ಫುಟ್ಬಾಲ್‌: ಇನ್ನು ಸುಖಾ ಸುಮ್ಮನೆ ಕೆಮ್ಮಿ​ದರೆ ರೆಡ್‌ ಕಾರ್ಡ್‌!

ಕೊರೋನಾ ಭೀತಿಯ ನಡುವೆಯೇ ಕ್ರೀಡಾ ಚಟುವಟಿಕೆಗಳು ಆರಂಭವಾಗಿವೆ. ಇದೀಗ ಮುನ್ನೆಚ್ಚರಿಕಾ ಕ್ರಮವಾಗಿ ಫುಟ್ಬಾಲ್ ಪಂದ್ಯಾವಳಿಯಲ್ಲಿ ಆಟಗಾರನೊಬ್ಬ ಉದ್ದೇಶಪೂರ್ವಕವಾಗಿ ಕೆಮ್ಮಿದರೆ ರೆಡ್ ಕಾರ್ಡ್ ನೀಡಲು ತೀರ್ಮಾನಿಸಲಾಗಿದೆ. ಈ ಕುರಿತಾದ ಒಂದು ರಿಪೋರ್ಟ್ ಇಲ್ಲಿದೆ ನೋಡಿ  

ಜ್ಯೂರಿಚ್(ಆ.05)‌: ಫುಟ್ಬಾಲ್‌ ಪಂದ್ಯಗಳಲ್ಲಿ ಇನ್ಮುಂದೆ ಆಟ​ಗಾ​ರ​ರು ಅನ​ವ​ಶ್ಯ​ಕವಾಗಿ ಎದು​ರಾಳಿ ಆಟ​ಗಾರನ ಮುಂದೆ ಕೆಮ್ಮಿ​ದರೆ, ಅಂತ​ಹ ಆಟ​ಗಾರನಿಗೆ ರೆಫ್ರಿ ರೆಡ್‌ ಕಾರ್ಡ್‌ ನೀಡ​ಬ​ಹು​ದಾ​ಗಿದೆ. 

ಫುಟ್ಬಾಲ್‌ನ ನಿಯಮಗಳನ್ನು ರಚಿಸಿರುವ ಅಂತಾ​ರಾ​ಷ್ಟ್ರೀಯ ಫುಟ್ಬಾಲ್‌ ಸಂಸ್ಥೆ, ಕೊರೋನಾ ಹಿನ್ನೆಲೆಯಲ್ಲಿ ತನ್ನ ಮಾರ್ಗ​ಸೂ​ಚಿಗಳನ್ನು ಪರಿಷ್ಕರಿ​ಸಿದೆ. ಎದು​ರಾಳಿಯ ಮೇಲೆ ಹಲ್ಲೆ ಇಲ್ಲವೇ ಅವ​ಹೇ​ಳ​ನ​, ಅನು​ಚಿತ ವರ್ತನೆ ವರ್ಗಕ್ಕೆ ಅನ​ವ​ಶ್ಯ​ಕವಾಗಿ ಕೆಮ್ಮು​ವು​ದನ್ನೂ ಸೇರಿ​ಸಲಾಗಿದೆ.

ದೇಶದ 5 ವಲ​ಯ​ಗ​ಳಲ್ಲಿ ಫುಟ್ಬಾಲ್‌ ಪ್ರತಿ​ಭಾ​ನ್ವೇಷಣೆ

ನವ​ದೆ​ಹ​ಲಿ: ಫಿಫಾ ವಿಶ್ವ​ಕಪ್‌ಗೆ ಭಾರತ ಅರ್ಹತೆ ಗಳಿ​ಸಬೇಕು ಎನ್ನುವ ಉದ್ದೇಶದಿಂದ ಕೇಂದ್ರ ಸರ್ಕಾರದಿಂದ ವಿಶಿಷ್ಠ ಯೋಜನೆ ರೂಪಿ​ಸಿದೆ. ದೇಶದ 5 ವಲ​ಯ​ಗ​ಳಲ್ಲಿ ಪ್ರತಿ​ಭಾ​ನ್ವೇ​ಷಣೆ ನಡೆ​ಸಲು ನಿರ್ಧ​ರಿ​ಸ​ಲಾ​ಗಿದೆ ಎಂದು ಕೇಂದ್ರ ಕ್ರೀಡಾ ಸಚಿವ ಕಿರಣ್‌ ರಿಜಿಜು ಸೋಮ​ವಾರ ಘೋಷಿ​ಸಿ​ದ್ದಾರೆ. 

ಖೇಲೋ ಇಂಡಿಯಾ ಯೋಜನೆಯಡಿ ಈ ಕಾರ್ಯ​ಕ್ರಮ ನಡೆ​ಯ​ಲಿದ್ದು, ಭಾರ​ತೀಯ ಕ್ರೀಡಾ ಪ್ರಾಧಿ​ಕಾರ ಹಣ​ಕಾಸು ನೆರವು ನೀಡ​ಲಿದೆ. ಭಾರ​ತೀಯ ಫುಟ್ಬಾಲ್‌ ಫೆಡ​ರೇ​ಷನ್‌ ಸಹ​ಯೋ​ಗ​ದಲ್ಲಿ ಈ ಯೋಜನೆ ಜಾರಿಗೆ ಬರ​ಲಿದೆ. ‘ಮುಂದಿನ ಕೆಲ ತಿಂಗ​ಳಲ್ಲಿ ಪ್ರತಿ​ಭಾ​ನ್ವೇ​ಷಣೆ ಕಾರ್ಯ​ಕ್ರಮ ಆರಂಭಿ​ಸ​ಲಿ​ದ್ದೇವೆ. ಉತ್ತರ, ದಕ್ಷಿಣ, ಕೇಂದ್ರ, ಪಶ್ಚಿಮ ಹಾಗೂ ಪೂರ್ವ ವಲ​ಯ​ಗ​ಳಲ್ಲಿರುವ ಪ್ರತಿಭೆಗಳನ್ನು ಹುಡು​ಕ​ಲಿ​ದ್ದೇವೆ. ಮುಂದಿನ 10-15 ವರ್ಷ​ಗ​ಳಲ್ಲಿ ವಿಶ್ವ​ಕಪ್‌ ಇಲ್ಲವೇ ಒಲಿಂಪಿಕ್ಸ್‌ಗೆ ಅರ್ಹತೆ ಪಡೆ​ಯು​ವುದು ನಮ್ಮ ಗುರಿ’ ಎಂದು ರಿಜಿಜು ಹೇಳಿ​ದ್ದಾರೆ.