Cyber Crime: ಆನ್​ಲೈನ್​ನಲ್ಲಿ ಉತ್ತಮ ಹಾಲಿಗಾಗಿ ಹುಡುಕಾಡಿ 18.5 ಲಕ್ಷ ಕಳೆದುಕೊಂಡ ವೃದ್ಧೆ!

ಆನ್​ಲೈನ್​ ವಂಚನೆ ಬಗ್ಗೆ ಎಷ್ಟೇ ಮಾಧ್ಯಮಗಳವರು, ಪೊಲೀಸರು ಎಚ್ಚರಿಕೆ ಕೊಡುತ್ತಲಿದ್ದರೂ ಹಲವರಿಗೆ ಇದು ತಿಳಿಯುವುದೇ ಇಲ್ಲ. ಇದೀಗ ಆನ್​ಲೈನ್​ನಲ್ಲಿ ಹಾಲು ತರಿಸಿಕೊಳ್ಳಲು ಹೋಗಿ 71 ವರ್ಷದ ವೃದ್ಧೆಯೊಬ್ಬರು 18.5 ಲಕ್ಷ ರೂ. ಕಳೆದುಕೊಂಡಿದ್ದಾರೆ. ಆಗಿದ್ದೇನು ನೋಡಿ... 

ಮುಂಬೈನ 71 ವರ್ಷದ ಮಹಿಳೆಯೊಬ್ಬರು ಆನ್‌ಲೈನ್‌ನಲ್ಲಿ ಹಾಲು ಆರ್ಡರ್ ಮಾಡಲು ಪ್ರಯತ್ನಿಸುವಾಗ ಸೈಬರ್ ಗೂಂಡಾಗಳಿಂದ 18.5 ಲಕ್ಷ ರೂ.ಗಳನ್ನು ವಂಚಿಸಲಾಗಿದೆ. ವಡಾಲಾ ನಿವಾಸಿಯಾಗಿರುವ ಈ ಮಹಿಳೆ ಆಗಸ್ಟ್ ಆರಂಭದಲ್ಲಿ ಆನ್‌ಲೈನ್ ಡೆಲಿವರಿ ಅಪ್ಲಿಕೇಶನ್ ಮೂಲಕ ಹಾಲು ಆರ್ಡರ್ ಮಾಡಲು ಪ್ರಯತ್ನಿಸಿದ್ದರು. ಅವರು ಮಾಡಿದ್ದು ಅಷ್ಟೇ. ಆದರೆ ಮುಂದಾದದ್ದೆಲ್ಲಾ ಅನಾಹುತ. ಸೈಬರ್​ ಕ್ರೈಂಗೆ ಬಲಿಯಾದ ಮಹಿಳೆ, 18.5 ಲಕ್ಷ ರೂ.ಗಳನ್ನು ಕಳೆದುಕೊಂಡಿದ್ದಾರೆ.

ಅಷ್ಟಕ್ಕೂ ಆಗಿದ್ದೇನೆಂದರೆ, ಆಗಸ್ಟ್ 4 ರಂದು, ಮಹಿಳೆಗೆ ದೀಪಕ್ ಎಂಬಾತ, ತಾನು ಹಾಲು ಕಂಪನಿಯ ಉದ್ಯೋಗಿ ಎಂದು ಪರಿಚಯಿಸಿಕೊಂಡು ಕರೆ ಮಾಡಿದ. ಮನೆಗೆ ಹಾಲು ಸರಬರಾಜು ಮಾಡುವುದಾಗಿ ಹೇಳಿದ. ಆನ್​ಲೈನ್​ನಲ್ಲಿ ಹಾಲಿನ ಬಗ್ಗೆ ಮಹಿಳೆ ಸರ್ಚ್​ ಮಾಡುತ್ತಿದ್ದುದು ಈ ಖದೀಮರಿಗೆ ತಿಳಿದಿತ್ತು (ಅದಕ್ಕೇ ಹೇಳುವುದು ನಾವು ಗೂಗಲ್​ನಲ್ಲಿ ಏನೇ ಸರ್ಚ್ ಮಾಡಿದರೂ ಅದರ ಮೇಲೆ ಇಂಥ ಕ್ರಿಮಿನಲ್ಸ್​ ಕಣ್ಣು ನೆಟ್ಟಿರುತ್ತದೆ ಎಂದು!​ ). ಆದ್ದರಿಂದ ಆ ಆಸಾಮಿ ದೀಪಕ್​ ಎಂದು ಪರಿಚಯಿಸಿಕೊಂಡು ವೃದ್ಧೆಯನ್ನು ನಂಬಿಸಿದ.

