ಕಂದಾಯ ಸಚಿವರ ಮುಂದೆ ತಹಸೀಲ್ದಾರ್ ಕಣ್ಣೀರು; ಗದರಿಸಿ ಕಳುಹಿಸಿದ ಸಚಿವರು

ಚನ್ನರಾಯಪಟ್ಟಣ ತಹಸೀಲ್ದಾರ್​ ವಿದ್ಯಾವತಿ ಕಂದಾಯ ಸಚಿವ ಕಾಗೋಡು ತಿಮ್ಮಪ್ಪ ಎದುರು ಕಣ್ಣೀರು ಹಾಕಿರುವ ಘಟನೆ ಹಾಸನ ಜಿಲ್ಲಾಪಂಚಾಯ್ತಿಯಲ್ಲಿ ನಡೆದಿದೆ.

ಬೆಂಗಳೂರು (ಏ.05): ಚನ್ನರಾಯಪಟ್ಟಣ ತಹಸೀಲ್ದಾರ್​ ವಿದ್ಯಾವತಿ ಕಂದಾಯ ಸಚಿವ ಕಾಗೋಡು ತಿಮ್ಮಪ್ಪ ಎದುರು ಕಣ್ಣೀರು ಹಾಕಿರುವ ಘಟನೆ ಹಾಸನ ಜಿಲ್ಲಾಪಂಚಾಯ್ತಿಯಲ್ಲಿ ನಡೆದಿದೆ.

ನನಗೆ ನಿವೃತ್ತಿಗೆ ಎರಡೂವರೆ ತಿಂಗಳ ಮಾತ್ರ ಇದ್ದು, ಈ ವೇಳೆ ನನ್ನನ್ನು ಕಡ್ಡಾಯ ರಜೆ ಮೇಲೆ ಡಿಸಿ ಕಳುಹಿಸುತ್ತಿದ್ದಾರೆ. ಹೀಗಾಗಿ ಮಾನಸಿಕ ತುಂಬಾ ನೊಂದಿದ್ದೇನೆ, ನನಗೆ ನ್ಯಾಯ ಕೊಡಿಸಿ ಎಂದು ಸಚವರಲ್ಲಿ ಮನವಿ ಮಾಡಿದರು. ಆದರೆ ತಹಸೀಲ್ದಾರ್​ ವಿದ್ಯಾವತಿಯನ್ನು ಗದರಿಸಿದ ಸಚಿವರು, ಇದು ಅಧಿಕಾರಿಗಳ ನಡವಳಿಕೆ ಅಲ್ಲ ಅಂದರು. ಜಿಲ್ಲಾ ಪಂಚಾಯ್ತಿ ಪ್ರಗತಿ ಪರಿಶೀಲನಾ ಸಭೆಯಲ್ಲಿ ಈ ಘಟನೆ ನಡೆಯಿತು.

ಈ ವೇಳೆ ಶಾಸಕರಾದ ಹೆಚ್ಡಿ ರೇವಣ್ಣ, ಬಾಲಕೃಷ್ಣ ತಹಸಿಲ್ದಾರ್​ ಬೆಂಬಲಕ್ಕೆ ನಿಂತರು. ಕರ್ತವ್ಯದಲ್ಲಿ ಲೋಪ ತೋರಿದ ಹಿನ್ನೆಲೆ ಚನ್ನರಾಯಪಟ್ಟಣ ತಹಸಿಲ್ದಾರ್​ ವಿದ್ಯಾವತಿಗೆ ಡಿಸಿ ಕಡ್ಡಾಯ ರಜೆ ಮೇಲೆ ತೆರಳುವಂತೆ ಸೂಚಿಸಿದ್ದಾರೆ. ಅಲ್ಲದೇ ತಾಲೂಕಿನಲ್ಲಿ ಮೇವು ಪೂರೈಕೆ, ಕುಡಿಯುವ ನೀರು ನಿರ್ವಹಣೆ ಕೆಲಸದಲ್ಲಿ ಲೋಪ ತೋರಿದ್ದೀರೆಂದು ತಹಸಿಲ್ದಾರ್​​ಗೆ ನೀಡಿದ ನೋಟೀಸ್​ನಲ್ಲಿ ಡಿಸಿ ಉಲ್ಲೇಖಿಸಿದ್ದಾರೆ. ಡಿಸಿ ಆದೇಶ ಹಿಂಪಡೆದು ನನಗೆ ಕೆಲಸ ಮಾಡಲು ಅವಕಾಶ ಮಾಡಿಕೊಡುವಂತೆ ತಹಸಿಲ್ದಾರ್​ ಮನವಿ ಮಾಡಿದ್ದಾರೆ.