ಭೂಮಿಯಿಂದ 5 ಸಾವಿರ ಅಡಿ ಎತ್ತರದಲ್ಲಿದೆ ಸ್ವರ್ಗದ ಬಾಗಿಲು: ಇಲ್ಲಿಗೆ ತಲುಪೋದು ಹೇಗೆ?

ಸ್ವರ್ಗ ಅನ್ನೋದು ಬಹುತೇಕರಿಗೆ ಸತ್ತ ನಂತರದ ಬದುಕಿನ ಕಲ್ಪನೆ. ಆದರೆ ಭೂಮಿ ಮೇಲೆಯೇ ಇರುವ ಸ್ವರ್ಗದ ಬಾಗಿಲಿನ ಬಗ್ಗೆ ನಿಮಗೆ ಗೊತ್ತಾ? ಇದು ಇರೋದು ಎಲ್ಲಿ ಆ ಸ್ಥಳವನ್ನು ತಲುಪುವುದು ಹೇಗೆ ಇಲ್ಲಿದೆ ಮಾಹಿತಿ.

ಅಡಗಿರುವ ನಿಧಿ

ಜಗತ್ತಿನ ಕೆಲವು ಸ್ಥಳಗಳು ತಮ್ಮ ಸುಂದರ ಕಡಲತೀರಗಳಿಗೆ ಹೆಸರುವಾಸಿಯಾಗಿದ್ದರೆ, ಇನ್ನು ಕೆಲವು ತಮ್ಮ ಐತಿಹಾಸಿಕ ಮಹತ್ವಕ್ಕೆ ಹೆಸರುವಾಸಿಯಾಗಿವೆ.ಅದೇ ಸಮಯದಲ್ಲಿ, ಕೆಲವು ಸ್ಥಳಗಳು ವಿಚಿತ್ರ ಕಾರಣಗಳಿಗಾಗಿ ಜನರನ್ನು ಆಕರ್ಷಿಸುತ್ತವೆ. ಚೀನಾದಲ್ಲಿ ಇಂತಹ ಹಲವು ಸ್ಥಳಗಳಿವೆ. ಪರ್ವತ ಕಾಡುಗಳಿಂದ ಹಿಡಿದು ರಕ್ತ ಕೆಂಪು ನದಿಗಳು ಮತ್ತು ಜಲಪಾತಗಳವರೆಗೆ ಅಲ್ಲಿ ಎಲ್ಲವೂ ವಿಚಿತ್ರವೇ.

ಭೌಗೋಳಿಕ ಸ್ಥಳಗಳು

ಹಾಗೆಯೇ  ಇಂದು ನಾವು ನಿಮಗೆ ವಿಚಿತ್ರ ಎನಿಸುವ 'ಸ್ವರ್ಗದ ಬಾಗಿಲು' ಎಂದು ಕರೆಯಲ್ಪಡುವ ಸ್ಥಳದ ಬಗ್ಗೆ ಮಾಹಿತಿ ನೀಡಲಿದ್ದೇವೆ. ಸ್ವರ್ಗ ಅಥವಾ ನರಕ ಎಲ್ಲಿದೆ ಎಂದು ನಿಜವಾಗಿಯೂ ನಮಗೆ ತಿಳಿದಿಲ್ಲದಿದ್ದರೂ, ಚೀನಾದ ಈ ಸ್ವರ್ಗದ ಬಾಗಿಲನ್ನು ನೋಡಲು ಜಗತ್ತಿನಾದ್ಯಂತ ಜನರು ಬರುತ್ತಾರೆ.

ವಿಶ್ವದ ಸ್ವರ್ಗದ ಬಾಗಿಲು

ಜಗತ್ತಿನಲ್ಲಿ ಇರುವ ಹಲವು ಅದ್ಭುತ ಸ್ಥಳಗಳಿಗೆ ವಿವಿಧ ದೇಶಗಳಿಂದ ಲಕ್ಷಾಂತರ ಪ್ರವಾಸಿಗರು ಭೇಟಿ ನೀಡುತ್ತಾರೆ. ಹಾಗೆಯೇ ಪ್ರಪಂಚದ ವಿವಿಧ ಸ್ಥಳಗಳಿಂದ ಪ್ರವಾಸಿಗರನ್ನು ಆಕರ್ಷಿಸುವ ಪ್ರವಾಸಿ ತಾಣಗಳಲ್ಲಿ ಈ ಸ್ವರ್ಗದ ಬಾಗಿಲು ಕೂಡ ಒಂದು. ಅಂದಹಾಗೆ ಈ ಭೂಮಿ ಮೇಲಿನ ಸ್ವರ್ಗದ ಬಾಗಿಲು ಇರೋದು ಚೀನಾದ ಟಿಯಾನನ್ಮೆನ್ ಪರ್ವತದಲ್ಲಿ.

