ಕೇಬಲ್ ಟಿವಿ ಗ್ರಾಹಕರಿಗೆ ಇಲ್ಲಿಗೆ ಭರ್ಜರಿ ಗುಡ್ ನ್ಯೂಸ್ ಶೀಘ್ರದಲ್ಲೇ ಕೇಬಲ್ ಚಾನೆಲ್ಗಳ ಶುಲ್ಕ ಭಾರೀ ಪ್ರಮಾಣದಲ್ಲಿ ಕಡಿಮೆಯಾಗಲಿದೆ.
ನವದೆಹಲಿ [ಜ.02]: ಇತ್ತೀಚೆಗೆ ಜಾರಿಗೆ ಬಂದ ಕೇಬಲ್ ಟೀವಿ ನಿಯಮಗಳು ಗ್ರಾಹಕರಿಗೆ ಹೊರೆಯಾಗುತ್ತಿರುವುದನ್ನು ಮನಗಂಡಿರುವ ದೂರಸಂಪರ್ಕ ನಿಯಂತ್ರಣಾ ಸಂಸ್ಥೆಯದ ‘ಟ್ರಾಯ್’ ಕೇಬಲ್ ಟೀವಿ ನಿಯಮಗಳಲ್ಲಿ ಬುಧವಾರ ಹಲವು ಮಹತ್ವದ ಬದಲಾವಣೆಗಳನ್ನು ತಂದಿದೆ.
ಈ ಹೊಸ ನಿಯಮಗಳಿಂದಾಗಿ ಗ್ರಾಹಕರು ಕಡಿಮೆ ಶುಲ್ಕದಲ್ಲೇ ಹೆಚ್ಚಿನ ಉಚಿತ ಚಾನೆಲ್ಗಳನ್ನು ಪಡೆಯಬಹುದಾಗಿದೆ. ಅಲ್ಲದೆ ಟೀವಿ ಚಾನೆಲ್ಗಳು ವಿಧಿಸುತ್ತಿದ್ದ ದರಗಳ ಮೇಲೂ ಕಡಿವಾಣ ಹಾಕಿದೆ. ಮತ್ತೊಂದೆಡೆ ಪ್ರಸಾರಕರು ಕ್ಯಾರಿಯೇಜ್ ಶುಲ್ಕದ ರೂಪದಲ್ಲಿ ಡಿಪಿಒ (ಡಿಸ್ಟ್ರಿಬ್ಯೂಷನ್ ಫ್ಲಾಟ್ಫಾಮ್ರ್ ಆಪರೇಟರ್ಸ್)ಗಳಿಗೆ ನೀಡಬೇಕಿದ್ದ ಶುಲ್ಕದ ಮೇಲೂ ಗರಿಷ್ಠ ಮಾಸಿಕ 4 ಲಕ್ಷ ರು.ಗಳ ಮಿತಿಯನ್ನು ಹೇರಲಾಗಿದೆ. ಈ ಎಲ್ಲಾ ಬೆಳವಣಿಗೆಗಳು ಶೀಘ್ರವೇ ಕೇಬಲ್ ಟೀವಿ ಮತ್ತು ಡಿಟಿಎಚ್ ಬಳಕೆದಾರರಿಗೆ ಇನ್ನಷ್ಟುಅಗ್ಗದ ದರದಲ್ಲಿ ಸೇವೆಯನ್ನು ಒದಗಿಸಲಿವೆ ಎನ್ನಲಾಗಿದೆ.
ಜ.15ರೊಳಗೆ ಈ ಎಲ್ಲಾ ನಿಯಮಗಳನ್ನು ಪ್ರಸಾರಕರು, ತಮ್ಮ ವೆಬ್ಸೈಟ್ಗಳಲ್ಲಿ ಪ್ರಕಟಿಸಬೇಕು. ಹೊಸ ನೀತಿ 2020ರ ಮಾ.1ರಿಂದ ಬರಲಿದೆ.
ಹೊಸ ನಿಯಮದ ಮುಖ್ಯಾಂಶಗಳು.
- ಎನ್ಸಿಎಫ್ ಶುಲ್ಕ (ಮಾಸಿಕ ಕಡ್ಡಾಯವಾಗಿ ಪಾವತಿಸಬೇಕಾದ)ವನ್ನು 130 ರು.(ತೆರಿಗೆ ಹೊರತುಪಡಿಸಿ)ಗೆ ಸೀಮಿತಗೊಳಿಸಲಾಗಿದೆ. ಅಂದರೆ ಅಂದಾಜು 150 ರು.ಗೆ 200 ಉಚಿತ ಚಾನೆಲ್ಗಳನ್ನು ನೀಡಬೇಕು. ಈ ಮೊದಲು 100 ಉಚಿತ ಚಾನೆಲ್ಗಳನ್ನು ನೀಡಬೇಕು ಎಂಬ ನಿಯಮವಿತ್ತು.
ದಶಕದ ನೆನಪು: ಹತ್ತಿರವಾಯ್ತು ಕ್ಯಾಬ್, ಮನೆಗೇ ಬರುತ್ತೆ ಬಯಸಿದ ತಿನಿಸು!...
