2022ರ ಒಂದೇ ವರ್ಷದಲ್ಲಿ ದಾಖಲೆಯ 75 ಸಾವಿರ ಬೈಕ್‌ ಸವಾರರು ಸಾವು!

ಭಾರತದಲ್ಲಿ ದ್ವಿಚಕ್ರ ವಾಹನಗಳಿಂದ ಉಂಟಾದ ಸಾವುಗಳು 2022 ರಲ್ಲಿ ಸುಮಾರು 8% ರಷ್ಟು ಹೆಚ್ಚಾಗಿದೆ, ಇದು ಒಟ್ಟು ರಸ್ತೆ ಸಾವುಗಳಲ್ಲಿ 44% ರಷ್ಟಿದೆ. ತಮಿಳುನಾಡಿನಲ್ಲಿ ಅತಿ ಹೆಚ್ಚು ದ್ವಿಚಕ್ರ ವಾಹನ ಸವಾರರು ಮತ್ತು ಪಾದಚಾರಿಗಳ ಸಾವು ಸಂಭವಿಸಿದೆ.

ನವದೆಹಲಿ (ನ.1): ದ್ವಿಚಕ್ರ ವಾಹನಗಳ ಅಪಘಾತದಿಂದ ಆಗಿರುವ ಸಾವುಗಳು 2022 ರಲ್ಲಿ ಸುಮಾರು 8% ರಷ್ಟು ಏರಿಕೆಯಾಗಿದೆ.  ಕಳೆದ ವರ್ಷವೊಂದರಲ್ಲೇ ಸುಮಾರು 75,000 ಮಂದಿ ಸಾವು ಕಂಡಿದ್ದಾರೆ. ಇದು ಭಾರತೀಯ ರಸ್ತೆಗಳಲ್ಲಿ ಉಂಟಾದ 1,68,491 ಸಾವುಗಳಲ್ಲಿ ಶೇ. 44ರಷ್ಟಿದೆ. ಅದಲ್ಲದೆ, 2022ರ ವರ್ಷವೊಂದರಲ್ಲೇ 32,825 ಪಾದಚಾರಿಗಳು ಸಾವಿಗೀಡಾಗಿದ್ದಾರೆ. ರಸ್ತೆ ಸುರಕ್ಷತೆ ತಜ್ಞರು ಭಾರತದಲ್ಲಿ ವಾಹನ ಬಳಕೆದಾರರ ಸುರಕ್ಷತೆಯ ಕಾಳಜಿಯನ್ನು ಪರಿಹರಿಸಲು ತುರ್ತಾಗಿ ಪರಿಹಾರಗಳನ್ನು ಹುಡುಕಲು ಕರೆ ನೀಡಿದ್ದಾರೆ. ಮಂಗಳವಾರ ಬಿಡುಗಡೆಯಾದ ಅಧಿಕೃತ ಮಾಹಿತಿಯು ಎಲ್ಲಾ ಅಪಘಾತಗಳಲ್ಲಿನ ಒಟ್ಟು ಸಾವುಗಳಲ್ಲಿ ಸುಮಾರು ನಾಲ್ಕನೇ ಒಂದು ಭಾಗಕ್ಕೆ ದ್ವಿಚಕ್ರ ವಾಹನಗಳು ಕಾರಣವೆಂದು ತೋರಿಸಿದೆ. ದ್ವಿಚಕ್ರ ವಾಹನಗಳು ದುರ್ಬಲವಾಗಿದ್ದರೂ, ಅವರು ಅತಿ ಹೆಚ್ಚು ಸಂಖ್ಯೆಯ ಪಾದಚಾರಿ ಜೀವಗಳನ್ನು ರಸ್ತೆ ಅಪಘಾತಗಳಲ್ಲಿ ಕಳೆದುಕೊಂಡಿದ್ದಾರೆ. 9,316 ಅಥವಾ 28% ರಷ್ಟು ಪಾದಚಾರಿಗಳು ರಸ್ತೆ ಅಪಘಾತದಲ್ಲಿ ಸಾವು ಕಂಡಿದ್ದಾರೆ.

