ಕನ್ನಡದ ನಟಿ ಭಾವನಾ ರಾಮಣ್ಣಗೆ ಮಗು; ಬಯಸಿದ್ದು ಎರಡು ದೊರಕಿದ್ದು ಒಂದು!

ಕನ್ನಡದ ನಟಿ ಭಾವನಾ ರಾಮಣ್ಣ ಅವರು ತಮ್ಮ 40ನೇ ವಯಸ್ಸಿನಲ್ಲಿ ಐವಿಎಫ್ ಮೂಲಕ ಗರ್ಭಧಾರಣೆ ಮಾಡಿಸಿಕೊಂಡಿದ್ದರು. ಇದೀಗ ಅವರು ಹೆಣ್ಣುಮಗುವಿನ ತಾಯಿಯಾಗಿದ್ದಾರೆ.

ಕನ್ನಡ ಸಿನಿಮಾ ನಟಿ ಭಾವನಾ ರಾಮಣ್ಣ ಅವರಿಗೆ ಎರಡು ವಾರಗಳ ಹಿಂದೆ ಹೆರಿಗೆ ಆಗಿದೆ. ಈಗ ಅವರು ಹೆಣ್ಣು ಮಗುವಿಗೆ ತಾಯಿಯಾಗಿದ್ದಾರೆ. ಬಂದ ಮಾಹಿತಿ ಪ್ರಕಾರ, ನಟಿ ಭಾವನಾ ಅವರ ಎರಡು ಮಕ್ಕಳಲ್ಲಿ ಒಂದು ಮಗು ನಿಧನವಾಗಿದ್ದು ಮತ್ತೊಂದು ಮಗು ಕ್ಷೇಮವಾಗಿದೆ.

ಐವಿಎಫ್ ಮೂಲಕ ತಾಯಿ ಆಗಿದ್ದಾರೆ ನಟಿ ಭಾವನಾ. ವೈದ್ಯರ ಸೂಚನೆಯಂತೆ ಹೆರಿಗೆಯಾಗಿದೆ. ಒಂದು ಮಗುವಿನಲ್ಲಿ ಏಳು ತಿಂಗಳ ನಂತ್ರ ಸಮಸ್ಯೆ ಕಾಣಿಸಿಕೊಂಡ ಕಾರಣ, 8 ತಿಂಗಳಿಗೆ ಹೆರಿಗೆ ಮಾಡಿಸಲಾಗಿದೆ. ಸದ್ಯ ತಾಯಿ ಮಗು ಇಬ್ಬರು ಕ್ಷೇಮವಾಗಿದ್ದಾರೆ.

ಖ್ಯಾತ ಕನ್ನಡ ನಟಿ ಭಾವನಾ ರಾಮಣ್ಣ ಅವರು ಐವಿಎಫ್ (IVF) ಚಿಕಿತ್ಸೆಯ ಮೂಲಕ ತಾಯಿಯಾಗಲು ಬಯಸಿದವರು. ಇತ್ತೀಚೆಗೆ, ಅವರ ಸೀಮಂತ ಕಾರ್ಯಕ್ರಮವು ಅದ್ಧೂರಿಯಾಗಿ ನಡೆದಿದ್ದು, ಅಭಿಮಾನಿಗಳು ಮತ್ತು ಸ್ನೇಹಿತರು ಶುಭ ಹಾರೈಸಿದ್ದರು. ಭಾವನಾ ಅವರ ಗರ್ಭಧಾರಣೆಯ ಸುದ್ದಿ ಈ ಹಿಂದೆ ಸಾಕಷ್ಟು ಚರ್ಚೆಗೆ ಒಳಗಾಗಿತ್ತು. ಮದುವೆಯಾಗದೇ ಐವಿಎಫ್ ಮೂಲಕ ತಾಯಿಯಾಗುವ ಅವರ ನಿರ್ಧಾರದ ಬಗ್ಗೆ ಸಾಕಷ್ಟು ಚರ್ಚೆಗಳು ನಡೆದಿದ್ದವು. ಅವರ ಈ ಧೈರ್ಯಶಾಲಿ ನಿರ್ಧಾರವನ್ನು ಅನೇಕರು ಶ್ಲಾಘಿಸಿದ್ದರು.

