Maharashtra Politics: ಆದಿತ್ಯ ಠಾಕ್ರೆ ನೋಡಿ 'ಮಿಯಾಂವ್ ಮಿಯಾಂವ್' ಎಂದ ಬಿಜೆಪಿ ಶಾಸಕ!

* ಆದಿತ್ಯ ಠಾಕ್ರೆ ಜೊತೆಗಿನ ಅನುಚಿತ ವರ್ತನೆಗೆ  ರಾಣೆಯ ಅಮಾನತಿಗೆ ಒತ್ತಾಯ * ‘ಮಿಯಾಂವ್’ ಎಂದು ಸದ್ದು ಮಾಡಿದ್ದ ರಾಣೆ * ರಾಜಕಾರಣಿಗಳ ವಿರುದ್ಧ ಅಸಭ್ಯ ವರ್ತನೆಗೆ ಅವಕಾಶ ನೀಡಬಾರದು

ಮುಂಬೈ(ಡಿ.29): ಮಹಾರಾಷ್ಟ್ರ ವಿಧಾನಸಭೆಯಲ್ಲಿ ಸೋಮವಾರ ಶಿವಸೇನೆ ಶಾಸಕರು ಭಾರತೀಯ ಜನತಾ ಪಕ್ಷದ (ಬಿಜೆಪಿ) ಶಾಸಕ ನಿತೇಶ್ ರಾಣೆ ಅವರ ರಾಜ್ಯ ಪರಿಸರ ಸಚಿವ ಆದಿತ್ಯ ಠಾಕ್ರೆ ಜೊತೆಗಿನ ಅನುಚಿತ ವರ್ತನೆಗೆ ಅವರನ್ನು ಅಮಾನತುಗೊಳಿಸಬೇಕು ಎಂದು ಒತ್ತಾಯಿಸಿದ್ದಾರೆ. ಇದಾದ ಬಳಿಕ ಸದನದ ಕಲಾಪವನ್ನು ಕೆಲಕಾಲ ಮುಂದೂಡಲಾಯಿತು. ಪ್ರಶ್ನೋತ್ತರ ಅವಧಿಯ ನಂತರ ಶಿವಸೇನೆ ಶಾಸಕ ಸುಹಾಸ್ ಕಾಂಡೆ ಈ ವಿಷಯ ಪ್ರಸ್ತಾಪಿಸಿದರು. ಕಳೆದ ವಾರ ರಾಣೆ ಅವರು ವಿಧಾನ ಭವನದ ಸಂಕೀರ್ಣದಲ್ಲಿ ಕುಳಿತಿದ್ದಾಗ ಠಾಕ್ರೆ ಕಟ್ಟಡದ ಒಳಗೆ ಹೋಗುತ್ತಿರುವುದನ್ನು ನೋಡಿ ‘ಮಿಯಾಂವ್’ ಎಂದು ಸದ್ದು ಮಾಡಿದ್ದರು ಎಂದು ಆರೋಪಿಸಿದರು. ರಾಜಕಾರಣಿಗಳ ವಿರುದ್ಧ ಅಸಭ್ಯ ವರ್ತನೆಗೆ ಅವಕಾಶ ನೀಡಬಾರದು ಎಂದು ಎಲ್ಲ ಸದಸ್ಯರು ಒಮ್ಮತದಿಂದ ಹೇಳಿದರು, ಆದರೆ ರಾಣೆ ತಮ್ಮ ನಡವಳಿಕೆಯನ್ನು ಸಮರ್ಥಿಸಿಕೊಂಡಿದ್ದಾರೆ ಮತ್ತು ಅದನ್ನು ಮುಂದುವರಿಸುವುದಾಗಿ ಸುದ್ದಿಗಾರರಿಗೆ ತಿಳಿಸಿದರು.

ಕಾಂಡೆ, 'ಆದಿತ್ಯ ಠಾಕ್ರೆ ಗೌರವಾನ್ವಿತ ವ್ಯಕ್ತಿಯಾಗಿದ್ದು, ಅವರು ನಿತೇಶ್ ರಾಣೆ ಬಗ್ಗೆ ಗಮನ ಹರಿಸಲಿಲ್ಲ. ನಮ್ಮ ನಾಯಕನಿಗೆ ಈ ರೀತಿಯ ಅವಮಾನ ಮಾಡುವುದನ್ನು ನಾವು ಸಹಿಸುವುದಿಲ್ಲ' ಹೀಗಾಗಿ ರಾಣೆ ಸದನದಲ್ಲಿ ಕ್ಷಮೆಯಾಚಿಸಬೇಕು ಅಥವಾ ಅವರನ್ನು ಅಮಾನತುಗೊಳಿಸಬೇಕು ಎಂದು ಆಗ್ರಹಿಸಿದರು. ಶಿವಸೇನೆ ಶಾಸಕ ಸುನೀಲ್ ಪ್ರಭು ಕಾಂಡೆ ಅವರನ್ನು ಬೆಂಬಲಿಸಿದರು. ರಾಣೆ ಅವರನ್ನು ವಿಧಾನಸಭೆಯ ಸದಸ್ಯತ್ವದಿಂದ ಶಾಶ್ವತವಾಗಿ ಅಮಾನತುಗೊಳಿಸಬೇಕು ಎಂದು ಪಕ್ಷದ ಮತ್ತೊಬ್ಬ ಸದಸ್ಯ ಭಾಸ್ಕರ್ ಜಾಧವ್ ಒತ್ತಾಯಿಸಿದರು. ಶಿವಸೇನೆ ಸದಸ್ಯರ ಘೋಷಣೆ ಮತ್ತು ಗದ್ದಲದಿಂದಾಗಿ ಸದನದ ಸಭಾಧ್ಯಕ್ಷರು 10 ನಿಮಿಷಗಳ ಕಾಲ ಕಲಾಪವನ್ನು ಮುಂದೂಡಿದರು. ನಿತೇಶ್ ರಾಣೆ ಕೇಂದ್ರ ಸಚಿವ ನಾರಾಯಣ ರಾಣೆ ಅವರ ಪುತ್ರ ಎಂಬುದು ಗಮನಾರ್ಹ.

