ಅಣ್ಣಾವ್ರು ಪೂಜಿಸಿದ್ದ 'ಶ್ರೀನಿವಾಸ ಮೂರ್ತಿ'ಗೆ ಹುಬ್ಬಳ್ಳಿಯಲ್ಲಿ ಈಗಲೂ ಪೂಜೆ, ಅದು ಹೇಗೆ?!

ಶ್ರೀನಿವಾಸ ಕಲ್ಯಾಣ ಚಿತ್ರದಲ್ಲಿ ಡಾ.ರಾಜ್‍ಕುಮಾರ್ ಅವರ ಶ್ರೀನಿವಾಸನ ಪಾತ್ರ ಭಕ್ತರ ಮನಸಲ್ಲಿ ಅಚ್ಚಳಿಯದೆ ಉಳಿದಿದೆ. ೧೯೭೪ ರಲ್ಲಿ ಬಿಡುಗಡೆಯಾದ ಈ ಚಿತ್ರದಲ್ಲಿ ನಿಜವಾದ ತಿರುಪತಿ ದೇಗುಲದಂತೆ ಸೆಟ್ ನಿರ್ಮಿಸಲಾಗಿತ್ತು. ಚಿತ್ರಮಂದಿರದ ಮುಂದೆ ಪ್ರತಿಷ್ಠಾಪಿಸಿದ್ದ ವೆಂಕಟೇಶ್ವರನ ಮೂರ್ತಿಗೆ ಜನ ಪೂಜೆ ಸಲ್ಲಿಸುತ್ತಿದ್ದರು. ಈ ಮೂರ್ತಿ ಈಗಲೂ ಹುಬ್ಬಳ್ಳಿಯಲ್ಲಿದೆ. ವೈಕುಂಠ ಏಕಾದಶಿ ಹಬ್ಬದಂದು ಈ ಚಿತ್ರವನ್ನು ಸ್ಮರಿಸಲಾಗುತ್ತದೆ.

ವೈಕುಂಠ ಏಕಾದಶಿ ದಿವಸ ಶ್ರೀನಿವಾಸ ಸ್ವಾಮಿಯ ದರ್ಶನ ಮಾಡಿದ್ರೆ ಮುಕ್ತಿ ಸಿಗುತ್ತೆ ಅನ್ನೋದು ಭಕ್ತರ ನಂಬಿಕೆ. ನಮ್ಮ ಕನ್ನಡಿಗರ ಪಾಲಿಗೆ ಶ್ರೀನಿವಾಸ ಅಂದ್ರೆ ಕಣ್ಮುಂದೆ ಬರೋದು ಬಾಲಾಜಿಯ ಪಾತ್ರ ಮಾಡಿದ್ದ ಡಾ.ರಾಜ್​ಕುಮಾರ್. ಅಣ್ಣಾವ್ರ ನಟನೆಯ ಶ್ರೀನಿವಾಸ ಕಲ್ಯಾಣ ಸಿನಿಮಾ ತಿಮ್ಮಪ್ಪನ ಭಕ್ತರ ಪಾಲಿಗೆ ನೆಚ್ಚಿನ ಸಿನಿಮಾ. ಈ ಸಿನಿಮಾ ಕುರಿತ ಒಂದಿಷ್ಟು ಇನ್​ಟ್ರೆಸ್ಟಿಂಗ್ ಸಂಗತಿಗಳು ಇಲ್ಲಿವೆ ನೋಡಿ.

'ಪವಡಿಸು ಪರಮಾತ್ಮ ಶ್ರೀ ವೆಂಕಟೇಶ..' ಎಲ್ಲಾ ಬಾಲಾಜಿ ಭಕ್ತರು ಅನುದಿನವೂ ಸ್ಮರಿಸುವ ಹಾಡಿದು. ಇದರಲ್ಲಿ ಪರಮಾತ್ಮನಾಗಿ ನಟಿಸಿರೋ ಅಣ್ಣಾವ್ರನ್ನ ನೋಡ್ತಾ ಇದ್ರೆ, ಆ ಶ್ರೀನಿವಾಸ ಹೀಗೆ ಇದ್ದನ್ನೇನೋ ಅನ್ನಿಸುತ್ತೆ. ಭಕ್ತಿಭಾವ ತಾನಾಗೇ ಉಕ್ಕಿ ಬರುತ್ತೆ.

