ಕುಂಟುತ್ತಲೇ ಬಂದು ಅರ್ಧಶತಕ ಸಿಡಿಸಿ, ಟೆಸ್ಟ್ ಸರಣಿಯಲ್ಲಿ ಹೊಸ ಇತಿಹಾಸ ಬರೆದ ರಿಷಭ್ ಪಂತ್!

ಕಾಲಿನ ಗಾಯದ ನಡುವೆಯೂ ಇಂಗ್ಲೆಂಡ್ ವಿರುದ್ಧದ ಟೆಸ್ಟ್‌ನಲ್ಲಿ ಅರ್ಧಶತಕ ಬಾರಿಸುವ ಮೂಲಕ ರಿಷಭ್ ಪಂತ್ ದಾಖಲೆ ನಿರ್ಮಿಸಿದ್ದಾರೆ. ಇಂಗ್ಲೆಂಡ್‌ನಲ್ಲಿ ನಡೆದ ಟೆಸ್ಟ್ ಸರಣಿಯಲ್ಲಿ ಅತಿ ಹೆಚ್ಚು ರನ್ ಗಳಿಸಿದ ವಿಕೆಟ್ ಕೀಪರ್ ಬ್ಯಾಟ್ಸ್‌ಮನ್ ಎಂಬ ಹೆಗ್ಗಳಿಕೆಗೆ ಪಾತ್ರರಾಗಿದ್ದಾರೆ. 

ಮ್ಯಾಂಚೆಸ್ಟರ್: ಕಾಲಿನ ಗಾಯವನ್ನು ಲೆಕ್ಕಿಸದೆ ಇಂಗ್ಲೆಂಡ್ ವಿರುದ್ಧದ ನಾಲ್ಕನೇ ಟೆಸ್ಟ್‌ನ ಎರಡನೇ ದಿನ ಕ್ರೀಸ್‌ಗೆ ಬಂದು ಅರ್ಧಶತಕ ಬಾರಿಸಿದ ಭಾರತದ ರಿಷಭ್ ಪಂತ್ ಅಪರೂಪದ ದಾಖಲೆ ಬರೆದಿದ್ದಾರೆ. ಟೆಸ್ಟ್ ಸರಣಿಗಳ ಇತಿಹಾಸದಲ್ಲಿ ಇಂಗ್ಲೆಂಡ್‌ನಲ್ಲಿ ನಡೆದ ಟೆಸ್ಟ್ ಸರಣಿಯೊಂದರಲ್ಲಿ ಅತಿ ಹೆಚ್ಚು ರನ್ ಗಳಿಸಿದ ವಿಕೆಟ್ ಕೀಪರ್ ಬ್ಯಾಟ್ಸ್‌ಮನ್ ಎಂಬ ದಾಖಲೆಯನ್ನು ನಾಲ್ಕನೇ ಟೆಸ್ಟ್‌ನಲ್ಲಿ ಅರ್ಧಶತಕ ಪೂರ್ಣಗೊಳಿಸುವ ಮೂಲಕ ರಿಷಭ್ ಪಂತ್ ತಮ್ಮ ಹೆಸರಿಗೆ ಬರೆಸಿಕೊಂಡಿದ್ದಾರೆ. 75 ಎಸೆತಗಳಲ್ಲಿ 54 ರನ್ ಗಳಿಸಿ ಔಟಾದ ರಿಷಭ್ ಪಂತ್ ಈ ಸರಣಿಯಲ್ಲಿ ಇದುವರೆಗೆ ನಾಲ್ಕು ಪಂದ್ಯಗಳಿಂದ ಎರಡು ಶತಕ ಮತ್ತು ಮೂರು ಅರ್ಧಶತಕ ಸೇರಿದಂತೆ 68.42 ಸರಾಸರಿಯಲ್ಲಿ 479 ರನ್ ಗಳಿಸಿದ್ದಾರೆ.

