ವಿಕ್ರಮ್‌ ಲ್ಯಾಂಡರ್‌ ಚಂದ್ರನ ಮೇಲೆ ಯಶಸ್ವಿಯಾಗಿ ಇಳಿಯುವುದರೊಂದಿಗೆ ಚಂದ್ರಯಾನ-3 ದೊಡ್ಡ ಮಟ್ಟದ ಯಶಸ್ಸು ಸಂಪಾದಿಸಿದೆ. ಹಾಗಂತ ಚಂದ್ರನ ಮೇಲೆ ಇಸ್ರೋದ ಕೊನೆಯ ಯೋಜನೆ ಇದಲ್ಲ. ಚಂದ್ರಯಾನ-4 ಬಗ್ಗೆ ಇಸ್ರೋ ವಿಜ್ಞಾನಿಯೇ ಮಾಹಿತಿ ನೀಡಿದ್ದಾರೆ.
ಬೆಂಗಳೂರು (ಆ.23): ಇಡೀ ಭಾರತದ ಕನಸು ವಿಕ್ರಮ್‌ ಲ್ಯಾಂಡರ್‌ ಚಂದ್ರನ ದಕ್ಷಿಣ ಧ್ರುವದಲ್ಲಿ ಲ್ಯಾಂಡ್‌ ಆಗುವ ಮೂಲಕ ಈಡೇರಿದೆ. ಹಾಗಂತ ಭಾರತದ ಚಂದ್ರ ಯೋಜನೆ ಇಲ್ಲಿಗೆ ಮುಗಿಯಿತಾ ಅಂದುಕೊಳ್ಳಬೇಡಿ. ಇದು ಆರಂಭ ಮಾತ್ರ. ಚಂದ್ರಯಾನ-3 ಯೋಜನೆಯ ದೊಡ್ಡ ಮಟ್ಟದ ಯಶಸ್ಸಿನ ಬೆನ್ನಲ್ಲಿಯೇ ಚಂದ್ರಯಾನ-4 ರ ಕನಸುಗಳನ್ನು ರೆಕ್ಕೆ ಬಿಡಲು ಆರಂಭಿಸಿದೆ. ಚಂದ್ರಯಾನ-3 ವಿಕ್ರಮ್‌ ಲ್ಯಾಂಡರ್‌ ಯಶಸ್ವಿಯಾಗಿ ಚಂದ್ರನ ಮೇಲೆ ಇಳಿದ ಖುಷಿಯಲ್ಲಿದ್ದ ಈ ಯೋಜನೆಯ ಭಾಗವಾಗಿದ್ದ ಡೆಪ್ಯುಟಿ ಮಿಷನ್ ಡೈರೆಕ್ಟರ್‌ ಶ್ರೀಕಾಂತ್‌ ಅವರಿಗೆ ಏಷ್ಯಾನೆಟ್‌ ಸುವರ್ಣ ನ್ಯೂಸ್‌ ಇದೇ ಪ್ರಶ್ನೆಯನ್ನು ಮುಂದಿಟ್ಟಿತು. ಚಂದ್ರಯಾನ-3 ಯಶಸ್ವಿಯಾಗಿದೆ. ಮುಂದಿನ ಮೂನ್‌ ಪ್ರಾಜೆಕ್ಟ್‌ ಆಗಿ ಚಂದ್ರಯಾನ-4 ನಿರೀಕ್ಷೆ ಮಾಡಬಹುದೇ ಎನ್ನುವುದಕ್ಕೆ ಅವೆಲ್ಲವೂ ಇನ್ನೂ ಚರ್ಚಾ ಹಂತದಲ್ಲಿದೆ ಎಂದರು. ಅದರೊಂದಿಗೆ ಭಾರತದ ಚಂದ್ರಬೇಟೆ ಚಂದ್ರಯಾನ-3ರೊಂದಿಗೆ ಕೊನೆಯಾಗೋದಿಲ್ಲ. 'ಚಂದ್ರಯಾನ-4ರ ಬಗ್ಗೆ ಈಗಲೇ ಏನನ್ನೂ ಹೇಳಲು ಸಾಧ್ಯವಿಲ್ಲ. ಅದಿನ್ನೂ ಚರ್ಚಾ ಹಂತದಲ್ಲಿದೆ. ಮುಂದಿನ ಕೆಲ ವರ್ಷಗಳು ಅದಕ್ಕೆ ಬೇಕಾಗಬಹುದು' ಎಂದು ಶ್ರೀಕಾಂತ್‌ ತಿಳಿಸಿದ್ದಾರೆ. ಚಂದ್ರಯಾನ--2 ಹಾಗೂ ಮಾರ್ಸ್‌ ಆರ್ಬಿಟರ್‌ ಮಿಷನ್ ಯೋಜನೆಯಲ್ಲೂ ಶ್ರೀಕಾಂತ್‌ ಭಾಗವಾಗಿದ್ದರು.
ಆಂಧ್ರದ ವಿಶಾಖಪಟ್ಟಣ ಮೂಲದ ಶ್ರೀಕಾಂತ್‌ ಕಳೆದ 16 ವರ್ಷಗಳಿಂದ ಇಸ್ರೋದಲ್ಲಿ ಕೆಲಸ ಮಾಡುತ್ತದ್ದಾರೆ. ಚಂದ್ರಯಾನ-4 ಯೋಜನೆ 2026ರ ವೇಳೆಗೆ ಆರಂಭವಾಗಬಹುದು. ಇದಕ್ಕೆ ಭಾರತದ ಇಸ್ರೋ ಸಂಸ್ಥೆಯೊಂದಿಗೆ ಜಪಾನ್‌ನ ಜಾಕ್ಸಾ ಕೂಡ ಕೈಜೋಡಿಸಲಿದೆ. ಈ ಯೋಜನೆಗೆ ಭಾರತ ತನ್ನ ಲ್ಯಾಂಡರ್‌ ಅನ್ನು ನೀಡಲಿದ್ದರೆ, ಜಪಾನ್ ತನ್ನ ಶಕ್ತಿಶಾಲಿ ರಾಕೆಟ್‌ ಹಾಗೂ ರೋವರ್‌ಅನ್ನು ನೀಡಲಿದೆ ಎಂದು ವರದಿಯಾಗಿದೆ.
