ರಾಜೀವ್ಗಾಂಧಿ ಆರೋಗ್ಯ ವಿಶ್ವವಿದ್ಯಾಲಯದ ಮತ್ತೊಂದು ಹಗರಣ: ಡಿಜಿಟಲ್ ಇ-ವ್ಯಾಲ್ಯುಯೇಷನ್ ಟೆಂಡರ್ ಗೋಲ್ಮಾಲ್

ಹಗರಣಗಳ ಸುಳಿಯಲ್ಲಿ ಸಿಲುಕಿರುವ ರಾಜೀವ್​ಗಾಂಧಿ ಆರೋಗ್ಯ ವಿಶ್ವವಿದ್ಯಾಲಯ ಈಗ ಮತ್ತೊಂದು ಆರೋಪಕ್ಕೆ ಗುರಿಯಾಗಿದೆ.  ಡಿಜಿಟಲ್​ ಇ ವ್ಯಾಲ್ಯುಯೇಷನ್​​ ಕಾರ್ಯ ನಿರ್ವಹಿಸಲು ಕರೆದಿದ್ದ ಟೆಂಡರ್​ನಲ್ಲಿ ಗೋಲ್ಮಾಲ್​ ನಡೆದಿದೆ ಎಂಬ ಆರೋಪಗಳು ಕೇಳಿ ಬಂದಿವೆ. ಅಲ್ಲದೆ, ಅತಿ ಹೆಚ್ಚು ದರ ನಮೂದಿಸಿರುವ ಕಂಪನಿಗೆ ಟೆಂಡರ್​ ಭಾಗ್ಯ ಕರುಣಿಸಿರುವ ರಾಜೀವ್​ ಗಾಂಧಿ ಆರೋಗ್ಯ ವಿ.ವಿ., ಕಂಪನಿಯೊಂದಿಗೆ ದರ ಸಂಧಾನಕ್ಕಿಳಿದು ಕಡೆಯಲ್ಲಿ ಕೇವಲ 5 ಪೈಸೆಗೆ ಸಂಧಾನ ನಡೆಸಿರುವುದು ದಾಖಲೆಗಳಿಂದ ತಿಳಿದು ಬಂದಿದೆ.

ಬೆಂಗಳೂರು(ಮಾ.21): ಹಗರಣಗಳ ಸುಳಿಯಲ್ಲಿ ಸಿಲುಕಿರುವ ರಾಜೀವ್​ಗಾಂಧಿ ಆರೋಗ್ಯ ವಿಶ್ವವಿದ್ಯಾಲಯ ಈಗ ಮತ್ತೊಂದು ಆರೋಪಕ್ಕೆ ಗುರಿಯಾಗಿದೆ.  ಡಿಜಿಟಲ್​ ಇ ವ್ಯಾಲ್ಯುಯೇಷನ್​​ ಕಾರ್ಯ ನಿರ್ವಹಿಸಲು ಕರೆದಿದ್ದ ಟೆಂಡರ್​ನಲ್ಲಿ ಗೋಲ್ಮಾಲ್​ ನಡೆದಿದೆ ಎಂಬ ಆರೋಪಗಳು ಕೇಳಿ ಬಂದಿವೆ. ಅಲ್ಲದೆ, ಅತಿ ಹೆಚ್ಚು ದರ ನಮೂದಿಸಿರುವ ಕಂಪನಿಗೆ ಟೆಂಡರ್​ ಭಾಗ್ಯ ಕರುಣಿಸಿರುವ ರಾಜೀವ್​ ಗಾಂಧಿ ಆರೋಗ್ಯ ವಿ.ವಿ., ಕಂಪನಿಯೊಂದಿಗೆ ದರ ಸಂಧಾನಕ್ಕಿಳಿದು ಕಡೆಯಲ್ಲಿ ಕೇವಲ 5 ಪೈಸೆಗೆ ಸಂಧಾನ ನಡೆಸಿರುವುದು ದಾಖಲೆಗಳಿಂದ ತಿಳಿದು ಬಂದಿದೆ.