1998 ರಲ್ಲಿ ದಕ್ಷಿಣ ಆಫ್ರಿಕಾ ವಿರುದ್ಧದ ಟೆಸ್ಟ್ ಸರಣಿಯಲ್ಲಿ ಇಂಗ್ಲೆಂಡ್ ಪರ ಐದು ಪಂದ್ಯಗಳ 10 ಇನ್ನಿಂಗ್ಸ್‌ಗಳಿಂದ ವಿಕೆಟ್ ಕೀಪರ್ ಬ್ಯಾಟರ್ ಅಲೆಕ್ಸ್ ಸ್ಟುವರ್ಟ್ 465 ರನ್ ಗಳಿಸಿದ್ದ ದಾಖಲೆಯನ್ನು ರಿಷಭ್ ಪಂತ್ ಮುರಿದಿದ್ದಾರೆ. ಅಲೆಕ್ಸ್ ಸ್ಟುವರ್ಟ್ ದಾಖಲೆ ಮುರಿಯಲು ಕೇವಲ 5 ಇನ್ನಿಂಗ್ಸ್‌ ತೆಗೆದುಕೊಂಡಿದ್ದಾರೆ. ಗಾಯದಿಂದಾಗಿ ಕೊನೆಯ ಟೆಸ್ಟ್‌ನಲ್ಲಿ ಆಡಲು ಸಾಧ್ಯವಾಗದ ರಿಷಭ್ ಪಂತ್ ಅವರನ್ನು ಮೀರಿಸಲು ಇನ್ನೊಬ್ಬ ಇಂಗ್ಲೆಂಡ್ ಆಟಗಾರನಿಗೆ ಈ ಬಾರಿ ಅವಕಾಶವಿದೆ. ನಾಲ್ಕು ಪಂದ್ಯಗಳಲ್ಲಿ 415 ರನ್ ಗಳಿಸಿರುವ ಇಂಗ್ಲೆಂಡ್ ವಿಕೆಟ್ ಕೀಪರ್ ಜಾಮಿ ಸ್ಮಿತ್‌ಗೆ ಎರಡು ಟೆಸ್ಟ್‌ಗಳಿಂದ 65 ರನ್ ಗಳಿಸಿದರೆ ರಿಷಭ್ ಪಂತ್ ಅವರನ್ನು ಮೀರಿಸಿ ದಾಖಲೆಯನ್ನು ತಮ್ಮ ಹೆಸರಿಗೆ ಬರೆಸಿಕೊಳ್ಳಬಹುದು.

ಇದಲ್ಲದೆ, ಟೆಸ್ಟ್ ಸರಣಿಯೊಂದರಲ್ಲಿ ಅತಿ ಹೆಚ್ಚು 50+ ಸ್ಕೋರ್‌ಗಳನ್ನು ಗಳಿಸಿದ ಭಾರತೀಯ ವಿಕೆಟ್ ಕೀಪರ್ ಎಂಬ ದಾಖಲೆಯನ್ನೂ ರಿಷಭ್ ಪಂತ್ ಮ್ಯಾಂಚೆಸ್ಟರ್‌ನಲ್ಲಿ ಅರ್ಧಶತಕ ಗಳಿಸುವ ಮೂಲಕ ತಮ್ಮ ಹೆಸರಿಗೆ ಬರೆಸಿಕೊಂಡಿದ್ದಾರೆ. ಸರಣಿಯಲ್ಲಿ ಎರಡು ಶತಕ ಮತ್ತು ಮೂರು ಅರ್ಧಶತಕ ಸೇರಿದಂತೆ ಐದು ಬಾರಿ ರಿಷಭ್ ಪಂತ್ 50+ ಸ್ಕೋರ್ ಗಳಿಸಿದ್ದಾರೆ. ಇಂಗ್ಲೆಂಡ್ ವಿರುದ್ಧ 1972-73ರ ಸರಣಿಯಲ್ಲಿ ನಾಲ್ಕು ಬಾರಿ 50+ ಸ್ಕೋರ್ ಗಳಿಸಿದ್ದ ಫಾರೂಕ್ ಎಂಜಿನಿಯರ್, 2008ರಲ್ಲಿ ಆಸ್ಟ್ರೇಲಿಯಾ ವಿರುದ್ಧ ಮತ್ತು 2014ರಲ್ಲಿ ಇಂಗ್ಲೆಂಡ್ ವಿರುದ್ಧ ನಾಲ್ಕು ಬಾರಿ 50+ ಸ್ಕೋರ್ ಗಳಿಸಿದ್ದ ಎಂ.ಎಸ್. ಧೋನಿ ಅವರನ್ನು ಪಂತ್ ಇಂದಿನ ಅರ್ಧಶತಕದೊಂದಿಗೆ ಹಿಂದಿಕ್ಕಿದ್ದಾರೆ.

