ಟೀಂ ಇಂಡಿಯಾ ಸೆಲೆಕ್ಷನ್ ಕಮಿಟಿ ಸ್ಟ್ರಾಂಗ್ ಆಗಬೇಕಾ..? ಮೊದಲು ಸಂಬಳ ಹೆಚ್ಚಿಸಿ..!
ಸಾರಾಂಶ
* ಟೀಂ ಇಂಡಿಯಾ ಆಯ್ಕೆ ಸಮಿತಿ ಮುಖ್ಯಸ್ಥರೇ ಇಲ್ಲದೇ ತಂಡ ಆಯ್ಕೆ * ನಾಲ್ವರು ಸೆಲೆಕ್ಟರ್ಸ್ ಡಮ್ಮಿ ಪ್ಲೇಯರ್ಸ್, ಬರುವವನೂ ಡಮ್ಮಿ ಪ್ಲೇಯರ್ * ಸೆಲೆಕ್ಷನ್ ಕಮಿಟಿಯ ಐವರು ಸದಸ್ಯರಿಗೆ ವರ್ಷಕ್ಕೆ ತಲಾ ಒಂದು ಕೋಟಿ ಸಂಬಳ
ಬೆಂಗಳೂರು(ಜೂ.24): ವಿರಾಟ್ ಕೊಹ್ಲಿ ಕ್ಯಾಪ್ಟನ್ಸಿ ಬಿಟ್ಮೇಲೋ..? ರವಿಶಾಸ್ತ್ರಿ ಕೋಚ್ ಸ್ಥಾನ ತ್ಯಜಿಸಿದ್ಮೇಲೋ..? ಜಯ್ ಶಾ ಬಿಸಿಸಿಐ ಕಾರ್ಯದರ್ಶಿ ಆದ್ಮೇಲೋ..? ಗೊತ್ತಿಲ್ಲ. ಕಳೆದ ಮೂರು ವರ್ಷದಿದಿಂದ ಬಿಸಿಸಿಐನಲ್ಲಿ ಒಂದಲ್ಲ ಒಂದು ಅವಘಡಗಳು ನಡೆಯುತ್ತಲೇ ಇವೆ. ಈ ಎಲ್ಲ ಭಾರತೀಯ ಕ್ರಿಕೆಟ್ ಅನ್ನು ಅಧಃಪತನದತ್ತ ಕೊಂಡೊಯ್ಯುತ್ತಿವೆ.
ಕಳೆದ 10 ವರ್ಷದ್ದು ಬೇಡ.. ಕಳೆದ ಮೂರು ವರ್ಷದ ಕಥೆ ಕೇಳಿ. ಉತ್ತಮ ಕೋಚ್ ಎನಿಸಿಕೊಂಡಿದ್ದ ರವಿಶಾಸ್ತ್ರಿ ತಮ್ಮ ಸ್ಥಾನ ಬಿಟ್ಟುಕೊಟ್ಟರು. ಉತ್ತಮವಾಗಿ ತಂಡ ಮುನ್ನಡೆಸುತ್ತಿದ್ದ ವಿರಾಟ್ ಕೊಹ್ಲಿಯನ್ನ ನಾಯಕತ್ವದಿಂದ ಕಿತ್ತಾಕಲಾಯ್ತು. ಭಾರತದ ಲೆಜೆಂಡ್ ಕ್ರಿಕೆಟರ್ ಸೌರವ್ ಗಂಗೂಲಿ ಬಿಸಿಸಿಐ ಅಧ್ಯಕ್ಷ ಸ್ಥಾನದಿಂದ ಕಿಕೌಟ್ ಆದ್ರು. ಟೀಂ ಇಂಡಿಯಾ, 2021ರಲ್ಲಿ ಟಿ20 ವಿಶ್ವಕಪ್ ಮತ್ತು ವಿಶ್ವ ಟೆಸ್ಟ್ ಚಾಂಪಿಯನ್ಶಿಪ್ ಗೆಲ್ಲಲಿಲ್ಲ. 2022ರಲ್ಲಿ ಏಷ್ಯಾಕಪ್-ಟಿ20 ವರ್ಲ್ಡ್ಕಪ್ ಸಹ ಗೆದ್ದಿಲ್ಲ. ಈ ವರ್ಷ ಟೆಸ್ಟ್ ವಿಶ್ವಕಪ್ ಕೈ ಚಲ್ಲಿಯಾಗಿದೆ. ಇದೇ ವರ್ಷ ನಡೆಯುವ ಏಷ್ಯಾಕಪ್ ಮತ್ತು ಏಕದಿನ ವಿಶ್ವಕಪ್ ಗೆಲ್ತೀವಿ ಅನ್ನೋ ಭರವಸೆಯಿಲ್ಲ. ಯಾಕಂದ್ರೆ ಟೀಂ ಇಂಡಿಯಾವನ್ನ ಆಯ್ಕೆ ಮಾಡೋರೇ ಇಲ್ಲದಂತಾಗಿದೆ.
ನಾಲ್ವರು ಡಮ್ಮಿ ಪ್ಲೇಯರ್ಸ್, ಬರುವವನೂ ಡಮ್ಮಿ ಪ್ಲೇಯರ್..!
