ಹೈದರಾಬಾದ್‌ನಲ್ಲಿ ನಡೆದ ಬಾಂಗ್ಲಾದೇಶ ಎದುರಿನ 3ನೇ ಟಿ20 ಪಂದ್ಯದಲ್ಲಿ ಭಾರತ ತಂಡ 297 ರನ್‌ಗಳಿಸಿ, ಸಂಜು ಸ್ಯಾಮ್ಸನ್ ಶತಕ ಸಿಡಿಸಿ, ಸೂರ್ಯಕುಮಾರ್ ಯಾದವ್ 2500 ರನ್‌ಗಳ ಗಡಿ ದಾಟಿ ಹಲವು ದಾಖಲೆಗಳನ್ನು ಬರೆದಿದೆ.
ಹೈದರಾಬಾದ್‌ನಲ್ಲಿ ನಡೆದ ಬಾಂಗ್ಲಾದೇಶ ವಿರುದ್ಧದ 3ನೇ ಟಿ20 ಪಂದ್ಯದಲ್ಲಿ ಭಾರತ 297 ರನ್‌ಗಳಿಸಿ ಹಲವು ದಾಖಲೆ ಬರೆದಿದೆ. ಇಲ್ಲಿ ವಿವರಗಳಿವೆ.
ಈಗಾಗಲೇ ಟಿ20 ಸರಣಿಯನ್ನ 2-0 ಅಂತರದಲ್ಲಿ ಗೆದ್ದಿದ್ದ ಭಾರತಕ್ಕೆ 3ನೇ ಪಂದ್ಯ ಔಪಚಾರಿಕತೆ ಅಂದುಕೊಂಡಿದ್ರೆ, ಅದಕ್ಕೆ ತದ್ವಿರುದ್ಧವಾಗಿ ಹಲವು ದಾಖಲೆಗಳು ಸೃಷ್ಟಿಯಾಗಿವೆ.
ಸಂಜು ಸ್ಯಾಮ್ಸನ್ ಮತ್ತು ಅಭಿಷೇಕ್ ಶರ್ಮಾ ಆರಂಭಿಕರಾಗಿ ಕಣಕ್ಕಿಳಿದರು. ಅಭಿಷೇಕ್ ಶರ್ಮಾ 4 ರನ್‌ಗೆ ಔಟಾದರು. ಆಗ ಭಾರತ 23 ರನ್ ಗಳಿಸಿತ್ತು. ನಂತರ ಸಂಜು ಸ್ಯಾಮ್ಸನ್ ಮತ್ತು ನಾಯಕ ಸೂರ್ಯಕುಮಾರ್ ಯಾದವ್ ಜೋಡಿ ಸಿಡಿಮದ್ದು ಸಿಡಿಸಿತು. ಹೈದರಾಬಾದ್‌ನಲ್ಲಿ ಇಬ್ಬರೂ ಸಿಕ್ಸರ್‌ಗಳ ಮಳೆ ಸುರಿಸಿದರು.
ಸಂಜು ಸ್ಯಾಮ್ಸನ್‌ರ ಮೊದಲ ಶತಕ, ಅತಿವೇಗದ ಶತಕ:
ಒಂದೇ ಓವರ್‌ನಲ್ಲಿ 5 ಸಿಕ್ಸರ್ ಬಾರಿಸಿದ ಸಂಜು ಸ್ಯಾಮ್ಸನ್ 22 ಎಸೆತಗಳಲ್ಲಿ 51 ರನ್ ಗಳಿಸಿ ಅತಿ ವೇಗದ ಅರ್ಧಶತಕ ಸಿಡಿಸಿದರು. ಮುಂದಿನ 18 ಎಸೆತಗಳಲ್ಲಿ 49 ರನ್ ಗಳಿಸಿ 40 ಎಸೆತಗಳಲ್ಲಿ ಶತಕ ಬಾರಿಸಿ ದಾಖಲೆ ನಿರ್ಮಿಸಿದರು. ಇದು ಅವರ ಮೊದಲ ಟಿ20 ಶತಕ. ಇನ್ನು ಭಾರತ ಪರ ಅತಿವೇಗದ ಟಿ20 ಶತಕ ಸಿಡಿಸಿದ 2ನೇ ಆಟಗಾರ ಎಂಬ ಹೆಗ್ಗಳಿಕೆಗೆ ಪಾತ್ರರಾದರು. ರೋಹಿತ್ ಶರ್ಮಾ 35 ಎಸೆತಗಳಲ್ಲಿ ಶತಕ ಸಿಡಿಸಿದ್ದಾರೆ.
