ನೋಟ್‌ ಬ್ಯಾನ್‌ ನಂತರ ಜನಸಾಮಾನ್ಯರಿಗೆ ಏನೆಲ್ಲ ಸಮಸ್ಯೆಗಳು ಎದುರಾದವು, ಯಾರೆಲ್ಲ ಅದರ ಲಾಭ ಪಡೆದರು, ಕಪ್ಪು ಹಣ ಹೊಂದಿದವರು ಹೇಗೆ ಜನ್ಧನ್ ಯೋಜನೆಯನ್ನು ದುರುಪಯೋಗ ಪಡಿಸಿಕೊಂಡರು ಎನ್ನುವ ಕತೆæಯನ್ನು ಕಾಮನ್‌ ಮ್ಯಾನ್‌ ಹಾಗೂ ರಾಯಲ್‌ ಮ್ಯಾನ್‌ ನಡುವಿನ ಭಾವನೆಗಳು, ಬದುಕಿನ ವೈರುದ್ಯಗಳ ಮೂಲಕ ಜನ್ಧನ್ ಚಿತ್ರದಲ್ಲಿ ಹಿಡಿದಿಡುವ ಪ್ರಯತ್ನ ಮಾಡಿದ್ದಾರೆ ನಿರ್ದೇಶಕ ನಾಗಚಂದ್ರ.
ದೇಶಾದ್ರಿ ಹೊಸ್ಮನೆ
ಸಿನಿಮಾದೊಳಗೇ ನಡೆಯುವ ಸಿನಿಮಾ ಕತೆ ಇದು. ಸಿನಿಮಾವನ್ನು ಆಗಾಧವಾಗಿ ಪ್ರೀತಿಸುವ ಒಬ್ಬ ಯುವ ನಿರ್ದೇಶಕನ ಸ್ವಾಭಿಮಾನದ ಬದುಕು ಮತ್ತು ಅವನನ್ನೇ ಬಳಸಿಕೊಂಡು ಕಪ್ಪು ಹಣವನ್ನು ಸಿನಿಮಾ ನಿರ್ಮಾಣದ ಮೇಲೆ ಹಾಕಿ ಅದನ್ನು ವೈಟ್‌ ಮನಿಯಾಗಿ ಪರಿವರ್ತಿಸಲು ಹೊರಟವರ ಕತೆ ಇಲ್ಲಿದೆ. ಒಬ್ಬನದು ಹಸಿವಿಗಾಗಿ ನಡೆಯುವ ಹೋರಾಟ, ಇನ್ನು ಕೆಲವರದು ಅಕ್ರಮವಾಗಿ ಸಂಪಾದಿಸಿದ್ದನ್ನು ಅಕ್ರಮವಾಗಿಯೇ ಉಳಿಸಿಕೊಳ್ಳಬೇಕೆನ್ನುವ ಹಪಾಹಪಿ. ಅದರಲ್ಲಿ ಸ್ವಾಭಿಮಾನಿ ನಿರ್ದೇಶಕ ಹೇಗೆ ಬಲಿಪಶುವಾದ, ಅದಕ್ಕೆ ಯಾರೆಲ್ಲ ಕಾರಣವಾದರೂ ಎನ್ನುವುದನ್ನು ಈ ಸಿನಿಮಾ, ಮನಸ್ಸಿಗೆ ತಟ್ಟುವಂತೆ ಹಾಗೆ ತೆರೆದಿಡುತ್ತದೆ. ನೋಟ್‌ ಬ್ಯಾನ್‌ ಕುರಿತೇ ಈಗಾಗಲೇ ಹಲವು ಸಿನಿಮಾ ಬಂದರೂ, ಈ ಸಿನಿಮಾ ವಿಶೇಷ ಎನಿಸುವುದು ಒಬ್ಬ ಸ್ವಾಭಿಮಾನಿ ನಿರ್ದೇಶಕ ಮತ್ತು ಕಪ್ಪು ಹಣವನ್ನು ಸಿನಿಮಾ ನಿರ್ಮಾಣದ ಮೇಲೆ ಹಾಕಬಹುದೆನ್ನುವ ಉಳ್ಳವರ ಮನಸ್ಥಿತಿಯನ್ನು ತೆರೆದಿಡುವ ಕಾರಣಕ್ಕೆ.
