ಸುಶಾಂತ್ ಕುಟುಂಬಕ್ಕೆ ಮತ್ತೊಂದು ಶಾಕ್: ಆಘಾತ ತಡೆಯಲಾರದೆ ಅತ್ತಿಗೆ ನಿಧನ!

ತೆರೆ ಮೇಲಿನ ಧೋನಿ ಎಂದೇ ಖ್ಯಾತಿ ಗಳಿಸಿದ್ದ ಸುಶಾಂತ್ ಆತ್ಮಹತ್ಯೆ| ದೇಶವನ್ನೇ ಬೆಚ್ಚಿ ಬೀಳಿಸಿದ ಸುಶಾಂತ್ ನಿಧನ ವಾರ್ತೆ| ಮೈದುನನ ಸಾವಿನ ಆಘಾತ ತಡೆಯಲಾರದೆ ಅತ್ತ ಜೀವನ ಪಯಣ ಮುಗಿಸಿದ ಸುಶಾಂತ್ ಅತ್ತಿಗೆ| ಸುಶಾಂತ್ ಕುಟುಂಬಕ್ಕೆ ಎರಡೆರಡು ಆಘಾತ

ಪಾಟ್ನಾ(ಜೂ.16): ಸುಶಾಂತ್ ಸಿಂಗ್ ನಿಧನ ಬಾಲಿವುಡ್‌ ಇಂಟಸ್ಟ್ರಿಗೆ ಬಹುದೊಡ್ಡ ಶಾಕ್ ನೀಡಿದ್ದು, ತೆರೆ ಮೇಲಿನ ಧೋನಿ ಕಳೆದುಕೊಂಡ ಬಾಲಿವುಡ್‌ ಮಂದಿ ಶೋಕದಲ್ಲಿದ್ದಾರೆ. ಬಾಲಿವುಡ್ ತನ್ನ ಯುವ ಹಾಗೂ ಪ್ರತಿಭಾನ್ವಿತ ನಟನನ್ನು ಕಳೆದುಕೊಂಡಿದೆ. 34 ವರ್ಷದ ಸುಶಾಂತ್ ಭಾನುವಾರ ತನ್ನ ಬಾಂದ್ರಾದ ಮನೆಯಲ್ಲಿ ನೇಣು ಬಿಗಿದ ಸ್ಥಿತಿಯಲ್ಲಿ ಪತ್ತೆಯಾಗಿದ್ದರು. ಖಿನ್ನತೆಯಿಂದ ಬಳಲುತ್ತಿದ್ದ ಸುಶಾಂತ್ ಆತ್ಮಹತ್ಯೆ ಮಾಡಿಕೊಂಡಿದ್ದಾರೆಂದು ಪ್ರಾಥಮಿಕ ವರದಿಯಲ್ಲಿ ತಿಳಿಸಲಾಗಿದೆ.

ಆದರೀಗ ಸದ್ಯ ಇತ್ತೀಚೆಗೆ ಸಿಕ್ಕ ಮಾಹಿತಿ ಅನ್ವಯ ಸುಶಾಂತ್ ಕಸಿನ್ ಹೆಂಡತಿ, ಅತ್ತಿಗೆ ಸುಧಾ ದೇವಿ ಕೂಡಾ ಬಿಹಾರದ ಪುರ್ನಿಯಾದಲ್ಲಿರುವ ತಮ್ಮ ನಿವಾಸದಲ್ಲಿ ಕೊನೆಯುಸಿರೆಳೆದಿದ್ದಾರೆ.  ನಟ ಸುಶಾಂತ್‌ ಇನ್ನಿಲ್ಲವೆಂಬ ಆಘಾತ ತಡೆದುಕೊಳ್ಳಲಾರದೆ ಅವರು ಕೊನೆಯುಸಿರೆಳೆದಿದ್ದಾರೆನ್ನಲಾಗಿದೆ. ಇತ್ತ ಮುಂಬೈನಲ್ಲಿ ಸುಶಾಂತ್ ಅಂತಿಮ ಕ್ರಿಯೆ ನಡೆಯುತ್ತಿದ್ದರೆ, ಅತ್ತ ಅತ್ತಿಗೆ ಕೊನೆಯುಸಿರೆಳೆದಿದ್ದಾರೆ. ಅಲ್ಲದೇ ಸುಶಾಂತ್ ನಿಧನದ ಸುದ್ದಿ ತಿಳಿದಾಗಿನಿಂದ ಸುಧಾ ದೇವಿ ಊಟ, ತಿಂಡಿಯನ್ನೂ ಬಿಟ್ಟಿದ್ದರೆಂದು ವರದಿಗಳು ತಿಳಿಸಿವೆ.

ಇನ್ನು ಸುಶಾಂತ್ ನಿಧನದ ಬೆನ್ನಲ್ಲೇ ಪ್ರಧಾನ ಮಂತ್ರಿ ನರೇಂದ್ರ ಮೋದಿ ಸೇರಿದಂತೆ ಬಾಲಿವುಡ್‌ ಸೆಲೆಬ್ರಿಟಿಗಳು ಸೋಶಿಯಲ್ ಮೀಡಿಯಾ ಮೂಲಕ ಸಂತಾಪ ವ್ಯಕ್ತಪಡಿಸಿದ್ದಾರೆ. ಈ ನಡುವೆ ಖಿನ್ನತೆಯಿಂದ ಬಳಲುತ್ತಿದ್ದ ನಟ ಸುಶಾಂತ್‌ಗೆ ಅಗತ್ಯವೆನಿಸುವ ಪರಿಸ್ಥಿತಿಯಲ್ಲಿ ಬಾಲಿವುಡ್‌ ಮಂದಿ ಅವರಿಗೆ ಸಹಕಾರ ನೀಡಿರಲಿಲ್ಲ ಎಂಬ ಆರೋಪವೂ ಕೇಳಿ ಬಂದಿದೆ. 

ನಿತೀಶ್‌ ತಿವಾರಿಯ ಚಿಚೋರೆ ಸಿನಿಮಾದಲ್ಲಿ ಕೊನೆಯ ಬಾರಿ ಕಾಣಿಸಿಕೊಂಡಿದ್ದ ಸುಶಾಂತ್, ಅದೆಷ್ಟೇ ಕಷ್ಟದ ಪರಿಸ್ಥಿತಿ ಇದ್ದರೂ ಆತ್ಮಹತ್ಯೆ ಮಾಡಿಕೊಳ್ಳಬಾರದೆಂಬ ಸಂದೇಶ ಸಾರಿದ್ದರು. ಆದರೆ ಮಾನಸಿಕ ಒತ್ತಡ ತಡೆಯಲಾರದೆ ಸುಶಾಂತ್ ಖುದ್ದು ತಾವೇ ಆತ್ಮಹತ್ಯೆಗೆ ಶರಣಾಗಿದ್ದಾರೆ.