ಮುಳ್ಳುಹಂದಿಯನ್ನು ಬಿಡಿಸಿದಂತೆ ಸಹಿ ಹಾಕಿದ ಸರ್ಕಾರಿ ಅಧಿಕಾರಿ

ಮುಳ್ಳುಹಂದಿಯನ್ನು ಬಿಡಿಸಿದಂತೆ ಸಹಿ ಹಾಕಿದ ಸರ್ಕಾರಿ ಅಧಿಕಾರಿ ಇದು ಗುವಾಹಟಿಯ ವೈದ್ಯಕೀಯ ಕಾಲೇಜು ಆಸ್ಪತ್ರೆ ಅಧಿಕಾರಿಯ ಸಹಿ ಸಹಿಯ ಫೋಟೋ ಸಾಮಾಜಿಕ ಜಾಲತಾಣದಲ್ಲಿ ವೈರಲ್‌  

ಗುವಾಹಟಿ: ಅಸ್ಸಾಂನ ಗುವಾಹಟಿ ಸರ್ಕಾರಿ ಮೆಡಿಕಲ್ ಕಾಲೇಜು ಆಸ್ಪತ್ರೆಯ ಅಧಿಕಾರಿಯೊಬ್ಬರ ಸಹಿಯೊಂದು ಸಾಮಾಜಿಕ ಜಾಲತಾಣದಲ್ಲಿ ವೈರಲ್ ಆಗಿದೆ. ಮುಳ್ಳುಹಂದಿಯನ್ನು ಚಿತ್ರಿಸುವಂತೆ ಸಹಿ ಹಾಕಿದ್ದು, ಇದು ನೆಟ್ಟಿಗರಲ್ಲಿ ಸೋಜಿಗ ಮೂಡಿಸಿದೆ. ಮುಳ್ಳುಹಂದಿಯ ದೇಹದಲ್ಲಿರುವ ಮುಳ್ಳಿನಷ್ಟೇ ಮುಳ್ಳನ್ನು ಇವರಿಗೆ ಬಿಡಿಸಲು ಸಾಧ್ಯವಾಗಿಲ್ಲ ಎಂದು ಈ ಸಹಿಯನ್ನು ನೋಡಿ ನೆಟ್ಟಿಗರು ಟ್ರೋಲ್ ಮಾಡಿದ್ದಾರೆ. 

ಈ ಸಹಿಯ ಜೊತೆ ಗುವಾಹಟಿಯ ವೈದ್ಯಕೀಯ ಕಾಲೇಜು ಮತ್ತು ಆಸ್ಪತ್ರೆಯ ಮೂಳೆ ಚಿಕಿತ್ಸಾ ವಿಭಾಗದ ರಿಜಿಸ್ಟ್ರಾರ್‌ನ ಮುದ್ರೆಯೂ ಇದೆ. ಅದರಂತೆ ಇದು ಮಾರ್ಚ್ 4 2022ರಂದು ಹಾಕಿದ ಸಹಿ ಆಗಿದೆ. ನಾನು ಹಲವು ಇಂತಹ ವಿಚಿತ್ರ ಸಹಿಗಳನ್ನು ನೋಡಿದ್ದೇನೆ. ಆದರೆ ಇದು ಮಾತ್ರ ಬೆಸ್ಟ್ ಎನಿಸುವ ಸಹಿ ಎಂದು ಈ ಸಹಿಯ ಫೋಟೋ ನೋಡಿದವರೊಬ್ಬರು ಕಾಮೆಂಟ್ ಮಾಡಿದ್ದಾರೆ. ಅಧಿಕಾರಿ ತಮ್ಮ ಪೆನ್ ಸರಿಯಾಗಿ ಕಾರ್ಯನಿರ್ವಹಿಸುತ್ತಿದೆಯೇ ಇಲ್ಲವೇ ಎಂಬುದನ್ನು ನೋಡುತ್ತಿದ್ದಾರೆಯೇ ಎಂದು ಮತ್ತೊಬ್ಬರು ಕಾಮೆಂಟ್ ಮಾಡಿದ್ದಾರೆ, ಇದು ಮುಳ್ಳುಹಂದಿಯಂತೆ ಕಾಣಿಸುತ್ತಿದೆ ಎಂದು ಮಗದೊಬ್ಬರು ಪ್ರತಿಕ್ರಿಯಿಸಿದ್ದಾರೆ. 

ಈ ಸಹಿಯನ್ನು ಬ್ಯಾಂಕ್ ಸಿಬ್ಬಂದಿ ಹೇಗೆ ಪರಿಶೀಲಿಸುತ್ತಾರೆ. ಮುಳ್ಳುಹಂದಿ ಹೊಂದಿರುವ ಮುಳ್ಳುಗಳ ಸಂಖ್ಯೆ ಎಷ್ಟಿದೆ ಎಂದು ಅವರು ಎಣಿಸುತ್ತಾರೆಯೇ ಎಂದು ನೆಟ್ಟಿಗರೊಬ್ಬರು ಪ್ರಶ್ನಿಸಿದ್ದಾರೆ. ಬಹುಶಃ ಈ ವ್ಯಕ್ತಿ ತಮ್ಮ ಸಹಿಯ ಮೂಲಕ ಏನೋ ರಹಸ್ಯವಾದ ಕೋಡ್ ಅನ್ನು ರವಾನಿಸುತ್ತಿರಬೇಕು ಎಂದು ಮತ್ತೊಬ್ಬರು ಕಾಮೆಂಟ್ ಮಾಡಿದ್ದಾರೆ. 

ಒಟ್ಟಿನಲ್ಲಿ ಈ ಸಹಿ ನೋಡುಗರನ್ನು ನಗೆಗಡಲಲ್ಲಿ ತೇಲಿಸುತ್ತಿದೆ. ಜೊತೆಗೆ ನೆಟ್ಟಿಗರು ತಾವು ನೋಡಿದ ಇದಕ್ಕಿಂತಲೂ ವಿಭಿನ್ನವಾದ ಸಹಿಗಳನ್ನು ಸಾಮಾಜಿಕ ಜಾಲತಾಣದಲ್ಲಿ ಹಂಚಿಕೊಂಡಿದ್ದಾರೆ.