕ್ಸ್ನಲ್ಲಿ ಕಂಚಿನ ಪದಕ ಖಚಿತ ಪಡಿಸಿಕೊಂಡರು.
ಟೋಕಿಯೋ 2020: ಒಲಿಂಪಿಕ್ಸ್ ರೆಫ್ರಿಗಳ ವಿರುದ್ಧ ಮೇರಿ ಕೋಮ್ ಆಕ್ರೋಶ!
ಆದರೆ, ಮೊದಲ ಸುತ್ತಿನಲ್ಲಿ ಜಯ ಸಾಧಿಸಿದ್ದ ಅಲೀವ್, ರೆಫ್ರಿ ತೀರ್ಪಿನ ವಿರುದ್ಧ ಅಸಮಾಧಾನ ವ್ಯಕ್ತಪಡಿಸಿ ರಿಂಗ್ನಲ್ಲೇ ಕುಳಿತು ಪ್ರತಿಭಟನೆ ನಡೆಸಿದರು. ಈ ನಿಜಕ್ಕೂ ನನಗಾದ ಅನ್ಯಾಯ. ನಾನು ಈ ಪಂದ್ಯವನ್ನು ಗೆಲ್ಲುತ್ತಿದ್ದೆ. ನಾನು ಈ ಒಲಿಂಪಿಕ್ಸ್ ಕ್ರೀಡಾಕೂಟಕ್ಕಾಗಿ ಸಾಕಷ್ಟು ಅಭ್ಯಾಸ ನಡೆಸಿದ್ದೆ. ಈ ರೀತಿ ನನಗೆ ಅನ್ಯಾಯವಾಗುತ್ತದೆ ಅಂದುಕೊಂಡಿರಲಿಲ್ಲ ಎಂದು ಮೌರದ್ ಅಲೀವ್ ತಮ್ಮ ಬೇಸರ ಹೊರಹಾಕಿದ್ದಾರೆ.
ಕೆಲ ದಿನಗಳ ಹಿಂದಷ್ಟೇ ಪ್ರೀ ಕ್ವಾರ್ಟರ್ ಫೈನಲ್ನಲ್ಲಿ ಸೋಲುಂಡ ಭಾರತದ ಬಾಕ್ಸರ್ ಮೇರಿ ಕೋಮ್ ಸಹ ರೆಫರಿ ತೀರ್ಪಿನ ವಿರುದ್ಧ ಅಸಮಾಧಾನ ವ್ಯಕ್ತಪಡಿಸಿದ್ದನ್ನು ಸ್ಮರಿಸಬಹುದು.