ದೊಡ್ಡ ಅನಾಹುತದಿಂದ ಅಮ್ಮನ ರಕ್ಷಿಸಿದ ಪುಟಾಣಿ... ವಿಡಿಯೋ ವೈರಲ್

ಪುಟ್ಟ ಬಾಲಕನೋರ್ವ ತನ್ನ ತಾಯಿಯನ್ನು ದೊಡ್ಡ ಅನಾಹುತವೊಂದರಿಂದ ರಕ್ಷಿಸಿದ್ದಾನೆ. ಈ ಘಟನೆಯ ವಿಡಿಯೋ ಸಿಸಿ ಕ್ಯಾಮರಾದಲ್ಲಿ ರೆಕಾರ್ಡ್ ಆಗಿದ್ದು, ಅದೀಗ ಸಾಮಾಜಿಕ ಜಾಲತಾಣದಲ್ಲಿ ವೈರಲ್ ಆಗಿದೆ. ಪುಟ್ಟ ಬಾಲಕನ ಸಮಯಪ್ರಜ್ಞೆಗೆ ನೆಟ್ಟಿಗರು ಶ್ಲಾಘನೆ ವ್ಯಕ್ತಪಡಿಸಿದ್ದಾರೆ. ಈ ವಿಡಿಯೋವನ್ನು ಐಪಿಎಸ್ ಅಧಿಕಾರಿ ದೀಪಾಂಶು ಕಬ್ರಾ ಅವರು ಕೂಡ ತಮ್ಮ ಟ್ವಿಟ್ಟರ್ ಖಾತೆಯಲ್ಲಿ ಪೋಸ್ಟ್ ಮಾಡಿದ್ದಾರೆ. 

ಅಂದಹಾಗೆ ತಾಯಿಯೊಬ್ಬಳು ಮನೆಯ ಗೇಟಿನ ಮೇಲೆ ಇರುವ ಕಮಾನನ್ನು ಸ್ವಚ್ಛಗೊಳಿಸುತ್ತಿದ್ದಾರೆ. ಇದಕ್ಕಾಗಿ ಅವರು ಮಡಚಬಹುದಾದ (Folding ladder) ಏಣಿಯನ್ನು ಇರಿಸಿಕೊಂಡು ಸ್ವಚ್ಛಗೊಳಿಸುತ್ತಿರಬೇಕಾದರೆ ಆ ಏಣಿ ಒಮ್ಮೆಲೆ ಕೆಳಗೆ ಬೀಳುತ್ತದೆ. ಈ ವೇಳೆ ತಾಯಿ ಕಮಾನನ್ನು ಹಿಡಿದು ನೇತಾಡುತ್ತ ಬೊಬ್ಬೆ ಹೊಡೆಯಲು ಶುರು ಮಾಡುತ್ತಾಳೆ. ಆಗ ಅಲ್ಲೇ ಇದ್ದ ಪುಟಾಣಿ ಬಹಳ ಕಷ್ಟಪಟ್ಟು ಆ ಏಣಿಯನ್ನು ನಿಧಾನವಾಗಿ ಮೇಲೆತ್ತಿ ನೇರವಾಗಿ ನಿಲ್ಲುವಂತೆ ಮಾಡುತ್ತಾನೆ. ಈ ವೇಳೆ ನೇತಾಡುತ್ತಲೇ ಆ ತಾಯಿ ಏಣಿ ಮೇಲೆ ಹಿಡಿತ ಸಾಧಿಸಿದ್ದು, ಅದನ್ನು ಸಮತೋಲನಗೊಳಿಸುತ್ತಾಳೆ. ಇಲ್ಲಿಗೆ 42 ಸೆಕೆಂಡ್‌ಗಳ ವಿಡಿಯೋ ಕೊನೆಗೊಂಡಿದೆ.