ಕೊನೆಗೆ ಹಾಲು ಮಾರಾಟ ಸುಲಭವಾಗಲಿದೆ ಎಂದು ಹೇಳಿ, ಆಕೆಯ ನಂಬರ್​ಗೆ ಒಂದು ಲಿಂಕ್​ ಕಳುಹಿಸಿದ. ಇದನದ್ನು ಕ್ಲಿಕ್​ ಮಾಡಿ ಅದರಲ್ಲಿ ಇರುವ ಡಿಟೇಲ್ಸ್​ ಫಿಲ್​​ ಮಾಡಿದರೆ ಮನೆಗೆ ಹಾಲು ಸರಬರಾಜು ಆಗುತ್ತದೆ ಎಂದ. ಅಜ್ಜಿಗೆ ಸಿಕ್ಕಾಪಟ್ಟೆ ಖುಷಿಯಾಗಿ ಹೋಯಿತು. ತಾನು ಅಂದುಕೊಂಡದ್ದು ಇಷ್ಟು ಬೇಗ ಆಗಿಹೋಯಿತಲ್ಲ, ಮನೆಯ ಬಾಗಿಲಿಗೇ ತಂತಾನೇ ಹಾಲು ಬರುತ್ತದೆಯಲ್ಲ ಎಂದು ಖುಷಿಪಟ್ಟುಕೊಂಡಳು.ಆಕೆಯನ್ನು ಇನ್ನಷ್ಟು ನಂಬಿಸಲು ಆ ಖದೀಮ, ಫೋನ್‌ನಲ್ಲಿ ದೀರ್ಘ ಸಂಭಾಷಣೆ ನಡೆಸಿದ.

ವೃದ್ಧೆ ಸಂಪೂರ್ಣ ತನ್ನ ಬುಟ್ಟಿಗೆ ಬಿದ್ದಳು ಎಂದು ತಿಳಿಯುತ್ತದ್ದಂತೆಯೇ ಲಿಂಕ್​ಕಳುಹಿಸಿ. ಅದರಂತೆ ಲಿಂಕ್​ ಓಪನ್​ ಮಾಡಿದ ಮಹಿಳೆ, ಅಲ್ಲಿರುವ ಫಾರ್ಮ್​ ತುಂಬಿದಳು. ನಂತರ ಹಾಲು ಬರಲಿಲ್ಲ. ಅದೇ ಫೋನ್​ಗೆ ಕರೆ ಮಾಡಿದಾಗ ಕರೆಯೂ ಸಿಗಲಿಲ್ಲ. ಕೊನೆಗೆ, ಆಕೆಯ ಫೋನ್​ಗೆ ಒಂದು ಬ್ಯಾಂಕ್​ ಖಾತೆಯಿಂದ 1.7 ಲಕ್ಷ ರೂಪಾಯಿ ಹಾಗೂ ಇತರ ಬ್ಯಾಂಕ್ ಖಾತೆ ಎಲ್ಲವು ಸೇರಿ, 18.5 ಲಕ್ಷ ರೂಪಾಯಿ ವಿತ್​ಡ್ರಾ ಆಗಿರುವುದು ತಿಳಿದಿದೆ. ಅದಾದ ಮೇಲೆ ವೃದ್ಧೆ ಪೊಲೀಸರಲ್ಲಿ ದೂರು ದಾಖಲಿಸಿದ್ದಾಳೆ. ಅವರು ತನಿಖೆ ಮಾಡಿದಾಗ ಹಾಲಿನ ವಿಷಯ ಹೇಳಿದ್ದಾಳೆ. ಸದ್ಯ ಪ್ರಕರಣ ದಾಖಲು ಮಾಡಿಕೊಂಡಿರುವ ಪೊಲೀಸರು ತನಿಖೆ ನಡೆಸುತ್ತಿದ್ದಾರೆ.