ಮಣಿಪುರ ಮತ್ತೆ ಧಗಧಗ: ಮಣಿಪುರ ಬಿಜೆಪಿ ನಾಯಕರ ಮನೆಗಳೇ ಟಾರ್ಗೆಟ್‌

 ಜನಾಂಗೀಯ ಸಂಘರ್ಷದಿಂದ ನಲುಗಿರುವ ಈಶಾನ್ಯ ರಾಜ್ಯ ಮಣಿಪುರದಲ್ಲಿ ಪರಿಸ್ಥಿತಿ ಮತ್ತಷ್ಟು ವಿಕೋಪಕ್ಕೆ ಹೋಗುತ್ತಿರುವಂತಿದೆ.  ರಾತ್ರಿಯಿಡೀ ಸಹಸ್ರಾರು ಜನರನ್ನು ಒಳಗೊಂಡ ದೊಂಬಿ ವಿವಿಧ ಸ್ಥಳಗಳಿಗೆ ಬೆಂಕಿ ಹಚ್ಚಿದೆ. 

ಪಿಟಿಐ ಇಂಫಾಲ/ಕೋಲ್ಕತಾ: ಜನಾಂಗೀಯ ಸಂಘರ್ಷದಿಂದ ನಲುಗಿರುವ ಈಶಾನ್ಯ ರಾಜ್ಯ ಮಣಿಪುರದಲ್ಲಿ ಪರಿಸ್ಥಿತಿ ಮತ್ತಷ್ಟು ವಿಕೋಪಕ್ಕೆ ಹೋಗುತ್ತಿರುವಂತಿದೆ.  ರಾತ್ರಿಯಿಡೀ ಸಹಸ್ರಾರು ಜನರನ್ನು ಒಳಗೊಂಡ ದೊಂಬಿ ವಿವಿಧ ಸ್ಥಳಗಳಿಗೆ ಬೆಂಕಿ ಹಚ್ಚಿದೆ. ಮತ್ತೊಂದೆಡೆ, ಈ ಗುಂಪು ಬಿಜೆಪಿ ನಾಯಕರ ಮನೆ- ಆಸ್ತಿಗಳನ್ನೇ ಗುರಿಯಾಗಿಸಿಕೊಂಡಿರುವುದು ಸ್ಪಷ್ಟವಾಗಿದೆ. ಶುಕ್ರವಾರ ರಾತ್ರಿ ಬಿಜೆಪಿ ರಾಜ್ಯಾಧ್ಯಕ್ಷೆ, ಬಿಜೆಪಿ ಶಾಸಕ ಸೇರಿದಂತೆ ಕೆಲವರ ಮನೆಗೆ ಬೆಂಕಿ ಹಚ್ಚಲು ಪ್ರಯತ್ನ ನಡೆಸಿದ್ದು, ಕ್ಷಿಪ್ರ ಕಾರ್ಯಾಚರಣೆ ಪಡೆ (ಆರ್‌ಪಿಎಫ್‌) ಹಾಗೂ ಸೇನಾಪಡೆಗಳ ಮಧ್ಯಪ್ರವೇಶದಿಂದಾಗಿ ಅದು ತಪ್ಪಿದೆ. ಮೊನ್ನೆಯಷ್ಟೇ ಕೇಂದ್ರ ಸಚಿವರೊಬ್ಬರ ಮನೆಯನ್ನು ದಹಿಸಲಾಗಿತ್ತು.

