ಕಾವೇರಿ ವಿವಾದ: ಕರ್ನಾ​ಟಕ ನಿಗದಿಯಷ್ಟು ನೀರು ಬಿಟ್ಟಿದೆ, ಪ್ರಾಧಿಕಾರ

ಸುಪ್ರೀಂ ಕೋರ್ಟ್‌ ನಿರ್ದೇ​ಶ​ನ​ದಂತೆ ಪ್ರಾಧಿ​ಕಾ​ರವು ಈ ವಸ್ತು​ಸ್ಥಿತಿ ವರದಿ ಸಲ್ಲಿ​ಸಿದ್ದು, ಇದಕ್ಕೆ ತಮಿ​ಳು​ನಾ​ಡಿ​ನಿಂದ ತೀವ್ರ ಆಕ್ಷೇಪ ವ್ಯಕ್ತ​ವಾ​ಗಿ​ದೆ. 

ನವದೆಹಲಿ(ಸೆ.01):  ಕರ್ನಾ​ಟಕ ಸರ್ಕಾರ ನಾವು ನಿಗದಿ ಮಾಡಿ​ದಷ್ಟುನೀರನ್ನು ಸಮ​ರ್ಪ​ಕ​ವಾಗಿ ತಮಿ​ಳು​ನಾ​ಡಿಗೆ ಬಿಡು​ಗಡೆ ಮಾಡು​ತ್ತಿದೆ ಎಂದು ಕಾವೇರಿ ನೀರು ನಿರ್ವ​ಹಣಾ ಪ್ರಾಧಿ​ಕಾರ (ಸಿ​ಡ​ಬ್ಲ್ಯು​ಎಂಎ) ಗುರು​ವಾರ ಸುಪ್ರೀಂ ಕೋರ್ಟ್‌ಗೆ ಸಲ್ಲಿ​ಸಿದ ವಸ್ತು​ಸ್ಥಿತಿ ವರ​ದಿ​ಯಲ್ಲಿ ಹೇಳಿದೆ. ಜತೆಗೆ, ತಮಿಳುನಾಡಿನ ಮೆಟ್ಟೂರು ಡ್ಯಾಂನಲ್ಲಿ ಸಾಕಷ್ಟು ನೀರಿದ್ದರೂ ಅದನ್ನು ಮಳೆ ಕೊರತೆ ವರ್ಷದಲ್ಲಿ ಸೂಕ್ತವಾಗಿ ಬಳಕೆ ಮಾಡಿಲ್ಲ ಎಂದೂ ತಿಳಿ​ಸಿ​ದೆ.

ಸುಪ್ರೀಂ ಕೋರ್ಟ್‌ ನಿರ್ದೇ​ಶ​ನ​ದಂತೆ ಪ್ರಾಧಿ​ಕಾ​ರವು ಈ ವಸ್ತು​ಸ್ಥಿತಿ ವರದಿ ಸಲ್ಲಿ​ಸಿದ್ದು, ಇದಕ್ಕೆ ತಮಿ​ಳು​ನಾ​ಡಿ​ನಿಂದ ತೀವ್ರ ಆಕ್ಷೇಪ ವ್ಯಕ್ತ​ವಾ​ಗಿ​ದೆ. ಮಳೆ ಕೊರತೆ ವರ್ಷ​ಗ​ಳಲ್ಲಿ ಪಾಲಿ​ಸ​ಬೇ​ಕಾದ ವೈಜ್ಞಾ​ನಿಕ ವಿಧಾ​ನ​ವನ್ನು ಸಿಡ​ಬ್ಲ್ಯು​ಎಂಎ ಸಿದ್ಧ​ಪ​ಡಿ​ಸಿಲ್ಲ. ವೈಜ್ಞಾ​ನಿಕ ವಿಧಾ​ನದ ಸೂತ್ರ ಸಿದ್ಧ​ಪ​ಡಿ​ಸಲು ಸುಪ್ರೀಂ ಕೋರ್ಟ್‌ ಸಿಡ​ಬ್ಲ್ಯು​ಎಂಎಗೆ ಸೂಚಿ​ಸ​ಬೇಕು. ನಮ್ಮ ಉಳಿ​ಕೆಯ ಪಾಲು 8.98 ಟಿಎಂಸಿ ನೀರನ್ನು ಬಿಡು​ಗಡೆ ಮಾಡಲು ಆದೇ​ಶಿ​ಸ​ಬೇಕು ಎಂದು ಸುಪ್ರೀಂ ಕೋರ್ಚ್‌ ಮುಂದೆ ಸಲ್ಲಿ​ಸಿ​ರುವ ಆಕ್ಷೇ​ಪ​ಣೆ​ಯಲ್ಲಿ ಮನವಿ ಮಾಡಿ​ದೆ.

