ಮಗ ಫೇಲಾಗಿದ್ದಕ್ಕೆ ಗಂಡ-ಹೆಂಡತಿ ಜಗಳ: ಪತ್ನಿ ಆತ್ಮಹತ್ಯೆ

* ಮೃತರು ಎಪಿಎಸ್‌ ಕಾಲೇಜಿನ ಮೇಲ್ವಿಚಾರಕಿ ಮಹಾದೇವಿ * ಎಸ್ಸೆಸ್ಸೆಲ್ಸಿಯಲ್ಲಿ ಅನುತ್ತೀರ್ಣಗೊಂಡಿದ್ದ ದಂಪತಿಯ ಏಕೈಕ ಪುತ್ರ * ಇವರ ಏಕೈಕ ಪುತ್ರ ನಿತಿನ್‌ ಗಣಿತ ವಿಷಯದಲ್ಲಿ ಅನುತ್ತೀರ್ಣ * ಈ ವಿಚಾರವಾಗಿ ಪತ್ನಿಗೆ ಬೈದಿದ್ದ ಮಹಾದೇವಿ ಪತಿ ಬಸವರಾಜು * ನಿನ್ನ ಮುದ್ದಿನಿಂದಲೇ ಮಗ ಹಾಳಾದ ಎಂದು ಬೈದಿದ್ದ ಪತಿ * ಕೋಣೆಯ ಬಾಗಿಲು ಹಾಕಿಕೊಂಡು ಸೀರೆಯಲ್ಲಿ ನೇಣು ಬಿಗಿದುಕೊಂಡು ಮಹಾದೇವಿ ಆತ್ಮಹತ್ಯೆ

ಬೆಂಗಳೂರು: ಎಸ್‌ಎಸ್‌ಎಲ್‌ಸಿ ಪರೀಕ್ಷೆಯಲ್ಲಿ ತಮ್ಮ ಏಕೈಕ ಪುತ್ರ ಅನುತ್ತೀರ್ಣಗೊಂಡಿದ್ದಕ್ಕೆ ಪತಿ ಜತೆ ಉಂಟಾದ ಜಗಳದಿಂದ ಬೇಸರಗೊಂಡು ಪತ್ನಿ ಆತ್ಮಹತ್ಯೆಗೆ ಶರಣಾಗಿರುವ ಘಟನೆ ಕತ್ರಿಗುಪ್ಪೆ ಸಮೀಪ ವಿವೇಕಾನಂದ ನಗರದಲ್ಲಿ ನಡೆದಿದೆ. ಇಲ್ಲಿನ ನಿವಾಸಿ ಮಹಾದೇವಿ (40) ಮೃತ ದುರ್ದೈವಿ. ಮನೆಯಲ್ಲಿ ಮಂಗಳವಾರ ರಾತ್ರಿ ಮಹಾದೇವಿ ನೇಣು ಬಿಗಿದುಕೊಂಡು ಆತ್ಮಹತ್ಯೆ ಮಾಡಿಕೊಂಡಿದ್ದು, ಕೆಲ ಹೊತ್ತಿನ ಬಳಿಕ ಅವರ ಕೊಠಡಿಗೆ ಪತಿ ಬಸವರಾಜು ತೆರಳಿದಾಗ ಘಟನೆ ಬೆಳಕಿಗೆ ಬಂದಿದೆ ಎಂದು ಪೊಲೀಸರು ಹೇಳಿದ್ದಾರೆ. 

