ಏಷ್ಯನ್ ಗೇಮ್ಸ್ ಮೆಲುಕು: ಚೊಚ್ಚಲ ಕ್ರೀಡಾಕೂಟಕ್ಕೆ ದೆಹಲಿ ಆತಿಥ್ಯ

ಏಷ್ಯನ್ ಗೇಮ್ಸ್ ಕ್ರೀಡಾಕೂಟಕ್ಕೆ ಕೌಂಟ್ ಡೌನ್ ಆರಂಭವಾಗಿದೆ. ಆಗಸ್ಟ್ 18 ರಿಂದ ಆರಂಭಗೊಳ್ಳಲಿರುವ ಅತೀ ದೊಡ್ಡ ಕ್ರೀಡಾಹಬ್ಬಕ್ಕೆ ಭಾರತ ಈಗಾಗಲೇ ಇಂಡೋನೇಷ್ಯಾದ ಜಕರ್ತಾದಲ್ಲಿ ಬೀಡುಬಿಟ್ಟಿದೆ. ಈ ವರೆಗೆ 17 ಏಷ್ಯನ್ ಗೇಮ್ಸ್ ಆಯೋಜಿಸಲಾಗಿದೆ. ಆರಂಭಿಕ 4 ಕ್ರೀಡಾಕೂಟದ ಸಂಕ್ಷಿಪ್ತ ವಿವರ ಇಲ್ಲಿದೆ. 

ಬೆಂಗಳೂರು(ಆ.14):  ಮೊದಲ ಏಷ್ಯನ್ ಗೇಮ್ಸ್ ನಡೆದಿದ್ದು 1951ರಲ್ಲಿ. ನವದೆಹಲಿ ಕ್ರೀಡಾಕೂಟಕ್ಕೆ ಆತಿಥ್ಯ ವಹಿಸಿತ್ತು. 11 ರಾಷ್ಟ್ರಗಳು ಪಾಲ್ಗೊಂಡಿದ್ದವು. ಜಪಾನ್ 60 ಪದಕಗಳೊಂದಿಗೆ ಮೊದಲ ಸ್ಥಾನ ಪಡೆಯಿತು. 15 ಚಿನ್ನ ಸೇರಿ 51 ಪದಕ ಪಡೆದ ಭಾರತ 2ನೇ ಸ್ಥಾನ ಪಡೆದುಕೊಂಡಿತು.

1954: 2ನೇ ಏಷ್ಯನ್ ಗೇಮ್ಸ್1954ರಲ್ಲಿ ಫಿಲಿಪೈನ್ಸ್‌ನ ಮನಿಲಾದಲ್ಲಿ ನಡೆಯಿತು. 19 ರಾಷ್ಟ್ರಗಳು ಕ್ರೀಡಾ ಕೂಟದಲ್ಲಿ ಪಾಲ್ಗೊಂಡಿದ್ದವು. 98 ಪದಕಗಳೊಂದಿಗೆ ಸತತ 2ನೇ ಬಾರಿಗೆ ಜಪಾನ್ ಮೊದಲ ಸ್ಥಾನ ಪಡೆಯಿತು. 5 ಚಿನ್ನ, 4 ಬೆಳ್ಳಿ, 8 ಕಂಚಿನೊಂದಿಗೆ 17 ಗೆದ್ದ ಭಾರತ 5ನೇ ಸ್ಥಾನ ಪಡೆದುಕೊಂಡಿತು.

1958 : 3ನೇ ಆವೃತ್ತಿಯ ಏಷ್ಯನ್ ಗೇಮ್ಸ್ 1958 ರಲ್ಲಿ ಜಪಾನ್‌ನ ಟೋಕಿಯೋದಲ್ಲಿ ನಡೆಯಿತು. 20 ರಾಷ್ಟ್ರಗಳು ಪಾಲ್ಗೊಂಡಿದ್ದವು. 67 ಚಿನ್ನ ಸೇರಿ 138 ಪದಕ ಗೆದ್ದ ಜಪಾನ್ ಮೊದಲ ಸ್ಥಾನ ಪಡೆದು ಹ್ಯಾಟ್ರಿಕ್ ಬಾರಿಸಿತು. 5ಚಿನ್ನ, ತಲಾ 4 ಬೆಳ್ಳಿ ಹಾಗೂ ಕಂಚಿನೊಂದಿಗೆ ಒಟ್ಟು 13 ಪದಕ ಗೆದ್ದ ಭಾರತ 7ನೇ ಸ್ಥಾನ ಪಡೆಯಿತು.

1962 : ಇಂಡೋನೇಷ್ಯಾದ ಜಕಾರ್ತ 1962ರಲ್ಲಿ 4ನೇ ಆವೃತ್ತಿಯ ಗೇಮ್ಸ್‌ಗೆ ಆತಿಥ್ಯ ವಹಿಸಿತು. 17 ರಾಷ್ಟ್ರಗಳು ಕಣಕ್ಕಿಳಿದಿದ್ದವು. ಜಪಾನ್ 152 ಪದಕಗಳೊಂದಿಗೆ ಅಗ್ರಸ್ಥಾನ ಕಾಯ್ದುಕೊಂಡರೆ, 33 ಪದಕ ಗೆದ್ದ ಭಾರತ 3ನೇ ಶ್ರೇಷ್ಠ ರಾಷ್ಟ್ರವಾಗಿ ಹೊರಹೊಮ್ಮಿತು.