ಟೀ ಮಾರಿದ್ದೇನೆ, ದೇಶ ಮಾರಿಲ್ಲ; ಗುಜರಾತ್'ನಲ್ಲಿ 'ನಮೋ' ವಾಗ್ದಾಳಿ

ಗುಜರಾತ್​  ಚುನಾವಣಾ ಕಣ ದಿನದಿಂದ ದಿನಕ್ಕೆ ರಂಗು ಪಡೆದುಕೊಳ್ಳುತ್ತಿದೆ.  ಪ್ರಧಾನಿ ಮೋದಿ ಗುಜರಾತ್ ನಲ್ಲಿ ರ್ಯಾಲಿಯ ಮೇಲೆ ರ್ಯಾಲಿ ಮಾಡುತ್ತಿದ್ದಾರೆ.  ನಿನ್ನೆ ಗುಜರಾತ್​'ನಲ್ಲಿ ಮೋದಿ ನಡೆಸಿದ್ದ ನಾಲ್ಕು ಬಹಿರಂಗ ಸಮಾವೇಶಗಳಲ್ಲಿ ಕಾಂಗ್ರೆಸ್​ ಮೇಲೆ ಮೋದಿ ವಾಗ್ದಾಳಿ ನಡೆಸಿದ್ದಾರೆ.

ಗುಜರಾತ್ (ನ.28): ಗುಜರಾತ್​  ಚುನಾವಣಾ ಕಣ ದಿನದಿಂದ ದಿನಕ್ಕೆ ರಂಗು ಪಡೆದುಕೊಳ್ಳುತ್ತಿದೆ.  ಪ್ರಧಾನಿ ಮೋದಿ ಗುಜರಾತ್ ನಲ್ಲಿ ರ್ಯಾಲಿಯ ಮೇಲೆ ರ್ಯಾಲಿ ಮಾಡುತ್ತಿದ್ದಾರೆ.  ನಿನ್ನೆ ಗುಜರಾತ್​'ನಲ್ಲಿ ಮೋದಿ ನಡೆಸಿದ್ದ ನಾಲ್ಕು ಬಹಿರಂಗ ಸಮಾವೇಶಗಳಲ್ಲಿ ಕಾಂಗ್ರೆಸ್​ ಮೇಲೆ ಮೋದಿ ವಾಗ್ದಾಳಿ ನಡೆಸಿದ್ದಾರೆ.

ದೇಶದ ಪ್ರಧಾನಿಯಾಗಿರುವ ಮೋದಿಗೆ ಮಾತಾಡಲು ಇಂಗ್ಲಿಷ್ ಬರುವುದಿಲ್ಲ.  ಅವರೇನಿದ್ದರೂ ಟೀ ಮಾರಾಟ ಮಾಡುವುದಕ್ಕೆ ಸರಿ ಎಂಬರ್ಥದ ಮೆಮೆ ಮಾಡಿ ಮೋದಿಯನ್ನು ಹೀಗೆಳೆದಿದ್ದ ಕಾಂಗ್ರೆಸ್​​'ಗೆ ಮೋದಿ ತಿರುಗೇಟು ನೀಡಿದ್ದಾರೆ. ನಾನು ಚಹಾ ಮಾರಾಟ ಮಾಡಿದ್ದೇನೆ.  ಆದರೆ  ದೇಶ ಮಾರಾಟ ಮಾಡಿಲ್ಲ ಎಂದು ಯುಪಿಎ ಆಡಳಿತ ಕಾಲದ ಹಗರಣಗಳನ್ನುದ್ದೇಶಿಸಿ ಕಾಂಗ್ರೆಸ್​ ವಿರುದ್ಧ ಮುಗಿಬಿದ್ದಿದ್ದಾರೆ.

ಗುಜರಾತ್ ಚುನಾವಣಾ ಕಣದಲ್ಲಿ ಮೋದಿಯನ್ನು ಹಣಿಯಲು ಕಾಂಗ್ರೆಸ್​ ಮಾಡುತ್ತಿರುವ ಪ್ರತಿಯೊಂದು ತಂತ್ರಗಳೂ ಅದಕ್ಕೇ ಮುಳುವಾಗುತ್ತಿವೆ. ಮುಂಬೈ ದಾಳಿ ಉಗ್ರ ಹಫೀಜ್​ ಸೈಯದ್​ನನ್ನು ಪಾಕಿಸ್ತಾನ ಜೈಲಿನಿಂದ ಬಿಡುಗಡೆ ಮಾಡಿದಾಗ ರಾಹುಲ್ ಮಾಡಿದ್ದ ಟ್ವೀಟ್ ವಿವಾದಕ್ಕೆ ಕಾರಣವಾಗಿತ್ತು.  ಅಮೆರಿಕ ಅಧ್ಯಕ್ಷ ಟ್ರಂಪ್​ ಜೊತೆ ಮೋದಿ ಮಾಡಿದ್ದ ಅಪ್ಪುಗೆಯ ರಾಜತಾಂತ್ರಿಕತೆ ವಿಫಲವಾಗಿದೆ. ಉಗ್ರ ಹಫೀಜ್ ಬಿಡುಗಡೆಯಾಗಿದ್ದಾನೆ.  ಪಾಕಿಸ್ತಾನಕ್ಕೆ ಅಮೆರಿಕ ಫಂಡ್​ ಅನ್ನೂ ಬಿಡುಗಡೆ ಮಾಡುತ್ತಿದೆ. ಮೋದಿಯ ಅಪ್ಪುಗೆಯ ರಾಜತಾಂತ್ರಿಕತೆ ವಿಫಲವಾಗಿದ್ದು ಇನ್ನಷ್ಟು ಅಪ್ಪುಗೆಗಳ ಅಗತ್ಯ ಇದೆ ಎಂದು ರಾಹುಲ್ ವ್ಯಂಗ್ಯವಾಡಿದ್ದರು. ನಿನ್ನೆಯ ರ್ಯಾಲಿಯಲ್ಲಿ ರಾಹುಲ್ ಟ್ವೀಟ್​ಗೆ ಪ್ರತ್ಯುತ್ತರ ನೀಡಿರುವ ಮೋದಿ  ಉಗ್ರ ಹಫೀಜ್ ಸೈಯದ್ ಬಿಡುಗಡೆಯಾದರೆ ಕಾಂಗ್ರೆಸ್​ ಸಂಭ್ರಮಿಸುತ್ತೆ ಎಂದು ಉಗ್ರವಾದದ ವಿರುದ್ಧ ಕಾಂಗ್ರೆಸ್​ ಗಂಭೀರವಾಗಿಲ್ಲ ಎಂದು ಹೇಳುವಲ್ಲಿ ಮೋದಿ ಯಶಸ್ವಿಯಾದರು.

