ಮಂಗಳಸೂತ್ರ ಧರಿಸಿಲ್ಲ, ಸಿಂಧೂರ ಇಟ್ಟಿಲ್ಲ ಅಂದ್ರೆ ಗಂಡನಿಗೆ ಆಸಕ್ತಿ ಹೇಗೆ ಬರುತ್ತೆ? ಜಡ್ಜ್‌ ಮಾತು ವೈರಲ್‌

ಕೌಟುಂಬಿಕ ಕಲಹದ ಪ್ರಕರಣದಲ್ಲಿ, ನ್ಯಾಯಾಧೀಶರು ದಂಪತಿಗೆ ನೀಡಿದ ಸಲಹೆಗಳು ವಿವಾದಕ್ಕೆ ಕಾರಣವಾಗಿವೆ. ವಕೀಲರೊಬ್ಬರು, ನ್ಯಾಯಾಧೀಶರ ಹೇಳಿಕೆಗಳನ್ನು ಪ್ರಶ್ನಿಸಿ ಸಾಮಾಜಿಕ ಜಾಲತಾಣದಲ್ಲಿ ಪೋಸ್ಟ್ ಮಾಡಿದ್ದಾರೆ. ನ್ಯಾಯಾಧೀಶರ ಸಲಹೆಗಳು ಮಹಿಳಾ ವಿರೋಧಿಯಾಗಿದ್ದವು ಎಂದು ಅವರು ಆರೋಪಿಸಿದ್ದಾರೆ. ಆದರೆ, ನ್ಯಾಯಾಧೀಶರ ವಿರುದ್ಧ ದೂರು ನೀಡಲು ಯಾವುದೇ ಅವಕಾಶವಿಲ್ಲ ಎಂದು ವಕೀಲರು ಬೇಸರ ವ್ಯಕ್ತಪಡಿಸಿದ್ದಾರೆ. ಈ ಪೋಸ್ಟ್ ಸಾಮಾಜಿಕ ಜಾಲತಾಣದಲ್ಲಿ ಚರ್ಚೆಗೆ ಗ್ರಾಸವಾಗಿದೆ.

ಕೌಟುಂಬಿಕ ಕಲಹ (Family conflict )ದ ನಂತ್ರ ದಂಪತಿ ಕೋರ್ಟ್ ಮೆಟ್ಟಿಲೇರ್ತಾರೆ. ಅನೇಕ ಬಾರಿ ದಂಪತಿಯ ಮಧ್ಯೆ ಹೊಂದಾಣಿಕೆ ನಡೆಸುವ ಪ್ರಯತ್ನ ಕೋರ್ಟ್ ನಲ್ಲಿ ನಡೆಯುತ್ತದೆ. ಜಡ್ಜ್ (Judge), ದಾರಿ ತಪ್ಪುತ್ತಿರುವ ದಂಪತಿಗೆ ಸೂಕ್ತ ಸಲಹೆ ನೀಡಿ, ಅವರ ಮನವೊಲಿಸಿ, ಒಬ್ಬರನ್ನೊಬ್ಬರು ಅರ್ಥ ಮಾಡಿಕೊಳ್ಳಲು ಮತ್ತೊಂದಿಷ್ಟು ಅವಕಾಶ ನೀಡುತ್ತಾರೆ. ಹೊಂದಾಣಿಕೆ ಪ್ರಯತ್ನದ ವೇಳೆ ಜಡ್ಜ್ ಒಬ್ಬರು ಹೇಳಿದ ಮಾತು ಈಗ ಚರ್ಚೆಯ ವಿಷ್ಯವಾಗಿದೆ. ವಕೀಲರೊಬ್ಬರು, ಜಡ್ಜ್ ಮಾತನ್ನು ಖಂಡಿಸಿದ್ದಾರೆ. ಆದ್ರೆ ಜಡ್ಜ್ ವಿರುದ್ಧ ದೂರು ನೀಡುವ ಯಾವುದೇ ಆಯ್ಕೆ ಇಲ್ಲ ಎಂದು ಬೇಸರ ವ್ಯಕ್ತಪಡಿಸಿದ್ದಾರೆ. 

