'ಸಾವು ಕೂಡ ಧರ್ಮವನ್ನೇ ನೋಡಿತು..' ಸೋಶಿಯಲ್‌ ಮೀಡಿಯಾದಲ್ಲಿ ಪಹಲ್ಗಾಮ್‌ ರಕ್ತದೋಕುಳಿಗೆ ಕಂಬನಿ!

ಪಹಲ್ಗಾಮ್‌ನಲ್ಲಿ ಉಗ್ರರು ಪ್ರವಾಸಿಗರ ಮೇಲೆ ದಾಳಿ ನಡೆಸಿ, ಧರ್ಮ ಖಚಿತಪಡಿಸಿಕೊಂಡು ಹಿಂದೂಗಳನ್ನು ಗುರಿಯಾಗಿಸಿಕೊಂಡು ಗುಂಡು ಹಾರಿಸಿದ್ದಾರೆ. ಟಿಆರ್‌ಎಫ್‌ ಈ ದಾಳಿಯ ಹೊಣೆ ಹೊತ್ತುಕೊಂಡಿದೆ. ೨೦೧೯ರ ಪುಲ್ವಾಮ ದಾಳಿಯ ನಂತರದ ಅತಿದೊಡ್ಡ ಭಯೋತ್ಪಾದಕ ದಾಳಿ ಇದಾಗಿದ್ದು, ಸಾಮಾಜಿಕ ಜಾಲತಾಣಗಳಲ್ಲಿ ಭಯೋತ್ಪಾದನೆಗೆ ಧರ್ಮದ ಲೇಪನ ನೀಡುತ್ತಿರುವುದರ ಬಗ್ಗೆ ಆಕ್ರೋಶ ವ್ಯಕ್ತವಾಗಿದೆ.

ಬೆಂಗಳೂರು (ಏ.22): ಪಹಲ್ಗಾಮ್‌ನಲ್ಲಿ ಪ್ರವಾಸಿಗರ ರಕ್ತದೋಕುಳಿ ಹರಿದಿದೆ. ಕ್ಷಣದಿಂದ ಕ್ಷಣಕ್ಕೆ ಬರುತ್ತಿರುವ ಮಾಹಿತಿಗಳು ಪೈಶಾಚಿಕ ಕೃತ್ಯದ ಮಾಹಿತಿಗಳನ್ನು ನೀಡಿದೆ. ಇದು ರಾಕ್ಷಸೀಯ ಕೃತ್ಯ ಅನ್ನೋದರಲ್ಲಿ ಯಾವುದೇ ಅನುಮಾನವಿಲ್ಲ. ಅದರೆ, ಇಂಥದ್ದೊಂದು ಮಾರಣಹೋಮವನ್ನು ಭಾರತ ಸರ್ಕಾರ ಹೇಗೆ ನಿಭಾಯಿಸಲಿದೆ ಅನ್ನೋದೇ ದೇಶದ ಜನರ ಮುಂದಿರುವ ಪ್ರಶ್ನೆಯಾಗಿದೆ.

ಇದರ ನಡುವೆ ಸೋಶಿಯಲ್‌ ಮೀಡಿಯಾದಲ್ಲಿ ಪಹಲ್ಗಾಮ್‌ ರಕ್ತದೋಕುಳಿಗೆ ಕಂಬಿನಿ ಮಿಡಿಯಲಾಗಿದೆ. ಪಹಲ್ಗಾಮ್‌ನ ಬೈಸರಣ್‌ ಬಳಿ ನೆರೆದಿದ್ದ ಪ್ರವಾಸಿಗರನ್ನು ಗುರಿಯಾಗಿ 5-6 ಉಗ್ರರು ದಾಳಿ ಮಾಡಿದ್ದು, ಸಿಕ್ಕ ಸಿಕ್ಕವರ ಮೇಲೆ ಗುಂಡು ಹಾರಿಸಿಲ್ಲ. ಬದಲಾಗಿ ಪ್ರವಾಸಿಗನ ಹೆಸರು ಹಾಗೂ ಧರ್ಮವನ್ನು ಕೇಳಿ ಆತನ ಮೇಲೆ ಗುಂಡು ಹಾರಿಸಿದ್ದರೆ. ಆತ ಹಿಂದು ಹೌದೋ ಅಲ್ಲವೋ ಅನ್ನೋದನ್ನ ಖಚಿತಪಡಿಸಿಕೊಳ್ಳಲು ಅವರ ಪ್ಯಾಂಟ್‌ಗಳನ್ನು ಎಳೆದು ಚೆಕ್‌ ಮಾಡಲಾಗಿದೆ. ಆ ನಂತರವೇ ಆತ ಹಿಂದು ಎಂದು ತಿಳಿದ ಬಳಿಕವೇ ಗುಂಡು ಹಾರಿಸಲಾಗಿದೆ. ಟಿಆರ್‌ಎಫ್‌ ಸಂಘಟನೆಯ ಉಗ್ರರು ಈ ಪಾಪಕೃತ್ಯದ ಹೊಣೆ ಹೊತ್ತುಕೊಂಡಿದೆ.