ಸದನದ ಕಲಾಪಗಳು ಪುನರಾರಂಭಗೊಂಡ ನಂತರ, ಪ್ರತಿಪಕ್ಷದ ನಾಯಕ ದೇವೇಂದ್ರ ಫಡ್ನವೀಸ್, ನಿತೇಶ್ ಅವರ ವರ್ತನೆಗೆ ಛೀಮಾರಿ ಹಾಕಲಾಗುವುದು ಎಂದು ಹೇಳಿದರು. ನ್ಯಾಶನಲಿಸ್ಟ್ ಕಾಂಗ್ರೆಸ್ ಪಕ್ಷದ ನಾಯಕ ಛಗನ್ ಭುಜಬಲ್ ಸದನಕ್ಕೆ ಪ್ರವೇಶಿಸಿದಾಗ ಭಾಸ್ಕರ್ ಜಾಧವ್ ಅವರು ಧ್ವನಿ ಎತ್ತುತ್ತಿದ್ದರು ಎಂದು ಫಡ್ನವೀಸ್ ಈ ಹಿಂದೆ ಹೇಳಿದ್ದರು ಎಂದು ಅವರು ಹೇಳಿದರು. ಬಿಜೆಪಿಯ ಚಂದ್ರಕಾಂತ ಪಾಟೀಲ ಮಾತನಾಡಿ, ಸದನದ ಹೊರಗೆ ನಡೆದ ಘಟನೆಯ ಬಗ್ಗೆ ವಿಧಾನಸಭೆಯಲ್ಲಿ ಏಕೆ ಚರ್ಚೆಯಾಗುತ್ತಿದೆ. ಇನ್ನು ಮುಂದೆ ಇಂತಹ ಘಟನೆಗಳು ನಡೆಯದಂತೆ ನೋಡಿಕೊಳ್ಳಲು ಮಂಗಳವಾರ ಸರ್ವಪಕ್ಷಗಳ ಮುಖಂಡರೊಂದಿಗೆ ಸಭೆ ನಡೆಸಲಾಗುವುದು ಎಂದು ಅಧ್ಯಕ್ಷರು ತಿಳಿಸಿದರು.

ವಿಧಾನಸಭೆ ಸದಸ್ಯರು ಸಂಸದೀಯ ನಿಯಮಗಳನ್ನು ಪಾಲಿಸಬೇಕು: ಅಜಿತ್ ಪವಾರ್

ರಾಜ್ಯದ ಜನರನ್ನು ಪ್ರತಿನಿಧಿಸುವ ಶಾಸಕರು ವಿಧಾನಸಭೆ ಮತ್ತು ವಿಧಾನ ಭವನದ ಆವರಣದಲ್ಲಿ ಸಂಸದೀಯ ಶಿಷ್ಟಾಚಾರವನ್ನು ಅನುಸರಿಸಬೇಕು ಮತ್ತು ಸಜ್ಜನಿಕೆಯನ್ನು ಕಾಪಾಡಿಕೊಳ್ಳಬೇಕು ಎಂದು ಮಹಾರಾಷ್ಟ್ರ ಉಪಮುಖ್ಯಮಂತ್ರಿ ಅಜಿತ್ ಪವಾರ್ ಮಂಗಳವಾರ ಹೇಳಿದ್ದಾರೆ. ವಿಧಾನಸಭೆಯಲ್ಲಿ ಸದಸ್ಯರಿಗೆ ನೀತಿ ಸಂಹಿತೆ ಕುರಿತು ಅವರು ಮಾತನಾಡಿದರು. ರಾಜ್ಯದ 12 ಕೋಟಿ ಜನಸಂಖ್ಯೆಯನ್ನು ಪ್ರತಿನಿಧಿಸುವ ವಿಧಾನಸಭಾ ಸದಸ್ಯರು ಶಿಷ್ಟಾಚಾರ ಮತ್ತು ಸಂಸದೀಯ ಶಿಷ್ಟಾಚಾರವನ್ನು ಅನುಸರಿಸುವ ಅಗತ್ಯವಿದೆ ಎಂದು ಪವಾರ್ ಹೇಳಿದರು.

ಜನರು ತಮ್ಮ ಚುನಾಯಿತ ಪ್ರತಿನಿಧಿಗಳು ಸದನದಲ್ಲಿ ಏನು ಮಾಡುತ್ತಿದ್ದಾರೆ ಎಂಬುದನ್ನು ನೇರ ಪ್ರಸಾರದ ಮೂಲಕ ತಿಳಿದುಕೊಳ್ಳುವುದರಿಂದ ಸಮಯ ಬದಲಾಗಿದೆ ಎಂದು ಅವರು ಹೇಳಿದರು. ಪವಾರ್, “ನಾವು ಪ್ರಾಣಿಗಳನ್ನು ಪ್ರತಿನಿಧಿಸುವುದಿಲ್ಲ. ಇತರರನ್ನು ಗೇಲಿ ಮಾಡುವುದು ಮತ್ತು ಪ್ರಾಣಿಗಳ ಶಬ್ದ ಮಾಡುವುದು ಜನರ ನಂಬಿಕೆಗೆ ದ್ರೋಹ ಎಂದೂ ಕಿಡಿ ಕಾರಿದ್ದಾರೆ.