ಗಾಯದ ನಡುವೆ ಕುಂಟುತ್ತಲೇ ಬ್ಯಾಟ್‌ ಬೀಸಿದ ರಿಷಭ್‌ ಪಂತ್‌

ಪಂದ್ಯದ ಮೊದಲ ದಿನ ಪಾದದ ಗಾಯಕ್ಕೆ ತುತ್ತಾಗಿದ್ದ ರಿಷಭ್‌ ಪಂತ್‌, ಇಂಗ್ಲೆಂಡ್‌ ವಿರುದ್ಧ ಸರಣಿಯಿಂದಲೇ ಹೊರಬೀಳಲಿದ್ದಾರೆ ಎಂದು ಹೇಳಲಾಗುತ್ತಿತ್ತು. ಆದರೆ ಅಚ್ಚರಿ ಎಂಬಂತೆ 2ನೇ ದಿನ ಬ್ಯಾಟಿಂಗ್‌ಗೆ ಆಗಮಿಸಿದರು. 6ನೇ ವಿಕೆಟ್‌ ರೂಪದಲ್ಲಿ ಶಾರ್ದೂಲ್‌ ಔಟಾದಾಗ ರಿಷಭ್‌ ಡ್ರೆಸ್ಸಿಂಗ್‌ ರೂಮ್‌ನಿಂದ ಕುಂಟುತ್ತಲೇ ಕ್ರೀಸ್‌ಗೆ ಬಂದರು. ಅವರ ಹೋರಾಟದ ಮನೋಭಾವಕ್ಕೆ ತಲೆದೂಗಿದ ಪ್ರೇಕ್ಷಕರು ಎದ್ದುನಿಂತು ಚಪ್ಪಾಳೆ ಬಾರಿಸಿದರು.

ಕ್ರೀಸ್‌ನ ಮಧ್ಯೆ ಓಡುವಾಗಲೂ ರಿಷಭ್‌ ಕುಂಟುತ್ತಲೇ ಇದ್ದರು. ಆದರೂ ಹೋರಾಟ ಬಿಡಲಿಲ್ಲ. ಮೊದಲ ದಿನ 48 ಎಸೆತಕ್ಕೆ 37 ರನ್‌ ಗಳಿಸಿದ್ದ ಪಂತ್, 2ನೇ ದಿನ ನೋವಿನ ನಡುವೆಯೂ 27 ಎಸೆತಗಳನ್ನು ಎದುರಿಸಿ 17 ರನ್‌ ಬಾರಿಸಿದರು. ಒಟ್ಟು 54 ರನ್‌ ಗಳಿಸಿ ಔಟಾದರು. ರಿಷಭ್ ಪಂತ್ ಅವರ ದಿಟ್ಟ ಹೋರಾಟಕ್ಕೆ ಕ್ರಿಕೆಟ್ ಜಗತ್ತಿನಲ್ಲಿ ವ್ಯಾಪಕ ಮೆಚ್ಚುಗೆ ವ್ಯಕ್ತವಾಯಿತು. ಹರ್ಷಾ ಬೋಗ್ಲೆ, ಯೂಸುಫ್ ಪಠಾಣ್, ಇರ್ಫಾನ್ ಪಠಾಣ್ ಸೇರಿದಂತೆ ಹಲವರು ಪಂತ್ ಕೆಚ್ಚೆದೆಯ ಹೋರಾಟವನ್ನು ಕೊಂಡಾಡಿದ್ದಾರೆ.