1974ರಲ್ಲಿ ಶ್ರೀನಿವಾಸನ ಲೀಲೆಗಳುಳ್ಳ ಈ 'ಶ್ರೀನಿವಾಸ ಕಲ್ಯಾಣ' ಸಿನಿಮಾ ತೆರೆಗೆ ಬಂದಿತ್ತು. ವೆಂಕಟೇಶ್ವರನಾಗಿ ರಾಜಕುಮಾರ್ ನಟಿಸಿದ್ರೆ ಲಕ್ಷ್ಮೀ ಮಾತೆಯಾಗಿ ಬಿ.ಸರೋಜಾದೇವಿ ನಟಿಸಿದ್ರು. ಈ ಸಿನಿಮಾದಲ್ಲಿ ಶ್ರೀನಿವಾಸನ ಸನ್ನಿವೇಶಗಳು ಬಂದಾಗ ಜನರು ಥಿಯೇಟರ್​ ನಲ್ಲೇ ಎದ್ದು ಕೈಮುಗೀತಾ ಇದ್ದರಂತೆ.

ಇನ್ನೂ ಈ ಸಿನಿಮಾದಲ್ಲಿ ತಿರುಪತಿ ದೇಗುಲದ ಸೆಟ್ ಹಾಕಲಾಗಿತ್ತು. ವೆಂಕಟೇಶ್ವರನ ಮೂರ್ತಿಯನ್ನ ಹೋಲುವ ಪ್ರತಿಕೃತಿ ತಯಾರಿಸಲಾಗಿತ್ತು. ಇದೆಷ್ಟು ನ್ಯಾಚುರಲ್ ಆಗಿತ್ತು ಅಂದ್ರೆ ಜನ ಇದು ನಿಜವಾದ ತಿರುಪತಿ ಅಂತ ನಂಬಿಕೊಂಡಿದ್ರು.

ಶ್ರೀನಿವಾಸ ಕಲ್ಯಾಣ ತೆರೆಗೆ ಬಂದ ವೇಳೆ ಈ ಮೂರ್ತಿಯನ್ನ ಚಿತ್ರಮಂದಿರ ಮುಂದೆ ಪ್ರತಿಷ್ಠಾಪನೆ ಮಾಡಲಾಗಿತ್ತು. ಜನರು ಮೂರ್ತಿಗೆ ಪೂಜೆ ಸಲ್ಲಿಸಿ ಒಳಗೆ ಸಿನಿಮಾ ನೋಡ್ಲಿಕ್ಕೆ ಹೋಗ್ತಾ ಇದ್ರಂತೆ.

ಈ ಮೂರ್ತಿ ಈಗಲೂ ಹುಬ್ಬಳ್ಳಿಯಲ್ಲಿದೆ. ಆಗ ಹುಬ್ಬಳ್ಳಿ ಭಾಗದಲ್ಲಿ ಈ ಚಿತ್ರವನ್ನ ವಿತರಣೆ ಮಾಡಿದ್ದ ಬಾಬ್ಜಿಯವರ ಮನೆಯಲ್ಲಿ ಈ ವಿಗ್ರಹ ಇದೆ. . 50 ವರ್ಷಗಳಿಂದಲೂ ಈ ಕುಟುಂಬದರು ಈ ಶ್ರೀನಿವಾಸನ ಮೂರ್ತಿಗೆ ಪೂಜೆ, ಪುನಸ್ಕಾರ ಸಲ್ಲಿಸ್ತಾ ಬಂದಿದ್ದಾರೆ.

ಒಟ್ಟಾರೆ ವೈಕುಂಠ ಏಕಾದಶಿ ಬಂದಾಗಲೊಮ್ಮೆ ಭಕ್ತರಿಗೆ ಅಣ್ಣಾವ್ರ ಶ್ರೀನಿವಾಸ ಕಲ್ಯಾಣ ತಪ್ಪದೇ ನೆನಪಾಗುತ್ತೆ. ಈ ಸಿನಿಮಾದ ಹಾಡುಗಳು, ಸನ್ನಿವೇಶಗಳು ಜನರಲ್ಲಿ ಭಕ್ತಿರಸವನ್ನ ಉಕ್ಕಿಸುತ್ವೆ. ಹೆಚ್ಚಿನ ಮಾಹಿತಿಗೆ ವಿಡಿಯೋ ನೋಡಿ...