ಕಾಶ್ಮೀರದಲ್ಲಿನ 14 ಮೆಸೇಜಿಂಗ್‌ ಆ್ಯಪ್‌ಗಳಿಗೆ ನಿಷೇಧ: ಉಗ್ರಗಾಮಿಗಳಿಗೆ ಕೇಂದ್ರದ ಶಾಕ್‌

terrorist activitiesಗೆ ಮತ್ತೊಂದು ಆಘಾತ ನೀಡಿರುವ ಕೇಂದ್ರ ಸರ್ಕಾರ, ಜಮ್ಮು-ಕಾಶ್ಮೀರದಲ್ಲಿ ಉಗ್ರರು ಸಂದೇಶಗಳ ವಿನಿಮಯಕ್ಕಾಗಿ ಬಳಸುತ್ತಿದ್ದ 14 ಮೊಬೈಲ್‌ ಆ್ಯಪ್‌ಗಳಿಗೆ ನಿಷೇಧ ಹೇರಿದೆ.

ನವದೆಹಲಿ: ಭಯೋತ್ಪಾದಕ ಚಟುವಟಿಕೆಗಳಿಗೆ ಮತ್ತೊಂದು ಆಘಾತ ನೀಡಿರುವ ಕೇಂದ್ರ ಸರ್ಕಾರ, ಜಮ್ಮು-ಕಾಶ್ಮೀರದಲ್ಲಿ ಉಗ್ರರು ಸಂದೇಶಗಳ ವಿನಿಮಯಕ್ಕಾಗಿ ಬಳಸುತ್ತಿದ್ದ 14 ಮೊಬೈಲ್‌ ಆ್ಯಪ್‌ಗಳಿಗೆ ನಿಷೇಧ ಹೇರಿದೆ. ಬೆಂಬಲಿಗರು ಹಾಗೂ ಸಂಘಟನೆ ಪರವಾಗಿ ದುಡಿಯುವ ಉಗ್ರರ ಜತೆ ಸಂಪರ್ಕ ಸಾಧಿಸಲು ಉಗ್ರಗಾಮಿ ಸಂಘಟನೆಗಳು ಈ ಆ್ಯಪ್‌ಗಳನ್ನು ಬಳಕೆ ಮಾಡುತ್ತಿದ್ದವು. ಅಲ್ಲದೆ ಪಾಕಿಸ್ತಾನದಿಂದ ಈ ಆ್ಯಪ್‌ಗಳ ಮೂಲಕವೇ ನಿರ್ದೇಶನ ಪಡೆಯುತ್ತಿದ್ದವು. ಹೀಗಾಗಿ ಉಗ್ರ ಸಂಘಟನೆಗಳಿಗೆ ಭರ್ಜರಿ ಹೊಡೆತ ಬಿದ್ದಂತಾಗಿದೆ ಎಂದು ವಿಶ್ಲೇಷಿಸಲಾಗುತ್ತಿದೆ.

ಕ್ರಿಪ್‌ವೈಸರ್‌ (Crypvisor) , ಎನಿಗ್ಮಾ (Enigma), ಸೇಫ್‌ಸ್ವಿಸ್‌ (SafeSwiss), ವಿಕ್ರಮಿ (Vikrami), ಮೀಡಿಯಾಫೈರ್‌ (Mediafire), ಬ್ರಿಯಾರ್‌(Briar), ಬಿಚಾಟ್‌ (BiChat), ನಂದ್‌ಬಾಕ್ಸ್‌ (Nandbox), ಕೊನಿಯಾನ್‌ (Conion), ಐಎಂಒ(IMO), ಎಲಿಮೆಂಟ್‌ (Element), ಸೆಕೆಂಡ್‌ ಲೈನ್‌( Second Line), ಝಾಂಗಿ (Zangi) ಹಾಗೂ ಥ್ರೀಮಾ (Threema)ಎಂಬ ಆ್ಯಪ್‌ಗಳನ್ನು ನಿಷೇಧಿಸಲಾಗಿದೆ.  ಭದ್ರತೆ ಹಾಗೂ ಗುಪ್ತಚರ ಸಂಸ್ಥೆಗಳ ಶಿಫಾರಸು ಆಧರಿಸಿ ಈ ಕ್ರಮವನ್ನು ತೆಗೆದುಕೊಳ್ಳಲಾಗಿದೆ. ರಾಷ್ಟ್ರೀಯ ಭದ್ರತೆಗೆ ಅಪಾಯಕಾರಿಯಾಗಿರುವ ಹಾಗೂ ಭಾರತೀಯ ಕಾನೂನುಗಳನ್ನು ಪಾಲನೆ ಮಾಡದಿರುವ ಆ್ಯಪ್‌ಗಳ ಪಟ್ಟಿಯನ್ನು ಸಿದ್ಧಪಡಿಸಿ, ನಿಷೇಧ ಹೇರುವಂತೆ ಸಂಬಂಧಿಸಿದ ಸಚಿವಾಲಯಕ್ಕೆ ಶಿಫಾರಸು ಮಾಡಲಾಗಿತ್ತು ಅದರಂತೆ, ಮಾಹಿತಿ ತಂತ್ರಜ್ಞಾನ ಕಾಯ್ದೆ 2000ರ ಸೆಕ್ಷನ್‌ 69ಎ ಅಡಿ ಆ್ಯಪ್‌ಗಳನ್ನು ನಿಷೇಧಿಸಲಾಗಿದೆ.