ಅಷ್ಟು ಸಂಭಾವನೆ, ಲಾಭದಲ್ಲಿ ಪಾಲು ಕೇಳಿದ್ದೇ ತಪ್ಪಾಯ್ತಾ? ದೀಪಿಕಾ ವಿವಾದದ ಸುತ್ತ ಅನುಮಾನದ ಹುತ್ತ!

ಸಾಮಾನ್ಯವಾಗಿ, ಲಾಭದಲ್ಲಿ ಪಾಲು ಕೇಳುವ ಪದ್ಧತಿ ಭಾರತೀಯ ಚಿತ್ರರಂಗದಲ್ಲಿ ಪ್ರಮುಖ ನಟರಿಗೆ ಇದೆ. ಆದರೆ, ನಾಯಕಿಯೊಬ್ಬರು ಇಷ್ಟು ದೊಡ್ಡ ಮೊತ್ತದ ಸಂಭಾವನೆಯ ಜೊತೆಗೆ ಲಾಭಾಂಶಕ್ಕೂ ಬೇಡಿಕೆಯಿಟ್ಟಿರುವುದು ಚಿತ್ರತಂಡಕ್ಕೆ ಆರ್ಥಿಕವಾಗಿ ದೊಡ್ಡ ಹೊರೆಯಾಗಬಹುದು ಎಂದು

ಹೈದರಾಬಾದ್: ಪ್ರಭಾಸ್ (Darling Prabhas) ನಟನೆಯ, 'ಅರ್ಜುನ್ ರೆಡ್ಡಿ' ಮತ್ತು 'ಅನಿಮಲ್' ಖ್ಯಾತಿಯ ನಿರ್ದೇಶಕ ಸಂದೀಪ್ ರೆಡ್ಡಿ ವಂಗಾ ಅವರ ಮುಂದಿನ ಪ್ಯಾನ್-ಇಂಡಿಯಾ ಚಿತ್ರ 'ಸ್ಪಿರಿಟ್' ಘೋಷಣೆಯಾದ ದಿನದಿಂದಲೂ ಒಂದಲ್ಲ ಒಂದು ಕಾರಣಕ್ಕೆ ಸುದ್ದಿಯಲ್ಲಿದೆ. (Spirit) ಚಿತ್ರದ ನಾಯಕಿಯ ಆಯ್ಕೆ ವಿಚಾರದಲ್ಲಿ ಇದೀಗ ಮತ್ತೊಂದು ದೊಡ್ಡ ವಿವಾದ ಭುಗಿಲೆದ್ದಿದೆ. ಬಾಲಿವುಡ್‌ನ ಅಗ್ರ ನಟಿ ದೀಪಿಕಾ ಪಡುಕೋಣೆ (Deepika Padukone) ಅವರು ಈ ಚಿತ್ರದಿಂದ ಹೊರಬರಲು ಅವರ ಭಾರಿ ಸಂಭಾವನೆಯ ಬೇಡಿಕೆಯೇ ಕಾರಣ ಎಂಬ ಹೊಸ ವದಂತಿ ಟಾಲಿವುಡ್ ಅಂಗಳದಲ್ಲಿ ಹರಿದಾಡುತ್ತಿದೆ.

ಏನಿದು ಹೊಸ ವಿವಾದ?

ಕೆಲವು ದಿನಗಳ ಹಿಂದೆ, ದೀಪಿಕಾ ಪಡುಕೋಣೆ ಅವರು ಚಿತ್ರೀಕರಣಕ್ಕೆ ದಿನಕ್ಕೆ ಕೇವಲ 8 ಗಂಟೆಗಳ ಕಾಲಾವಕಾಶ ನೀಡುವುದಾಗಿ ಷರತ್ತು ವಿಧಿಸಿದ್ದರಿಂದ 'ಸ್ಪಿರಿಟ್' ಚಿತ್ರತಂಡ ಅವರನ್ನು ಕೈಬಿಟ್ಟಿತು ಎಂದು ಹೇಳಲಾಗಿತ್ತು. ಆದರೆ, ಈಗ ಅದಕ್ಕಿಂತಲೂ ದೊಡ್ಡ ಕಾರಣವೊಂದು ಮುನ್ನೆಲೆಗೆ ಬಂದಿದೆ. ವರದಿಗಳ ಪ್ರಕಾರ, ದೀಪಿಕಾ ಅವರು ಈ ಚಿತ್ರದಲ್ಲಿ ನಟಿಸಲು ಬರೋಬ್ಬರಿ 25 ಕೋಟಿ ರೂಪಾಯಿ ಸಂಭಾವನೆ ಹಾಗೂ ಚಿತ್ರದ ಲಾಭದಲ್ಲಿ 10% ಪಾಲು (ಪ್ರಾಫಿಟ್ ಶೇರಿಂಗ್) ಕೇಳಿದ್ದರು ಎನ್ನಲಾಗಿದೆ.

