ತವರಿನಲ್ಲಿ ಕೊನೆ ಟೂರ್ನಿ ಆಡುತ್ತಿರುವ ಪೇಸ್, ಕ್ವಾರ್ಟರ್‌‌ಫೈನಲ್‌ಗೆ ಲಗ್ಗೆ!

ತವರಿನಲ್ಲಿ ಕೊನೆಯ ಟೂರ್ನಿ ಆಡಲು ಭಾರತದ ಟೆನಿಸ್ ದಿಗ್ಗಜ ಲಿಯಾಂಡರ್ ಪೇಸ್ ಬೆಂಗಳೂರನ್ನು ಆಯ್ಕೆ ಮಾಡಿಕೊಂಡಾಲೇ ಕನ್ನಡಿಗರಿಗೆ ಖುಷಿ ಜೊತೆ ಬೇಸರವೂ ಆಗಿತ್ತು. ಒಂದೆಡೆ  ಪೇಸ್ ಆಟ ಕಣ್ತುಂಬಿಕೊಳ್ಳಬಹುದೆಂಬ ಖುಷಿ, ಮತ್ತೊಂದೆಡೆ ತವರಿನಲ್ಲಿ ಇನ್ನು ಪೇಸ್ ಆಟ ಸಿಗಲ್ಲ ಅನ್ನೋ ಬೇಸರ. ಇದೀಗ ತವರಿನ ಅಂತಿನ ಟೂರನಿಯಲ್ಲಿ ಪೇಸ್ ಶುಭಾರಂಭ ಮಾಡಿದ್ದಾರೆ. 

ಬೆಂಗಳೂರು(ಫೆ.13): ತವರಲ್ಲಿ ವೃತ್ತಿ ಜೀವನದ ಕೊನೆಯ ಟೂರ್ನಿಯಾಡುತ್ತಿರುವ ಭಾರತದ ದಿಗ್ಗಜ ಟೆನಿಸಿಗ ಲಿಯಾಂಡರ್‌ ಪೇಸ್‌, ಇಲ್ಲಿ ನಡೆಯುತ್ತಿರುವ ಎಟಿಪಿ ಚಾಲೆಂಜರ್‌ ಟೂರ್‌ ಬೆಂಗಳೂರು ಓಪನ್‌ ಟೆನಿಸ್‌ನಲ್ಲಿ ಶುಭಾರಂಭ ಮಾಡಿದ್ದು, ಕ್ವಾರ್ಟರ್‌ಫೈನಲ್‌ ಪ್ರವೇಶಿಸಿದ್ದಾರೆ.

ಇದನ್ನೂ ಓದಿ: ಡೇವಿಸ್ ಕಪ್: ಪಾಕ್‌ ವಿರುದ್ಧ ಭಾರತ ಕ್ಲೀನ್‌ ಸ್ವೀಪ್‌

ಡಬಲ್ಸ್‌ ವಿಭಾಗದ ಅಂತಿಮ 16ರ ಸುತ್ತಿನಲ್ಲಿ ಲಿಯಾಂಡರ್‌ ಪೇಸ್‌ ಹಾಗೂ ಆಸ್ಪ್ರೇಲಿಯಾದ ಎಬ್ಡೆನ್‌ ಮ್ಯಾಥ್ಯೂ ಜೋಡಿ, ಸ್ಲೋವೇನಿಯಾದ ಬ್ಲಾಜ್‌ ರೋಲಾ, ಚೀನಾದ ಜಾಂಗ್‌ ಜಿಜಾನ್‌ ಜೋಡಿ ವಿರುದ್ಧ 7-6(7-2), 6-4 ಸೆಟ್‌ಗಳಲ್ಲಿ ಗೆಲುವು ಸಾಧಿಸಿತು.