ಕೊನೆಯದಾಗಿ ಸಂಜು ಸ್ಯಾಮ್ಸನ್ 47 ಎಸೆತಗಳಲ್ಲಿ 11 ಬೌಂಡರಿ, 8 ಸಿಕ್ಸರ್‌ಗಳೊಂದಿಗೆ 111 ರನ್ ಗಳಿಸಿ ಔಟಾದರು. ಸಂಜು ಮತ್ತು ಸ್ಕೈ ಜೋಡಿ 2ನೇ ವಿಕೆಟ್‌ಗೆ 173 ರನ್‌ಗಳ ಜೊತೆಯಾಟ ನೀಡಿ ದಾಖಲೆ ಬರೆದಿದೆ. ನಂತರ ಸ್ಕೈ ಸ್ವಲ್ಪ ಹೊತ್ತು ಬಿರುಸಿನ ಆಟ ಆಡಿದ್ದರಿಂದ ಭಾರತದ ಮೊತ್ತ ಬೇಗನೆ ಏರಿತು.
ಸೂರ್ಯಕುಮಾರ್ ಯಾದವ್ 2500 ರನ್:
ಸೂರ್ಯ 35 ಎಸೆತಗಳಲ್ಲಿ 8 ಬೌಂಡರಿ, 5 ಸಿಕ್ಸರ್‌ಗಳೊಂದಿಗೆ 75 ರನ್ ಗಳಿಸಿ ಔಟಾದರು. ಆದರೆ ಈ ಪಂದ್ಯದ ಮೂಲಕ ಅಂತಾರಾಷ್ಟ್ರೀಯ ಟಿ20 ಕ್ರಿಕೆಟ್‌ನಲ್ಲಿ ಅತಿವೇಗದಲ್ಲಿ 2500 ರನ್ ಪೂರ್ಣಗೊಳಿಸಿದ 2ನೇ ಆಟಗಾರ ಎಂಬ ದಾಖಲೆ ಬರೆದರು. ಇದಕ್ಕೂ ಮೊದಲು ವಿರಾಟ್ ಕೊಹ್ಲಿ ಅತಿವೇಗದಲ್ಲಿ 2500 ರನ್ ಪೂರ್ಣಗೊಳಿಸಿದ್ದರು.
ನಂತರ ಹಾರ್ದಿಕ್ ಪಾಂಡ್ಯ ಬಿರುಸಿನ ಆಟ ಆಡಿ 18 ಎಸೆತಗಳಲ್ಲಿ 4 ಬೌಂಡರಿ, 4 ಸಿಕ್ಸರ್‌ಗಳೊಂದಿಗೆ 47 ರನ್ ಗಳಿಸಿ ಔಟಾದರು. ರಿಯಾನ್ ಪರಾಗ್ 4 ಸಿಕ್ಸರ್, 1 ಬೌಂಡರಿ ಸೇರಿದಂತೆ 34 ರನ್ ಗಳಿಸಿ ಔಟಾದರು. ಕೊನೆಯದಾಗಿ ಭಾರತ 20 ಓವರ್‌ಗಳಲ್ಲಿ 6 ವಿಕೆಟ್‌ ಕಳೆದುಕೊಂಡು 297 ರನ್ ಗಳಿಸಿ ಹೊಸ ದಾಖಲೆ ಬರೆದಿದೆ.