ಉತ್ತರ ಪತ್ರಿಕೆಗಳ ಸ್ಕ್ಯಾನಿಂಗ್​ ಸೇರಿದಂತೆ ಪರೀಕ್ಷೆ ಮತ್ತು ಪರೀಕ್ಷಾ ನಂತರದ ಕಾರ್ಯುನಿರ್ವಹಿಸುವ ಸಲುವಾಗಿ ಡಿಜಿಟಲ್​ ಇ ವ್ಯಾಲ್ಯುಯೇಷನ್​​ ಕಾರ್ಯಕ್ಕೆ ರಾಜೀವ್​ಗಾಂಧಿ ಆರೋಗ್ಯ ವಿ.ವಿ. ಟೆಂಡರ್​ ಕರೆದಿತ್ತು. ಇದರಲ್ಲಿ ಮೆರಿ ಟ್ರ್ಯಾಕ್​ ಸರ್ವಿಸಸ್​ ಲಿಮಿಟೆಡ್​, ಮೈಂಡ್​ ಲಾಜಿಕ್ಸ್​ ಮತ್ತು ಎಡುಕ್ವಿಟಿ ಕಂಪನಿ ಟೆಂಡರ್​ನಲ್ಇ ಭಾಗವಹಿಸಿತ್ತು. ಈ ಮೂರು ಕಂಪನಿಗಳ ಪೈಕಿ ಮೆರಿ ಟ್ರ್ಯಾಕ್​​ ಸರ್ವಿಸಸ್​​ ಲಿಮಿಟೆಡ್​​ 2,98,20,000, ಎಡುಕ್ವಿಟಿ 2,84,40,000 ರೂ., ಮೈಂಡ್​ ಲಾಜಿಕ್ಸ್​ 2,43,00,000 ರೂ.ನಮೂದಿಸಿತ್ತು. ಟೆಂಡರ್​ ನಿಯಾಮವಳಿಗಳ ಪ್ರಕಾರ ಕಡಿಮೆ ದರ ನಮೂದಿಸಿರುವ ಕಂಪನಿಗೆ ಟೆಂಡರ್​ ನೀಡಬೇಕಿತ್ತು. ಆದರಿಲ್ಲಿ, ರಾಜೀವ್​ ಗಾಂಧಿ ಆರೋಗ್ಯ ವಿ.ವಿ. ಅಧಿಕಾರಿಗಳು ತಾಂತ್ರಿಕ ಅಂಕ ನೀಡಿಕೆಯಲ್ಲಿ ತಮ್ಮ ಕೈ ಚಳಕ ಪ್ರದರ್ಶಿಸಿದ್ದಾರೆ. ಮೆರಿ ಟ್ರ್ಯಾಕ್​​ಗೆ 92.23 ಅಂಕ ಮತ್ತು ಮೈಂಡ್​ ಲಾಜಿಕ್ಸ್​ಗೆ 92.13 ಅಂಕ ನೀಡಿ ಕಡೆಯಲ್ಲಿ ಮೆರಿ ಟ್ರ್ಯಾಕ್​ ಕಂಪನಿಗೆ ಟೆಂಡರ್​ ಪಾಲಾಗಿಸುವಲ್ಲಿ ವಿ.ವಿ. ಅಧಿಕಾರಿಗಳು ಶಾಮೀಲಾಗಿರುವುದು ದಾಖಲೆಗಳಿಂದ ಗೊತ್ತಾಗಿದೆ.

