Cholistan Project: ಅಸಿಮ್ ಮುನೀರ್‌ಗೆ ಬಡ್ತಿ ಬೆನ್ನಲ್ಲೇ ಪಾಕ್‌ನಲ್ಲಿ ಅಂತರ್ಯುದ್ಧ ಆರಂಭ, ಗೃಹ ಸಚಿವರ ಮನೆಯನ್ನೇ ಸುಟ್ಟ ಜನ!

ಚೋಲಿಸ್ತಾನ್ ಯೋಜನೆಯು ಸಿಂಧ್ ಪ್ರಾಂತ್ಯದಲ್ಲಿ ತೀವ್ರ ವಿರೋಧಕ್ಕೆ ಕಾರಣವಾಗಿದ್ದು, ಹಿಂಸಾಚಾರಕ್ಕೆ ಕಾರಣವಾಗಿದೆ. ಸೇನಾ ಮುಖ್ಯಸ್ಥ ಅಸಿಮ್ ಮುನೀರ್‌ರ ಬಡ್ತಿ ಮತ್ತು ಯೋಜನೆಯಲ್ಲಿ ಸೇನೆಯ ಪಾತ್ರವು ಜನರ ಆಕ್ರೋಶವನ್ನು ಹೆಚ್ಚಿಸಿದೆ. ಈ ಪರಿಸ್ಥಿತಿಯು ಸೇನಾ ದಂಗೆಗೆ ಕಾರಣವಾಗಬಹುದೇ ಎಂಬ ಪ್ರಶ್ನೆಗಳು ಎದ್ದಿವೆ.

Asim Munir promotion Sindh unrest: ಪಾಕಿಸ್ತಾನದ ಸೇನಾ ಮುಖ್ಯಸ್ಥ ಅಸಿಮ್ ಮುನೀರ್‌ ಚೋಲಿಸ್ತಾನ್ ಯೋಜನೆಯು ದೇಶದ ರಾಜಕೀಯ ಮತ್ತು ಸಾಮಾಜಿಕವಾಗಿ ಬಿರುಗಾಳಿ ಎಬ್ಬಿಸಿದೆ. ಈ ಯೋಜನೆ, ಗ್ರೀನ್ ಪಾಕಿಸ್ತಾನ್ ಇನಿಶಿಯೇಟಿವ್‌ನಡಿ 2023ರಲ್ಲಿ ಪ್ರಾರಂಭವಾಯಿತು, ಇದರ ಮೂಲ ಉದ್ದೇಶ ಚೋಲಿಸ್ತಾನ್ ಮರುಭೂಮಿಯ 12 ಲಕ್ಷ ಎಕರೆ ಭೂಮಿಯನ್ನು ಕಾಲುವೆಗಳ ಮೂಲಕ ನೀರಿನ ಸರಬರಾಜಿನಿಂದ ಹಸಿರಾಗಿಸುವುದು. ಒಟ್ಟು 176 ಕಿ.ಮೀ ಉದ್ದದ ಆರು ಕಾಲುವೆಗಳನ್ನು ನಿರ್ಮಿಸುವ ಈ ಯೋಜನೆಯ ವೆಚ್ಚ ಸುಮಾರು 945 ಶತಕೋಟಿ ರೂಪಾಯಿಗಳಾಗಿದ್ದು, ಈ ಒಪ್ಪಂದವನ್ನು ಪಾಕಿಸ್ತಾನ ಸೇನೆಯೇ ತೆಗೆದುಕೊಂಡಿದೆ. ಆದರೆ, ಈ ಯೋಜನೆಯು ಸಿಂಧ್ ಪ್ರಾಂತ್ಯದ ಜನರ ತೀವ್ರ ಆಕ್ಷೇಪಕ್ಕೆ ಕಾರಣವಾಗಿದೆ, ಏಕೆಂದರೆ ಇದಕ್ಕಾಗಿ ಸಿಂಧೂ ನದಿಯಿಂದ ನೀರನ್ನು ಕಸಿದುಕೊಳ್ಳಲಾಗುತ್ತಿದ್ದು, ಈಗಾಗಲೇ ನೀರಿನ ಕೊರತೆಯಿಂದ ಬಳಲುತ್ತಿರುವ ಸಿಂಧ್‌ನ ಜನರಿಗೆ ಇದು ಮತ್ತಷ್ಟು ಸಂಕಷ್ಟವನ್ನು ಉಂಟುಮಾಡಿದೆ.