ಸಾಮಾನ್ಯವಾಗಿ, ಲಾಭದಲ್ಲಿ ಪಾಲು ಕೇಳುವ ಪದ್ಧತಿ ಭಾರತೀಯ ಚಿತ್ರರಂಗದಲ್ಲಿ ಪ್ರಮುಖ ನಟರಿಗೆ (Male Superstars) ಇದೆ. ಆದರೆ, ನಾಯಕಿಯೊಬ್ಬರು ಇಷ್ಟು ದೊಡ್ಡ ಮೊತ್ತದ ಸಂಭಾವನೆಯ ಜೊತೆಗೆ ಲಾಭಾಂಶಕ್ಕೂ ಬೇಡಿಕೆಯಿಟ್ಟಿರುವುದು ಚಿತ್ರತಂಡಕ್ಕೆ ಆರ್ಥಿಕವಾಗಿ ದೊಡ್ಡ ಹೊರೆಯಾಗಬಹುದು ಎಂದು ಭಾವಿಸಿ, ಅವರ ಆಯ್ಕೆಯಿಂದ ಹಿಂದೆ ಸರಿಯಲಾಗಿದೆ ಎಂಬ ಮಾತುಗಳು ಬಲವಾಗಿ ಕೇಳಿಬರುತ್ತಿವೆ.

ಬೇಡಿಕೆಯಲ್ಲಿ ತಪ್ಪೇನಿದೆ ಎನ್ನುತ್ತಾರೆ ಕೆಲವರು:-

ಆದಾಗ್ಯೂ, ದೀಪಿಕಾ ಅವರ ಈ ಬೇಡಿಕೆಯನ್ನು ಸಮರ್ಥಿಸಿಕೊಳ್ಳುವವರೂ ಇದ್ದಾರೆ. ಪ್ರಸ್ತುತ ಭಾರತದ ನಂಬರ್ ಒನ್ ನಟಿಯಾಗಿರುವ ದೀಪಿಕಾ ಪಡುಕೋಣೆ, ತಾವೇ ಒಬ್ಬ ನಿರ್ಮಾಪಕಿಯೂ ಹೌದು. ಅವರ ಉಪಸ್ಥಿತಿಯು 'ಸ್ಪಿರಿಟ್' ಚಿತ್ರಕ್ಕೆ ಪ್ಯಾನ್-ಇಂಡಿಯಾ ಮಟ್ಟದಲ್ಲಿ ದೊಡ್ಡ ಮಾರುಕಟ್ಟೆ ಮೌಲ್ಯವನ್ನು ತಂದುಕೊಡುತ್ತದೆ.

ಅವರ ಸ್ಟಾರ್‌ಡಮ್ ಅನ್ನು ಪರಿಗಣಿಸಿದರೆ, ಲಾಭದಲ್ಲಿ ಪಾಲು ಕೇಳುವುದು ಅವರ ವೃತ್ತಿಪರ ಹಕ್ಕು ಎಂಬ ವಾದವೂ ಇದೆ. ದೊಡ್ಡ ಬಜೆಟ್‌ನ ಚಿತ್ರದಲ್ಲಿ ನಾಯಕಿಯೊಬ್ಬರು ತಮ್ಮ ಮೌಲ್ಯಕ್ಕೆ ತಕ್ಕಂತೆ ಲಾಭಾಂಶ ಕೇಳುವುದರಲ್ಲಿ ತಪ್ಪೇನಿಲ್ಲ ಎಂದು ಅವರ ಅಭಿಮಾನಿಗಳು ವಾದಿಸುತ್ತಿದ್ದಾರೆ.

ಗೊಂದಲದಲ್ಲಿ ಪ್ರಭಾಸ್ ಅಭಿಮಾನಿಗಳು:-

ಈ ಹಿಂದೆ '8-ಗಂಟೆಗಳ ಕೆಲಸ'ದ ವಿವಾದ, ಈಗ 'ಸಂಭಾವನೆ ಮತ್ತು ಲಾಭಾಂಶ'ದ ವಿವಾದ, ಹೀಗೆ ಒಂದರ ಹಿಂದೊಂದು ಸುದ್ದಿಗಳು ಹರಿದಾಡುತ್ತಿರುವುದರಿಂದ 'ಸ್ಪಿರಿಟ್' ಚಿತ್ರದ ನಾಯಕಿ ಯಾರು ಎಂಬ ಗೊಂದಲ ಮತ್ತಷ್ಟು ಹೆಚ್ಚಾಗಿದೆ. ದೀಪಿಕಾ ಮತ್ತು ಪ್ರಭಾಸ್ ಜೋಡಿಯನ್ನು ತೆರೆಯ ಮೇಲೆ ನೋಡಲು ಕಾತರದಿಂದ ಕಾಯುತ್ತಿದ್ದ ಅಭಿಮಾನಿಗಳಿಗೆ ಈ ಬೆಳವಣಿಗೆಗಳು ನಿರಾಸೆ ಮೂಡಿಸಿವೆ.

ಈ ಎಲ್ಲಾ ವದಂತಿಗಳ ಬಗ್ಗೆ ದೀಪಿಕಾ ಪಡುಕೋಣೆ, ನಿರ್ದೇಶಕ ಸಂದೀಪ್ ರೆಡ್ಡಿ ವಂಗಾ ಅಥವಾ 'ಸ್ಪಿರಿಟ್' ಚಿತ್ರತಂಡದಿಂದ ಯಾವುದೇ ಅಧಿಕೃತ ಸ್ಪಷ್ಟನೆ ಇನ್ನೂ ಹೊರಬಿದ್ದಿಲ್ಲ. ಅಧಿಕೃತ ಘೋಷಣೆಯಾಗುವವರೆಗೂ ಈ ಎಲ್ಲಾ ಚರ್ಚೆಗಳು ಮುಂದುವರೆಯುವುದಂತೂ ಖಚಿತ.