ರಾಜ್‌ಕುಮಾರ್ ಜೊತೆ ನಾಯಕಿ, ಪುನೀತ್ ಜೊತೆ ಅಜ್ಜಿ: ಸಾಹುಕಾರ್ ಜಾನಕಿ ಸಿನಿ ಜರ್ನಿಯ ವಿಶೇಷತೆಯೇನು?

Sowcar Janaki Death: ದಕ್ಷಿಣ ಭಾರತದ ಚಿತ್ರರಂಗದ ಹಿರಿಯ ಹಾಗೂ ದಿಗ್ಗಜ ನಟಿಯರಲ್ಲಿ ಒಬ್ಬರಾದ ಸಾಹುಕಾರ್ ಜಾನಕಿ ಅವರು ಶುಕ್ರವಾರ ಚೆನ್ನೈನಲ್ಲಿ ನಿಧನರಾಗಿದ್ದಾರೆ. ಅವರಿಗೆ 94 ವರ್ಷ ವಯಸ್ಸಾಗಿತ್ತು.

ದಕ್ಷಿಣ ಭಾರತದ ಚಿತ್ರರಂಗದ ಹಿರಿಯ ಹಾಗೂ ದಿಗ್ಗಜ ನಟಿಯರಲ್ಲಿ ಒಬ್ಬರಾದ ಸಾಹುಕಾರ್ ಜಾನಕಿ ಅವರು ಶುಕ್ರವಾರ ಚೆನ್ನೈನಲ್ಲಿ ನಿಧನರಾಗಿದ್ದಾರೆ. ಅವರಿಗೆ 94 ವರ್ಷ ವಯಸ್ಸಾಗಿತ್ತು. ಏಳು ದಶಕಗಳಿಗೂ ಹೆಚ್ಚು ಕಾಲ ಚಿತ್ರರಂಗದಲ್ಲಿ ಸಕ್ರಿಯರಾಗಿದ್ದ ಅವರು, ತೆಲುಗು, ತಮಿಳು, ಕನ್ನಡ ಹಾಗೂ ಮಲಯಾಳಂ ಸೇರಿದಂತೆ ಸುಮಾರು 400ಕ್ಕೂ ಹೆಚ್ಚು ಸಿನಿಮಾಗಳಲ್ಲಿ ನಟಿಸಿ ತಮ್ಮದೇ ಛಾಪು ಮೂಡಿಸಿದ್ದರು.

ಕನ್ನಡ ಚಿತ್ರರಂಗದೊಂದಿಗೂ ಸಾಹುಕಾರ್ ಜಾನಕಿ ಅವರದ್ದು ಸುದೀರ್ಘ ನಂಟು. 1954ರಲ್ಲಿ ಬಿಡುಗಡೆಯಾದ ‘ದೇವಕನ್ನಿಕಾ’ ಚಿತ್ರದ ಮೂಲಕ ಅವರು ಕನ್ನಡ ಸಿನಿಮಾರಂಗಕ್ಕೆ ಪದಾರ್ಪಣೆ ಮಾಡಿದರು. ಬಳಿಕ ಸುಮಾರು 27 ಕನ್ನಡ ಸಿನಿಮಾಗಳಲ್ಲಿ ನಟಿಸಿದರು. ‘ಭಾಗ್ಯಚಕ್ರ’, ‘ಸದಾರಮೆ’, ‘ರತ್ನಗಿರಿ ರಹಸ್ಯ’, ‘ಸ್ಕೂಲ್ ಮಾಸ್ಟರ್’, ‘ಮಹಿಷಾಸುರ ಮರ್ದಿನಿ’, ‘ಸಾಕು ಮಗಳು’, ‘ನವಕೋಟಿ ನಾರಾಯಣ’, ‘ತಾಯಿಗೆ ತಕ್ಕ ಮಗ’, ‘ಶಬ್ದವೇಧಿ’ ಹಾಗೂ ‘ಅಭಿ’ ಸೇರಿದಂತೆ ಹಲವು ಪ್ರಮುಖ ಸಿನಿಮಾಗಳು ಅವರ ಕನ್ನಡ ಸಿನಿ ಪಯಣದ ಭಾಗವಾಗಿವೆ.

ರಾಜ್‌ಕುಮಾರ್ ಜೊತೆಗಿನ ವಿಶೇಷ ನಂಟು

ಸಾಹುಕಾರ್ ಜಾನಕಿ ಅವರ ಕನ್ನಡ ಚಿತ್ರರಂಗದ ಪಯಣದಲ್ಲಿ ಡಾ. ರಾಜ್‌ಕುಮಾರ್ ಜೊತೆಗಿನ ಸಿನಿಮಾಗಳಿಗೂ ವಿಶೇಷ ಸ್ಥಾನವಿದೆ. 1963ರಲ್ಲಿ ಬಿಡುಗಡೆಯಾದ ‘ಸಾಕು ಮಗಳು’ ಸಿನಿಮಾದಲ್ಲಿ ಸಾಹುಕಾರ್ ಜಾನಕಿ ಅವರು ರಾಜ್‌ಕುಮಾರ್ ಅವರೊಂದಿಗೆ ನಾಯಕಿಯಾಗಿ ನಟಿಸಿದ್ದರು. ಹಲವು ವರ್ಷಗಳ ಬಳಿಕ 1978ರಲ್ಲಿ ತೆರೆಕಂಡ ‘ತಾಯಿಗೆ ತಕ್ಕ ಮಗ’ ಸಿನಿಮಾದಲ್ಲಿ ಮತ್ತೆ ರಾಜ್‌ಕುಮಾರ್ ಅವರೊಂದಿಗೆ ತೆರೆ ಹಂಚಿಕೊಂಡರು. ಆದರೆ ಈ ಬಾರಿ ಅವರ ಪಾತ್ರ ತಾಯಿಯದ್ದು. ಇಷ್ಟೇ ಅಲ್ಲದೆ, ರಾಜ್‌ಕುಮಾರ್ ಅವರ ಕೊನೆಯ ಸಿನಿಮಾ ‘ಶಬ್ದವೇಧಿ’ಯಲ್ಲೂ ಸಾಹುಕಾರ್ ಜಾನಕಿ ನಟಿಸಿದ್ದರು. ಹೀಗಾಗಿ ಕನ್ನಡದ ವರನಟನ ವೃತ್ತಿಜೀವನದ ವಿಭಿನ್ನ ಹಂತಗಳಿಗೆ ಸಾಕ್ಷಿಯಾದ ನಟಿಯರಲ್ಲಿ ಸಾಹುಕಾರ್ ಜಾನಕಿ ಕೂಡ ಒಬ್ಬರು.

