ಕೊಹ್ಲಿ, ಪೂಜಾರ, ಅಶ್ವಿನ್ ಉತ್ತಮ ಆಟ; ಇನ್ನಿಂಗ್ಸ್ ಮುನ್ನಡೆಯತ್ತ ಭಾರತ

ಐದು ಪಂದ್ಯಗಳ ಈ ಟೆಸ್ಟ್ ಸರಣಿಯಲ್ಲಿ ಭಾರತ ಈಗಾಗಲೇ 1-0 ಮುನ್ನಡೆ ಹೊಂದಿದೆ. ವಿಶಾಖಪಟ್ಟಣಂನಲ್ಲಿ ನಡೆದ 2ನೇ ಪಂದ್ಯದಲ್ಲಿ ಭಾರತ 246 ರನ್'ಗಳಿಂದ ಜಯಭೇರಿ ಭಾರಿಸಿತ್ತು. ಕೊನೆಯ ಎರಡು ಪಂದ್ಯಗಳು ಮುಂಬೈ ಮತ್ತು ಚೆನ್ನೈನಲ್ಲಿ ನಡೆಯಲಿವೆ.

ಮೊಹಾಲಿ(ನ. 27): ವಿರಾಟ್ ಕೊಹ್ಲಿ, ಚೇತೇಶ್ವರ್ ಪೂಜಾರ ಮತ್ತು ಆರ್.ಅಶ್ವಿನ್ ಅವರ ಉತ್ತಮ ಆಟದ ನೆರವಿನಿಂದ ಭಾರತ ತಂಡ ಇಂಗ್ಲೆಂಡ್ ವಿರುದ್ಧದ ಮೂರನೇ ಕ್ರಿಕೆಟ್ ಟೆಸ್ಟ್ ಪಂದ್ಯದಲ್ಲಿ ಇನ್ನಿಂಗ್ಸ್ ಮುನ್ನಡೆಯತ್ತ ಸಾಗುತ್ತಿದೆ. ಇಂಗ್ಲೆಂಡ್'ನ 283 ರನ್'ಗಳ ಮೊದಲ ಇನ್ನಿಂಗ್ಸ್'ಗೆ ಪ್ರತಿಯಾಗಿ ಇಂದು ಎರಡನೇ ದಿನಾಂತ್ಯಕ್ಕೆ ಭಾರತ ತನ್ನ ಮೊದಲ ಇನ್ನಿಂಗ್ಸಲ್ಲಿ 6 ವಿಕೆಟ್ ನಷ್ಟಕ್ಕೆ 271 ರನ್ ಗಳಿಸಿದೆ. ರನ್ ದಾಹ ಮುಂದುವರಿಸಿದ ವಿರಾಟ್ ಕೊಹ್ಲಿ 62 ರನ್'ಗೆ ಔಟಾದರು. ಪೂಜಾರ ಕೂಡ ಆಕರ್ಷಕ ಶತಕ ದಾಖಲಿಸಿದರು. ಪೂಜಾರ ಮತ್ತು ಕೊಹ್ಲಿ 3ನೇ ವಿಕೆಟ್'ಗೆ 75 ರನ್ ಜೊತೆಯಾಟ ಆಡಿದರು. ಪಾರ್ಥಿವ್ ಪಟೇಲ್ ಕೂಡ 42 ರನ್ ಗಳಿಸಿ ತಂಡದ ಸ್ಕೋರಿಗೆ ಕೊಡುಗೆ ನೀಡಿದರು. ಆದರೆ, ಅಜಿಂಕ್ಯ ರಹಾನೆ ಮತ್ತು ಕರುಣ್ ನಾಯರ್ ನಿರಾಶೆ ಅನುಭವಿಸಿದರು. ಟೆಸ್ಟ್ ಕ್ರಿಕೆಟ್'ಗೆ ಪದಾರ್ಪಣೆ ಮಾಡಿದ ಕರ್ನಾಟಕದ ಕರುಣ್ ನಾಯರ್ ಕೇವಲ 4 ರನ್ ಗಳಿಸಿ ರನ್ನೌಟ್ ಆದರು. ಒಂದು ಹಂತದಲ್ಲಿ 204 ರನ್'ಗೆ 6 ವಿಕೆಟ್ ಗಳಿಸಿ ಅಪಾಯದಲ್ಲಿದ್ದ ಭಾರತಕ್ಕೆ ಆರ್.ಅಶ್ವಿನ್ ಮತ್ತು ರವೀಂದ್ರ ಜಡೇಜಾ ಆಸರೆಯಾದರು. ಇವರಿಬ್ಬರು ಜವಾಬ್ದಾರಿಯುತವಾಗಿ ಬ್ಯಾಟ್ ಮಾಡಿ 7 ವಿಕೆಟ್'ಗೆ 67 ರನ್'ಗಳ ಮುರಿಯದ ಜೊತೆಯಾಟವಾಡಿ ತಂಡವನ್ನು ಅಪಾಯದಿಂದ ಪಾರು ಮಾಡಿ ಉತ್ತಮ ಮೊತ್ತದತ್ತ ಕೊಂಡೊಯ್ಯುತ್ತಿದ್ದಾರೆ.

