ಯುಎಸ್ ಓಪನ್ ಟೆನಿಸ್ ಗ್ರ್ಯಾಂಡ್‌ಸ್ಲಾಂ ಟೂರ್ನಿಯಲ್ಲಿ ಸ್ಪೇನ್ ದಿಗ್ಗಜ ರಾಫೆಲ್ ನಡಾಲ್ ಪ್ರಶಸ್ತಿ ಕೈವಶ ಮಾಡೋ ಎಲ್ಲಾ ಸಾಧ್ಯತೆ ದಟ್ಟವಾಗಿದೆ. ಅರ್ಜೆಂಟೀನಾದ ಡೀಗೋ ವಿರುದ್ಧ ಗೆದ್ದ ರಾಫಾ ಇದೀಗ ಸೆಮೀಸ್ ಹಂತಕ್ಕೆ ಲಗ್ಗೆ ಇಟ್ಟಿದ್ದಾರೆ.
ನ್ಯೂಯಾರ್ಕ್(ಸೆ.06): ಯುಎಸ್ ಓಪನ್ ಟೆನಿಸ್ ಗ್ರ್ಯಾಂಡ್‌ಸ್ಲಾಂ ಟೂರ್ನಿಯ ಪುರುಷರ ಸಿಂಗಲ್ಸ್‌ ಸೆಮಿಫೈನಲ್‌ಗೆ ಸ್ಪೇನ್ ತಾರೆ ರಾಫೆಲ್ ನಡಾಲ್ ಪ್ರವೇಶಿಸಿದ್ದಾರೆ. ವಿಶ್ವ ನಂ.1 ಜೊಕೊವಿಚ್‌, ನಂ.3 ರೋಜರ್ ಫೆಡರರ್‌ ಈಗಾಗಲೇ ಹೊರಬಿದ್ದಿರುವ ಕಾರಣ, ನಡಾಲ್ ಪ್ರಶಸ್ತಿ ಹಾದಿ ಸುಗಮಗೊಂಡಿದೆ.
ಇದನ್ನೂ ಓದಿ: US ಓಪನ್ 2019: ಹೊರಬಿದ್ದ ರೋಜರ್ ಫೆಡರರ್‌!
ಕ್ವಾರ್ಟರ್‌ ಫೈನಲ್‌ನಲ್ಲಿ ನಡಾಲ್, 20ನೇ ಶ್ರೇಯಾಂಕಿತ ಆಟಗಾರ ಅರ್ಜೆಂಟೀನಾದ ಡೀಗೋ ಶ್ವಾಟ್ಸ್‌ಮ್ಯಾನ್‌ ವಿರುದ್ಧ 6-4, 7-5, 6-2ರಲ್ಲಿ ಜಯಿಸಿದರು. ಸೆಮೀಸ್‌ನಲ್ಲಿ ನಡಾಲ್, ಇಟಲಿಯ ಮಾಟ್ಟೆಯೋ ಬೆರೆಟ್ಟೆನಿ ವಿರುದ್ಧ ಸೆಣಸಲಿದ್ದಾರೆ. ಮತ್ತೊಂದು ಕ್ವಾರ್ಟರ್‌ ಫೈನಲ್‌ನಲ್ಲಿ ಬೆರೆಟ್ಟೆನಿ, ಫ್ರಾನ್ಸ್‌ನ ಗೇಲ್‌ ಮೊನ್ಫಿಲ್ಸ್‌ ವಿರುದ್ಧ 3-6, 6-3, 6-2, 3-6, 7-6ರಲ್ಲಿ ಗೆದ್ದರು. ಇದೇ ವೇಳೆ ಮಹಿಳಾ ಸಿಂಗಲ್ಸ್‌ ಸೆಮೀಸ್‌ಗೆ ಕೆನಡಾದ 19 ವರ್ಷದ ಬಿಯಾಂಕಾ ಆಂಡ್ರೀಸ್ಕು ಪ್ರವೇಶಿಸಿದ್ದಾರೆ. ಬೆಲ್ಜಿಯಂನ ಎಲೈಸಿ ಮೆರ್ಟೆನ್ಸ್‌ ವಿರುದ್ಧ 3-6, 6-2, 6-3 ಸೆಟ್‌ಗಳಲ್ಲಿ ಬಿಯಾಂಕ ಜಯಗಳಿಸಿದರು.
ಮೊದಲ ಬಾರಿ ಸೆಮೀಸ್ ಪ್ರವೇಶಿಸಿದ 6 ಮಂದಿ!
ಪುರುಷರ ಸಿಂಗಲ್ಸ್‌ನಲ್ಲಿ ಇಟಲಿಯ ಮಾಟೆಯೋ ಬೆರೆಟ್ಟಿನಿ (ಇಟಲಿ), ರಷ್ಯಾದ ಡಾನಿಲ್‌ ಮೆಡ್ವೆಡೆವ್‌, ಬಲ್ಗೇರಿಯಾದ ಗ್ರಿಗರ್‌ ಡಿಮಿಟ್ರೊವ್‌ ಇದೇ ಮೊದಲ ಬಾರಿಗೆ ಯುಎಸ್ ಓಪನ್ ಸೆಮಿಫೈನಲ್‌ ಪ್ರವೇಶಿಸಿದ್ದಾರೆ. ಇನ್ನು ಮಹಿಳಾ ಸಿಂಗಲ್ಸ್‌ನಲ್ಲಿ ಉಕ್ರೇನ್‌ನ ಎಲಿನಾ ಸ್ವಿಟೊಲಿನಾ, ಸ್ವಿಜರ್‌ಲೆಂಡ್‌ನ ಬೆಲಿಂಡಾ ಬೆನ್ಚಿಚ್‌ ಹಾಗೂ ಕೆನಡಾದ ಬಿಯಾಂಕಾ ಆಂಡ್ರೀಸ್ಕು ಸಹ ಮೊದಲ ಬಾರಿಗೆ ಸೆಮಿಫೈನಲ್‌ನಲ್ಲಿ ಆಡಲಿದ್ದಾರೆ. ನಡಾಲ್, ಸೆರೆನಾ ಹೊರತುಪಡಿಸಿದರೆ 6 ಮಂದಿ ಮೊದಲ ಗ್ರ್ಯಾಂಡ್‌ಸ್ಲಾಂ ಪ್ರಶಸ್ತಿ ಗೆಲ್ಲುವ ಕನಸು ಕಾಣುತ್ತಿದ್ದಾರೆ.