ಅದೇ ರೀತಿ, ದ್ವಿಚಕ್ರ ವಾಹನಗಳ ಸಾವಿನಲ್ಲಿ 27,615 ವ್ಯಕ್ತಿಗಳು ಮತ್ತೊಂದು ದ್ವಿಚಕ್ರ ವಾಹನದೊಂದಿಗೆ ಅಪಘಾತದಲ್ಲಿ ಭಾಗಿಯಾಗಿದ್ದಾರೆ. ಒಟ್ಟಾರೆಯಾಗಿ, ದ್ವಿಚಕ್ರ ವಾಹನ ಸವಾರರ ತಪ್ಪಿನಿಂದಾಗಿ 47,171 ಸಾವುಗಳು ಸಂಭವಿಸಿವೆ ಎಂದು ಸರ್ಕಾರದ ವರದಿ ತಿಳಿಸಿದೆ. ಕಳೆದ ವರ್ಷ ಕನಿಷ್ಠ 1.2 ಲಕ್ಷ ಪಾದಚಾರಿಗಳು ಮತ್ತು ದ್ವಿಚಕ್ರ ವಾಹನ ಸವಾರರು ತೀವ್ರವಾಗಿ ಗಾಯಗೊಂಡಿದ್ದಾರೆ ಎಂದು ಡೇಟಾ ತೋರಿಸಿದೆ. "ಸರ್ಕಾರದ ಅಂಕಿಅಂಶಗಳು ಸಾವಿಗೀಡಾದವರು ಮತ್ತು ಅವರ ಕುಟುಂಬಗಳ ಮೇಲೆ ಆದ ಗಾಯಗಳ ಪರಿಣಾಮವನ್ನು ಸೆರೆಹಿಡಿಯುವುದಿಲ್ಲ. ನಾವು ಗಂಭೀರವಾಗಿ ಗಾಯಗೊಂಡ ವ್ಯಕ್ತಿಗಳ ಸಂಖ್ಯೆಯ ಮೇಲೆ ಗಮನ ಹರಿಸಬೇಕಾಗಿದೆ" ಎಂದು ಸಾರಿಗೆ ರಸ್ತೆ ಸುರಕ್ಷತೆ ತಜ್ಞ ಅನಿಲ್ ಚಿಕಾರ ಹೇಳಿದ್ದಾರೆ.

ರಾಜ್ಯವಾರು ಅಂಕಿಅಂಶಗಳ ವರದಿಯ ಪ್ರಕಾರ, ತಮಿಳುನಾಡು ಕಳೆದ ವರ್ಷ ಗರಿಷ್ಠ ದ್ವಿಚಕ್ರ ವಾಹನ ಸವಾರರ ಸಾವುಗಳನ್ನು (11,140) ವರದಿ ಮಾಡಿದೆ ನಂತರದ ಸ್ಥಾನದಲ್ಲಿ ಮಹಾರಾಷ್ಟ್ರ (7,733) ಮತ್ತು ಉತ್ತರ ಪ್ರದೇಶ (6,959) ಇದೆ. ಪಾದಚಾರಿಗಳ ಸಾವಿನ ಪ್ರಕರಣದಲ್ಲಿ ತಮಿಳುನಾಡಿನಲ್ಲಿ 4,427 ಸಾವುಗಳು ದಾಖಲಾಗಿವೆ, ನಂತರ ಬಿಹಾರ (3,345) ಮತ್ತು ಪಶ್ಚಿಮ ಬಂಗಾಳ (2,938) ಇದೆ. ದ್ವಿಚಕ್ರ ವಾಹನಗಳು ಖಾಸಗಿ ಸಾರಿಗೆಯ ಅಗ್ಗದ ವಿಧಾನವಾಗಿದ್ದರೂ, ಅಪಘಾತದ ಸಂದರ್ಭದಲ್ಲಿ ಪ್ರಯಾಣಿಕರಿಗೆ ಯಾವುದೇ ರಕ್ಷಣೆಯನ್ನು ಹೊಂದಿರುವುದಿಲ್ಲ. ದ್ವಿಚಕ್ರ ವಾಹನಗಳನ್ನು ಒಳಗೊಂಡ ಅಪಘಾತಗಳನ್ನು ನಿಗ್ರಹಿಸಲು ಇರುವ ಏಕೈಕ ಆಯ್ಕೆಯೆಂದರೆ ಅವುಗಳನ್ನು ಇತರ ಸಂಚಾರದಿಂದ ಪ್ರತ್ಯೇಕಿಸುವುದು ಎಂದು ತಜ್ಞರು ಹೇಳಿದ್ದಾರೆ.