ಪಂದ್ಯದ ಮೊದಲ ಸೆಟ್‌ನಲ್ಲಿ ಪೇಸ್‌ ಜೋಡಿಗೆ ಎದುರಾಳಿ ಆಟಗಾರರು ಉತ್ತಮ ಪೈಪೋಟಿ ನೀಡಿದರು. ಎದುರಾಳಿ ಜೋಡಿಯ ಸವ್‌ರ್‍ ಬ್ರೇಕ್‌ ಮಾಡಲು ಪೇಸ್‌ ಸಾಕಷ್ಟುಪ್ರಯತ್ನ ಪಟ್ಟರೂ ಯಶಸ್ವಿಯಾಗಲಿಲ್ಲ. 6-6ರಲ್ಲಿ ಸಮಬಲ ಸಾಧಿಸಿದ ಪರಿಣಾಮ ಟೈ ಬ್ರೇಕರ್‌ ಮೊರೆ ಹೋಗಲಾಯಿತು. ಟೈ ಬ್ರೇಕರ್‌ನಲ್ಲಿ 7-2 ರಿಂದ ಮುನ್ನಡೆ ಸಾಧಿಸಿದ ಪೇಸ್‌ ಜೋಡಿ ಸೆಟ್‌ ವಶಪಡಿಸಿಕೊಂಡಿತು. ಇನ್ನು 2ನೇ ಸೆಟ್‌ನಲ್ಲಿ ಬ್ಲಾಜ್‌-ಜಾಂಗ್‌ ಜೋಡಿ, ಪೇಸ್‌ ಜೋಡಿ ಆಟದ ಎದುರು ಮಂಕಾಯಿತು. ಕ್ವಾರ್ಟರ್‌ ಫೈನಲ್‌ನಲ್ಲಿ ಪೇಸ್‌ ಜೋಡಿ, ಸ್ವೀಡನ್‌ನ ಆ್ಯಂಡ್ರೆ ಗೊರೆನ್ಸನ್‌, ಇಂಡೋನೇಷ್ಯಾದ ಕ್ರಿಸ್ಟೋಫರ್‌ ರಂಕಟ್‌ ಜೋಡಿಯನ್ನು ಎದುರಿಸಲಿದೆ.

ಇದನ್ನೂ ಓದಿ: ಪೇಸ್ 42ರಲ್ಲಿ ಗ್ರ್ಯಾಂಡ್ ಸ್ಲಾಂ ಗೆಲ್ಲೋದಾದ್ರೆ ನಾನ್ಯಾಕೆ ಕ್ರಿಕೆಟ್ ಆಡಬಾರದು: ಶ್ರೀಶಾಂತ್!..

ಕ್ವಾರ್ಟರ್‌ಗೆ ಸಾಕೇತ್‌ ಜೋಡಿ: ಭಾರತದ ಸಾಕೇತ್‌ ಮೈನೇನಿ, ಆಸ್ಪ್ರೇಲಿಯಾದ ಮ್ಯಾಟ್‌ ರೀಡ್‌ ಜೋಡಿ, ಭಾರತದವರೇ ಆದ ನಿಕ್ಷೇಪ್‌ ಬೆಲ್ಲೆಕೆರೆ, ವಸಿಷ್ಠ ಚೆರುಕು ಜೋಡಿ ವಿರುದ್ಧ 6-3, 6-1 ಸೆಟ್‌ಗಳಲ್ಲಿ ಜಯಿಸಿತು.

ಪ್ರಜ್ನೇಶ್‌ಗೆ ಜಯ: ಮೊದಲ ಸುತ್ತಲ್ಲಿ ಬೈ ಪಡೆದಿದ್ದ ಹಾಲಿ ಚಾಂಪಿಯನ್‌ ಭಾರತದ ಪ್ರಜ್ನೇಶ್‌ ಗುಣೇಶ್ವರನ್‌, ಜರ್ಮನಿಯ ಸೆಬಾಸ್ಟಿನ್‌ ಫನ್ಸಲೆವ್‌ ವಿರುದ್ಧ 6-2, 4-6, 6-4 ಸೆಟ್‌ಗಳಲ್ಲಿ ಪ್ರಯಾಸದ ಗೆಲುವು ಪಡೆದು ಪ್ರಿ ಕ್ವಾರ್ಟರ್‌ ಹಂತಕ್ಕೇರಿದರು. ಮುಂದಿನ ಸುತ್ತಿನಲ್ಲಿ ಪ್ರಜ್ನೇಶ್‌, ಫ್ರಾನ್ಸ್‌ನ ಬೆಂಜಮಿನ್‌ ಬೊನ್ಜಿ ಎದುರು ಸೆಣಸಲಿದ್ದಾರೆ.

ಇನ್ನೊಂದು ಪಂದ್ಯದಲ್ಲಿ ರಾಮಕುಮಾರ್‌ ರಾಮನಾಥನ್‌, ಭಾರತದವರೇ ಆದ ಅಭಿನವ್‌ ಶಣ್ಮುಗಂ ವಿರುದ್ಧ 6-1, 6-3 ಸೆಟ್‌ಗಳಲ್ಲಿ ಸುಲಭ ಜಯ ಪಡೆದರು.