ಸ್ವರ್ಗದ ಬಾಗಿಲು

5000 ಅಡಿ ಎತ್ತರದಲ್ಲಿರುವ ಈ 'ಸ್ವರ್ಗದ ಬಾಗಿಲು' ಹೆಸರಿನ ಗುಹೆಯನ್ನು ತಲುಪಲು 999 ಮೆಟ್ಟಿಲುಗಳನ್ನು ಹತ್ತಬೇಕು. ಮೋಡಗಳಿಂದ ಆವೃತವಾದ ಈ ಗುಹೆಯೂ ಅಲ್ಲಿ ಅಡಗಿರುವ ನಿಧಿ ಮತ್ತು ಕಣ್ಮರೆಯಾದ ಜಲಪಾತದ ಸ್ವಾರಸ್ಯಕರವಾದ ಕಥೆಯ ಹಿನ್ನೆಲೆಯನ್ನು ಹೊಂದಿದೆ.

ಚೀನಾ

ಈ ಸ್ವರ್ಗದ ಬಾಗಿಲು 5000 ಅಡಿ ಎತ್ತರದಲ್ಲಿದೆ, ಅಲ್ಲಿಗೆ ಹೋಗಲು 999 ಮೆಟ್ಟಿಲುಗಳನ್ನು ಹತ್ತಬೇಕು. ಇದನ್ನು ಸ್ವರ್ಗದ ಬಾಗಿಲು ಎಂದು ಕರೆಯುತ್ತಾರೆ ಎಂದು ನೀವು ಖಂಡಿತವಾಗಿಯೂ ಯೋಚಿಸುತ್ತೀರಿ? ಈ ಸ್ಥಳ ಟಿಯಾನನ್ಮೆನ್ ಪರ್ವತ, ಇದು ಚೀನಾದಲ್ಲಿದೆ. ಇದು ಚೀನಾದ ಪ್ರಮುಖ ಪ್ರವಾಸಿ ತಾಣವಾಗಿದೆ. ಟಿಯಾನನ್ಮೆನ್ ಪರ್ವತದ ತುದಿಯಲ್ಲಿ ಒಂದು ಗುಹೆ ಇದೆ.

ಟಿಯಾನನ್ಮೆನ್ ಪರ್ವತ

ಇದು ನೆಲದಿಂದ ಸುಮಾರು 5000 ಅಡಿ ಎತ್ತರದಲ್ಲಿದೆ. ಇದು ಪರ್ವತದ ಮೇಲಿರುವ ವಿಶ್ವದ ಅತಿ ಎತ್ತರದ ಗುಹೆ ಎಂದು ಪರಿಗಣಿಸಲ್ಪಟ್ಟಿದೆ. ಈ ಗುಹೆಯನ್ನು ಸ್ವರ್ಗದ ಬಾಗಿಲು ಎಂದೂ ಕರೆಯುತ್ತಾರೆ. ಕ್ರಿ.ಶ. 253 ರಲ್ಲಿ ಈ ಪರ್ವತದ ಕೆಲವು ಭಾಗಗಳು ಒಡೆದು ಈ ಗುಹೆ ರೂಪುಗೊಂಡಿದೆ ಎಂದು ಮಾಧ್ಯಮ ವರದಿಗಳು ತಿಳಿಸಿವೆ.

ಇದರ ಉದ್ದ 196 ಅಡಿ, ಎತ್ತರ 431 ಅಡಿ ಮತ್ತು ಅಗಲ 187 ಅಡಿ. ಎತ್ತರದ ಕಾರಣ ಇದು ಯಾವಾಗಲೂ ಮೋಡಗಳಿಂದ ಆವೃತವಾಗಿರುವುದರಿಂದ, ಜನರು ಇದನ್ನು ಸ್ವರ್ಗದ ಬಾಗಿಲು ಎಂದು ಕರೆಯಲು ಪ್ರಾರಂಭಿಸಿದರು. ಕೆಲವು ವರ್ಷಗಳ ಹಿಂದೆ ಇಲ್ಲಿಗೆ ಹೋಗುವುದು ತುಂಬಾ ಕಷ್ಟಕರವಾಗಿತ್ತು. ಆದರೆ ಈಗ ರಸ್ತೆ ಮತ್ತು ಕೇಬಲ್ ಕಾರ್ ಮೂಲಕ ಪ್ರವಾಸಿಗರು ಇಲ್ಲಿಗೆ ಬರಬಹುದು.

