ರಂಜಾನ್‌ ಟೈಮ್‌ನಲ್ಲಿ ಮುಸ್ಲಿಮರಿಗೆ ಕೆಲಸದ ವಿನಾಯಿತಿ, ತೆಲಂಗಾಣ ಸರ್ಕಾರ ನಿರ್ಧಾರ ಸಮರ್ಥಿಸಿಕೊಂಡ ಕಾಂಗ್ರೆಸ್‌ ಸಚಿವ!

ರಂಜಾನ್ ಸಮಯದಲ್ಲಿ ಮುಸ್ಲಿಂ ಉದ್ಯೋಗಿಗಳಿಗೆ ಕಡಿಮೆ ಕೆಲಸದ ಸಮಯವನ್ನು ಅನುಮತಿಸುವ ತೆಲಂಗಾಣ ಮತ್ತು ಆಂಧ್ರಪ್ರದೇಶ ಸರ್ಕಾರಗಳ ನಿರ್ಧಾರವು ವಿವಾದಕ್ಕೆ ಕಾರಣವಾಗಿದೆ. ಬಿಜೆಪಿ ಈ ಕ್ರಮವನ್ನು ತುಷ್ಟೀಕರಣ ಎಂದು ಟೀಕಿಸಿದರೆ, ಸರ್ಕಾರವು ಇದನ್ನು ದೀರ್ಘಕಾಲದಿಂದಲೂ ಇರುವ ನೀತಿ ಎಂದು ಸಮರ್ಥಿಸಿಕೊಂಡಿದೆ.

ಹೈದರಾಬಾದ್‌ (ಫೆ.19): ರಂಜಾನ್ ಸಮಯದಲ್ಲಿ ಮುಸ್ಲಿಂ ಉದ್ಯೋಗಿಗಳಿಗೆ ಕೆಲಸದ ಸಮಯವನ್ನು ಕಡಿಮೆ ಮಾಡುವ ರಾಜ್ಯ ಸರ್ಕಾರದ ನಿರ್ಧಾರವನ್ನು ತೆಲಂಗಾಣ ಸಚಿವ ಪೊನ್ನಂ ಪ್ರಭಾಕರ್ ಬುಧವಾರ ಸಮರ್ಥಿಸಿಕೊಂಡಿದ್ದಾರೆ. ಕಳೆದ 25 ವರ್ಷಗಳಿಂದ ಇದೇ ರೀತಿಯ ನಿಯಮಗಳು ಅಸ್ತಿತ್ವದಲ್ಲಿವೆ ಎಂದು ಹೇಳಿದ್ದಾರೆ. ಈ ಕ್ರಮವನ್ನು ರಾಜಕೀಯಗೊಳಿಸಿದ್ದಕ್ಕಾಗಿ ಬಿಜೆಪಿಯನ್ನು ಟೀಕಿಸಿದ ಅವರು, "ಆಂಧ್ರಪ್ರದೇಶದಲ್ಲಿ ನಿಮ್ಮ (ಬಿಜೆಪಿಯ) ಸಮ್ಮಿಶ್ರ ಸರ್ಕಾರವಿದೆ. ಫೆಬ್ರವರಿ 11 ರಂದು ಎಲ್ಲಾ ಮುಸ್ಲಿಂ ಉದ್ಯೋಗಿಗಳು ರಂಜಾನ್ ತಿಂಗಳಲ್ಲಿ ನಮಾಜ್‌ಗೆ ಹೋಗಬಹುದು ಎಂದು ಆದೇಶ ಹೊರಡಿಸಿದೆ. ಇದು ನಮ್ಮ ಹೊಸ ನಿರ್ಧಾರವೇನಲ್ಲ. ಕಳೆದ 25 ವರ್ಷಗಳಿಂದ ಇದು ನಡೆಯುತ್ತಿದೆ. ನಾವು ಕೂಡ ಇದೇ ರೀತಿಯ ಆದೇಶವನ್ನು ಹೊರಡಿಸಿದ್ದೇವೆ ಮತ್ತು ಈಗ ಅವರು ಅದರ ಮೇಲೆ ರಾಜಕೀಯ ಮಾಡುತ್ತಿದ್ದಾರೆ. ಅಭಿವೃದ್ಧಿಯ ಮೇಲೆ ರಾಜಕೀಯ ಇರಬೇಕು ಮತ್ತು ಎಲ್ಲವೂ ಧರ್ಮದ ಬಗ್ಗೆ ಇರಬಾರದು' ಎಂದು ಹೇಳಿದ್ದಾರೆ.

ಈ ನಡುವೆ ರಂಜಾನ್ ಸಮಯದಲ್ಲಿ ಮುಸ್ಲಿಂ ಉದ್ಯೋಗಿಗಳು ಒಂದು ಗಂಟೆ ಮುಂಚಿತವಾಗಿ ಕೆಲಸ ತೊರೆಯಲು ಅವಕಾಶ ನೀಡುವ ತೆಲಂಗಾಣ ಮತ್ತು ಆಂಧ್ರಪ್ರದೇಶ ಸರ್ಕಾರಗಳ ನಿರ್ಧಾರವನ್ನು ಬಿಜೆಪಿ ವಕ್ತಾರ ಪ್ರಕಾಶ್ ರೆಡ್ಡಿ ಟೀಕಿಸಿದರು, ಇದು ತುಷ್ಟೀಕರಣದ ಕ್ರಮ ಎಂದು ಕರೆದಿದ್ದಾರೆ.

