ಟಿಕ್ ಟಾಕ್ ದುರಂತ : ನೋಡ ನೋಡುತ್ತಿದ್ದಂತೆ ಕೆರೆಯಲ್ಲಿ ಮುಳುಗಿ ಯುವಕ ಸಾವು

ಟಿಕ್ ಟಾಕ್ ವಿಡಿಯೋ ದುರಂತಗಳು ಪದೇ ಪದೇ ವರದಿಯಾಗುತ್ತಲೇ ಇರುತ್ತದೆ. ಇದೀಗ ತೆಲಂಗಾಣದಲ್ಲಿಯೂ ಕೂಡ ಯುವಕನೋರ್ವ ತನ್ನ ಪ್ರಾಣವನ್ನೇ ಕಳೆದುಕೊಂಡಿದ್ದಾನೆ. 

ಹೈದರಾಬಾದ್ [ಜು.12] : ಟಿಕ್ ಟಾಕ್ ವಿಡಿಯೋಗಳು ಈಗಾಗಲೇ ಅನೇಕ ಜೀವಗಳನ್ನು ಬಲಿ ಪಡೆದುಕೊಂಡಿರುವ ನಿದರ್ಶನಗಳು ನಮ್ಮ ಮುಂದೆ ಇದ್ದು, ತೆಲಂಗಾಣದಲ್ಲಿಯೂ ವಿಡಿಯೋ ಮಾಡುವ ವೇಳೆ ಯುವಕನೋರ್ವ ಪ್ರಾಣ ಕಳೆದುಕೊಂಡ ದುರಂತವೊಂದು ನಡೆದಿದೆ.

ಟಿಕ್ ಟಾಕ್ ವಿಡಿಯೋ ಮಾಡುತ್ತಿದ್ದ ವೇಳೆ ಕೆರೆಯಲ್ಲಿ ಮುಳುಗಿ 24 ವರ್ಷದ ಯುವಕ ಸಾವಿಗೀಡಾಗಿದ್ದಾರೆ. 

ನರಸಿಂಹ ಎನ್ನುವ ಯುವಕ ತನ್ನ ಸಂಬಂಧಿಯೊಂದಿಗೆ ಕೆರೆಗೆ ಈಜಲು ತೆರಳಿದ್ದಾಗ  ಇಬ್ಬರೂ ಕೂಡ ಕೆರೆಗೆ ಇಳಿದಿದ್ದು, ವಿಡಿಯೋ ಮಾಡುತ್ತಿದ್ದರು. ವಿಡಿಯೋಗೆ  ಪೋಸ್ ನೀಡುತ್ತಿದ್ದ ನರಸಿಂಹ ಆಳವಾದ ಜಾಗಕ್ಕೆ ತೆರಳಿ ಜಾರಿ ಬಿದ್ದಿದ್ದಾನೆ.

ಇಬ್ಬರಿಗೂ ಕೂಡ ಈಜು ಬಾರದ ಕಾರಣ ರಕ್ಷಣೆಗೆ ಕೂಗಿಕೊಂಡರು ಸ್ಥಳದಲ್ಲಿ ಯಾರೂ ಇರದ ಕಾರಣ ಮೇಲೇಳಲಾಗದೇ ನರಸಿಂಹ ಅಲ್ಲಿಯೇ ಮೃತಪಟ್ಟಿದ್ದಾನೆ. 

ನೀರಿನಲ್ಲಿ ಮುಳುಗುವ ಮೊದಲು ಆತ ನೀರಿನಲ್ಲಿ ನೃತ್ಯ ಮಾಡಿದ್ದು, ದೂರ ದೂರ ಹೋಗಿ ಮುಳುಗಿರುವ ದೃಶ್ಯ ಇದೀಗ ಎಲ್ಲೆಡೆ ವೈರಲ್ ಆಗಿದೆ.