ಇದಕ್ಕೆ ಮುನ್ನ, ನಿನ್ನೆ ಮೊದಲ ದಿನಾಂತ್ಯಕ್ಕೆ 8 ವಿಕೆಟ್ ನಷ್ಟಕ್ಕೆ 268 ರನ್ ಗಳಿಸಿದ್ದ ಇಂಗ್ಲೆಂಡ್ ಇಂದು 283 ರನ್ನಿಗೆ ಆಲೌಟ್ ಆಯಿತು. ಜೇಮ್ಸ್ ಆಂಡರ್ಸನ್ ಮಿಂಚಿನ ಆಟವಾಡಿ ಒಂದಷ್ಟು ರನ್ ಗಳಿಸಿದ್ದಷ್ಟೇ ಇಂಗ್ಲೆಂಡ್'ಗೆ ಆದ ಲಾಭ. ಇಂದು ಬಿದ್ದ ಎರಡೂ ಇಂಗ್ಲೆಂಡ್ ವಿಕೆಟ್'ಗಳು ಮೊಹಮ್ಮದ್ ಶಮಿ ಪಾಲಾದವು.

ಐದು ಪಂದ್ಯಗಳ ಈ ಟೆಸ್ಟ್ ಸರಣಿಯಲ್ಲಿ ಭಾರತ ಈಗಾಗಲೇ 1-0 ಮುನ್ನಡೆ ಹೊಂದಿದೆ. ವಿಶಾಖಪಟ್ಟಣಂನಲ್ಲಿ ನಡೆದ 2ನೇ ಪಂದ್ಯದಲ್ಲಿ ಭಾರತ 246 ರನ್'ಗಳಿಂದ ಜಯಭೇರಿ ಭಾರಿಸಿತ್ತು. ಕೊನೆಯ ಎರಡು ಪಂದ್ಯಗಳು ಮುಂಬೈ ಮತ್ತು ಚೆನ್ನೈನಲ್ಲಿ ನಡೆಯಲಿವೆ.

ಇಂಗ್ಲೆಂಡ್ ಮೊದಲ ಇನ್ನಿಂಗ್ಸ್ 93.5 ಓವರ್ 283 ರನ್ ಆಲೌಟ್
(ಜಾನಿ ಬೇರ್'ಸ್ಟೋ 89, ಜೋಸ್ ಬಟ್ಲರ್ 43, ಬೆನ್ ಸ್ಟೋಕ್ಸ್ 29, ಅಲಸ್ಟೇರ್ ಕುಕ್ 27, ಕ್ರಿಸ್ ವೋಕ್ಸ್ 25 ರನ್ - ಮೊಹಮ್ಮದ್ ಶಮಿ 63/3, ಜಯಂತ್ ಯಾದವ್ 49/2, ಉಮೇಶ್ ಯಾದವ್ 58/2)

ಭಾರತ ಮೊದಲ ಇನ್ನಿಂಗ್ಸ್ 83 ಓವರ್ 230/6
(ವಿರಾಟ್ ಕೊಹ್ಲಿ 62, ಚೇತೇಶ್ವರ್ ಪೂಜಾರ 51, ಆರ್.ಅಶ್ವಿನ್ ಅಜೇಯ 57, ಪಾರ್ಥಿವ್ ಪಟೇಲ್ 42, ರವೀಂದ್ರ ಜಡೇಜಾ ಅಜೇಯ 31 ರನ್ - ಅದಿಲ್ ರಷೀದ್ 68/3, ಬೆನ್ ಸ್ಟೋಕ್ಸ್ 48/2)