Lady Superstar's Legacy: ಸ್ಟಾರ್ ನಟರೇ ಮೆರೆಯುತ್ತಿದ್ದ ಕಾಲದಲ್ಲಿ ಲೇಡಿ ಸೂಪರ್ ಸ್ಟಾರ್ ಆಗಿ ಮಿಂಚಿದ ನಯನತಾರ

ಕೇರಳದ ಸಾಂಪ್ರದಾಯಿಕ ಕುಟುಂಬದಲ್ಲಿ ಜನಿಸಿದ ಹುಡುಗಿ ಡಯಾನ ಮರಿಯಮ್ ಲೇಡಿ ಸೂಪರ್ ಸ್ಟಾರ್ ನಯನತಾರ ಆಗಿದ್ದು ಹೇಗೆ? ಇಲ್ಲಿದೆ ಕಥೆ.

ಸ್ಟಾರ್ ನಟರೇ ಮೆರೆಯುತ್ತಿದ್ದ ಸಮಯದಲ್ಲಿ ಯಾವುದೇ ಸಿನಿಮಾ ಬ್ಯಾಕ್ ಗ್ರೌಂಡ್ ಇಲ್ಲದೇ ಸಿನಿಮಾಗೆ ಎಂಟ್ರಿ ಕೊಟ್ಟು, ಆರಂಭದಲ್ಲಿ ಸಣ್ಣ ಪುಟ್ಟ ಪಾತ್ರಗಳನ್ನು ಮಾಡಿ, ಇದೀಗ ಲೇಡಿ ಸೂಪರ್ ಸ್ಟಾರ್ (lady super star) ಆಗಿ ಮೆರೆಯುತ್ತಿರುವ ನಟಿ ನಯನ್ ತಾರಾ.

ನಯನತಾರಾ ನವೆಂಬರ್ 18 , 1984 ರಂದು ಬೆಂಗಳೂರಿನಲ್ಲಿ ಸಾಂಪ್ರದಾಯಿಕ ಮಲಯಾಳಿ ಸಿರಿಯನ್ ಕ್ರಿಶ್ಚಿಯನ್ (christian family) ಪೋಷಕರಾದ ಕುರಿಯನ್ ಕೋಡಿಯತ್ತ ಮತ್ತು ಓಮನ ಕುರಿಯನ್ ಅವರ ಮಗಳು ಡಯಾನಾ ಮರಿಯಮ್ ಕುರಿಯನ್ ಆಗಿ ಜನಿಸಿದರು. ಅವರು ಕೇರಳದ ಮಾರ್ಥೋಮ ಕಾಲೇಜಿನಿಂದ ಇಂಗ್ಲಿಷ್ ಸಾಹಿತ್ಯದಲ್ಲಿ ಪದವಿ ಪಡೆದಿದ್ದಾರೆ.

ನಯನತಾರಾ ವೃತ್ತಿಪರ ನಟಿಯಾಗುವ ಮೊದಲು ಅರೆಕಾಲಿಕ ಮಾಡೆಲ್ ಆಗಿದ್ದರು. ಅವರ ಮಾಡೆಲಿಂಗ್ ಕಾರ್ಯಗಳನ್ನು ನೋಡಿದ ನಂತರ ಚಲನಚಿತ್ರ ನಿರ್ಮಾಪಕ ಸತ್ಯನ್ ಅಂತಿಕಾಡ್ ಅವರು ಅವರನ್ನು ಗುರುತಿಸಿ 'ಮನಸ್ಸಿನಕ್ಕರೆ' (Manasinakkare)ಗಾಗಿ ಅವರನ್ನು ಸಂಪರ್ಕಿಸಿದರು. ನಯನತಾರಾ ಸಿಎ ಆಗಬೇಕೆಂದು ಬಯಸಿದ್ದರು ಆದರೆ ಸಿನಿಮಾಗಳ ಮೇಲಿನ ಬದ್ಧತೆಯಿಂದಾಗಿ ಆ ಯೋಜನೆಯನ್ನು ಕೈಬಿಡಬೇಕಾಯಿತು.