ಒಂದು ವೇಳೆ ಈ ಪುಟಾಣಿ ಬಾಲಕ (Little boy) ಸಮಯಪ್ರಜ್ಞೆ ತೋರದೇ ಇದ್ದಿದ್ದರೆ ತಾಯಿ ಕೆಳಗೆ ಬಿದ್ದು, ಮೂಳೆ ಮುರಿದುಕೊಳ್ಳುತ್ತಿದ್ದಳು. ಆದರೆ ದೇವರ ರೂಪದಲ್ಲಿ ಬಂದು ಆಕೆಯ ಕಂದನೇ ಆಕೆಯನ್ನು ರಕ್ಷಿಸಿದ್ದಾನೆ. ಈ ವಿಡಿಯೋವನ್ನು ಡಿಸೆಂಬರ್ 23 ರಂದು ಐಪಿಎಸ್ ಅಧಿಕಾರಿ (IPS Officer) ದೀಪಾಂಶು ಕಬ್ರಾ (Deepamshu Kabra) ಪೋಸ್ಟ್ ಮಾಡಿದ್ದು, 74 ಸಾವಿರಕ್ಕೂ ಹೆಚ್ಚು ಜನ ಈ ವಿಡಿಯೋವನ್ನು ವೀಕ್ಷಿಸಿದ್ದಾರೆ.  ಈ ವಿಡಿಯೋವನ್ನು ಪೋಸ್ಟ್ ಮಾಡಿದ ದೀಪಾಂಶು ಕಬ್ರಾ, ತಾಯಿ ಬಾಗಿಲನ್ನು ರಿಪೇರಿ ಮಾಡುತ್ತಿದ್ದಾಗ ಆಕೆ ನಿಂತಿದ್ದ ಏಣಿ ಆಯತಪ್ಪಿ ಬಿದ್ದಿದ್ದು, ತಾಯಿ ಮೇಲೆ ನೇತಾಡುವುದನ್ನು ನೋಡಿದ ಪುಟ್ಟ ಬಾಲಕ ಸಮಯಪ್ರಜ್ಞೆ ಮೆರೆದು ಏಣಿಯನ್ನು ಬಹಳ ಶ್ರಮವಹಿಸಿ ನೇರವಾಗಿ ನಿಲ್ಲಿಸಿ ತಾಯಿ ಜೀವ ಉಳಿಸಿದ. ಈ ಪುಟ್ಟ ಬಾಲಕನ ಧೈರ್ಯ (dareness) ಹಾಗೂ ಸಾಹಸವನ್ನು ಎಷ್ಟು ಮೆಚ್ಚಿದರು ಸಾಲದು ಎಂದು ಅವರು ಬರೆದುಕೊಂಡಿದ್ದಾರೆ. 

ಈ ವಿಡಿಯೋ ನೋಡಿದ ಅನೇಕರು ಪ್ರಶಂಸೆ ವ್ಯಕ್ತಪಡಿಸಿದ್ದು, ಈ ದಿನದ ಹೀರೋ ಎಂದು ಒಬ್ಬರು ಕಾಮೆಂಟ್ ಮಾಡಿದ್ದಾರೆ. ಮತ್ತೊಬ್ಬರು ತಮಾಷೆಯಾಗಿ ಡ್ಯಾಡಿಯ ಡೇರಿಂಗ್ ಸನ್ ಡಿಂಡ್‌ಡಾಂಗ್ ಮಮ್ಮಿಯನ್ನು ಸೇವ್ ಮಾಡಿದ( ಅಪ್ಪನ ಧೈರ್ಯವಂತ ಮಗ ನೇತಾಡುತ್ತಿರುವ ಅಮ್ಮನನ್ನು ರಕ್ಷಿಸಿದ) ಎಂದು ಕಾಮೆಂಟ್ ಮಾಡಿದ್ದಾರೆ. ಅಂತಹ ದೊಡ್ಡದಾದ ಏಣಿಯನ್ನು ನೆಟ್ಟಗೆ ನಿಲ್ಲಿಸಿದ ಈ ಪುಟ್ಟ ಬಾಲಕನಿಗೆ ಶತಕೋಟಿ ದೇವರು ಆಶೀರ್ವಾದಿಸಲಿ (Blessings) ಎಂದು ಮತ್ತೊಬ್ಬರು ಕಾಮೆಂಟ್ ಮಾಡಿದ್ದಾರೆ. ಪ್ರಯತ್ನಿಸುವವರಿಗೆ ಎಂದೂ ಸೋಲಾಗುವುದಿಲ್ಲ ಎಂದು ಮತ್ತೊಬ್ಬರು ಕಾಮೆಂಟ್ ಮಾಡಿದ್ದಾರೆ. ಈ ಫೋಸ್ಟ್ ನೋಡಿ ನಾನು ಭಾವುಕನಾದೆ ಎಂದು ಮತ್ತೊಬ್ಬರು ಕಾಮೆಂಟ್ ಮಾಡಿದ್ದಾರೆ. ಏಣಿಯನ್ನು ಎತ್ತಿ ನಿಲ್ಲಿಸಿದ ಮೇಲೂ ಆ ಬಾಲಕ ದೂರ ಸರಿಯಲಿಲ್ಲ ಅದನ್ನು ಹಿಡಿದು ನಿಂತಿದ್ದ ಎಂದು ಮತ್ತೊಬ್ಬರು ಕಾಮೆಂಟ್ ಮಾಡಿದ್ದಾರೆ. ಒಟ್ಟಿನಲ್ಲಿ ಬಾಲಕನ ಕಾರ್ಯಕ್ಕೆ ವ್ಯಾಪಕ ಶ್ಲಾಘನೆ ವ್ಯಕ್ತವಾಗಿದೆ.