ಭಾರತಕ್ಕೆ ನುಗ್ಗಲು ಹೊಸ ದಾರಿ ಹುಡುಕ್ತಿದೆ ಪಾಕ್: ಗುಜರಾತ್‌, ರಾಜಸ್ಥಾನದ ಮೂಲಕ ಪ್ರವೇಶ ಯತ್ನ

ಉಗ್ರರ ಒಳನುಸುಳಿಸಲು ಹೊಸ ಮಾರ್ಗಗಳಿಗಾಗಿ ಪಾಕ್‌ ಶೋಧ | ಗುಜರಾತ್‌, ರಾಜಸ್ಥಾನ ಮೂಲಕವೂ ಪ್ರವೇಶ ಯತ್ನ

ನವದೆಹಲಿ(ಡಿ.27): ಈವರೆಗೆ ಕೇವಲ ಜಮ್ಮು-ಕಾಶ್ಮೀರ ಹಾಗೂ ಪಂಜಾಬ್‌ ಗಡಿಗಳ ಮೂಲಕ ನುಸುಳಲು ಯತ್ನಿಸುತ್ತಿದ್ದ ಪಾಕಿಸ್ತಾನಿ ಉಗ್ರರು, ಈಗ ಗುಜರಾತ್‌ ಹಾಗೂ ರಾಜಸ್ಥಾನದ ಮೂಲಕವೂ ನುಸುಳಲು ಯತ್ನಿಸುತ್ತಿರುವ ವಿಷಯ ಬೆಳಕಿಗೆ ಬಂದಿದೆ.

2020ರಲ್ಲಿ ಈ ಎರಡೂ ರಾಜ್ಯಗಳ ಮೂಲಕ ಉಗ್ರರನ್ನು ನುಸುಳಿಸಲು ಪಾಕಿಸ್ತಾನ ಯತ್ನಿಸಿತ್ತು ಎಂದು ಗಡಿ ಭದ್ರತಾ ಪಡೆ (ಬಿಎಸ್‌ಎಫ್‌) ಹೇಳಿದೆ. ಗಡಿಯಲ್ಲಿ ಒಳನುಸುಳುವಿಕೆ ಯತ್ನಗಳ ಪ್ರಮಾಣ ಹೆಚ್ಚಿದೆ ಎಂದೂ ಬಿಎಸ್‌ಎಫ್‌ ವರದಿ ಕಳವಳ ವ್ಯಕ್ತಪಡಿಸಿದೆ.

‘ಕಳೆದ ವರ್ಷ ಗುಜರಾತ್‌ ಹಾಗೂ ರಾಜಸ್ಥಾನದ ಗಡಿಗಳಲ್ಲಿ ಇಂತಹ ಯಾವುದೇ ಯತ್ನಗಳು ನಡೆದಿರಲಿಲ್ಲ. ಆದರೆ ಈ ವರ್ಷ ಆಗಸ್ಟ್‌ ಮತ್ತು ಸೆಪ್ಟೆಂಬರ್‌ನಲ್ಲಿ ಈ ರಾಜ್ಯಗಳ ಗಡಿ ಮೂಲಕ ನುಸುಳುವ ಯತ್ನಗಳು ನಡೆದಿವೆ’ ಎಂದು ಅದು ತಿಳಿಸಿದೆ.

ಆದರೆ ಕಾಶ್ಮೀರದ ಗಡಿಯಲ್ಲಿ ಕಳೆದ ವರ್ಷ 4 ನುಸುಳುವಿಕೆ ಯತ್ನಗಳು ನಡೆದಿದ್ದರೆ, ಈ ಸಲ ಕೇವಲ 1 ಯತ್ನ ದಾಖಲಾಗಿದೆ ಎಂಬ ಅಚ್ಚರಿಯ ಮಾಹಿತಿಯನ್ನು ಇದರಲ್ಲಿ ನೀಡಲಾಗಿದೆ.

ಇದರರ್ಥ, ಪಾಕಿಸ್ತಾನವು ಭಾರತಕ್ಕೆ ಉಗ್ರರನ್ನು ಕಳಿಸಲು ಹೊಸ ಮಾರ್ಗಗಳನ್ನು ಶೋಧಿಸುತ್ತಿದೆ. ಆದರೆ ಗಡಿಯಲ್ಲಿ 24 ತಾಸೂ ಹದ್ದಿನ ಕಣ್ಣು ಇಟ್ಟಿರುವ ಬಿಎಸ್‌ಎಫ್‌, ಈ ಯತ್ನಗಳನ್ನು ವಿಫಲಗೊಳಿಸಿದೆ ಎಂದು ಅಧಿಕಾರಿಗಳು ತಿಳಿಸಿದ್ದಾರೆ.

ಒಟ್ಟಾರೆ ಜಮ್ಮು-ಕಾಶ್ಮೀರ, ಪಂಜಾಬ್‌, ರಾಜಸ್ಥಾನ ಹಾಗೂ ಗುಜರಾತ್‌- ಈ ಗಡಿಗಳ ಮೂಲಕ 11 ಒಳನುಸುಳುವಿಕೆ ಯತ್ನಗಳು ಈ ವರ್ಷದ ನವೆಂಬರ್‌ 1ನೇ ವಾರದವರೆಗೆ ದಾಖಲಾಗಿವೆ. ಜಮ್ಮು ಹಾಗೂ ಪಂಜಾಬ್‌ ಗಡಿಗಳಲ್ಲಿ ಅತಿ ಹೆಚ್ಚು ಎಂದರೆ ತಲಾ 4 (ಒಟ್ಟಾರೆ 8) ನುಸುಳುವಿಕೆ ಯತ್ನಗಳು ನಡೆದಿವೆ.