ಬೆಂಗಳೂರು-ಮೈಸೂರು ಹೈವೇ ಫೆಬ್ರವರಿ ಅಂತ್ಯಕ್ಕೆ ಉದ್ಘಾಟನೆ: ಕೇಂದ್ರ ಸಚಿವ ನಿತಿನ್‌ ಗಡ್ಕರಿ

ಬೆಂಗ​ಳೂರು-ಮೈಸೂರು ದಶ​ಪಥ ರಾಷ್ಟ್ರೀಯ ಹೆದ್ದಾ​ರಿ​ಯನ್ನು ಫೆಬ್ರ​ವರಿ ಅಂತ್ಯ​ದಲ್ಲಿ ಲೋಕಾರ್ಪಣೆ ಮಾಡಲಾಗುವುದು ಎಂದು ಕೇಂದ್ರ ರಸ್ತೆ ಸಾರಿಗೆ ಹಾಗೂ ಹೆದ್ದಾರಿ ಸಚಿವ ನಿತಿನ್‌ ಗಡ್ಕರಿ ತಿಳಿಸಿದ್ದಾರೆ. 

ರಾಮ​ನ​ಗರ (ಜ.06): ಬೆಂಗ​ಳೂರು-ಮೈಸೂರು ದಶ​ಪಥ ರಾಷ್ಟ್ರೀಯ ಹೆದ್ದಾ​ರಿ​ಯನ್ನು ಫೆಬ್ರ​ವರಿ ಅಂತ್ಯ​ದಲ್ಲಿ ಲೋಕಾರ್ಪಣೆ ಮಾಡಲಾಗುವುದು ಎಂದು ಕೇಂದ್ರ ರಸ್ತೆ ಸಾರಿಗೆ ಹಾಗೂ ಹೆದ್ದಾರಿ ಸಚಿವ ನಿತಿನ್‌ ಗಡ್ಕರಿ ತಿಳಿಸಿದ್ದಾರೆ. ಹೆಲಿ​ಕಾ​ಪ್ಟರ್‌, ಬಳಿಕ ರಸ್ತೆ ಮೂಲಕ ಬೆಂಗ​ಳೂರು-ಮೈಸೂರು ಹೆದ್ದಾ​ರಿಯ ಸಮೀಕ್ಷೆ ನಡೆ​ಸಿದ ಬಳಿಕ ಸುದ್ದಿ​ಗೋ​ಷ್ಠಿ​ಯಲ್ಲಿ ಅವರು ಮಾತ​ನಾ​ಡಿದರು. ಬೆಂಗಳೂರು-ಮೈಸೂರು ಹೆದ್ದಾ​ರಿಯ ಕಾಮ​ಗಾರಿ ಫೆಬ್ರ​ವರಿ ವೇಳೆಗೆ ಪೂರ್ಣ​ಗೊ​ಳ್ಳ​ಲಿದೆ. 

ರಾಷ್ಟ್ರಪತಿ ದ್ರೌಪತಿ ಮುರ್ಮು ಅಥವಾ ಪ್ರಧಾನಿ ನರೇಂದ್ರ ಮೋದಿ ಅವರನ್ನು ಉದ್ಘಾ​ಟನಾ ಕಾರ್ಯ​ಕ್ರ​ಮಕ್ಕೆ ಆಹ್ವಾ​ನಿ​ಸ​ಲಾ​ಗು​ವುದು. ದಶ​ಪಥ ಹೆದ್ದಾರಿ ಕಾಮ​ಗಾರಿ ವೇಳೆ ಮಾಜಿ ಪ್ರಧಾನಿ ದೇವೇ​ಗೌಡ ಸೇರಿ​ದಂತೆ ಈ ಭಾಗದ ಸಂಸ​ದರು ಹಾಗೂ ಶಾಸ​ಕರು ಅಂಡರ್‌ ಪಾಸ್‌ಗಳ ನಿರ್ಮಾ​ಣ​ಕ್ಕಾಗಿ ಮನವಿ ಸಲ್ಲಿ​ಸಿ​ದ್ದರು. ಅವರ ಸಲಹೆ ಮತ್ತು ಮನ​ವಿ ಪರಿ​ಗ​ಣಿ​ಸ​ಲಾ​ಗಿದೆ. ಅಲ್ಲದೆ, ಹೊಸ​ಕೋಟೆ, ದೊಡ್ಡ​ಬ​ಳ್ಳಾ​ಪುರ, ದೇವ​ನ​ಹ​ಳ್ಳಿ, ಡಾಬಸ್‌ ಪೇಟೆ ಹಾಗೂ ರಾಮ​ನ​ಗರ ಸೇರಿ​ದಂತೆ ಪ್ರಮುಖ ನಗ​ರ​ಗ​ಳನ್ನು ಬೆಸೆ​ಯಲು ವರ್ತುಲ ರಸ್ತೆಯನ್ನು ನಿರ್ಮಾಣ ಮಾಡ​ಲಾ​ಗು​ವುದು ಎಂದು ತಿಳಿಸಿದರು.