 ಚುನಾವಣಾ ಪ್ರಚಾರದುದ್ದಕ್ಕೂ ಮೋದಿ ಭಾವನಾತ್ಮಕವಾಗಿ ಗುಜರಾತಿಗಳನ್ನು ಸೆಳೆಯುವ ಯತ್ನ ಮಾಡುತ್ತಿದ್ದಾರೆ. ಯಾವಾಗಲೂ ಹಿಂದಿಯಲ್ಲಿ ಭಾಷಣ ಮಾಡುತ್ತಿದ್ದ ಮೋದಿ ಈಗ ಗುಜರಾತಿಯಲ್ಲಿ ಭಾಷಣ ಮಾಡುತ್ತಿದ್ದಾರೆ. ಗುಜರಾತ್​ನ ಒಬ್ಬ ಬಡ ಚಹಾ ವ್ಯಾಪಾರಿ ದೇಶದ ಪ್ರಧಾನಿಯಾಗಿರುವುದನ್ನು ಸಹಿಸುತ್ತಿಲ್ಲ. ಅದೇ ಕಾರಣದಿಂದ ನಮ್ಮ ಎಲ್ಲ ಯೋಜನೆಗಳನ್ನೂ ಕಾಂಗ್ರೆಸ್​ ವಿರೋಧಿಸುತ್ತಿದೆ ಎಂದು ಗುಜರಾತಿಗಳಿಗೆ ಮನವರಿಕೆ ಮಾಡುತ್ತಿದ್ದಾರೆ. ಬಿಜೆಪಿ ಗುಜರಾತ್​ನಲ್ಲಿ ಪಟೇಲ್ ಸಮುದಾಯದ ನಾಲ್ವರನ್ನು ಮುಖ್ಯಮಂತ್ರಿಯನ್ನಾಗಿ ಮಾಡಿದೆ. ಸರ್ದಾರ್ ಪಟೇಲರನ್ನು ಕಾಂಗ್ರೆಸ್​ ಕಡೆಗಣಿಸಿತ್ತು. ಗುಜರಾತ್​ಗೆ ಮತ್ತು ಪಟೇಲ್ ಸಮುದಾಯಕ್ಕೆ ಕಾಂಗ್ರೆಸ್​ ಮಾಡಿದ ಅನ್ಯಾಯಕ್ಕೆ ಆ ಪಕ್ಷ ಗುಜರಾತಿಗಳ ಕ್ಷಮೆಯಾಚಿಸಬೇಕು ಎಂದು ಒತ್ತಾಯಿಸಿದ್ದಾರೆ..

ಮೀಸಲಾತಿ ಹೋರಾಟವನ್ನೇ ಚುನಾವಣಾ ಅಸ್ತ್ರ ಮಾಡಿಕೊಂಡಿದ್ದ ಕಾಂಗ್ರೆಸ್​ಗೆ ಪಟೇಲ್​ ಸಮುದಾಯಕ್ಕೆ ಮನ್ನಣೆ ನೀಡಿದ್ದು ಬಿಜೆಪಿ ಮಾತ್ರ ಅನ್ನೋ ದಾಳವನ್ನುರುಳಿಸಿದ್ದಾರೆ. ಸದ್ಯಕ್ಕೆ ಮೋದಿ ಸಾಗುತ್ತಿರುವ ಹಾದಿ, ಚುನಾವಣಾ ಸಮೀಕ್ಷೆಗಳ ಭವಿಷ್ಯ, ಕಾಂಗ್ರೆಸ್​ಗೆ ಮುಳುವಾಗುತ್ತಿರುವ ರಣ ತಂತ್ರ ಎಲ್ಲವನ್ನೂ ನೋಡುತ್ತಿದ್ದರೆ ಈ ಚುನಾವಣೆಯಲ್ಲಿಯೂ ಮೋದಿ  unstoppable ಆಗುತ್ತಾರಾ ಅನ್ನೋದಷ್ಟೇ ಎಲ್ಲರ ಕುತೂಹಲ.