ನಾಯಕಿಯಿಂದ ಪೋಷಕ ಪಾತ್ರಗಳವರೆಗೆ...

ಸಾಹುಕಾರ್ ಜಾನಕಿ ಅವರ ಕನ್ನಡ ಸಿನಿ ಪಯಣ ಹಲವು ತಲೆಮಾರುಗಳನ್ನು ಕಂಡಿದೆ. ಆರಂಭದಲ್ಲಿ ನಾಯಕಿಯಾಗಿ ಮಿಂಚಿದ್ದ ಅವರು, ಕಾಲ ಬದಲಾದಂತೆ ಪೋಷಕ ಹಾಗೂ ಹಿರಿಯ ಪಾತ್ರಗಳಲ್ಲೂ ಕಾಣಿಸಿಕೊಂಡರು. 2003ರಲ್ಲಿ ಬಿಡುಗಡೆಯಾದ ‘ಅಭಿ’ ಸಿನಿಮಾದಲ್ಲಿ ಪುನೀತ್ ರಾಜ್‌ಕುಮಾರ್ ಹಾಗೂ ರಮ್ಯಾ ಅವರೊಂದಿಗೆ ನಟಿಸಿದ್ದರು. ಚಿತ್ರದಲ್ಲಿ ರಮ್ಯಾ ಅವರ ಅಜ್ಜಿಯ ಪಾತ್ರದಲ್ಲಿ ಸಾಹುಕಾರ್ ಜಾನಕಿ ಕಾಣಿಸಿಕೊಂಡಿದ್ದರು. ಅಂದರೆ, ಯಾವ ತಲೆಮಾರಿನ ನಟ-ನಟಿಯರೇ ಬಂದರೂ ಕನ್ನಡ ಚಿತ್ರರಂಗದೊಂದಿಗೆ ತಮ್ಮ ನಂಟನ್ನು ಮುಂದುವರಿಸಿಕೊಂಡು ಬಂದಿದ್ದರು.

ಆರು ದಶಕಗಳ ಬಳಿಕವೂ ಕನ್ನಡ ಸಿನಿಮಾದಲ್ಲಿ...

1954ರಲ್ಲಿ ‘ದೇವಕನ್ನಿಕಾ’ ಮೂಲಕ ಕನ್ನಡ ಚಿತ್ರರಂಗಕ್ಕೆ ಕಾಲಿಟ್ಟ ಸಾಹುಕಾರ್ ಜಾನಕಿ, ಬರೋಬ್ಬರಿ ಆರು ದಶಕಗಳ ಬಳಿಕವೂ ಕನ್ನಡ ಸಿನಿಮಾಗಳಲ್ಲಿ ನಟಿಸುತ್ತಿದ್ದರು. 2014ರಲ್ಲಿ ಬಿಡುಗಡೆಯಾದ ‘ಪುಂಗಿದಾಸ’ ಅವರ ಕೊನೆಯ ಕನ್ನಡ ಸಿನಿಮಾವಾಯಿತು. ಅಂದರೆ, ಕನ್ನಡ ಚಿತ್ರರಂಗಕ್ಕೆ ಕಾಲಿಟ್ಟ ಸುಮಾರು 60 ವರ್ಷಗಳ ಬಳಿಕವೂ ಅವರು ಸಿನಿ ಪ್ರೇಕ್ಷಕರೊಂದಿಗೆ ತಮ್ಮ ನಂಟನ್ನು ಉಳಿಸಿಕೊಂಡಿದ್ದರು. ನಾಯಕಿಯಾಗಿ ಆರಂಭಿಸಿ ಹಲವು ತಲೆಮಾರುಗಳ ನಟರೊಂದಿಗೆ ತೆರೆ ಹಂಚಿಕೊಂಡು, ಪೋಷಕ ಪಾತ್ರಗಳಲ್ಲೂ ತಮ್ಮದೇ ಛಾಪು ಮೂಡಿಸಿದ ಸಾಹುಕಾರ್ ಜಾನಕಿ ಅವರ ನಿಧನದಿಂದ ದಕ್ಷಿಣ ಭಾರತೀಯ ಚಿತ್ರರಂಗದ ಒಂದು ಅಪರೂಪದ ಅಧ್ಯಾಯ ಅಂತ್ಯಗೊಂಡಂತಾಗಿದೆ. ಕನ್ನಡ ಚಿತ್ರರಂಗದೊಂದಿಗಿನ ಅವರ ಏಳು ದಶಕಗಳ ನಂಟು ಮಾತ್ರ ಸದಾ ನೆನಪಿನಲ್ಲಿ ಉಳಿಯಲಿದೆ.