ಪಾಕಿಸ್ತಾನದ ವಿರುದ್ಧವೇ ತಿರುಗಿಬಿದ್ದ ಜನ:

ಸಿಂಧ್‌ನ ಜನರ ವಿರೋಧವು ತೀವ್ರಗೊಂಡಿದ್ದು, ಗೃಹ ಸಚಿವ ಜಿಯಾವುಲ್ ಹಸನ್ ಲಂಜಾರ್‌ರ ಮನೆಯನ್ನು ಸುಡುವಂತಹ ಘಟನೆಗಳು ಮತ್ತು ಹಿಂಸಾಚಾರದ ಘಟನೆಗಳು ಸಂಭವಿಸಿವೆ. ಈ ಹಿಂಸಾಚಾರವು ಚೋಲಿಸ್ತಾನ್ ಯೋಜನೆಯಿಂದ ಉಂಟಾದ ಅಸಮಾಧಾನದ ನೇರ ಪರಿಣಾಮವೆಂದೆ ಹೇಳಲಾಗಿದೆ. ಈ ಯೋಜನೆಯನ್ನು ಪಾಕಿಸ್ತಾನ ಪೀಪಲ್ಸ್ ಪಾರ್ಟಿ (ಪಿಪಿಪಿ) ಮತ್ತು ಅಧ್ಯಕ್ಷ ಆಸಿಫ್ ಅಲಿ ಜರ್ದಾರಿ ಬೆಂಬಲಿಸುತ್ತಿದ್ದರೂ, ಸಿಂಧ್‌ನ ಜನರ ಆಕ್ರೋಶವು ಸರ್ಕಾರದ ವಿರುದ್ಧ ತಿರುಗಿದೆ. ಈ ಪರಿಸ್ಥಿತಿಯು ರಾಜಕೀಯವಾಗಿ ಸೂಕ್ಷ್ಮವಾಗಿದ್ದು, ಸಿಂಧ್‌ನಲ್ಲಿ ಪಿಪಿಪಿಯ ಸರ್ಕಾರಕ್ಕೆ ತೀವ್ರ ಒತ್ತಡವನ್ನು ಉಂಟುಮಾಡಿದೆ.

ಸಿಂಧ್ ಜನರ ಅಸಮಾಧಾನಕ್ಕೆ ಕಾರಣಗಳೇನು?

ಅಸಿಮ್ ಮುನೀರ್‌ರ ಇತ್ತೀಚಿನ ಬಡ್ತಿಯು ಈ ಸನ್ನಿವೇಶವನ್ನು ಇನ್ನಷ್ಟು ಉಲ್ಬಣಗೊಳಿಸಿದೆ. ಫೀಲ್ಡ್ ಮಾರ್ಷಲ್‌ ಆಗಿ ಅವರ ಸ್ಥಾನಮಾನದ ಏರಿಕೆಯು ಪಾಕಿಸ್ತಾನದ ಸೇನೆಯನ್ನು ರಾಜಕೀಯ ಮತ್ತು ಆಡಳಿತಾತ್ಮಕವಾಗಿ ಇನ್ನಷ್ಟು ಶಕ್ತಿಶಾಲಿಯಾಗಿಸಿದೆ. ಸೇನೆಯು ಯುದ್ಧವನ್ನು ಬಿಟ್ಟು, ವ್ಯಾಪಾರ, ಕೃಷಿ, ತೋಟಗಾರಿಕೆ ಮತ್ತು ದೊಡ್ಡ ಯೋಜನೆಗಳ ಒಪ್ಪಂದಗಳಂತಹ ವಿವಿಧ ಕ್ಷೇತ್ರಗಳಲ್ಲಿ ತೊಡಗಿಕೊಂಡಿರುವುದು ದೇಶದ ಆರ್ಥಿಕ ಮತ್ತು ರಾಜಕೀಯ ರಂಗದಲ್ಲಿ ಅದರ ಪ್ರಾಬಲ್ಯವನ್ನು ತೋರಿಸುತ್ತದೆ. ಚೋಲಿಸ್ತಾನ್ ಯೋಜನೆಯಂತಹ ಬೃಹತ್ ಯೋಜನೆಗಳು ಸೇನೆಯ ಆರ್ಥಿಕ ಲಾಭದ ಆಸಕ್ತಿಯನ್ನು ಪ್ರತಿಬಿಂಬಿಸುತ್ತವೆ, ಆದರೆ ಇದು ಸ್ಥಳೀಯ ಜನರಿಗೆ, ವಿಶೇಷವಾಗಿ ಸಿಂಧ್‌ನ ಜನರಿಗೆ ಸಂಕಷ್ಟ ಎದುರಿಸಬೇಕಿದೆ. ಹೀಗಾಗಿ ತೀವ್ರ ಅಸಮಾಧಾನಕ್ಕೆ ಕಾರಣವಾಗಿದೆ.