2011 ರಲ್ಲಿ, ನಯನತಾರಾ (Nayanthara) ಚೆನ್ನೈನ ಆರ್ಯ ಸಮಾಜ ದೇವಸ್ಥಾನದಲ್ಲಿ ಹಿಂದೂ ಧರ್ಮಕ್ಕೆ ಮತಾಂತರಗೊಂಡರು. ಈ ಸಮಾರಂಭದ ನಂತರ ಅವರು ತಮ್ಮ ಹೆಸರನ್ನು ನಯನತಾರಾ ಎಂದು ಅಧಿಕೃತಗೊಳಿಸಿದರು. ಹಿಂದೂ ಧರ್ಮಕ್ಕೆ ಮತಾಂತರಗೊಂಡ ನಂತರ, ನಯನ ನಿಯಮಿತವಾಗಿ ತಿರುಪತಿ, ಋಷಿಕೇಶ, ಹರಿದ್ವಾರ ಮುಂತಾದ ಹಲವಾರು ಹಿಂದೂ ಪವಿತ್ರ ಸ್ಥಳಗಳಿಗೆ ಭೇಟಿ ನೀಡಿದರು. ನಟಿ ಆಧ್ಯಾತ್ಮಿಕತೆಯನ್ನು ತುಂಬಾನೆ ನಂಬುತ್ತಾರೆ.

ನಯನತಾರಾ ಅವರ ತಂದೆ ಭಾರತೀಯ ವಾಯುಪಡೆಯ ಅಧಿಕಾರಿಯಾಗಿದ್ದರು. ಅವರ ಹಿರಿಯ ಸಹೋದರ ಲೆನೊ ಯುನೈಟೆಡ್ ಅರಬ್ ಎಮಿರೇಟ್ಸ್‌ನ ದುಬೈನಲ್ಲಿ ವಾಸಿಸುತ್ತಿದ್ದಾರೆ. ನಯನತಾರಾ ಜೂನ್ 9, 2022 ರಂದು ಚಲನಚಿತ್ರ ನಿರ್ಮಾಪಕ-ಗೀತರಚನೆಕಾರ ವಿಘ್ನೇಶ್ ಶಿವನ್ (Vignes Sivan)ಅವರನ್ನು ವಿವಾಹವಾದರು. ದಂಪತಿಗಳು ಸರೊಗಸಿ ಮೂಲಕ ಉಯಿರ್ ಮತ್ತು ಉಲಗಮ್ ಎಂಬ ಅವಳಿ ಮಕ್ಕಳನ್ನು ಪಡೆದರು. ಅವರ ಅವಳಿ ಗಂಡು ಮಕ್ಕಳ ಪೂರ್ಣ ಹೆಸರು ಉಯಿರ್ ರುದ್ರೋನೀಲ್ ಎನ್ ಶಿವನ್ ಮತ್ತು ಉಲಗ್ ದೈವಿಕ್ ಎನ್ ಶಿವನ್ ಎಂಬುದಾಗಿದ್ದು, ಇದರಲ್ಲಿ ಎನ್ ಎಂದರೆ ನಯನತಾರಾ ಎಂದಾಗಿದೆ.

