ಬೆಂಗಳೂರು-ದಿಲ್ಲಿ ವಿಮಾನ ದರ ದುಪ್ಪಟ್ಟು?

ಬೆಂಗಳೂರು-ದಿಲ್ಲಿ ವಿಮಾನ ದರ ದುಪ್ಪಟ್ಟು?| 5700 ರು. ಇರುವ ದರ 11,200 ರು.ಗೆ ಹೆಚ್ಚಳ ಸಾಧ್ಯತೆ| ಲಾಕ್‌ಡೌನ್‌ ಅಂತ್ಯದ ಬಳಿಕ ಏರಿಕೆ|  ಅಂತರ ಕಾಯುವ ಕಾರಣ ಇಡೀ ವಿಮಾನ ಭರ್ತಿ ಇಲ್ಲ| ಹೀಗಾಗಿ ಖಾಲಿ ಉಳಿವ ಸೀಟಿನ ದರದ ಹೊರೆ ಪ್ರಯಾಣಿಕರಿಗೆ| ಅಧ್ಯಯನ ವರದಿಯಲ್ಲಿ ವಿಶ್ಲೇಷಣೆ

ನವದೆಹಲಿ(ಮೇ.05): ಒಮ್ಮೆ ಲಾಕ್‌ಡೌನ್‌ ಮುಕ್ತಾಯವಾಗಿ ವಿಮಾನ ಹಾರಾಟ ಆರಂಭವಾಯಿತೆಂದರೆ ವಿಮಾನ ಟಿಕೆಟ್‌ ದರ ದುಪ್ಪಟ್ಟು ಆಗುವ ಸಾಧ್ಯತೆ ಇದೆ. ಬೆಂಗಳೂರು-ದಿಲ್ಲಿ ವಿಮಾನ ಟಿಕೆಟ್‌ ದರ 5,700 ರು.ನಿಂದ 11,200 ರು.ಗೆ ಏರುವ ಸಂಭವವಿದೆ ಎಂದು ಅಧ್ಯಯನ ವರದಿಯೊಂದು ಹೇಳಿದೆ.

ಇದಕ್ಕೆ ಅನೇಕ ಕಾರಣಗಳಿವೆ. ಕೊರೋನಾ ಬರದಂತೆ ತಡೆಯಲು ಸಾಮಾಜಿಕ ಅಂತರ ಕಾಯ್ದುಕೊಳ್ಳುವ ಪದ್ಧತಿ ವಿಮಾನಗಳಲ್ಲೂ ಜಾರಿಗೆ ಬರಲಿದೆ. ಅಂದರೆ 3 ಸೀಟುಗಳಿರುವ ಒಂದು ಆಸನದಲ್ಲಿ ಮಧ್ಯದ ಸೀಟನ್ನು ಖಾಲಿ ಬಿಡಬೇಕಾಗುತ್ತದೆ. ಅಲ್ಲದೆ, ವಿಮಾನ ಸಾಗುವಾಗ ಪ್ರಯಾಣಿಕರಿಗೆ ಹೆಚ್ಚೂ ಕಡಿಮೆ ಆದರೆ ಕ್ವಾರಂಟೈನ್‌ಗೆಂದು ಕೊನೆಯ 3 ಸಾಲು ಖಾಲಿ ಬಿಡಬೇಕು ಎಂದು ವಿಮಾನಯಾನ ಸಚಿವಾಲಯ ಪ್ರಸ್ತಾಪ ಇರಿಸಿದೆ. ಆಗ 180 ಸೀಟಿನ ವಿಮಾನದಲ್ಲಿ 108 ಮಂದಿಗೆ ಮಾತ್ರ ಪ್ರಯಾಣಕ್ಕೆ ಅವಕಾಶ ಲಭಿಸಲಿದೆ. ಅಲ್ಲದೆ, ವಿಮಾನವನ್ನು ಸೋಂಕು ರಹಿತಗೊಳಿಸಲು ಸಾಕಷ್ಟುಶುದ್ಧೀಕರಣ ಕ್ರಮ ಜರುಗಿಸಬೇಕಾಗುತ್ತದೆ.

ಹೀಗಾದರೆ ವಿಮಾನಯಾನ ಕಂಪನಿಗಳು ಭಾರೀ ಖರ್ಚು ಮಾಡಬೇಕಾಗುತ್ತದೆ. ಈ ವೆಚ್ಚ ಹಾಗೂ ಖಾಲಿ ಸೀಟಿನ ವೆಚ್ಚವನ್ನು ಸರಿದೂಗಿಸಲು ವಿಮಾನ ಪ್ರಯಾಣ ದರವನ್ನು ದುಪ್ಪಟ್ಟು ಮಾಡಬೇಕಾಗುತ್ತದೆ. ಸುಮಾರು 5700 ರು. ಇರುವ ದಿಲ್ಲಿ-ಬೆಂಗಳೂರು ವಿಮಾನ ಟಿಕೆಟ್‌ ದರ 11,200 ರು.ಗೆ ಏರುವ ಸಾಧ್ಯತೆ ಇದೆ. 5000 ರು. ಇರುವ ಮುಂಬೈ-ದಿಲ್ಲಿ ವಿಮಾನ ಪ್ರಯಾಣ ದರ 9,700 ರು.ಗೆ ಏರುವ ಸಾಧ್ಯತೆ ಇದೆ ಎಂದು ಏಷ್ಯಾ ಪೆಸಿಫಿಕ್‌ ಏವಿಯೇಶನ್‌ ಇಂಡಿಯಾ ಸೆಂಟರ್‌ (ಸಿಎಪಿಎ) ಅಧ್ಯಯನ ವರದಿ ಅಂದಾಜು ಮಾಡಿದೆ.