ಮೃತ ಮಹಾದೇವಿ ಅವರು ಎಪಿಎಸ್‌ ಕಾಲೇಜಿನಲ್ಲಿ ಮೇಲ್ವಿಚಾರಕಾಗಿದ್ದು, ಪತಿ ಬಸವರಾಜು ಹಾಗೂ ಪುತ್ರ ನಿತಿನ್‌ ಜೊತೆ ವಿವೇಕಾನಂದ ನಗರದಲ್ಲಿ ನೆಲೆಸಿದ್ದರು. ಎಸ್‌ಎಲ್‌ಎಲ್‌ಸಿ ಪರೀಕ್ಷೆಯಲ್ಲಿ ಗಣಿತ ವಿಷಯದಲ್ಲಿ ಅವರ ಪುತ್ರ ಅನುತ್ತೀರ್ಣಗೊಂಡಿದ್ದ ವಿಚಾರವಾಗಿ ದಂಪತಿ ಮಧ್ಯೆ ಮನಸ್ತಾಪವಾಗಿತ್ತು. ಪರೀಕ್ಷೆಯಲ್ಲಿ ಫೇಲಾದ ನಂತರ ನಿತಿನ್‌, ಶ್ರೀನಗರದಲ್ಲಿರುವ ತನ್ನ ಅಜ್ಜಿ ಮನೆಯಲ್ಲಿದ್ದ. ಮಗನ ವಿಷಯವಾಗಿ ಮತ್ತೆ ರಾತ್ರಿ ಅವರಲ್ಲಿ ಜಗಳವಾಗಿದೆ. ಆಗ ‘ನಿನ್ನ ಮುದ್ದಿನಿಂದಲೇ ಅವನು ಹಾಳಾಗಿದ್ದು. ಅವನು ಸರಿಯಾಗಿ ಓದಲಿಲ್ಲ' ಎಂದು ಮಹಾದೇವಿ ಅವರಿಗೆ ಪತಿ ಬಸವರಾಜು ಬೈದಿದ್ದರು ಎನ್ನಲಾಗಿದೆ. ಇದರಿಂದ ಬೇಸರಗೊಂಡ ಅವರು, ಸೀದಾ ತಮ್ಮ ಮಲಗುವ ಕೊಠಡಿಗೆ ತೆರಳಿ ಬಾಗಿಲು ಹಾಕಿಕೊಂಡಿದ್ದಾರೆ. 

ಇತ್ತ ಬಸವರಾಜು ಅವರು, ಎಷ್ಟುಹೊತ್ತಾದರೂ ಕೊಠಡಿಯಿಂದ ಪತ್ನಿ ಹೊರಬಾರದೆ ಹೋದಾಗ ಕಂಗಲಾಗಿದ್ದಾರೆ. ಕೊಠಡಿ ಬಾಗಿಲು ತೆಗೆಯುವಂತೆ ಪತ್ನಿಯಲ್ಲಿ ಅವರು ಮನವಿ ಮಾಡಿದರೂ ಯಾವುದೇ ಪ್ರಯೋಜನವಾಗಿಲ್ಲ. ಅದಾದ ಬಳಿಕ ರಾತ್ರಿ 12 ಗಂಟೆಗೆ ಬಸವರಾಜು ಕಿರಿಯ ಸೋದರ, ಕಂಪನಿ ಕೆಲಸ ಮುಗಿಸಿಕೊಂಡು ಮನೆಗೆ ಮರಳಿದ್ದಾರೆ. ಆಗ ಸೋದರನಿಗೆ ‘ನಿಮ್ಮ ಅತ್ತಿಗೆ ಬಾಗಿಲು ಹಾಕಿಕೊಂಡಿದ್ದಾರೆ. ಎಷ್ಟುಕೂಗಿದರೂ ಬಾಗಿಲು ತೆರೆಯುತ್ತಿಲ್ಲ' ಎಂದು ಬಸವರಾಜು ಹೇಳಿದ್ದರು. ಆಗ ಆತಂಕಗೊಂಡ ಸೋದರರು, ರಾತ್ರಿ 2 ಗಂಟೆಗೆ ಸುಮಾರಿಗೆ ಬಲವಂತವಾಗಿ ಬಾಗಿಲು ಮುರಿದು ಒಳಪ್ರವೇಶಿಸಿದಾಗ ನೇಣಿನ ಕುಣಿಕೆಯಲ್ಲಿ ಮಹಾದೇವಿ ಮೃತದೇಹ ಕಂಡು ಬಂದಿದೆ. ತಕ್ಷಣವೇ ಸ್ಥಳೀಯ ಠಾಣೆಗೆ ಅವರು ತಿಳಿಸಿದ್ದಾರೆ. ಪೊಲೀಸರು ಸ್ಥಳಕ್ಕೆ ಧಾವಿಸಿ ಪರಿಶೀಲಿಸಿದ್ದಾರೆ ಎಂದು ಅಧಿಕಾರಿಗಳು ಮಾಹಿತಿ ನೀಡಿದ್ದಾರೆ. 

ಈ ಸಂಬಂಧ ಚನ್ನಮ್ಮನಕೆರೆ ಅಚ್ಚುಕಟ್ಟು ಪೊಲೀಸ್‌ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ. 

ಕನ್ನಡಪ್ರಭ ವಾರ್ತೆ
epaper.kannadaprabha.in