PM Modi ಯೋಜನೆ ಶೇ.100 ರಷ್ಟು ಜನರಿಗೆ ತಲುಪುವವರೆಗೆ ವಿಶ್ರಮಿಸಿಲ್ಲ, ಮತ್ತೆ ಬಿಜೆಪಿ ಸರ್ಕಾರಕ್ಕೆ ಮೋದಿ ಇಂಗಿತ!

ಎರಡು ಬಾರಿ ಪ್ರಧಾನಿಯಾಗಿದ್ದು ಸಾಕಲ್ಲವೇ ಪ್ರಶ್ನೆಗೆ ಉತ್ತರ ನನಗೆ ವಿಶ್ರಮಿಸಬೇಕು ಎನ್ನಿಸಲ್ಲ: ಪ್ರಧಾನಿ ನವ ಭಾರತ ನಿರ್ಮಾಣಕ್ಕೆ ಮೋದಿ ಸಂಕಲ್ಪ

ಭರೂಚ್‌(ಮೇ.13): ‘ಎರಡು ಬಾರಿ ಪ್ರಧಾನಿಯಾಗಿದ್ದು ಸಾಕಲ್ಲವೇ ಎಂದ ಹಿರಿಯ ವಿಪಕ್ಷ ನಾಯಕನಿಗೆ, ನಾನು ಇಲ್ಲಿಗೇ ರಾಜಕೀಯ ಪಯಣವನ್ನು ನಿಲ್ಲಿಸುವುದಿಲ್ಲ’ ಎಂದು ಹೇಳಿದ ಘಟನೆಯನ್ನು ಎಂದು ಪ್ರಧಾನಿ ನರೇಂದ್ರ ಮೋದಿ ಗುರುವಾರ ನೆನಪಿಸಿಕೊಂಡಿದ್ದಾರೆ. ಈ ಮೂಲಕ ಮತ್ತೆ ಬಿಜೆಪಿ ಸರ್ಕಾರ ಬರುವ ಸುಳಿವನ್ನು ಅವರು ನೀಡಿದ್ದಾರೆ.

ಗುಜರಾತ್‌ ಸರ್ಕಾರದ ಆರ್ಥಿಕ ನೆರವು ಯೋಜನೆಗಳಿಗೆ ಚಾಲನೆ ನೀಡಿ ಗುರುವಾರ ಮಾತನಾಡಿದ ಮೋದಿ, ‘ಹಿರಿಯ ವಿಪಕ್ಷ ನಾಯಕರು ಒಮ್ಮೆ ಭೇಟಿಯಾಗಿದ್ದರು. ಅವರು ಮೋದಿಯವರೇ ನಿಮ್ಮನ್ನು ಜನರು 2 ಬಾರಿ ಪ್ರಧಾನಿಯಾಗಿ ಆಯ್ಕೆ ಮಾಡಿದ್ದಾರೆ. ನಿಮಗಿನ್ನೇನು ಬೇಕು ಎಂದರು. ಅವರ ಪ್ರಕಾರ ಒಬ್ಬ ವ್ಯಕ್ತಿ 2 ಬಾರಿ ಪ್ರಧಾನಿಯಾದರೆ ಎಲ್ಲವನ್ನೂ ಸಾಧಿಸಿದಂತೆ. ಆದರೆ ಗುಜರಾತಿನ ಮಣ್ಣಿನಲ್ಲಿ ಜನಿಸಿದ ನನಗೆ ಇದೇ ದೊಡ್ಡ ಸಾಧನೆ, ಇದರ ನಂತರ ವಿಶ್ರಾಂತಿ ಪಡೆಯಬೇಕು ಎಂದೆನಿಸುವುದಿಲ್ಲ. ಶೇ. 100 ರಷ್ಟುಜನರಿಗೆ ಕಲ್ಯಾಣ ಯೋಜನೆಗಳು ತಲುಪುವವರೆಗೆ ನಾನು ವಿಶ್ರಾಂತಿ ತೆಗೆದುಕೊಳ್ಳಲ್ಲ’ ಎಂದರು.

ಮೋದಿ ತಮ್ಮ ಭಾಷಣದಲ್ಲಿ ಯಾವುದೇ ವಿಪಕ್ಷ ನಾಯಕನ ಹೆಸರನ್ನು ಸೂಚಿಸದಿದ್ದರೂ, ಕಳೆದ ತಿಂಗಳು ಎನ್‌ಸಿಪಿ ಮುಖ್ಯಸ್ಥ ಶರದ್‌ ಪವಾರ್‌ ಅವರನ್ನು ದೆಹಲಿಯಲ್ಲಿ ಭೇಟಿಯಾಗಿದ್ದರು. ಮೋದಿ ಆ ಭೇಟಿಯನ್ನೇ ಇಲ್ಲಿ ಉಲ್ಲೇಖಿಸಿದ್ದಾರೆ ಎನ್ನಲಾಗಿದೆ.