ರಾಷ್ಟ್ರೀಯ ಹೆದ್ದಾ​ರಿಗೆ ಹೆಸ​ರಿ​ಡುವ ಸಂಪ್ರ​ದಾಯ ಇಲ್ಲ: ಹೆದ್ದಾ​ರಿಗೆ ಹೆಸರಿಡುವ ಕುರಿತಾದ ಪ್ರಶ್ನೆಗೆ ಪ್ರತಿಕ್ರಿಯಿಸಿ, ರಾಷ್ಟ್ರೀಯ ಹೆದ್ದಾ​ರಿ​ಗ​ಳಿಗೆ ಹೆಸ​ರಿ​ಡುವ ಸಂಪ್ರ​ದಾಯ ಇಲ್ಲ. ನಾವು ಹೆದ್ದಾ​ರಿ​ಗ​ಳಿಗೆ ನಂಬರ್‌ ಮಾತ್ರ ನೀಡು​ತ್ತೇವೆ ಅಷ್ಟೇ. ಮಾಜಿ ಮುಖ್ಯಮಂತ್ರಿ ಎಸ್‌.ಎಂ.ಕೃ​ಷ್ಣ ಅವರು ಬೆಂಗ​ಳೂರು-ಮೈಸೂರು ಹೆದ್ದಾ​ರಿಗೆ ನಾಲ್ವಡಿ ಕೃಷ್ಣ​ರಾಜ ಒಡೆ​ಯರ್‌ ಹೆಸರಿಡುವಂತೆ ಮನವಿ ಸಲ್ಲಿ​ಸಿ​ದ್ದಾರೆ. ಇನ್ನು ಕೆಲ​ವರು ಬೇರೆ ಹೆಸ​ರು​ಗ​ಳನ್ನು ಪ್ರಸ್ತಾಪ ಮಾಡು​ತ್ತಿ​ದ್ದಾರೆ. ಈ ಬಗ್ಗೆ ಮುಖ್ಯ​ಮಂತ್ರಿ ಬಸ​ವ​ರಾಜ ಬೊಮ್ಮಾ​ಯಿ ಪ್ರಸ್ತಾ​ವನೆ ಸಲ್ಲಿ​ಸಿ​ದರೆ ಪ್ರಧಾನಿಗಳೊಂದಿಗೆ ಚರ್ಚಿಸಿ ಯಾವ ಹೆಸರು ಇಡ​ಬೇ​ಕೆಂಬು​ದನ್ನು ನಿರ್ಧಾರ ಮಾಡು​ತ್ತೇವೆ ಎಂದು ಹೇಳಿ​ದರು.

ಹೆದ್ದಾರಿ ​ಯೋ​ಜನೆ ಅವೈಜ್ಞಾನಿಕ ಅಲ್ಲ: ನಾನಾ​ಗಲಿ, ಸಂಸ​ದ​ರಾ​ಗಲಿ ಅಥವಾ ಶಾಸ​ಕ​ರಾ​ಗಲಿ ಡಿಪಿ​ಆರ್‌ ಸಿದ್ಧಪಡಿ​ಸು​ವು​ದಿಲ್ಲ. ತಾಂತ್ರಿ​ಕ​ವಾಗಿ ನಿಪು​ಣ​ರಾ​ಗಿ​ರುವ ಅಧಿ​ಕಾ​ರಿ​ಗಳ ತಂಡ ಯೋಜನೆ ಸಿದ್ಧಪಡಿ​ಸು​ತ್ತದೆ. 10 ವರ್ಷದ ಬಳಿಕ, ಈ ಬಾರಿ ಅಧಿಕ ಮಳೆಯಾಗಿದ್ದು, ಇದ​ರಿಂದ ಹೆದ್ದಾ​ರಿ​ಯಲ್ಲಿ ಸಮಸ್ಯೆ ಉಂಟಾಗಿತ್ತು. ಸಮಸ್ಯೆ ಪರಿ​ಹ​ರಿ​ಸ​ಲಾ​ಗಿದೆ. ಹೆದ್ದಾ​ರಿ​ಯಲ್ಲಿ ಸಾಕಷ್ಟು ಸುಧಾರಣೆಗಳನ್ನು ತರಲಾಗಿದೆ. ಬೆಂ-ಮೈ ಹೆದ್ದಾರಿ ರಸ್ತೆಯ ಡಿಸೈನ್‌ ತುಂಬ ಚೆನ್ನಾಗಿದ್ದು, ಪ್ರಕೃತಿಯ ನಡುವೆ ಈ ಹೆದ್ದಾರಿ ಹಾದು ಹೋಗಿದೆ ಎಂದು ಮೆಚ್ಚುಗೆ ವ್ಯಕ್ತಪಡಿಸಿದರು.

ಡಬಲ್‌ ಡೆಕ್ಕರ್‌ ಬಸ್‌: ಸಾರಿಗೆ ಸೇವೆಗಳನ್ನು ಮೇಲ್ದರ್ಜೆಗೇರಿಸುವ ದೃಷ್ಟಿಯಿಂದ ವಿದೇಶಗಳಲ್ಲಿರುವಂತೆ ಬ್ಯುಸಿನೆಸ್‌ ಕ್ಲಾಸ್‌ ಒಳಗೊಂಡ ಡಬಲ್‌ ಡೆಕ್ಕರ್‌ ಬಸ್‌ಗಳನ್ನು ಮೈಸೂರು-ಬೆಂಗಳೂರು ಮಾರ್ಗ​ದಲ್ಲಿ ಆರಂಭಿ​ಸುವ ಕುರಿತು ಚಿಂತನೆ ನಡೆ​ಸ​ಲಾ​ಗಿದೆ. ಈ ಸಂಬಂಧ ವೋಲ್ವೋ ಸಂಸ್ಥೆಯೊಂದಿಗೆ ಮಾತುಕತೆ ನಡೆ​ದಿದೆ. ಸ್ಕೈ ವಾಕ್‌ ನಿರ್ಮಾಣದ ಬಗ್ಗೆಯೂ ಶೀಘ್ರವೇ ತೀರ್ಮಾನಿಸಲಾ​ಗು​ವುದು ಎಂದು ತಿಳಿಸಿದರು.