ಚೀನಾದ ಸ್ವರ್ಗದ ಬಾಗಿಲು

ವಿಶ್ವದ ಅತಿ ಉದ್ದದ ಹಾಗೂ 24459 ಅಡಿ ಎತ್ತರದಲ್ಲಿ ಇಲ್ಲಿ ಕೇಬಲ್ ಕಾರ್ ಇದೆ ಎಂದು ತಿಳಿದು ನೀವು ಆಶ್ಚರ್ಯಪಡುತ್ತೀರಿ. ಈ ದಾಖಲೆ ಗಿನ್ನೆಸ್ ಪುಸ್ತಕದಲ್ಲೂ ದಾಖಲಾಗಿದೆ. ಆದರೆ ರಸ್ತೆ ಮತ್ತು ಕೇಬಲ್ ಕಾರಿನಿಂದ ಇಳಿದ ನಂತರ, ಗುಹೆಯನ್ನು ತಲುಪಲು ಜನರು 999 ಮೆಟ್ಟಿಲುಗಳನ್ನು ಹತ್ತಬೇಕು, ಇದು ಸುಲಭದ ಕೆಲಸವಲ್ಲ. ಚೀನಾ ತತ್ತ್ವಶಾಸ್ತ್ರದ ಪ್ರಕಾರ, ಈ 999 ಮೆಟ್ಟಿಲುಗಳು ಅತ್ಯುನ್ನತ ಸಂಖ್ಯೆ ಮತ್ತು ಚಕ್ರವರ್ತಿಯ ಸಂಕೇತವಾಗಿದೆ. ಮೋಡಗಳ ನಡುವೆ ಈ ಗುಹೆಯನ್ನು ನೋಡುವುದು ಅದ್ಭುತವಾಗಿದೆ.

ನಿಧಿ ಬೆಟ್ಟಗಳು

ಈ ಪರ್ವತದ ಬಗ್ಗೆ ಆಗಾಗ್ಗೆ ವಿವಿಧ ವಿಚಾರಗಳು ತಿಳಿದು ಬರುತ್ತವೆ. ಒಂದೆಡೆ, ಸ್ವರ್ಗದ ಬಾಗಿಲಿನಿಂದಾಗಿ ಇದು ವಿಶ್ವಾದ್ಯಂತ ಪ್ರಸಿದ್ಧವಾಗಿದೆ. ಮತ್ತೊಂದೆಡೆ, ಈ ಪರ್ವತಗಳಲ್ಲಿ ಬಹಳಷ್ಟು ನಿಧಿ ಅಡಗಿದೆ ಎಂದು ಜನರು ಹೇಳುತ್ತಾರೆ. ಹಲವರು ಈ ನಿಧಿಯನ್ನು ಹುಡುಕಲು ಪ್ರಯತ್ನಿಸಿದರು. ಆದರೆ ಅವರು ಯಾರು ತಮ್ಮ ಗುರಿ ತಲುಪಲು ವಿಫಲರಾದರು. ಟಿಯಾನನ್ಮೆನ್ ಪರ್ವತ ಒಂದು ಕಾಲದಲ್ಲಿ ಅದರ ಅದ್ಭುತ ಜಲಪಾತಕ್ಕೆ ಹೆಸರುವಾಸಿಯಾಗಿತ್ತು ಎಂಬ ಮಾಹಿತಿ ಇದೆ.

ಐತಿಹಾಸಿಕ ಸಂಗತಿಗಳು

20ನೇ ಶತಮಾನದ ಕತೆ ಇದಾಗಿದ್ದು ಆ ಸಮಯದಲ್ಲಿ, ಈ ಜಲಪಾತ ಕೇವಲ 15 ನಿಮಿಷಗಳ ಕಾಲ ಮಾತ್ರ ಗೋಚರಿಸುತ್ತಿತ್ತು, ನಂತರ ಅದು ಕಣ್ಮರೆಯಾಗುತ್ತಿತ್ತು. ಆದಾಗ್ಯೂ, ಕ್ರಮೇಣ ಈ ಜಲಪಾತ ಸಂಪೂರ್ಣವಾಗಿ ಕಣ್ಮರೆಯಾಯಿತು, ಈಗ ಅದರ ಯಾವುದೇ ಚಿಹ್ನೆಗಳಿಲ್ಲ.ಚೀನಾದಲ್ಲಿ ಮಾತ್ರವಲ್ಲ, ಭಾರತದಲ್ಲೂ 35000 ಮೆಟ್ಟಿಲುಗಳನ್ನು ಹೊಂದಿರುವ ಗುಹೆ ಇದೆ. ಈ ಗುಹೆ ರಾಜಸ್ಥಾನದ ದೌಸರ್ ಅಬಾನೇರಿ ನಗರದಲ್ಲಿರುವ ಚಂದ್ ಬಾವಡಿಯಲ್ಲಿದೆ. ಈ ಗುಹೆಯ ಉದ್ದ ಸುಮಾರು 17 ಕಿ.ಮೀ. ಇದು ಹತ್ತಿರದ ಬಂದಾರೇಜ್ ಗ್ರಾಮದಿಂದ ಹುಟ್ಟಿಕೊಂಡಿದೆ.