ವಕೀಲ ಅಂಕುರ್ ಆರ್ ಎನ್ನುವವರು ಸೋಶಿಯಲ್ ಮೀಡಿಯಾದಲ್ಲಿ ದೀರ್ಘವಾದ ಪೋಸ್ಟ್ ಹಂಚಿಕೊಂಡಿದ್ದಾರೆ. ಅದರಲ್ಲಿ ನ್ಯಾಯಾಧೀಶರ ಹೇಳಿಕೆಯನ್ನು ವಿವರಿಸಿದ್ದಲ್ಲದೆ, ಅವರ ಹೇಳಿಕೆ ಎಷ್ಟು ಸರಿ ಎಂದು ಪ್ರಶ್ನೆ ಮಾಡಿದ್ದಾರೆ. ಅವರು ಒಂದು ದಿನ ಕೋರ್ಟ್ ನಲ್ಲಿದ್ದ ವೇಳೆ ನ್ಯಾಯಾಧೀಶರ ಮುಂದೆ ದಂಪತಿ ಪ್ರಕರಣವೊಂದು ಬಂದಿತ್ತು. ದಂಪತಿಯನ್ನು ಮನವೊಲಿಸಲು ನ್ಯಾಯಾಧೀಶರು ಮುಂದಾಗಿದ್ದರು. ನೀವು ಮಂಗಳಸೂತ್ರ ಮತ್ತು ಬಿಂದಿಯನ್ನು ಧರಿಸಿದಂತೆ ಕಾಣುವುದಿಲ್ಲ. ನೀವು ವಿವಾಹಿತ ಮಹಿಳೆಯಂತೆ ವರ್ತಿಸದಿದ್ದರೆ ನಿಮ್ಮ ಪತಿ ನಿಮ್ಮಲ್ಲಿ ಏಕೆ ಆಸಕ್ತಿ ತೋರುತ್ತಾರೆ ? ಎಂದು ಪ್ರಶ್ನೆ ಕೇಳಿದ್ದಾರೆ ಎಂದು ಅಂಕುರ್ ತಮ್ಮ ಪೋಸ್ಟ್ ನಲ್ಲಿ ಬರೆದಿದ್ದಾರೆ.

ಅಷ್ಟೇ ಅಲ್ಲದೆ ಇನ್ನೊಂದು ಪ್ರಕರಣವನ್ನು ಅವರು ತಮ್ಮ ಪೋಸ್ಟ್ ನಲ್ಲಿ ಉಲ್ಲೇಖಿಸಿದ್ದಾರೆ. ಮಧ್ಯಸ್ಥಿಕೆಯ ಸಮಯದಲ್ಲಿ ನ್ಯಾಯಾಧೀಶರು ನನ್ನ ಮಹಿಳಾ ಕಕ್ಷಿದಾರರಿಗೆ ಒಬ್ಬ ಮಹಿಳೆ ಚೆನ್ನಾಗಿ ಸಂಪಾದಿಸುತ್ತಿದ್ದರೆ, ಅವಳು ಯಾವಾಗಲೂ ತನಗಿಂತ ಹೆಚ್ಚು ಸಂಪಾದಿಸುವ ಗಂಡನನ್ನು ಹುಡುಕುತ್ತಾಳೆ.  ಕಡಿಮೆ ಸಂಪಾದಿಸುವ ಹುಡುಗನನ್ನು ಎಂದೂ ಒಪ್ಪುವುದಿಲ್ಲ. ಆದರೆ, ಚೆನ್ನಾಗಿ ಸಂಪಾದಿಸುವ ಪುರುಷ ಮದುವೆಯಾಗಲು ಬಯಸಿದರೆ, ಅವನು ತನ್ನ ಮನೆಯಲ್ಲಿ ಪಾತ್ರೆ ತೊಳೆಯುವ ಸೇವಕಿಯನ್ನು ಸಹ ಮದುವೆಯಾಗಬಹುದು. ಪುರುಷರು ಎಷ್ಟು ಹೊಂದಿಕೊಳ್ಳುವವರು ನೋಡಿ. ನೀವು ಸ್ವಲ್ಪ ಹೊಂದಿಕೊಳ್ಳಬೇಕು. ಅಷ್ಟು ಕಠಿಣವಾಗಿ ವರ್ತಿಸಬೇಡ ಎಂದಿದ್ದರು ಎಂದು ತಮ್ಮ ಪೋಸ್ಟ್ ನಲ್ಲಿ ಬರೆದಿದ್ದಾರೆ.