ಅಸಿಮ್ ಮುನೀರ್ ಪಾಕಿಸ್ತಾನದಲ್ಲಿ ದಂಗೆ ನಡೆಸುವ ಸಾಧ್ಯತೆ:
ಈ ಹಿಂಸಾಚಾರ ಮತ್ತು ಪ್ರತಿಭಟನೆಗಳ ನಡುವೆ, ಅಸಿಮ್ ಮುನೀರ್‌ರ ಆಡಳಿತಾತ್ಮಕ ಉದ್ದೇಶಗಳ ಬಗ್ಗೆ ಗಂಭೀರ ಪ್ರಶ್ನೆಗಳು ಎದ್ದಿವೆ. ಸಿಂಧ್‌ನಲ್ಲಿನ ಅಶಾಂತಿಯನ್ನು ನೆಪವಾಗಿಟ್ಟುಕೊಂಡು, ಅವರು ಪಾಕಿಸ್ತಾನದಾದ್ಯಂತ ತಮ್ಮ ಪ್ರಾಬಲ್ಯವನ್ನು ವಿಸ್ತರಿಸಲು ಮತ್ತು ಸಮರ ಕಾನೂನಿನಂತಹ ಕಠಿಣ ಕ್ರಮಗಳನ್ನು ಜಾರಿಗೊಳಿಸಲು ಯತ್ನಿಸುತ್ತಿದ್ದಾರೆಯೇ ಎಂಬ ಊಹಾಪೋಹಗಳು ಹುಟ್ಟಿಕೊಂಡಿವೆ. ಐತಿಹಾಸಿಕವಾಗಿ, ಪಾಕಿಸ್ತಾನದಲ್ಲಿ ಸೇನೆಯು ದಂಗೆಗಳ ಮೂಲಕ ಆಡಳಿತವನ್ನು ವಶಪಡಿಸಿಕೊಂಡಿರುವ ಉದಾಹರಣೆಗಳಿವೆ, ಉದಾಹರಣೆಗೆ ಫೀಲ್ಡ್ ಮಾರ್ಷಲ್ ಅಯೂಬ್ ಖಾನ್‌ರ ಕಾಲದಲ್ಲಿ. ಇದೇ ರೀತಿಯ ಕಾರ್ಯತಂತ್ರವನ್ನು ಅಸಿಮ್ ಮುನೀರ್ ಅನುಸರಿಸುವ ಸಾಧ್ಯತೆಯನ್ನು ತಳ್ಳಿಹಾಕಲಾಗದು.

ಪಾಕಿಸ್ತಾನದ ಭವಿಷ್ಯ

ಸಿಂಧ್‌ನ ಹಿಂಸಾಚಾರವು ಚೋಲಿಸ್ತಾನ್ ಯೋಜನೆಯಿಂದ ಉಂಟಾದ ಸ್ಥಳೀಯ ಅಸಮಾಧಾನದ ಫಲಿತಾಂಶವಾದರೂ, ಇದರ ಹಿಂದಿನ ರಾಜಕೀಯ ಮತ್ತು ಆರ್ಥಿಕ ಆಯಾಮಗಳು ದೇಶದ ಸ್ಥಿರತೆಗೆ ಗಂಭೀರ ಪರಿಣಾಮಗಳನ್ನು ಒಡ್ಡಬಹುದು. ಸೇನೆಯ ಶಕ್ತಿಶಾಲಿ ಪಾತ್ರ, ಸರ್ಕಾರದ ಬೆಂಬಲ ಮತ್ತು ಜನರ ವಿರೋಧದ ನಡುವಿನ ಈ ಸಂಘರ್ಷವು ಪಾಕಿಸ್ತಾನದ ಭವಿಷ್ಯವನ್ನು ಅನಿಶ್ಚಿತವಾಗಿಸಿದೆ. ಸಿಂಧ್‌ನ ಬೆಂಕಿಯು ಇಡೀ ದೇಶಕ್ಕೆ ಹರಡುವ ಭೀತಿಯಿದ್ದು, ಈ ಸನ್ನಿವೇಶವು ಅಸಿಮ್ ಮುನೀರ್‌ರ ನಾಯಕತ್ವದ ದಿಕ್ಕನ್ನು ಮತ್ತು ಪಾಕಿಸ್ತಾನದ ರಾಜಕೀಯ ಭವಿಷ್ಯವನ್ನು ನಿರ್ಧರಿಸುವಲ್ಲಿ ಪ್ರಮುಖ ಪಾತ್ರ ವಹಿಸಬಹುದು.