ಸಾಮಾಜಿಕ ಜಾಲತಾಣಗಳಲ್ಲಿ ಹಂಚಿಕೊಂಡಿರುವ ಫೋಟೋಗಳಲ್ಲಿ, ಭಾವನಾ ರಾಮಣ್ಣ ಹಸಿರು ಮತ್ತು ಗುಲಾಬಿ ಬಣ್ಣದ ರೇಷ್ಮೆ ಸೀರೆಯಲ್ಲಿ ಸೀಮಂತದ ಸಂಭ್ರಮದಲ್ಲಿದ್ದರು. ಅವರ ಮುಖದಲ್ಲಿ ತಾಯ್ತನದ ಹೊಳಪು ಕಾಣಿಸುತ್ತಿದ್ದು, ಸಂಭ್ರಮದಿಂದ ಕಾರ್ಯಕ್ರಮದಲ್ಲಿ ಭಾಗಿಯಾಗಿದ್ದರು. ಸೀಮಂತ ಕಾರ್ಯಕ್ರಮದಲ್ಲಿ ಅವರ ಆಪ್ತ ಸ್ನೇಹಿತರು ಮತ್ತು ಕುಟುಂಬದವರು ಭಾಗವಹಿಸಿದ್ದರು.

ಭಾವನಾ ರಾಮಣ್ಣ ಈ ವಯಸ್ಸಿನಲ್ಲಿ ತಾಯಿಯಾಗಲು ನಿರ್ಧರಿಸಿದ ಅವರ ಧೈರ್ಯಕ್ಕೆ ಎಲ್ಲರೂ ಮೆಚ್ಚುಗೆ ವ್ಯಕ್ತಪಡಿಸಿದ್ದರು. ವೈದ್ಯಕೀಯ ವರದಿಗಳ ಪ್ರಕಾರ, ಅವರ ಡೆಲಿವರಿ ದಿನಾಂಕವನ್ನು ನವೆಂಬರ್ 2025ರ ಸುಮಾರಿಗೆ ನಿಗದಿಪಡಿಸಲಾಗಿತ್ತು. ಆದರೆ, ಅವಧಿಗೂ ಮೊದಲೇ ಡೆಲಿವರಿ ಆಗಿದೆ. ಬಯಸಿದ್ದ ಎರಡು ಮಕ್ಕಳಲ್ಲಿ ಒಂದು ಮಗು ಮಾತ್ರ ದೊರಕಿದೆ. 

ಭಾವನಾ ರಾಮಣ್ಣ ಅವರು ಕನ್ನಡ ಚಿತ್ರರಂಗದ ಜನಪ್ರಿಯ ನಟಿಯಾಗಿದ್ದು, 'ಶಾಂತಿ', 'ಚಂದ್ರಮುಖಿ ಪ್ರಾಣಸಖಿ', 'ಇಂತಿ ನಿನ್ನ ಪ್ರೀತಿಯ'ಯಂತಹ ಹಲವು ಯಶಸ್ವಿ ಚಲನಚಿತ್ರಗಳಲ್ಲಿ ನಟಿಸಿದ್ದಾರೆ. ಮದುವೆಯ ಕುರಿತು ಇದುವರೆಗೂ ಯಾವುದೇ ಅಧಿಕೃತ ಘೋಷಣೆ ಮಾಡಿಲ್ಲ. ಮಕ್ಕಳಾದ ಬಳಿಕ ಮುಂದೆ ತಮ್ಮ ಜೀವನಕ್ಕೆ ಹೊಂದಿಕೊಳ್ಳುವ ವ್ಯಕ್ತಿ ಸಿಕ್ಕರೆ ಮದುವೆ ಆಗಲೂಬಹುದು ಎಂದು ಭಾವನಾ ಸಂದರ್ಶನವೊಂದರಲ್ಲಿ ಹೇಳಿದ್ದರು. 

ಐವಿಎಫ್ ಮತ್ತು ಸರೋಗಸಿ ಚಿಕಿತ್ಸಾ ಪ್ರಕ್ರಿಯೆಗಳು ಹಾಗೂ ಈ ಎರಡರಲ್ಲಿ ಮಗು ಪಡೆಯಲು ಯಾವುದು ಬೆಸ್ಟ್ ಎಂಬುದರ ಬಗ್ಗೆ ಖ್ಯಾತ ನಿರ್ದೇಶಕಿ, ನಿರ್ಮಾಪಕಿ, ನಟಿ ರೂಪ ಅಯ್ಯರ್ ಏಷ್ಯಾನೆಟ್ ಸುವರ್ಣ ನ್ಯೂಸ್‌ಗೆ ನೀಡಿದ ಸಂದರ್ಶನದಲ್ಲಿ ಎಳೆಎಳೆಯಾಗಿ ಮಾಹಿತಿ ನೀಡಿದ್ದಾರೆ. ರೂಪಾ ಅಯ್ಯರ್ ಹೇಳಿರೋದು ಹೀಗೆ..