ಉದ್ಯಮದ ಒಳ ಮಾಹಿತಿ ಪ್ರಕಾರ, ನಯನತಾರಾ ತಮಿಳು ಚಿತ್ರರಂಗದಲ್ಲಿ ಅತಿ ಹೆಚ್ಚು ಸಂಭಾವನೆ ಪಡೆಯುವ ಮಹಿಳಾ ನಟಿ. ತಮ್ಮ ಆಕ್ಷನ್ ಸಿನಿಮಾಗಳಿಂದಲೇ, ಹಾಗೂ ಮಹಿಳಾ ಪ್ರಧಾನ ಸಿನಿಮಾಗಳಿಂದಲೇ ಲೇಡಿ ಸೂಪರ್ ಸ್ಟಾರ್ ಎಂದೆನಿಸಿದ ನಯನತಾರಾ ಪ್ರತಿ ಚಿತ್ರಕ್ಕೆ 12-15 ಕೋಟಿ ಸಂಭಾವನೆ ಪಡೆಯುತ್ತಾರೆ ಎಂದು ವರದಿಯಾಗಿದೆ. ವರದಿಗಳ ಪ್ರಕಾರ ನಯನತಾರಾ ತಮ್ಮ ಚೊಚ್ಚಲ ಬಾಲಿವುಡ್ ಚಿತ್ರ (Bollywood film) 'ಜವಾನ್' ಗಾಗಿ ಬರೋಬ್ಬರಿ 35 ಕೋಟಿ ಸಂಭಾವನೆ ಪಡೆದಿದ್ದಾರೆ.

ನಯನತಾರಾ ಐಷಾರಾಮಿ ಜೀವನ (luxury life) ಸಾಗಿಸುತ್ತಿದ್ದು, ಇವರಿಗೆ ಕೇರಳದಲ್ಲಿ, ಚೆನ್ನೈನಲ್ಲಿ ದೊಡ್ಡದಾದ ಬಂಗಲೆ ಇದೆ, ಹಾಗೂ ಮುಂಬೈನಲ್ಲೂ ಕೂಡ ಐಷಾರಾಮಿ ಬಂಗಲೆಯನ್ನು ಹೊಂದಿದ್ದಾರೆ, ಜೊತೆಗೆ ಹಲವು ಲಕ್ಸುರಿ ಕಾರುಗಳ ಒಡತಿ ಕೂಡ ಹೌದು. ಇವರ ನೆಟ್ ವರ್ತ್ ಸುಮಾರು 200 ಕೋಟಿಗೂ ಅಧಿಕವಾಗಿದೆ. ಅಲ್ಲದೇ ಇವರಿಗೆ ಪ್ರೈವೆಟ್ ಜೆಟ್ ಕೂಡ ಇದೆ. ಕೆಲವೇ ನಟಿಯರು ಮಾತ್ರ ಪ್ರೈವೆಟ್ ಜೆಟ್ ಹೊಂದಿದ್ದು, ಅವರಲ್ಲಿ ಇವರೂ ಒಬ್ಬರು. ಅದಕ್ಕೇ ಹೇಳೋದು ನೋಡಿ ಲೇಡಿ ಸೂಪರ್ ಸ್ಟಾರ್ ಎಂದು.

ಎರಡು ದಶಕಗಳಿಗೂ ಹೆಚ್ಚಿನ ವೃತ್ತಿಜೀವನದಲ್ಲಿ, ನಯನತಾರಾ 80 ಕ್ಕೂ ಹೆಚ್ಚು ಚಿತ್ರಗಳಲ್ಲಿ ನಟಿಸಿದ್ದಾರೆ. ನಟಿಯಾಗಿರುವುದರ ಹೊರತಾಗಿ ನಯನತಾರಾ ಉದ್ಯಮಿಯೂ ಹೌದು. ಅವರು ವಿಘ್ನೇಶ್ ಶಿವನ್ ಜೊತೆಗೂಡಿ ‘ರೌಡಿ ಪಿಕ್ಚರ್ಸ್’ ಎಂಬ ಪ್ರೊಡಕ್ಷನ್ ಹೌಸ್ (production house) ಅನ್ನು ಹೊಂದಿದ್ದಾರೆ. ಸದ್ಯ ಮೂಗುತ್ತಿ ಅಮ್ಮನ್ 2 ಸಿನಿಮಾದ ಶೂಟಿಂಗ್ ನಲ್ಲಿ ಬ್ಯುಸಿಯಾಗಿದ್ದಾರೆ.