- ಎನ್ಸಿಎಫ್ ಶುಲ್ಕ 160 ರು. (ತೆರಿಗೆ ಹೊರತುಪಡಿಸಿ) ಪಡೆದರೆ, ಅದಕ್ಕೆ ಲಭ್ಯವಿರುವ ಎಲ್ಲಾ ಉಚಿತ ಚಾನೆಲ್ಗಳನ್ನು ಗ್ರಾಹಕರಿಗೆ ನೀಡಬೇಕು.
- ಬಳಕೆದಾರನೊಬ್ಬನ ಹೆಸರಲ್ಲಿ ಒಂದಕ್ಕಿಂತ ಹೆಚ್ಚು ಸಂಪರ್ಕ ಇದ್ದರೆ, ಆತನಿಗೆ ಎರಡು ಮತ್ತು ತದನಂತರದ ಪ್ರತಿ ಸಂಪರ್ಕಕ್ಕೆ ಮೊದಲ ಸಂಪರ್ಕದ ಶೇ.40ರಷ್ಟನ್ನು ಮಾತ್ರವೇ ಎನ್ಸಿಎಫ್ ಶುಲ್ಕವಾಗಿ ವಿಧಿಸಬಹುದು.
- ಕೇಂದ್ರ ಮಾಹಿತಿ ಮತ್ತು ಪ್ರಸಾರ ಸಚಿವಾಲಯವು ಕಡ್ಡಾಯವಾಗಿ ಪ್ರಸಾರ ಮಾಡಲೇಬೇಕು ಎಂದು ಪಟ್ಟಿಮಾಡಿರುವ ಚಾನೆಲ್ಗಳು ಎನ್ಸಿಎಫ್ನ 200 ಚಾನೆಲ್ಗಳ ವ್ಯಾಪ್ತಿಗೆ ಬರದು. ಈ ಚಾನೆಲ್ಗಳನ್ನು ಹೊರತುಪಡಿಸಿ ಅವರು 200 ಉಚಿತ ಚಾನೆಲ್ಗಳನ್ನು 150 ರು.ಗೆ ನೀಡಬೇಕು.
- ಗುಚ್ಛಗಳಲ್ಲಿ ಲಭ್ಯವಿರುವ ಚಾನೆಲ್ಗಳನ್ನು ಗ್ರಾಹಕನೊಬ್ಬ ಪ್ರತ್ಯೇಕವಾಗಿ ಪಡೆಯಬಯಸಿದರೆ, ಆತನಿಗೆ ಸೇವಾ ಕಂಪನಿಗಳು ಪ್ರತಿ ಚಾನೆಲ್ಗೆ ವಿಧಿಸುವ ಶುಲ್ಕವು, ಗುಚ್ಛದಲ್ಲಿ ಲಭ್ಯವಿರುವ ಎಲ್ಲಾ ಚಾನೆಲ್ಗಳ ಸರಾಸರಿ ಶುಲ್ಕದ ಒಂದೂವರೆ ಪಟ್ಟಿಗಿಂತ ಹೆಚ್ಚಿರಬಾರದು. (ಉದಾಹರಣೆಗೆ ಒಂದು ಗುಚ್ಛದಲ್ಲಿ 5 ಚಾನೆಲ್ಗಳಿದ್ದು ಅದಕ್ಕೆ 40 ರು. ಶುಲ್ಕ ಇದೆ ಎಂದಿಟ್ಟುಕೊಳ್ಳಿ. ಆಗ 5 ಚಾನೆಲ್ಗಳ ಸರಾಸರಿ ಶುಲ್ಕ 8 ರು. ಆಗುತ್ತದೆ. ಹೀಗಾಗಿ ಈ ಗುಚ್ಛದಲ್ಲಿ ಯಾವುದೇ ಚಾನೆಲ್ ಅನ್ನು ಗ್ರಾಹಕ ಪ್ರತ್ಯೇಕವಾಗಿ ಬಯಸಿದರೆ ಅದರ ಶುಲ್ಕ 12 ರು.ಗಿಂತ ಹೆಚ್ಚಿರಬಾರದು)
- 12 ರು. ಮತ್ತು ಅದಕ್ಕಿಂತ ಕಡಿಮೆ ಶುಲ್ಕ ಹೊಂದಿರುವ ಚಾನೆಲ್ಗಳನ್ನು ಮಾತ್ರವೇ ಪ್ರಸಾರಕರು ಚಾನೆಲ್ಗಳ ಗುಚ್ಛದಲ್ಲಿ ಸೇರಿಸಲು ಅವಕಾಶವಿರುತ್ತದೆ.
- ಪ್ರಸಾರಕರು ಕ್ಯಾರಿಯೇಜ್ ಶುಲ್ಕದ ರೂಪದಲ್ಲಿ ಡಿಪಿಒ (ಡಿಸ್ಟ್ರಿಬ್ಯೂಷನ್ ಫ್ಲಾಟ್ಫಾಮ್ರ್ ಆಪರೇಟರ್ಸ್)ಗಳಿಗೆ ನೀಡಬೇಕಿದ್ದ ಶುಲ್ಕದ ಮೇಲೂ ಗರಿಷ್ಠ ಮಾಸಿಕ 4 ಲಕ್ಷ ರು.ಗಳ ಮಿತಿ ಹೇರಲಾಗಿದೆ.