ತ್ರೇತಾ, ದ್ವಾಪರ ಯುಗದಲ್ಲೂ ಇತ್ತು ಈ ವಿಧಾನ:

"ಐವಿಎಫ್ ಮತ್ತು ಸರೋಗಸಿ ಮೂಲಕ ಮಗು ಪಡೆಯುವ ವಿಧಾನ ತ್ರೇತಾಯುಗ, ದ್ವಾಪರ ಯುಗ ಹೀಗೆ ಎಲ್ಲ ಯುಗದಲ್ಲೂ ನಡೆದಿದೆ. ತನಗೊಂದು ಮಗು ಬೇಕೆಂಬ ಒಂದೇ ಒಂದು ಕಾರಣಕ್ಕೆ ಅಷ್ಟೆಲ್ಲಾ ಪ್ರಯತ್ನವಾಗಿರುತ್ತೆ. ಹಾಗೆಯೇ ಇನ್ನೊಂದು ವ್ಯಕ್ತಿ ಜೀವನಕ್ಕೆ ಬಂದು ಮಗು ತಂದುಕೊಡಬೇಕು ಅನ್ನೋದೇನಿಲ್ಲ. ಐವಿಎಫ್ ಆಗಿರಬಹುದು, ಸರೋಗಸಿ ಆಗಿರಬಹುದು ಇದೊಂದು ಆಪ್ಷನ್ ಇದೆ ಅಂತ ಕಿರಿಯರು, ಮುಂದಿನ ಪೀಳಿಗೆ ಸಹ ಇದನ್ನ ರೂಢಿ ಮಾಡಿಕೊಳ್ಳಬಾರದು. ಅವರಿಗೆ ಬುದ್ದಿ ಮಾತು ಹೇಳಬೇಕು. ಹಾಗೆಂದ ಮಾತ್ರಕ್ಕೆ ಈಗಾಗಲೇ ಮಾಡಿಕೊಂಡಿರುವವರನ್ನು ತೆಗಳಬಾರದು.

ಐವಿಎಫ್‌ ನಾವಂದುಕೊಂಡಷ್ಟು ಸುಲಭವಲ್ಲ

ಒಂದೊಂದು ಐವಿಎಫ್‌ಗೂ ಹದಿನೈದರಿಂದ ಇಪ್ಪತ್ತು ಇಂಜೆಕ್ಷನ್ ಬರುತ್ತೆ. ಇಂಜೆಕ್ಷನ್ ತಗೊಂಡೂ ವರ್ಕ್‌ಔಟ್ ಆಗಲಿಲ್ಲ ಅಂದಾಗ ಸರೋಗಸಿ ವಿಧಾನವನ್ನು ಅಳವಡಿಸಿಕೊಂಡರೆ ತಪ್ಪೇನಿಲ್ಲ. ಆದರೆ ಹೆಣ್ಣು ಮಕ್ಕಳಿಗೆ ಆ ತರಹ ಇಂಜೆಕ್ಷನ್ ತಗೊಂಡ್ರೆ ಸಂಧಿವಾತ, ಮಾನಸಿಕ ಖಿನ್ನತೆ ಶುರುವಾಗುತ್ತೆ. ಅವಳ ದೇಹದಲ್ಲಿ ಅನೇಕ ಬದಲಾವಣೆಗಳಾಗುತ್ತವೆ. ಎಗ್ ಪ್ರೊಡಕ್ಷನ್ ಕೂಡ ನಿಂತು ಹೋಗುತ್ತೆ. ಮೆನೊಪಾಸ್ ಬೇಗ ಆಗುತ್ತೆ. ಎಲ್ಲಾ ಆರೋಗ್ಯ ಸಮಸ್ಯೆ ನೋಡಿಕೊಂಡು ಕುಟುಂಬದವರು ಒಂದು ನಿರ್ಧಾರಕ್ಕೆ ಬರುತ್ತಾರೆ. ಇಷ್ಟು ಕಷ್ಡಪಡುವ ಬದಲು ಸರೋಗಸಿಗೆ ಹೋಗೋಣವೆಂದು ಅಥವಾ ದತ್ತು ತೆಗೆದುಕೊಳ್ಳವ ಯೋಚನೆ ಮಾಡುತ್ತಾರೆ. ಒಟ್ಟಿನಲ್ಲಿ ಮಕ್ಕಳು ಬೇಕು ಅನ್ನೋ ಕಾರಣಕ್ಕೆ ಜನ ಆ ನಿರ್ಧಾರ ತೆಗೆದುಕೊಳ್ಳುತ್ತಾರೆ ತಪ್ಪೇನಿಲ್ಲ.

ಮೊಟ್ಟೆಯನ್ನ ಯಾವ ಏಜ್‌ನಲ್ಲಿ ಪ್ರಿಸರ್ವ್ ಮಾಡಬೇಕಾಗುತ್ತೆ?

