WPL Auction ಆರ್‌ಸಿಬಿ ಬಿಡ್ ಗೆಲ್ಲುತ್ತಿದ್ದಂತೆ ಸಂಭ್ರಮದಲ್ಲಿ ತೇಲಾಡಿದ ಮಂಧಾನಾ, ರೇಣುಕಾ ಸಿಂಗ್!

ಮಹಿಳಾ ಐಪಿಎಲ್ ಹರಾಜು ಪ್ರಕ್ರಿಯೆಯನ್ನು ಖುದ್ದು ಭಾರತ ಮಹಿಳಾ ತಂಡದ ಆಟಗಾರ್ತಿಯರು ನೇರ ಪ್ರಸಾರ ವೀಕ್ಷಿಸಿದ್ದಾರೆ. ಒಬ್ಬೊಬ್ಬ ಆಟಗಾರ್ತಿಯರು ಹರಾಜಾಗುತ್ತಿದ್ದಂತೆ ಸಂಭ್ರಮ ಮುಗಿಲು ಮುಟ್ಟಿದೆ. ಅದರಲ್ಲೂ ಸ್ಮೃತಿ ಮಂದನಾ ಹಾಗೂ ರೇಣುಕಾ ಸಿಂಗ್ ಆರ್‌ಸಿಬಿ ಪಾಲಾಗುತ್ತಿದ್ದಂತೆ ಇಡೀ ಮಹಿಳಾ ತಂಡ ಸಂಭ್ರಮಿಸಿದೆ. ಈ ವಿಡಿಯೋ ಇದೀಗ ವೈರಲ್ ಆಗಿದೆ.  

ಬೆಂಗಳೂರು(ಫೆ.13): ಮಹಿಳಾ ಐಪಿಎಲ್ ಹರಾಜು ಹಲವು ಅಚ್ಚರಿ ಹಾಗೂ ದಾಖಲೆಗಳಿಗೆ ಕಾರಣವಾಗಿದೆ. ಇದೇ ಮೊದಲ ಬಾರಿ ನಡೆಯುತ್ತಿರುವ ಮಹಿಳಾ ಐಪಿಎಲ್ ಹರಾಜಿನಲ್ಲಿ ಸ್ಮೃತಿ ಮಂದನಾ ಹಾಗೂ ರೇಣುಕಾ ಸಿಂಗ್ ಆರ್‌ಸಿಬಿ ಪಾಲಾಗಿದ್ದಾರೆ. ರಾಯಲ್ ಚಾಲೆಂಜರ್ಸ್ ಬೆಂಗಳೂರು ಮಹಿಳಾ ತಂಡ, ಅಳೆದು ತೂಗಿ ಆಟಗಾರ್ತಿಯರನ್ನು ಖರೀದಿಸುತ್ತಿದೆ.ಬಲಿಷ್ಠ ಹಾಗೂ ಜನಪ್ರಿಯ ತಂಡ ಕಟ್ಟಲು ಮುಂದಾಗಿದೆ. ಚೊಚ್ಚಲ ಮಹಿಳಾ ಹರಾಜಿನ ಆರಂಭದಂದಲೂ ಆರ್‌ಸಿಬಿ ಹೆಚ್ಚು ಆಕ್ರಮಣಕಾರಿಯಾಗಿ ಆಟಗಾರ್ತಿಯರನ್ನು ಖರೀದಿಸಿತು. ಇತ್ತ ಭಾರತ ಮಹಿಳಾ ತಂಡ ಖುದ್ದು ಹರಾಜು ನೇರಪ್ರಸಾರ ವೀಕ್ಷಿಸಿದೆ. ಈ ವೇಳೆ ಸ್ಮೃತಿ ಮಂದನಾ ಅವರನ್ನು ರಾಯಲ್ ಚಾಲೆಂಜರ್ಸ್ ತಂಡ ಅತೀ ಹೆಚ್ಚು ಮೊತ್ತಕ್ಕೆ ಖರೀದಿ ಮಾಡುತ್ತಿದ್ದಂತೆ ತಂಡದಲ್ಲಿ ಸಂಭ್ರಮ ಮನೆ ಮಾಡಿತ್ತು. ಖುದ್ದು ಸ್ಮೃತಿ ಮಂದನಾ ಅಚ್ಚರಿ ಜೊತೆ ಸಂಭ್ರಮಪಟ್ಟಿದ್ದಾರೆ. ಈ ವಿಡಿಯೋವನ್ನು ಆರ್‌ಸಿಬಿ ಪೋಸ್ಟ್ ಮಾಡಿದೆ. 

