
ಪಿಟಿಐ ನವದೆಹಲಿ (ನ.20): ಗುರುವಾರ ನಡೆದ ಇಪಿಎಫ್ಒ (ಭವಿಷ್ಯ ನಿಧಿ) ಕೇಂದ್ರೀಯ ಟ್ರಸ್ಟಿಗಳ ಮಂಡಳಿ ಸಭೆಯಲ್ಲಿ ನೌಕರರು, ನಿವೃತ್ತರು ಮತ್ತು ಪಿಂಚಣಿದಾರರಿಗೆ ಅನುಕೂಲವಾಗುವಂತೆ ಹಲವು ಪ್ರಮುಖ ನಿರ್ಣಯಗಳನ್ನು ಕೈಗೊಳ್ಳಲಾಗಿದೆ. ಈ ಮೂಲಕ ಇತ್ತೀಚೆಗೆ ಕಠಿಣ ಪಿಎಫ್ ನಿಯಮಾವಳಿಗಳ ವಿರುದ್ಧ ಸಿಡಿದೆದ್ದಿದ್ದ ನೌಕರ ವರ್ಗವನ್ನು ತಣಿಸಲು ಸರ್ಕಾರ ಮುಂದಾಗಿದೆ.
ನಿವೃತ್ತಿಯ ನಂತರ ಪಿಎಫ್ ಖಾತೆಯಲ್ಲಿರುವ ಪೂರ್ತಿ ಹಣವನ್ನು ಒಂದೇ ಬಾರಿಗೆ ಪಡೆಯುವ ಬದಲು, ಮಾಸಿಕ, ತ್ರೈಮಾಸಿಕ ಅಥವಾ ಅರ್ಧವಾರ್ಷಿಕ ಕಂತುಗಳಲ್ಲಿ ಹಿಂಪಡೆಯುವ ವ್ಯವಸ್ಥಿತ ಹಿಂಪಡೆಯುವಿಕೆ ಯೋಜನೆಗೆ ಅನುಮತಿಸಲಾಗಿದೆ. ಖಾತೆಯಲ್ಲಿ ಉಳಿಯುವ ಮೊತ್ತಕ್ಕೆ ಇಪಿಎಫ್ ಬಡ್ಡಿ ದರ ಮುಂದುವರಿಯಲಿದೆ. ಸುಮಾರು 6.32 ಲಕ್ಷ ನಿವೃತ್ತ ಉದ್ಯೋಗಿಗಳಿಗೆ ಇದರ ನೇರ ಪ್ರಯೋಜನ ಸಿಗಲಿದೆ.
ಇಪಿಎಫ್ ಖಾತೆಯಲ್ಲಿ ಕಾಯ್ದುಕೊಳ್ಳಬೇಕಾದ ಕನಿಷ್ಠ ಬ್ಯಾಲೆನ್ಸ್ ಪ್ರಮಾಣವನ್ನು ಶೇ. 25 ರಿಂದ ಶೇ.10ಕ್ಕೆ ಇಳಿಸಲಾಗಿದೆ. ಇದರಿಂದ ಸದಸ್ಯರು ತಮ್ಮ ಉಳಿತಾಯದ ಶೇ. 90 ರಷ್ಟು ಹಣವನ್ನು ಸುಲಭವಾಗಿ ಹಿಂಪಡೆಯಬಹುದು.
ಉದ್ಯೋಗ ಕಳೆದುಕೊಂಡ ನಂತರ ಪೂರ್ಣ ಪಿಎಫ್ ಹಣವನ್ನು ಪಡೆಯಲು ಇದ್ದ 12 ತಿಂಗಳ ಕಾಯುವ ಅವಧಿಯನ್ನು ಇಪಿಎಫ್ಒ ಮಂಡಳಿಯು ಮತ್ತೆ 2 ತಿಂಗಳಿಗೆ ಇಳಿಸಿದೆ. ಪಿಂಚಣಿ ಹಣ (ಇಪಿಎಸ್) ಹಿಂಪಡೆಯಲು 36 ತಿಂಗಳ ಅವಧಿ ಮುಂದುವರಿಯಲಿದೆ.
₹5 ಲಕ್ಷದವರೆಗಿನ ಅರ್ಹ ಮುಂಗಡ ಕ್ಲೈಮ್ಗಳು ಸುಮಾರು 3 ಕೆಲಸದ ದಿನಗಳಲ್ಲಿ ಸ್ವಯಂಚಾಲಿತವಾಗಿ ಇತ್ಯರ್ಥಗೊಳ್ಳುತ್ತವೆ.
ಪಿಂಚಣಿದಾರರು ಅಥವಾ ಸದಸ್ಯರು ಮೃತಪಟ್ಟರೆ, ಅವರ ನಾಮಿನಿಗಳು ಉಳಿದ ಹಣವನ್ನು ಒಂದೇ ಬಾರಿಗೆ ಪಡೆಯಬಹುದು ಅಥವಾ ಕಂತುಗಳ ರೂಪದಲ್ಲಿ ಪಡೆಯುವುದನ್ನು ಮುಂದುವರಿಸಬಹುದು.
ಕರ್ನಾಟಕ, ಭಾರತ (India News) ಮತ್ತು ಜಗತ್ತಿನ ಕ್ಷಣಕ್ಷಣದ ಕನ್ನಡ ಸುದ್ದಿ (Kannada News) ಅಪ್ಡೇಟ್ಗಳಿಗಾಗಿ ಏಷ್ಯಾನೆಟ್ ಸುವರ್ಣ ನ್ಯೂಸ್ ಫಾಲೋ ಮಾಡಿ. ಬ್ರೇಕಿಂಗ್ ಸುದ್ದಿ (Latest Kannada News), ವಿಶೇಷ ವರದಿಗಳು ಮತ್ತು ನೇರ ಪ್ರಸಾರಗಳೊಂದಿಗೆ (kannada news live) ಸಂಪೂರ್ಣ ಮಾಹಿತಿ ಒಂದೇ ಕ್ಲಿಕ್ನಲ್ಲಿ ಲಭ್ಯ. ಏಷ್ಯಾನೆಟ್ ಸುವರ್ಣ ನ್ಯೂಸ್ ಅಧಿಕೃತ ಆ್ಯಪ್ ಡೌನ್ಲೋಡ್ ಮಾಡಿ ಹಾಗು ಎಲ್ಲಾ ಅಪ್ಡೇಟ್ ಗಳನ್ನು ಪಡೆಯಿರಿ