ರಸ್ತೆ ಸುರಕ್ಷತೆ ನಿಟ್ಟಿನಲ್ಲಿ ಮಾತನಾಡುವ ಕನ್ಶುಮರ್‌ ವಾಯ್ಸ್‌ ಸಿಇಒ ಆಶಿಮ್ ಸನ್ಯಾಲ್, "ವರದಿಯ ಗಮನವು ದುರ್ಬಲ ರಸ್ತೆ ಬಳಕೆದಾರರ ಅಪಘಾತಗಳ ಸಂಖ್ಯೆಯನ್ನು ಹೆಚ್ಚಿಸುತ್ತಿದೆ. ರಸ್ತೆ ಅಪಘಾತಗಳನ್ನು ತಡೆಗಟ್ಟುವ ಕ್ರಮಗಳ ಮೂಲಕ ರಸ್ತೆಗಳಲ್ಲಿನ ಜೀವಗಳನ್ನು ಉಳಿಸುವಲ್ಲಿ ಯಾವುದೇ ರಾಜ್ಯವು ಸಕಾರಾತ್ಮಕ ಪರಿಣಾಮ ಬೀರಿಲ್ಲ. 2030 ರ ವೇಳೆಗೆ ರಸ್ತೆ ಸಾವುಗಳಲ್ಲಿ ಶೇ. 50ರಷ್ಟು ಕಡಿಮೆ ಆಗಬೇಕು. ಈ ನಿಟ್ಟಿನಲ್ಲಿ ಯಾವುದೇ ರಾಜ್ಯಗಳು ಕ್ರಮ ವಹಿಸುತ್ತಿಲ್ಲ' ಎಂದಿದ್ದಾರೆ.

ಇನ್ನು ದೇಶದಲ್ಲಿ ಅತ್ಯಂತ ಅಸುರಕ್ಷಿತ ರಸ್ತೆಗಳನ್ನು ಹೊಂದಿರುವ ನಗರಗಳ ಪಟ್ಟಿಯಲ್ಲಿ ಬೆಂಗಳೂರು 2ನೇ ಸ್ಥಾನ ಪಡೆದಿದೆ. ಕೆಟ್ಟ ರಸ್ತೆಗಳ ಕಾರಣದಿಂದಾಗಿ ಬೆಂಗಳೂರಿನಲ್ಲಿ 2022ರಲ್ಲಿ 772 ಅಪಘಾತಗಳಾಗಿದ್ದು, 2021ಕ್ಕಿಂತ ಶೇ. 18ರಷ್ಟು ಹೆಚ್ಚಾಗಿದೆ. 1461 ಕೇಸ್‌ಗಳನ್ನು ಹೊಂದಿರುವ ದೆಹಲಿ ಮೊದಲ ಸ್ಥಾನದಲ್ಲಿದೆ. ಜೈಪುರ (765), ಕಾನ್ಪುರ (640) ಹಾಗೂ ಇಂದೋರ್‌ (639) ನಂತರದ ಸ್ಥಾನಗಳಲ್ಲಿವೆ.