ಸ್ಮೃತಿ ಮಂದನಾಗೆ ರಾಯಲ್ ಜಾಲೆಂಜರ್ಸ್ ಬೆಂಗಳೂರು ತಂಡ 3.4 ಕೋಟಿ ರೂಪಾಯಿ ನೀಡಿ ಖರೀದಿಸಿದೆ. ಇದುವರೆಗಿನ ಗರಿಷ್ಠ ಮೊತ್ತ ಕೂಡ ಇದಾಗಿದೆ. ಇಷ್ಟೇ ಅಲ್ಲ ಚೊಚ್ಚಲ ಹರಾಜಿನ ಮೊದಲ ಹರಾಜು ಗರಿಷ್ಠ ಮೊತ್ತದ ದಾಖಲೆ ಬರೆದಿದೆ. ಇತ್ತ ರೇಣುಕಾ ಸಿಂಗ್ ಬಿಡ್ಡಿಂಗ್ ವೇಳೆ ಭಾರತ ಮಹಿಳಾ ತಂಡ ತೀವ್ರ ಕುತೂಹಲದಿಂದ ನೇರಪ್ರಸಾರ ವೀಕ್ಷಿಸಿತ್ತು. ಫ್ರಾಂಚೈಸಿಗಳು ರೇಣುಕಾ ಸಿಂಗ್ ಖರೀದಿಸಲು ಮುಗಿ ಬಿದ್ದಿತ್ತು. ಹಂತ ಹಂತವಾಗಿ ಬಿಡ್ಡಿಂಗ್ ಮೊತ್ತ ಏರುತ್ತಿದ್ದಂತೆ ತಂಡದಲ್ಲಿ ಚಪ್ಪಾಳೆ, ಸಂಭ್ರಮ ಹೆಚ್ಚಾಗಿತ್ತು. ಕೊನೆಗೆ ರೇಣುಕಾ ಸಿಂಗ್ 1.5 ಕೋಟಿ ರೂಪಾಯಿ ನೀಡಿ ಆರ್‌ಸಿಬಿ ಪಾಲಾದರು. ಈ ವೇಳೆ ತಂಡದ ಸದಸ್ಯರು ರೇಣುಕಾ ಸಿಂಗ್ ಅಭಿನಂದಿಸಿದರು. ಈ ವಿಡಿಯೋವನ್ನು ಆರ್‌ಸಿಬಿ ಪೋಸ್ಟ್ ಮಾಡಿದೆ.

ಇದುವರೆಗೆ ರಾಯಲ್ ಚಾಲೆಂಜರ್ಸ್ ಬೆಂಗಳೂರು ಮಹಿಳಾ ಫ್ರಾಂಚೈಸಿ ಖರೀದಿಸಿದ ಆಟಗಾರ್ತಿಯರ ಪಟ್ಟಿ:
ಸ್ಮೃತಿ ಮಂಧಾನ: 3.4 ಕೋಟಿ ರೂಪಾಯಿ( ಆರ್‌ಸಿಬಿ)
ರಿಚಾ ಘೋಷ್: 1.9 ಕೋಟಿ ರೂಪಾಯಿ( ಆರ್‌ಸಿಬಿ
ರೇಣುಕಾ ಸಿಂಗ್: 1.5 ಕೋಟಿ ರೂಪಾಯಿ( ಆರ್‌ಸಿಬಿ
ಎಲ್ಲಿಸ್ ಪೆರಿ: 1.17 ಕೋಟಿ ರೂಪಾಯಿ( ಆರ್‌ಸಿಬಿ)
ಸೋಫಿ ಡಿವೈನ್: 50 ಲಕ್ಷ ರೂಪಾಯಿ( ಆರ್‌ಸಿಬಿ