ಥಾಯ್ಲೆಂಡ್ ಓಪನ್: ಫೈನಲ್ ಪ್ರವೇಶಿಸಿದ ಪಿವಿ ಸಿಂಧು

2018ರ ಸಾಲಿನಲ್ಲಿ ಫೈನಲ್ ಪ್ರವೇಶಲು ವಿಫಲವಾಗಿದ್ದ ಭಾರತದ ಬ್ಯಾಡ್ಮಿಂಟನ್ ತಾರೆ ಪಿವಿ ಸಿಂಧೂ ಥಾಯ್ಲೆಂಡ್ ಓಪನ್ ಟೂರ್ನಿಯಲ್ಲಿ ಕೊರಗು ನೀಗಿಸಿದ್ದಾರೆ. ಸೆಮಿಫೈನಲ್ ಪಂದ್ಯದಲ್ಲಿ ಸಿಂಧು ಹೋರಾಟ ಹೇಗಿತ್ತು? ಇಲ್ಲಿದೆ ವಿವರ.

ಬ್ಯಾಂಕಾಕ್(ಜು.15): ರಿಯೋ ಒಲಿಂಪಿಕ್ಸ್ ಬೆಳ್ಳಿ  ಪದಕ ವಿಜೇತೆ ಸಿಂಧು, ಇಲ್ಲಿ ನಡೆಯುತ್ತಿರುವ ಥಾಯ್ಲೆಂಡ್ ಓಪನ್ ಬ್ಯಾಡ್ಮಿಂಟನ್ ಟೂರ್ನಿಯಲ್ಲಿ ಫೈನಲ್ ಪ್ರವೇಶಿಸಿದ್ದಾರೆ. ಶನಿವಾರ ನಡೆದ ಮಹಿಳಾ ಸಿಂಗಲ್ಸ್‌ನ ಸೆಮಿಫೈನಲ್‌ನಲ್ಲಿ ಸಿಂಧು, ಇಂಡೋನೇಷ್ಯಾದ ಗ್ರೆಗೋರಿಯಾ ತುಂಜುಂಗ್‌ರನ್ನು 23-21,16-21,21-9 ಗೇಮ್‌ಗಳಿಂದ ಸೋಲಿಸಿದರು.

ಪ್ರಸಕ್ತ ಋತುವಿನಲ್ಲಿ ಸಿಂಧು, ಇದೇ  ಮೊದಲ ಬಾರಿಗೆ ಟೂರ್ನಿಯೊಂದರಲ್ಲಿ ಫೈನಲ್ ಪ್ರವೇಶಿಸಿದ್ದಾರೆ. ಫೈನಲ್‌ನಲ್ಲಿ ಸಿಂಧುಗೆ ಜಪಾನ್‌ನ ನೋಜೋಮಿ ಓಕುಹಾರಾ ಎದುರಾಗಲಿದ್ದಾರೆ. ವಿಶ್ವ ಚಾಂಪಿಯನ್‌ಶಿಪ್ ಫೈನಲ್‌ನಲ್ಲಿ ಓಕುಹಾರಾ ವಿರುದ್ಧ ಅನುಭವಿಸಿದ್ದ ಸೋಲಿಗೆ ಸೇಡು ತೀರಿಸಿಕೊಳ್ಳಲು ಸಿಂಧು ಕಾತರಿಸುತ್ತಿದ್ದಾರೆ. 

ಭಾರೀ ಪೈಪೋಟಿ: ಸುಮಾರು ಒಂದು ತಾಸು ನಡೆದ ಹೋರಾಟದಲ್ಲಿ ಸಿಂಧುಗೆ ಪ್ರಬಲ ಪೈಪೋಟಿ ಎದುರಾಯಿತು. ಮೊದಲ ಗೇಮ್‌ನ ಆರಂಭದಲ್ಲಿ ಹಿನ್ನಡೆಯಲ್ಲಿದ್ದ ಸಿಂಧು, ಪುಟಿದೆದ್ದು 16-16 ರಲ್ಲಿ ಸಮಬಲ ಸಾಧಿಸಿದರು. ನಂತರ ಅದೇ ವೇಗ ಕಾಯ್ದುಕೊಂಡು ಗೇಮ್ ತಮ್ಮದಾಗಿಸಿಕೊಂಡರು. 2ನೇ ಗೇಮ್‌ಗನಲ್ಲಿ ಎಚ್ಚೆತ್ತುಕೊಂಡ ತುಂಜುನ್, 21-16  ಅಂಕಗಳಿಂದ ತಿರಗೇಟು ನೀಡಿ ಅಂತಕ ಸೃಷ್ಟಿಸಿದರು. ಆದರೆ ಅಂತಿಮ ಗೇಮ್‌ನಲ್ಲಿ ಸಿಂಧು ವೇಗಕ್ಕೆ ಸರಿಸಾಟಿಯಾಗದ ತುಂಜುಂಗ್ ವಿರುದ್ಧ ಸುಲಭವಾಗಿ ಗೇಮ್ ಗೆದ್ದು, ಪಂದ್ಯ ತಮ್ಮದಾಗಿಸಿಕೊಂಡರು.