ಟಿ20 ಕ್ರಿಕೆಟ್‌ನಲ್ಲಿ ಪವರ್‌ಪ್ಲೇಯಲ್ಲಿ ಅತಿ ಹೆಚ್ಚು ರನ್ ಗಳಿಸಿದ ತಂಡ – 6 ಓವರ್‌ಗಳಲ್ಲಿ 82/1, ಹೈದರಾಬಾದ್.
26 ಎಸೆತಗಳಲ್ಲಿ 50 ರನ್ ದಾಟಿ ದಾಖಲೆ.
ಟಿ20 ಕ್ರಿಕೆಟ್‌ನಲ್ಲಿ ಅತಿವೇಗದಲ್ಲಿ 100 ರನ್ ದಾಟಿದ ಭಾರತ – 7.1 ಓವರ್‌ಗಳಲ್ಲಿ 102/1 ರನ್.
ಟಿ20 ಕ್ರಿಕೆಟ್‌ನಲ್ಲಿ ಅತಿ ಹೆಚ್ಚು ರನ್‌ಗಳ ಜೊತೆಯಾಟ ನೀಡಿದ ಜೋಡಿ ಸಂಜು ಸ್ಯಾಮ್ಸನ್ – ಸೂರ್ಯಕುಮಾರ್ ಯಾದವ್ 173 ರನ್.
10 ಓವರ್‌ಗಳಲ್ಲಿ 152/1 ರನ್ ದಾಟಿದ 3ನೇ ತಂಡ ಎಂಬ ದಾಖಲೆ ಬರೆದ ಭಾರತ.
14 ಓವರ್‌ಗಳಲ್ಲಿ 201/2 ರನ್ ದಾಟಿದ 2ನೇ ತಂಡ ಎಂಬ ದಾಖಲೆ ಬರೆದ ಭಾರತ.
16.4 ಓವರ್‌ಗಳಲ್ಲಿ ಭಾರತ 250 ರನ್ ಪೂರ್ಣಗೊಳಿಸಿತು.
ಟಿ20 ಕ್ರಿಕೆಟ್‌ನಲ್ಲಿ ಅತಿ ಹೆಚ್ಚು ಬೌಂಡರಿಗಳು 47 (ಸಿಕ್ಸರ್ + ಬೌಂಡರಿ)
ಟಿ20 ಕ್ರಿಕೆಟ್‌ನಲ್ಲಿ ಭಾರತ ಈ ಪಂದ್ಯದಲ್ಲಿ 22 ಸಿಕ್ಸರ್ ಬಾರಿಸಿದೆ.
ಕೊನೆಯದಾಗಿ 20 ಓವರ್‌ಗಳಲ್ಲಿ 297/6 ರನ್ ಗಳಿಸಿ ಟಿ20 ಕ್ರಿಕೆಟ್‌ನಲ್ಲಿ ಅತಿ ಹೆಚ್ಚು ರನ್ ಗಳಿಸಿದ 2ನೇ ತಂಡ ಎಂಬ ದಾಖಲೆ ಬರೆದಿದೆ. ಆದರೆ 18 ರನ್‌ಗಳಿಂದ ವಿಶ್ವ ದಾಖಲೆ ಮಿಸ್ ಮಾಡಿಕೊಂಡಿದೆ. ಒಟ್ಟಾರೆ ಅಂತಾರಾಷ್ಟ್ರೀಯ ಟಿ20ಯಲ್ಲಿ ಗರಿಷ್ಠ ಸ್ಕೋರ್‌ ದಾಖಲೆ ಇರುವುದು ನೇಪಾಳ ಹೆಸರಲ್ಲಿ. 2023ರ ಏಷ್ಯನ್‌ ಗೇಮ್ಸ್‌ ಕ್ರಿಕೆಟ್‌ನಲ್ಲಿ ಮಂಗೋಲಿಯಾ ವಿರುದ್ಧ ನೇಪಾಳ 3 ವಿಕೆಟ್‌ಗೆ 314 ರನ್ ಗಳಿಸಿತ್ತು.