ಜನಪ್ರತಿನಿಧಿಗಳು, ಶ್ರೀಮಂತರನ್ನು ಅಪಹರಿಸಲು ಸ್ಕೆಚ್ ಹಾಕಿದ್ದ ಚೋಟಾ ರಾಜನ್ ಬಲಗೈ ಬಂಟ ರಶೀದ್ ಮಲಬಾರಿ

ಛೋಟಾ ರಾಜನ್ ಬಲಗೈ ಬಂಟ ಎಂದೇ ಗುರುತಿಸಿಕೊಂಡಿರುವ ರಶೀದ್ ಮಲಬಾರಿ ಮತ್ತು ಆತನ ಗ್ಯಾಂಗ್ ಬೆಳಗಾವಿ ನಗರದಲ್ಲಿ ಜನಪ್ರತಿನಿಧಿಗಳು, ಶ್ರೀಮಂತರನ್ನು ಅಪಹರಿಸಲು ಸಂಚು ರೂಪಿಸಿದ್ದ ವಿಚಾರ ಇದೀಗ ಬಯಲಾಗಿದೆ.

ಬೆಳಗಾವಿ(ಮೇ.17): ಛೋಟಾ ರಾಜನ್ ಬಲಗೈ ಬಂಟ ಎಂದೇ ಗುರುತಿಸಿಕೊಂಡಿರುವ ರಶೀದ್ ಮಲಬಾರಿ ಮತ್ತು ಆತನ ಗ್ಯಾಂಗ್ ಬೆಳಗಾವಿ ನಗರದಲ್ಲಿ ಜನಪ್ರತಿನಿಧಿಗಳು, ಶ್ರೀಮಂತರನ್ನು ಅಪಹರಿಸಲು ಸಂಚು ರೂಪಿಸಿದ್ದ ವಿಚಾರ ಇದೀಗ ಬಯಲಾಗಿದೆ.

ಈ ಸಂಬಂಧ ಮಲಬಾರಿ ಹಾಗೂ ಗ್ಯಾಂಗ್ ಪೂರ್ವ ತಯಾರಿಯನ್ನೂ ಮಾಡಿಕೊಂಡಿತ್ತು. ದೂರವಾಣಿ ಮೂಲಕ ಕೆಲ ಜನಪ್ರತಿನಿಧಿಗಳಿಗೆ ಬೆದರಿಕೆಯನ್ನೂ ಹಾಕಿದ್ದರು. ಆದರೆ, ಕೆಲ ಶಾಸಕರು ಸಾಲಗಾರರಾಗಿದ್ದು, ಅವರಿಂದ ಏನೂ ಗಿಟ್ಟುವುದಿಲ್ಲ ಎಂಬುದು ಗೊತ್ತಾದ ಮೇಲೆ ಈ ಯೋಜನೆ ಕೈ ಬಿಟ್ಟಿರುವುದಾಗಿ ಮಲಬಾರಿ ಗ್ಯಾಂಗ್‌ನ ಬಂಧಿತ ಪಾತಕಿಗಳು ವಿಚಾರಣೆ ವೇಳೆ ಬಾಯ್ಬಿಟ್ಟಿದ್ದಾರೆ ಎಂದು ಅಪರಾಧ ವಿಭಾಗದ ಡಿಸಿಪಿ ಅಮರನಾಥ ರೆಡ್ಡಿ ಮಾಹಿತಿ ನೀಡಿದ್ದಾರೆ. ಎರಡು ವರ್ಷಗಳ ಅವಧಿಯಲ್ಲಿ ನಗರ ಸೇರಿ ವಿವಿಧೆಡೆ ಉದ್ಯಮಿ, ಶ್ರೀಮಂತರ ಕೊಲೆ, ಅಪಹರಣ ಹಾಗೂ ಕಳ್ಳತನ ಪ್ರಕರಣಕ್ಕೆ ಸಂಬಂಧಿಸಿ ಕೆಲವರನ್ನು ವಶಕ್ಕೆ ಪಡೆದು ವಿಚಾರಣೆ ನಡೆಸಲಾಗುತ್ತಿದೆ. ಮೇಲ್ನೋಟಕ್ಕೆ ರಶೀದ್ ಮಲಬಾರಿ ಗ್ಯಾಂಗ್ ಈ ರೀತಿಯ ಕೃತ್ಯದ ಹಿಂದಿರುವ ಶಂಕೆ ವ್ಯಕ್ತವಾಗಿದೆ. ಈ ಹಿನ್ನೆಲೆಯಲ್ಲಿ ಮಲಬಾರಿ ಗ್ಯಾಂಗ್ ವಶಕ್ಕೆ ಪಡೆದುಕೊಳ್ಳಲು ಹಿರಿಯ ಅಧಿಕಾರಿಗಳ ನೇತೃತ್ವದ ನಾಲ್ಕು ತಂಡಗಳನ್ನು ರಚಿಸಲಾಗಿದೆೆ. ಈಗಾಗಲೇ ರಚನೆಯಾಗಿರುವ ತನಿಖಾ ತಂಡಗಳು ಮುಂಬೈ, ಗೋವಾ, ಹೈದರಾಬಾದ್, ರಾಜಸ್ಥಾನ, ಬಿಹಾರ, ಬೆಂಗಳೂರು, ಮಂಗಳೂರು, ಮುಂಬೈ ಸೇರಿದಂತೆ ಇನ್ನಿತರ ಕಡೆ ಪಾತಕಿ ಮಲಬಾರಿ ಶೋಧಕಾರ್ಯ ನಡೆಸುತ್ತಿವೆ ಎಂದು ತಿಳಿಸಿದ್ದಾರೆ.