ಇಲ್ಲಿ ಮಾತ್ರ ಮೋದಿ ಸೋಲಿಸಲು ಸಾಧ್ಯವೇ ಇಲ್ಲ.. ಶತಕ ಬಾರಿಸಿದ ಬಿಜೆಪಿ

ಪಂಚ ರಾಜ್ಯಗಳ ಫಲಿತಾಂಶದ ನಂತರ ದೇಶದಲ್ಲಿ ಬಿಜೆಪಿ ವಿರುದ್ಧವಾದ, ಮೋದಿ ವಿರುದ್ಧ ಅಲೆ ಇದೆ ಎಂಬ ಭಾವನೆ ವ್ಯಕ್ತವಾಗಿತ್ತು. ಆದರೆ ಗುಜರಾತ್‌ನಲ್ಲಿ ಕಮಲದ ಆಟಕ್ಕೆ ವಿರೋಧಿಗಳು ತಲೆ ಬಗ್ಗಿಸಿದ್ದಾರೆ.

ಅಹಮದಾಬಾದ್[ಡಿ.23] ಮಧ್ಯಪ್ರದೇಶ, ರಾಜಸ್ಥಾನ, ಛತ್ತೀಸ್ ಗಢದಲ್ಲಿ ಅಧಿಕಾರ ಕಳೆದುಕೊಂಡಿದ್ದರೂ ಬಿಜೆಪಿಯ ಗೆಲವುವನ್ನು ಇಲ್ಲಿ ಮಾತ್ರ ತಡೆಯಲು ಸಾಧ್ಯವಾಗಿಲ್ಲ. ಗುಜರಾತ್‌ನ ಉಪಚುನಾವಣೆಯಲ್ಲಿ ಕಮಲ ಅರಳಿದೆ.

99 ಶಾಸಕರ ಬಲ ಹೊಂದಿದ್ದ ಬಿಜೆಪಿ ಶತಕ ಬಾರಿಸಿದೆ.  ಜಸ್ದಾನ್ ವಿಧಾನಸಭೆಗೆ ನಡೆದ ಉಪಚುನಾವಣೆಯಲ್ಲಿ ಬಿಜೆಪಿ ಅಭ್ಯರ್ಥಿ ಕುನಾರ್ಜಿ ಬವಾಲಿಯಾ ಕಾಂಗ್ರೆಸ್ ನ ಅಭ್ಯರ್ಥಿ ಅವ್ಸರ್ ನಕಿಯಾ ಅವರನ್ನು 19,779 ಮತಗಳ ಭಾರೀ ಅಂತರದಿಂದ ಸೋಲಿಸಿದ್ದಾರೆ.

ಬವಾಲಿಯಾ 2017 ರಲ್ಲಿ ಕಾಂಗ್ರೆಸ್ ಅಭ್ಯರ್ಥಿಯಾಗಿ ಗೆದ್ದಿದ್ದರು. ಆದರೆ ಶಾಸಕ ಸ್ಥಾನಕ್ಕೆ ರಾಜೀನಾಮೆ ನೀಡಿ ಬಿಜೆಪಿಗೆ ಸೇರ್ಪಡೆಯಾದ ಕೇವಲ 3 ಗಂಟೆಗಳಲ್ಲಿ ಬವಾಲಿಯಾಗೆ ಗುಜರಾತ್ ಸಂಪುಟದಲ್ಲಿ ಸ್ಥಾನವೂ ಸಿಕ್ಕಿತ್ತು.  ಈ ಗೆಲುವಿನ ಪರಿಣಾಮ ಬಿಜೆಪಿ ಶತಕ ಬಾರಿಸಿದ್ದರೆ ಕಾಂಗ್ರೆಸ್ 77 ರಿಂದ 76ಕ್ಕೆ ಇಳಿದಿದೆ.