ನಿತ್ಯ24 ಸಾವಿರ ಕ್ಯುಸೆಕ್‌ ನೀರು ಬಿಡುಗಡೆಗೆ ಕರ್ನಾಟಕಕ್ಕೆ ಆದೇಶಿಸುವಂತೆ ಕೋರಿ ತಮಿಳುನಾಡು ಸರ್ಕಾರ ಸಲ್ಲಿಸಿರುವ ಅರ್ಜಿಯ ವಿಚಾರಣೆಯನ್ನು ಕಳೆದ ಶುಕ್ರ​ವಾರ ನಡೆ​ಸಿದ್ದ ನ್ಯಾಯಾಲಯ, ತಮಿಳುನಾಡಿಗೆ ಸಮರ್ಪಕವಾಗಿ ನೀರು ಬಿಡುಗಡೆ ಆಗುತ್ತಿದೆಯೇ ಇಲ್ಲವೇ ಎಂಬುದರ ಕುರಿತು ವಸ್ತುಸ್ಥಿತಿ ವರದಿಯನ್ನು ಮುಂದಿನ ವಿಚಾರಣೆಯೊಳಗೆ ಸಲ್ಲಿ​ಸು​ವಂತೆ ಸಿಡಬ್ಲ್ಯುಎಂಎಗೆ ಸೂಚಿಸಿತ್ತು. ಅದರಂತೆ ಇದೀಗ ಸಿಡಬ್ಲ್ಯುಎಂಎ ತನ್ನ ವರದಿ ಸಲ್ಲಿಸಿದೆ.

ಆ.11ರಂದು ಕಾವೇರಿ ನೀರು ನಿರ್ವಹಣಾ ಪ್ರಾಧಿಕಾರದ ಸಭೆಯಲ್ಲಿ ಹೊರಡಿಸಿದ ಆದೇಶವನ್ನು ಕರ್ನಾಟಕ ಸಂಪೂರ್ಣವಾಗಿ ಪಾಲಿಸಿದೆ. ಆ.12ರಿಂದ 26ರ ವರೆಗೆ 14,9898 ಕ್ಯುಸೆಕ್‌ ನೀರನ್ನು ತಮಿಳುನಾಡಿಗೆ ಬಿಡುಗಡೆ ಮಾಡಿದೆ. ಆ.28ರಂದು ನಡೆದ ಕಾವೇರಿ ನೀರು ನಿರ್ವಹಣಾ ಪ್ರಾಧಿಕಾರದ ತುರ್ತು ಸಭೆಯಲ್ಲಿ ಮುಂದಿನ 15 ದಿನಗಳ ವರೆಗೆ ಸೆಕೆಂಡಿಗೆ 5 ಸಾವಿರ ಘನ ಅಡಿಯಂತೆ ನೀರು ಹರಿಸಲು ಆದೇಶ ಹೊರಡಿಸಲಾಗಿದೆ. ಅದನ್ನೂ ಕರ್ನಾಟಕ ಪಾಲಿಸುತ್ತಿದೆ ಎಂದು ಸಿಡಬ್ಲ್ಯುಎಂಎ ವರದಿಯಲ್ಲಿ ಪ್ರಸ್ತಾಪಿಸಲಾಗಿದೆ.

ತ.ನಾಡು ಆಕ್ಷೇ​ಪ: 

ಸಿಡ​ಬ್ಲ್ಯು​ಎಂಎ ವರ​ದಿಗೆ ಸಂಬಂಧಿಸಿ ಸುಪ್ರೀಂ ಕೋರ್ಟ್‌ ಮುಂದೆ ಆಕ್ಷೇ​ಪಣೆ ಸಲ್ಲಿ​ಸಿ​ರುವ ತಮಿ​ಳು​ನಾಡು, ಮಳೆ ಕೊರತೆ ವರ್ಷ ಎಂದು ತೀರ್ಮಾ​ನಿಸಿ ತಮಿ​ಳು​ನಾ​ಡಿನ ಪಾಲು ಹಂಚಿಕೆ ಮಾಡು​ವಾಗ ಪಾರ​ದ​ರ್ಶ​ಕತೆ ಕಾಯ್ದು​ಕೊ​ಳ್ಳು​ವಂತೆ, ನ್ಯಾಯ​ಪ​ರತೆ ಕಾಯ್ದು​ಕೊ​ಳ್ಳು​ವಂತೆ ಸಿಡ​ಬ್ಲ್ಯು​ಎಂಎಗೆ ನಿರ್ದೇ​ಶನ ನೀಡ​ಬೇಕು. 10 ದಿನ​ಕ್ಕೊಮ್ಮೆ ನೀರು ಹಂಚಿಕೆ ಕುರಿತು ಸೂಕ್ತ ನಿರ್ದೇ​ಶನ ನೀಡು​ತ್ತಿ​ರ​ಬೇಕು ಎಂದು ಹೇಳಿ​ದ​ರು.