ಈ ಮಧ್ಯೆ, ಭದ್ರತಾ ಪಡೆಗಳ ಜತೆ ಗುಂಪೊಂದು ಸಂಘರ್ಷಕ್ಕೆ ಇಳಿದಿದ್ದರಿಂದ ಇಬ್ಬರು ಗಾಯಗೊಂಡಿದ್ದಾರೆ. ಮಣಿಪುರದ (Manipur) ಬಿಷ್ಣುಪುರ (Bishnupur) ಹಾಗೂ ಚೂರಾಚಾಂದ್‌ಪುರ (Churachandpur) ಜಿಲ್ಲೆಯಲ್ಲಿ ರಾತ್ರಿಯಿಡೀ ಆ್ಯಟೋಮ್ಯಾಟಿಕ್‌ ರೈಫಲ್‌ಗಳಿಂದ (automatic rifles) ಗುಂಡಿನ ಶಬ್ದ ಕೇಳಿ ಬಂದಿದೆ. ಪಶ್ಚಿಮ ಇಂಫಾಲ ಜಿಲ್ಲೆಯ ಇರಿಂಗ್‌ಬಾಮ್‌ ಪೊಲೀಸ್‌ ಠಾಣೆಯಿಂದ (Iringbaum police) ಶಸ್ತ್ರಾಸ್ತ್ರ ಲೂಟಿಗೆ ಯತ್ನ ನಡೆದಿದೆ.

ಇಂಫಾಲದಲ್ಲಿ ಅಸ್ಸಾಂ ರೈಫಲ್ಸ್‌ (Assam Rifles) ಹಾಗೂ ಆರ್‌ಎಎಫ್‌ ಯೋಧರು (RAF soldiers) ಶುಕ್ರವಾರ ತಡರಾತ್ರಿವರೆಗೆ ಜಂಟಿ ಪಥಸಂಚಲನ ನಡೆಸಿದರೂ, ದೊಂಬಿಕೋರರು ಹೆದರಿಲ್ಲ. ಸುಮಾರು 1000 ಜನರು ಒಟ್ಟುಗೂಡಿ ಪ್ಯಾಲೇಸ್‌ ಕಾಂಪೌಂಡ್‌ ಬಳಿಯ ಕಟ್ಟಡಗಳಿಗೆ ಬೆಂಕಿ ಹಚ್ಚಲು ಯತ್ನಿಸಿದ್ದಾರೆ. ಆರ್‌ಎಎಫ್‌ ಸ್ಥಳಕ್ಕೆ ಆಗಮಿಸಿ, ರಬ್ಬರ್‌ ಬುಲೆಟ್‌ ಹಾಗೂ ಅಶ್ರುವಾಯು ಸಿಡಿಸಿದ್ದರಿಂದ ಅವರು ಪರಾರಿಯಾಗಿದ್ದಾರೆ.

ಮತ್ತೊಂದು ದೊಂಬಿಯು ಬಿಜೆಪಿ ಶಾಸಕ ಬಿಸ್ವಜೀತ್‌ (BJP MLA Biswajeet) ಮನೆಗೆ ಬೆಂಕಿ ಹಚ್ಚಲು ಯತ್ನಿಸಿದೆ. ಆರ್‌ಎಎಫ್‌ ಆ ಗುಂಪನ್ನೂ ಚದುರಿಸುವಲ್ಲಿ ಯಶಸ್ವಿಯಾಗಿದೆ. ಇನ್ನೊಂದು ಗುಂಪು ಶುಕ್ರವಾರ ತಡರಾತ್ರಿ ಬಿಜೆಪಿ ಕಚೇರಿಯನ್ನು ಸುತ್ತುವರೆದು ದಾಂಧಲೆಗೆ ಯತ್ನಿಸಿತಾದರೂ ಸೇನೆ ಆ ಯತ್ನವನ್ನು ವಿಫಲಗೊಳಿಸಿದೆ. ಬಿಜೆಪಿ ರಾಜ್ಯಾಧ್ಯಕ್ಷೆ ಶಾರದಾದೇವಿ (Sharadadevi) ಅವರ ನಿವಾಸದಲ್ಲೂ ದಾಂಧಲೆಗೆ ಯತ್ನ ನಡೆದಿದ್ದು, ಭದ್ರತಾ ಪಡೆಗಳೂ ಯುವಕರನ್ನು ಓಡಿಸಿವೆ. ಇದಕ್ಕೂ ಮುನ್ನ ಇಂಫಾಲದ ವಿವಿಧೆಡೆ ಹಲವಾರು ಆಸ್ತಿಗಳಿಗೆ ಬೆಂಕಿ ಹಚ್ಚಲಾಗಿದೆ.