ನ್ಯಾಯಾಧೀಶರು ಇಂಥ ಸಲಹೆ ನೀಡಿದರೂ ದುರದೃಷ್ಟವಶಾತ್ ಅವರ ವಿರುದ್ಧ ದೂರು ನೀಡಲು ಯಾವುದೇ ಮಾರ್ಗವಿಲ್ಲ. ನನಗೆ ನ್ಯಾಯಾಧೀಶರ ಈ ಕಮೆಂಟ್ ಇಷ್ಟವಾಗಲಿಲ್ಲ. ಅತ್ಯಂತ ನಿರಾಶಾದಾಯಕ ವಿಷ್ಯ ಅಂದ್ರೆ ಕಕ್ಷಿದಾರರಾಗಲಿ ಅಥವಾ ನನ್ನಂತಹ ಯಾವುದೇ ವೀಕ್ಷಕರಾಗಲಿ ನ್ಯಾಯಾಧೀಶರು ಮಾಡಿದ ಇಂತಹ ಮೊಂಡುತನದ ಕಾಮೆಂಟ್‌ಗಳ ವಿರುದ್ಧ ದೂರು ನೀಡಲು ಯಾವುದೇ ಮಾರ್ಗ ಇಲ್ಲ ಎಂದು ವಕೀಲರು ಬರೆದಿದ್ದಾರೆ. 

ವಕೀಲ ಅಂಕುರ್ ಈ ಪೋಸ್ಟ್ ಸೋಶಿಯಲ್ ಮೀಡಿಯಾದಲ್ಲಿ ವೈರಲ್ ಆಗಿದೆ. ಬಳಕೆದಾರರು ಇದಕ್ಕೆ ವಿಭಿನ್ನ ಪ್ರತಿಕ್ರಿಯೆಗಳನ್ನು ನೀಡುತ್ತಿದ್ದಾರೆ.  ನಾನು ಇಂತಹ ಅಸಮಂಜಸ ಕಾಮೆಂಟ್‌ಗಳನ್ನು ಅನುಭವಿಸಿದ್ದೇನೆ ಎಂದು ಒಬ್ಬ ಬಳಕೆದಾರರು ಬರೆದಿದ್ದಾರೆ. ಇನ್ನೊಬ್ಬರು,  ಜಿಲ್ಲಾ ಮಟ್ಟದ ನ್ಯಾಯಾಧೀಶರಿಗೆ ಮೃದು ಕೌಶಲ್ಯ ತರಬೇತಿ ಮತ್ತು ಸಂವೇದನೆ ಅಗತ್ಯವಿದೆ ಎಂದಿದ್ದಾರೆ. ನೀವು ಪ್ರಕರಣದಲ್ಲಿ ಸೋತಂತೆ ಕಾಣುತ್ತಿದೆ.  ನಿಮ್ಮ ಮೂಲ ಮತ್ತು ನೈತಿಕತೆಯನ್ನು ಮರೆಯಬೇಡಿ ಎಂದು ಸಲಹೆ ನೀಡಿದ್ದಾರೆ. ನ್ಯಾಯಾಧೀಶರು ಹೆಚ್ಚು ವ್ಯವಹಾರಿಕವಾಗಿರಬೇಕು. ಆಗ ಮಾತ್ರ ಸುಧಾರಣೆಯ ಸಾಧ್ಯ,  ನ್ಯಾಯಾಂಗದಲ್ಲಿ ಸುಧಾರಣೆಯ ಅವಶ್ಯಕತೆ ಬಹಳಷ್ಟಿದೆ ಎಂದಿದ್ದಾರೆ. ಜೂನ್ 31, 2019ರಲ್ಲಿ   ಭ್ರಷ್ಟಾಚಾರ ತಡೆ ಕಾಯ್ದೆ (ಪಿಸಿಎ) ಅಡಿಯಲ್ಲಿ ನ್ಯಾಯಮೂರ್ತಿ ಎಸ್. ಶುಕ್ಲಾ  ವಿರುದ್ಧ ಎಫ್‌ಐಆರ್ ದಾಖಲಿಸಲು ಅನುಮತಿ ನೀಡಲಾಗಿತ್ತು.  ಭಾರತೀಯ ನ್ಯಾಯಾಂಗ ಇತಿಹಾಸದಲ್ಲಿ ಅದೇ ಮೊದಲ ಬಾರಿಗೆ ಹೈಕೋರ್ಟ್ ನ್ಯಾಯಾಧೀಶರ ವಿರುದ್ಧ ಎಫ್‌ಐಆರ್ ದಾಖಲಾಗಿತ್ತು.  ಈ ಕೆಳಗಿನ ಲಿಂಕ್‌ ನಲ್ಲಿ ಅಂಕುರ್‌ ಪೋಸ್ಟ್‌ ನೀವು ನೋಡ್ಬಹುದು.