ಮಹಿಳೆ 55 ವರ್ಷದ ತನಕ ಮಗು ಮಾಡಿಕೊಳ್ಳಬಹುದು. ಆದ್ರೆ ಮೆನೊಪಾಸ್ ಮುಂಚೆನೇ ಇವರು ಮೊಟ್ಟೆಯನ್ನು ಎತ್ತಿಟ್ಟರಬೇಕಾಗುತ್ತದೆ. ವಯಸ್ಸಾದ ಮೇಲೆ ಮದುವೆಯಾಗೋರು ಮೊಟ್ಟೆಯನ್ನು ಎತ್ತಿಟ್ಟರದಿದ್ರೆ ಅದಕ್ಕೂ ಆಪ್ಷನ್ ಇದೆ. ಯಾವ ವಯಸ್ಸಿನಲ್ಲಿಯಾದರೂ ಮೊಟ್ಟೆ ಪ್ರಿಸರ್ವ್ ಮಾಡಬಹುದು. ಇಪ್ಪತ್ತರಲ್ಲಿ ಮಾಡಿದರೆ ಒಳ್ಳೆಯದು. 35ರವರೆಗೂ ಮಾಡಬಹುದು. ಆಗೆಲ್ಲಾ ಚೆನ್ನಾಗಿ ಉತ್ಪತ್ತಿಯಾಗ್ತಾ ಇರುತ್ತೆ. ಆ ಫಲವತ್ತತ್ತೆಯನ್ನ ದೇಹದಲ್ಲಿ ನೋಡ್ತಾರೆ. ಮಣ್ಣಲ್ಲಿ ಫಲವತ್ತತೆ ಹೇಗೆ ನೋಡ್ತಾರೋ, ದೇಹದಲ್ಲೂ ನೋಡ್ತಾರೆ. ಹೆಣ್ಣು ಮಕ್ಕಳು ಯೋಗ, ವ್ಯಾಯಾಮ ಮಾಡಿಕೊಂಡು ಆರೋಗ್ಯವಾಗಿದ್ದಾಗ ಹೆಚ್ಚು ಸಮಸ್ಯೆಯಾಗಲ್ಲ.

ಯಾಕೀ ವಿಧಾನ ಇಷ್ಟವಾಗುತ್ತೆ?

ಮೊಟ್ಟೆಯ ಸಮಸ್ಯೆ ವಯಸ್ಸಿನಿಂದ ಬರುವ ಪ್ಲಾಬ್ಲಂ ಅಲ್ಲ, ಚಿಕ್ಕ ಮಕ್ಕಳಿಗೂ ಕೂಡ ಪಿಸಿಒಡಿ ಬರುತ್ತೆ. ವಯಸ್ಸಿನಿಂದ ಮೊಟ್ಟೆ ಗುಣಮಟ್ಟ ಹೋಯ್ತು ಅನ್ನೋಕೆ ಆಗಲ್ಲ. ನಲವತ್ತೈದಕ್ಕೆ ಮಕ್ಕಳು ಮಾಡಿಕೊಂಡರನ್ನ ನೋಡಿರಬಹುದು. ಆ ಮಕ್ಕಳು ತುಂಬಾ ಚೆನ್ನಾಗಿ ಬೆಳೆದಿರುವ ಉದಾಹರಣೆಗಳಿವೆ. ಮೇಲೆ ತಿಳಿಸಿದ ವಿಧಾನಗಳೆಲ್ಲವೂ 60ರ ದಶಕದಲ್ಲಿ ಬಂದಿತ್ತು. ಈಗ ಇದನ್ನ ಎಲ್ಲಾ ಕಡೆ ಧೈರ್ಯವಾಗಿ ಮಾಡಿಕೊಳ್ಳೋಕೆ ಮುಂದೆ ಬರ್ತಾ ಇದ್ದಾರೆ. ಯಾವುದೋ ಮಗುನಾ ದತ್ತು ತೆಗೆದುಕೊಳ್ಳಲು ಹೋದಾಗ ತುಂಬಾ ಕಾಯಿಸ್ತಾರೆ. ಆದ್ರೆ ಹೀಗೆ ಐವಿಎಫ್ ಮೂಲಕ ಮಗು ಮಾಡಿಕೊಳ್ಳಲು ಬಯಸಿದಾಗ ಅದು ಡೇ ಒನ್‌ನಿಂದ ನಮ್ಮ ಮಡಿಲಲ್ಲಿ ಇರುತ್ತೆ. ಹಾಗಾಗಿ ಜನ ಇಂತಹ ವಿಧಾನವನ್ನು ಅಳವಡಿಸಿಕೊಳ್ಳುತ್ತಿದ್ದಾರೆ". ಎಂದಿದ್ದಾರೆ ನಟಿ-ನಿರ್ದೇಶಕಿ ರೂಪಾ ಅಯ್ಯರ್.