WHO ಸುಧಾರಣೆಗೆ ಮೋದಿ ಕರೆ
ಕೋವಿಡ್‌ ಸಾಂಕ್ರಾಮಿಕ ತಡೆಗಟ್ಟಲು ಲಸಿಕೆಗಳು ಮತ್ತು ಚಿಕಿತ್ಸಕಗಳಿಗೆ ಅನುಮೋದನೆ ನೀಡುವ ವಿಶ್ವ ಆರೋಗ್ಯ ಸಂಸ್ಥೆಯ ಪ್ರಕ್ರಿಯೆಯನ್ನು ಸರಳೀಕರಿಸಬೇಕು’ ಎಂದು ಪ್ರಧಾನಿ ನರೇಂದ್ರ ಮೋದಿ Üರೆ ನೀಡಿದ್ದಾರೆ. ಅಮೆರಿಕ ಅಧ್ಯಕ್ಷ ಜೋ ಬೈಡೆನ್‌ ಅವರು ಆಯೋಜಿಸಿದ್ದ 2ನೇ ಜಾಗತಿಕ ಕೋವಿಡ್‌ ವರ್ಚುವಲ್‌ ಶೃಂಗಸಭೆಯಲ್ಲಿ ಅವರು ಗುರುವಾರ ರಾತ್ರಿ ಮಾತನಾಡಿದರು.

‘ಸಾಂಕ್ರಾಮಿಕದ ವಿರುದ್ಧ ಹೋರಾಡಲು ಲಸಿಕೆ ಮತ್ತು ಔಷಧಗಳ ಜಾಗತಿಕ ಪೂರೈಕೆ ಸರಪಳಿಯನ್ನು ನಿರ್ಮಾಣ ಮಾಡುವುದು ಮತ್ತು ಇವುಗಳಿಗೆ ಸಮಾನ ಪ್ರವೇಶವನ್ನು ಸಕ್ರಿಯಗೊಳಿಸುವುದು ಅಗತ್ಯವಾಗಿದೆ. ಹೆಚ್ಚು ಸುಧಾರಿತವಾದ ಆರೋಗ್ಯ ವ್ಯವಸ್ಥೆಯನ್ನು ನಿರ್ಮಿಸಲು ವಿಶ್ವ ಆರೋಗ್ಯ ಸಂಸ್ಥೆ ಸುಧಾರಿಸಬೇಕು ಮತ್ತು ಬಲಗೊಳ್ಳಬೇಕು’ ಎಂದು ಅವರು ಹೇಳಿದರು.

ಈ ವೇಳೆ ಭಾರತವು ಸಾಂಕ್ರಾಮಿಕವನ್ನು ನಿಭಾಯಿಸುತ್ತಿರುವುದನ್ನು ಉಲ್ಲೇಖಿಸಿದ ಮೋದಿ, ‘ದೇಶದ ಲಸಿಕಾ ಕಾರ್ಯಕ್ರಮವು ವಿಶ್ವದಲ್ಲೇ ಅತಿದೊಡ್ಡ ಲಸಿಕಾಕರಣವಾಗಿದೆ. ಕೋವಿಡ್‌ ವಿರುದ್ಧ ಹೋರಾಡಲು ನಾವು ಜನಕೇಂದ್ರಿತವಾದ ಕಾರ್ಯತಂತ್ರಗಳನ್ನು ಅಳವಡಿಸಿಕೊಂಡಿದ್ದೇವೆ. ಅದೇ ರೀತಿ ಭವಿಷ್ಯದ ಆರೋಗ್ಯ ತುರ್ತುಪರಿಸ್ಥಿತಿಗಳನ್ನು ಎದುರಿಸಲು ಸಂಘಟಿತ ಜಾಗತಿಕ ಪ್ರತ್ರಿಕ್ರಿಯೆಯ ಅಗತ್ಯವಿದೆ’ ಎಂದು ಅವರು ಹೇಳಿದರು.

ಈಗಲೂ ಸಹ ಜನರು ಸಾಂಕ್ರಾಮಿಕದಿಂದ ತೊಂದರೆ ಅನುಭವಿಸುತ್ತಿದ್ದಾರೆ. ಹಾಗಾಗಿ ಔಷಧಗಳ ಪೂರೈಕೆ ಮತ್ತು ಕೋವಿಡ್‌ ಪರೀಕ್ಷೆಯನ್ನು ಹೆಚ್ಚು ಮಾಡಬೇಕು. ಅಲ್ಲದೇ ಬೌದ್ಧಿಕ ಆಸ್ತಿ ಹಕ್ಕುಗಳ ವ್ಯಾಪಾರ (ಟ್ರಿಫ್ಸ್‌) ಕುರಿತಾಗಿ ಜಾಗತಿಕವಾಗಿ ಹೆಚ್ಚು ಹೊಂದಿಕೊಳ್ಳುವ ಅಗತ್ಯ ಇದೆ ಎಂದು ಅವರು ಹೇಳಿದರು.

ಕಳೆದ ವರ್ಷ ಸೆ.22ರಂದು ಆಯೋಜಿಸಿದ್ದ ಮೊದಲ ಕೋವಿಡ್‌ ಶೃಂಗಸಭೆಯಲ್ಲೂ ಸಹ ಮೋದಿ ಅವರು ವರ್ಚುವಲ್‌ ಆಗಿ ಭಾಗಿಯಾಗಿದ್ದರು.