ಚಿತ್ರ ವಿಮರ್ಶೆ: ಶ್ರೀ ಭರತ ಬಾಹುಬಲಿ
ಕತೆಯ ಮೂಲಕ ಗಮನ ಸೆಳೆಯುವ ಈ ಚಿತ್ರವು ಅನೇಕ ಕೊರತೆಗಳಲ್ಲಿ ಸೊರಗಿದೆ. ಒಂದು ಪಕ್ಕಾ ಕಮರ್ಷಿಯಲ್‌ ಸಿನಿಮಾದಲ್ಲಿರಬೇಕಾದ ಪ್ರೀತಿ, ಪ್ರೇಮ, ಸೆಂಟಿಮೆಂಟ್‌, ಸಾಂಗ್ಸ್‌, ಆ್ಯಕ್ಷನ್‌ ಎನ್ನುವ ಮಸಾಲೆ ಅಂಶಗಳಿದ್ದರೂ, ಪ್ರೇಕ್ಷಕರನ್ನು ಯಾವು ಕೂಡ ಗಾಢವಾಗಿ ತಟ್ಟುವುದಿಲ್ಲ. ಹಾರರ್‌ ಅಂಶಗಳಿವೆ ಎನ್ನುವ ಹಾಗೆ ಆರಂಭದಲ್ಲೇ ಕುತೂಹಲ ಹುಟ್ಟಿಸುವ ಸಿನಿಮಾ, ಅದ್ಯಾಕೆ ಎನ್ನುವುದನ್ನು ಎಲ್ಲಿಯೂ ರಿವೀಲ್‌ ಮಾಡದೇ ನಿರಾಸೆಗೊಳಿಸಿ ಮುಗಿದು ಹೋಗುತ್ತದೆ.
ಪಾತ್ರವರ್ಗ ಮತ್ತು ಹಿಡಿತವಿಲ್ಲದ ನಿರೂಪಣೆ, ಸಾಧಾರಣ ತಾಂತ್ರಿಕತೆ ಚಿತ್ರಕ್ಕೆ ತೊಡಕಾಗಿವೆ. ಸುನೀಲ್‌ ಜೋಶಿ ಹಾಗೂ ರಚನಾ ಈ ಚಿತ್ರದ ನಾಯಕ-ನಾಯಕಿ.ಅವರಿಬ್ಬರ ಅಭಿನಯಕ್ಕೆ ಇಲ್ಲಿ ಅಷ್ಟಾಗಿ ಜಾಗ ಸಿಕ್ಕಿಲ್ಲ. ನಿರ್ದೇಶಕನಾಗಿ ಬರುವ ಅರುಣ್‌ ಈ ಚಿತ್ರದ ಹೈಲೈಟ್‌. ಅವರೇ ಇಡೀ ಸಿನಿಮಾವನ್ನು ತಮ್ಮ ಮಾತು ಮತ್ತು ನಟನೆಯ ಮೂಲಕ ಸರಗವಾಗಿ ಸಾಗಿಸಿಕೊಂಡು ಬರುತ್ತಾರೆ. ಆ ಕಾರಣಕ್ಕೆ ಸಿನಿಮಾ ನಡುವಲ್ಲಿ ಬೇಸರ ಹುಟ್ಟಿಸಿದರೂ, ಕ್ಲೈಮ್ಯಾಕ್ಸ್‌ ವರೆಗೂ ನೋಡಿಸಿಕೊಂಡು ಬರುತ್ತದೆ.