'ಇಫ್ತಾರ್' ಪದ್ಧತಿಗೆ ಗೌರವ ನೀಡುವಾಗ, ಹಿಂದೂ ಹಬ್ಬಗಳಿಗೂ ಇದೇ ರೀತಿಯ ಪರಿಗಣನೆಯನ್ನು ನೀಡಬೇಕು, 'ಅಯ್ಯಪ್ಪ ಸ್ವಾಮಿ ಪೂಜೆ'ಯಂತಹ ಸಂದರ್ಭಗಳಲ್ಲಿ ವಿಶೇಷ ರಜೆಯನ್ನು ನೀಡಬೇಕು ಎಂದು ಬಿಜೆಪಿ ವಕ್ತಾರ ಪ್ರಕಾಶ್ ರೆಡ್ಡಿ ಸಲಹೆ ನೀಡಿದರು.

ತೆಲಂಗಾಣ ಸರ್ಕಾರವು ರಾಜ್ಯದಲ್ಲಿ ಕೆಲಸ ಮಾಡುತ್ತಿರುವ ಎಲ್ಲಾ ಸರ್ಕಾರಿ ಮುಸ್ಲಿಂ ನೌಕರರು, ಶಿಕ್ಷಕರು, ಗುತ್ತಿಗೆ, ಹೊರಗುತ್ತಿಗೆ, ಮಂಡಳಿಗಳು, ನಿಗಮಗಳು ಮತ್ತು ಸಾರ್ವಜನಿಕ ವಲಯದ ನೌಕರರು ಮಾರ್ಚ್ 2 ರಿಂದ ಮಾರ್ಚ್ 31 ರವರೆಗೆ (ಎರಡೂ ದಿನಗಳು ಸೇರಿದಂತೆ) ಪವಿತ್ರ ರಂಜಾನ್ ಮಾಸದಲ್ಲಿ ಸಂಜೆ 4.00 ಗಂಟೆಗೆ ತಮ್ಮ ಕಚೇರಿಗಳು/ಶಾಲೆಗಳಿಂದ ಹೊರಡಲು ಅನುಮತಿ ನೀಡಿ ಸರ್ಕಾರಿ ಆದೇಶ ಹೊರಡಿಸಿದೆ, ಮೇಲಿನ ಅವಧಿಯಲ್ಲಿ ಸೇವೆಗಳ ತುರ್ತು ಪರಿಸ್ಥಿತಿಯಿಂದಾಗಿ ಅವರ ಉಪಸ್ಥಿತಿಯು ಅಗತ್ಯವಿರುವಾಗ ಹೊರತುಪಡಿಸಿ ಅವರು ತಮ್ಮ ಕೆಲಸದಿಂದ ಬೇಗನೆ ಹೊರಡಬಹುದು ಎಂದಿದೆ.

ತೆಲಂಗಾಣದ ರಂಜಾನ್ ಆದೇಶದ ನಂತರ, ಮುಖ್ಯಮಂತ್ರಿ ಚಂದ್ರಬಾಬು ನಾಯ್ಡು ಅವರ ತೆಲುಗು ದೇಶಂ ಪಕ್ಷ (ಟಿಡಿಪಿ) ನೇತೃತ್ವದ ಆಂಧ್ರಪ್ರದೇಶ ಸರ್ಕಾರವು, ಪವಿತ್ರ ರಂಜಾನ್ ತಿಂಗಳಲ್ಲಿ ಮುಸ್ಲಿಂ ಉದ್ಯೋಗಿಗಳು ಒಂದು ಗಂಟೆ ಮುಂಚಿತವಾಗಿ ಕೆಲಸ ಬಿಡಲು ಅವಕಾಶ ನೀಡುವುದಾಗಿ ಘೋಷಿಸಿದೆ.

Ramzan Row: ತೆಲಂಗಾಣ ಸರ್ಕಾರದಿಂದ ಮುಸ್ಲಿಂ ನೌಕರರಿಗೆ 1 ಗಂಟೆ ರಂಜಾನ್ ಬ್ರೇಕ್, ನವರಾತ್ರಿ ಉಪವಾಸಕ್ಕೆ ಏಕಿಲ್ಲ ? ಬಿಜೆಪಿ ಕಿಡಿ

ಕಾಂಗ್ರೆಸ್ ನೇತೃತ್ವದ ಸರ್ಕಾರದ ಅಡಿಯಲ್ಲಿ ನೆರೆಯ ರಾಜ್ಯವಾದ ತೆಲಂಗಾಣವು ಇದೇ ರೀತಿಯ ನಿರ್ದೇಶನವನ್ನು ಹೊರಡಿಸಿದ ಕೆಲವೇ ದಿನಗಳಲ್ಲಿ ಈ ನಿರ್ಧಾರ ಬಂದಿದೆ, ಇದನ್ನು ಬಿಜೆಪಿ "ತುಷ್ಟೀಕರಣ ರಾಜಕೀಯ" ಎಂದು ಟೀಕಿಸಿತು.