ಮೆರಿ ಟ್ರ್ಯಾಕ್​​ ಸರ್ವಿಸಸ್​ ಲಿಮಿಟೆಡ್​ ನಮೂದಿಸಿದ್ದ ದರ ದುಬಾರಿ ಎಂದು ಆರಂಭದಲ್ಲಿ ವಿ.ವಿ. ಹಣಕಾಸು ಅಧಿಕಾರಿ ತಕರಾರು ತೆಗೆದು ಕಂಪನಿ ಜತೆ ದರ ಸಂಧಾನ ನಡೆಸಿ ಎಂದು ಸಲಹೆ ನೀಡಿದ್ದರು ಎನ್ನಲಾಗಿದೆ. ಈ ಮಧ್ಯೆ ಕುಲಪತಿ ಡಾ.ರವೀಂದ್ರನಾಥ್​​ ಮಧ್ಯ ಪ್ರವೇಶ ಮಾಡಿ ದರ ಸಂಧಾನ ನಡೆಸಲು ಅಧಿಕಾರಿಗಳಿಗೆ ಸೂಚಿಸಿದ್ದರು. ಕುಲಪತಿಗಳ ಸೂಚನೆಯಂತೆ ಅಧಿಕಾರಿಗಳ ದರ ಸಂಧಾನ ನಡೆಸುವ ಪ್ರಹಸನ ನಡೆಸಿದ್ದು, ಕಡೆಯಲ್ಲಿ ಕಂಪನಿ ನಮೂದಿಸಿದ್ದ ಒಟ್ಟು ದರದಲ್ಲಿ ಕೇವಲ 5 ಪೈಸೆಯಷ್ಟೇ ಮಾತ್ರ ಕಡಿಮೆ ಮಾಡಿರುವುದು ದಾಖಲೆಗಳಿಂದ ಬಹಿರಂಗವಾಗಿದೆ. ಈ ಟೆಂಡರ್​ ಪ್ರಕ್ರಿಯೆಯಲ್ಲಿ ಅಧಿಕಾರಿಗಳು ಮೊದಲೇ ಕಂಪನಿ ಜತೆ ಮಾತುಕತೆ ನಡೆಸಿದ್ದರು ಎಂದು ಮೂಲಗಳು ತಿಳಿಸಿವೆ.

ಟೆಂಡರ್​​ ಪಡೆದಿದ್ದ ಕಂಪನಿಯಿಂದ ಕಳಪೆ ಕೆಲಸ?

ಟೆಂಡರ್​ ಪಡೆಯುವಲ್ಲಿ ಯಶಸ್ವಿಯಾಗಿದ್ದ ಮೆರಿ ಟ್ರ್ಯಾಕ್​ ಸರ್ವಿಸಸ್​​ ಲಿಮಿಟೆಡ್​​ ವಿ.ವಿ.ಪರೀಕ್ಷಾ ಕಾರ್ಯಗಳಲ್ಲಿ ಗುಣಮಟ್ಟವನ್ನು ಕಾಯ್ದುಕೊಂಡಿಲ್ಲ ಎಂಬ ದೂರುಗಳು ಕೇಳಿ ಬಂದಿವೆ. ಇದಕ್ಕೆ ಸಂಬಂಧಿಸಿದಂತೆ ವಿ.ವಿ.ರಿಜಿಸ್ಟ್ರಾರ್​ ಹಲವು ಬಾರಿ ಕಂಪನಿಗೆ ನೋಟೀಸ್​ ಕೂಡ ನೀಡಿದ್ದರು. ಉತ್ತರ ಪತ್ರಿಕೆಗಳ ಸ್ಕ್ಯಾನಿಂಗ್​ ಮತ್ತು ಪ್ರಶ್ನೆ ಪತ್ರಿಕೆಗಳು, ಉತ್ತರ ಪತ್ರಿಕೆಗಳ ಕೋಡ್​ ನಂಬರ್​ ಜತೆ ತಾಳೆ ಆಗದಿರುವುದು ಸೇರಿದಂತೆ ಹಲವು ಲೋಪಗಳನ್ನು ಸರಿಪಡಿಸಲು ಸೂಚಿಸಿದ್ದರೂ ಪಾಲನೆ ಮಾಡಿಲ್ಲ ಎಂದು ಮೂಲಗಳು ತಿಳಿಸಿವೆ.

ರಾಜೀವ್​ಗಾಂಧಿ ಆರೋಗ್ಯ ವಿಶ್ವವಿದ್ಯಾಲಯದಲ್ಲಿ ಇಷ್ಟೆಲ್ಲಾ ನಡೆಯುತ್ತಿದ್ದರೂ ವೈದ್ಯಕೀಯ ಶಿಕ್ಷಣ ಸಚಿವ ಡಾ.ಶರಣ್​ ಪ್ರಕಾಶ್​ ಪಾಟೀಲ್​, ವಿಶ್ವವಿದ್ಯಾಲಯದ ಕುಲಪತಿ ಡಾ.ರವೀಂದ್ರನಾಥ್​ ಅವರಾಗಲಿ ಇದರತ್ತ ಗಮನವನ್ನೇ ಹರಿಸಿಲ್ಲ ಎನ್ನಲಾಗಿದೆ.

ವರದಿ: ಜಿ.ಮಹಾಂತೇಶ್​​