2019ರ ಫೆಬ್ರವರಿಯಲ್ಲಿ 40 ಜನ ಸಿಆರ್‌ಪಿಎಫ್‌ ಯೋಧರನ್ನು ನಡುರಸ್ತೆಯಲ್ಲಿ ಆತ್ಮಾಹುತಿ ದಾಳಿ ಮಾಡಿ ಕೊಲ್ಲಲಾಗಿತ್ತು. ಅದರ ನಂತರ ನಡೆದಿರುವ ಅತಿದೊಡ್ಡ ಟೆರರಿಸ್ಟ್‌ ದಾಳಿ ಇದಾಗಿದ್ದು, 'ಈಗ ಸಾವು ಕೂಡ ಧರ್ಮವನ್ನೇ ನೋಡಿದೆ' ಎಂದು ಅಮಿತ್‌ ಸೋನಿ ಎನ್ನುವವರು ಟ್ವೀಟ್‌ ಮಾಡಿದ್ದಾರೆ.

'ಹಿಂದಿ, ಕನ್ನಡ, ತಮಿಳು, ಮರಾಠಿ.. ಇತರ ರಾಜ್ಯದ ಭಾಷೆಗಳು..ನಿಮ್ಮ ಯುದ್ಧ ಜಾತಿ, ಭಾಷೆ ಹಾಗೂ ರಾಜ್ಯಕ್ಕಾಗಿ ಆಗಿದೆ. ಆದರೆ, ಅವರು ಮಾತ್ರ ನಿನ್ನ ಧರ್ಮವನ್ನು ಕೇಳಿ ಕೊಲ್ಲುತ್ತಿದ್ದಾರೆ' ಅನ್ನೋ ಪೋಸ್ಟರ್‌ಗಳನ್ನು ಹಂಚಿಕೊಂಡಿದ್ದಾರೆ.

'ಅವರು ಆತನ ಧರ್ಮವನ್ನು ಕೇಳಿದರು. ಆತನ ಪ್ಯಾಂಟ್‌ ಎಳೆದು ಚೆಕ್‌ ಮಾಡಿದರು. ಆತ ಹಿಂದು ಅನ್ನೋದನ್ನ ಖಚಿತಪಡಿಸಿಕೊಂಡರು.ಆ ಬಳಿಕ ಗುಂಡಿಟ್ಟರು. ಇದೆಲ್ಲಾ ಆದರೂ ಟೆರರಿಸಂಗೆ ಧರ್ಮ ಅನ್ನೋದಿಲ್ಲ' ಎಂದು ಪೋಸ್ಟ್‌ ಹಂಚಿಕೊಂಡಿದ್ದಾರೆ.

'ಅವರು ಇವನ ಐಡಿ ಕಾರ್ಡ್‌ ನೋಡಿದರು. ಆತನ ಪ್ಯಾಂಟ್‌ಅನ್ನು ಎಳೆದರು.ಆತ ಹಿಂದೂ ಅನ್ನೋದನ್ನ ಖಚಿತಪಡಿಸಿಕೊಂಡರು. ಬಳಿಕ ಪಾಯಿಂಟ್‌ ಬ್ಲ್ಯಾಂಕ್‌ ರೇಂಜ್‌ಅಲ್ಲಿ ಗುಂಡಿಟ್ಟರು. ಈಗಲೂ ಕೂಡ ಅವರು ಭಯೋತ್ಪಾದನೆಗೆ ಧರ್ಮವಿಲ್ಲ ಅನ್ನುತ್ತಾರೆ' ಎಂದು ಬೇಸರ ವ್ಯಕ್ತಪಡಿಸಿ ಪೋಸ್ಟರ್‌ ಹಂಚಿದ್ದಾರೆ.

'ಗುಂಡಿಟ್ಟವರು ಇವನ ರಾಜ್ಯ ಕೇಳಲಿಲ್ಲ. ಆತ ಭಾಷೆ ಯಾವುದು ಅನ್ನೋದನ್ನ ಕೇಳಲಿಲ್ಲ. ಆತನ ಜಾತಿ ಯಾವುದು ಎಂದೂ ಕೇಳಲಿಲ್ಲ. ಅವರು ಕೇಳಿದ್ದು ಒಂದೇ 'ಧರ್ಮ ಯಾವುದು' ಎಂದು ಪೋಸ್ಟರ್‌ ಹಂಚಿಕೊಂಡು ಆಕ್ರೋಶ ವ್ಯಕ್ತಪಡಿಸಿದ್ದಾರೆ.