ಏನಿದು ಚಂದ್ರಯಾನ-4,ಅದರ ಮಾಹಿತಿ ಇಲ್ಲಿದೆ: ಚಂದ್ರಯಾನ-4ನ ಕೆಲಸಗಳು ಈಗಾಗಲೇ ಆರಂಭವಾಗಿದೆ. ಇದನ್ನು ಲುಪೆಕ್ಸ್‌ ಎಂದು ಕರೆಯಲಾಗಿದೆ. ಅದರರ್ಥ ಲೂನಾರ್‌ ಪೋಲಾರ್‌ ಎಕ್ಸ್‌ಪ್ಲೋರೇಷನ್‌ ಮಿಷನ್ (ಚಂದ್ರನ ಧ್ರುವ ಪರಿಶೋಧನೆ ಮಿಷನ್).ಇದು ರೋಬೋಟಿಕ್‌ ಯೋಜನೆಯಾಗಿದ್ದು ಭಾರತದೊಂದಿಗೆ ಜಪಾನ್ ಕೂಡ ಈ ಯೋಜನೆಗೆ ಹೆಗಲು ಕೊಡಲಿದೆ. ಜಪಾನ್‌ನ ಜಪಾನ್ ಏರೋಸ್ಪೇಸ್ ಎಕ್ಸ್‌ಪ್ಲೋರೇಶನ್ ಏಜೆನ್ಸಿ ಅಥವಾ ಜಾಕ್ಸಾ ಜೊತೆ ಈಗಾಗಲೇ ಒಪ್ಪಂದವಾಗಿದ್ದು, ಚಂದ್ರಯಾನ-4ಗೆ ಬೇಕಾಗುವ ರೋವರ್‌ಗಳನ್ನು ನೀಡಲಿದೆ. ಚಂದ್ರನ ದಕ್ಷಿಣ ಧ್ರುವದ ಪರಿಶೋಧನೆಯೇ ಇದರ ಮುಖ್ಯ ಉದ್ದೇಶ. 2026ರ ವೇಳೆಗೆ ಈ ನೌಕೆ ಉಡಾವಣೆ ಮಾಡುವ ಯೋಜನೆ ರೂಪಿಸಲಾಗಿದೆ. ಇಷ್ಟು ಮಾತ್ರವಲ್ಲದೆ ತನ್ನ ಅಭಿವೃದ್ಧಿ ಹಂತದಲ್ಲಿರುವ ಎಚ್‌3 ಲಾಂಚ್‌ ವೆಹಿಕಲ್‌ ಅನ್ನು ಜಾಕ್ಸಾ ನೀಡಲಿದೆ. ಭಾರತ ತನ್ನ ಲ್ಯಾಂಡರ್‌ಅನ್ನು ಈ ಯೋಜನೆಗೆ ನೀಡಲಿದೆ. ಇಸ್ರೋ ನೀಡಿರುವ ಮಾಹಿತಿಯ ಪ್ರಕಾರ ಈ ಯೋಜನೆಯು ಇನ್ನೂ ಪರಿಕಲ್ಪನೆಯ ಹಂತದಲ್ಲಿದೆ.
ಚಂದ್ರಯಾನ-3 ಆಯ್ತು.. ಚಂದ್ರಯಾನ-4ಗೆ ರೆಡಿಯಾದ ಇಸ್ರೋ!
2019ರ ಲ್ಯಾಡಿಂಗ್‌ ಪ್ರಯತ್ನದಲ್ಲಿ ಭಾರತದ ಲ್ಯಾಂಡರ್‌ ಚಂದ್ರನ ನೆಲದ ಮೇಲೆ ಕ್ರ್ಯಾಶ್‌ ಆಗಿತ್ತು. ಈ ಬಾರಿ ಭಾರತ ಚಂದ್ರಯಾನ-3 ಜೊತೆ ಮತ್ತೊಮ್ಮೆ ಪ್ರಯತ್ನ ಮಾಡಿ ಯಶಸ್ವಿಯಾಗಿದೆ. ಲ್ಯಾಂಡರ್‌ನ ಯಶಸ್ಸು ಮುಂದಿನ ಲುಪೆಕ್ಸ್‌ ಅಥವಾ ಚಂದ್ರಯಾನ-4ಗೆ ಬಹುದೊಡ್ಡ ಲಾಭವಾಗಲಿದೆ. ಈ ನಡುವೆ 2019ರ ಸೆಪ್ಟೆಂಬರ್‌ 24 ರಂದು ಜಾಕ್ಸಾ ಹಾಗೂ ನಾಸಾ ಜಂಟಿ ಹೇಳಿಕೆ ನೀಡಿದ್ದವು. ಈ ವೇಳೆ ಚಂದ್ರಯಾನ-4 ಯೋಜನೆಗೆ ನಾಸಾ ಭಾಗಿಯಾಗುವ ಬಗ್ಗೆ ಮಾತುಕತೆ ನಡೆಸಲಾಗಿತ್ತು.
ನಾಲ್ಕೇ ದಿನದಲ್ಲಿ ಚಂದ್ರನತ್ತ ಹೋಗುತ್ತೆ ಅಮೆರಿಕಾ, ಭಾರತಕ್ಕೆ ಏಕೆ 42 ದಿನ?