ಸದ್ಯ ಟೀಂ ಇಂಡಿಯಾವನ್ನ ಆಯ್ಕೆ ಮಾಡೋರು ಶಿವಸುಂದರ್ ದಾಸ್, ಸುಬ್ರೊತೊ ಬ್ಯಾನರ್ಜಿ, ಸಲೀಲ್ ಅಂಕೋಲಾ ಮತ್ತು ಶ್ರೀಧರನ್ ಶರತ್. ಈ ನಾಲ್ವರಲ್ಲಿ ಶರತ್ ಭಾರತದ ಪರ ಆಡಿಲ್ಲ. ಈ ಮೂವರು 25 ಟೆಸ್ಟ್, 30 ಒನ್ಡೇ ಮ್ಯಾಚ್ಗಳನ್ನಾಡಿದ್ದಾರೆ. ಇನ್ನು ಟಿ20 ಗಂಧಗಾಳಿಯೂ ಈ ನಾಲ್ವರಿಗೆ ಗೊತ್ತಿಲ್ಲ. ಇನ್ನು ಆಯ್ಕೆ ಸಮಿತಿ ಮುಖ್ಯಸ್ಥರಾಗಿದ್ದ ಚೇತನ್ ಶರ್ಮಾ, ಖಾಸಗಿ ಚಾನೆಲ್ವೊಂದರ ಕುಟುಕು ಕಾರ್ಯಾಚರಣೆಯಲ್ಲಿ ಸಿಕ್ಕಿಬಿದ್ದ ಬಳಿಕ ತಮ್ಮ ಸ್ಥಾನಕ್ಕೆ ರಾಜೀನಾಮೆ ನೀಡಿದ್ದರು. ಖಾಲಿ ಇರುವ ಆಯ್ಕೆ ಸಮಿತಿಯ ಏಕೈಕ ಸದಸ್ಯನ ಸ್ಥಾನಕ್ಕೆ ಈಗ ಬಿಸಿಸಿಐ ಅರ್ಜಿ ಆಹ್ವಾನಿಸಿದೆ. ನಿವೃತ್ತಿಯಾಗಿ ಕನಿಷ್ಟ 5 ವರ್ಷ ಆಗಿರುವ ಆಟಗಾರ, 7 ಟೆಸ್ಟ್ ಅಥವಾ 30 ಫಸ್ಟ್ ಕ್ಲಾಸ್, 10 ಒನ್ಡೇ ಮತ್ತು 20 ಟಿ20 ಮ್ಯಾಚ್ ಆಡಿರಬೇಕು. ಅಂತವರು ಅರ್ಜಿ ಸಲ್ಲಿಸಬಹುದು.
1 ಕೋಟಿ ಸಂಬಳಕ್ಕೆ ಸಿಗುವುದು ಅನಾನುಭವಿ ಆಟಗಾರರೇ..!
ಹೌದು, ಸೆಲೆಕ್ಷನ್ ಕಮಿಟಿಯ ಐವರು ಸದಸ್ಯರಿಗೆ ವರ್ಷಕ್ಕೆ ತಲಾ ಒಂದು ಕೋಟಿ ಸಂಬಳ. ಒಂದೂ ಕೋಟಿನಾ ಅನ್ನಬೇಡಿ. ಮಾಜಿ ಕ್ರಿಕೆಟರ್ಸ್ಗೆ ಒಂದು ಕೋಟಿ ಯಾವ ಲೆಕ್ಕಕ್ಕೂ ಇಲ್ಲ. ಅವರು ವರ್ಷಕ್ಕೆ ಅದಕ್ಕಿಂತ 10 ಪಟ್ಟು ಹೆಚ್ಚು ದುಡಿಯುತ್ತಾರೆ. ಆಯ್ಕೆ ಸಮಿತಿ ಸೇರಿಕೊಂಡ್ರೆ, ಬೇರೆ ಎಲ್ಲೂ ಕೆಲಸ ಮಾಡುವಂತಿಲ್ಲ. ಐಪಿಎಲ್ನಲ್ಲಿ ಕೋಚ್, ಮೆಂಟರ್ ಆಗುವಂತಿಲ್ಲ. ಕಾಮೆಂಟ್ರಿ ಮಾಡುವಂತಿಲ್ಲ.
ಈ ಕ್ರಿಕೆಟಿಗನಿಗೆ ತಿಂಗಳಿಗೆ 5.5 ಕೋಟಿ ರುಪಾಯಿ ಸಂಬಳ..! ಆದ್ರೆ ಅದು ಧೋನಿ, ರೋಹಿತ್, ಸಚಿನ್ ಅಲ್ಲ..!
ವರ್ಷ ಪೂರ್ತಿ ಬರೀ 1 ಕೋಟಿಯನ್ನೇ ನಂಬಿ ಕೂರಬೇಕು. ಹೀಗಾಗಿ 2000ರ ನಂತರ ರಿಟೈರ್ಡ್ ಆದ ಆಟಗಾರರು ಆಯ್ಕೆ ಸಮಿತಿ ಸದಸ್ಯರಾಗಲು ಅರ್ಜಿಯನ್ನೇ ಹಾಕುವುದಿಲ್ಲ. ಇದಕ್ಕೆ ಬೆಸ್ಟ್ ಎಕ್ಸಾಂಪಲ್ ಸದ್ಯ ಇರುವ ಆಯ್ಕೆ ಸಮಿತಿ ಸದಸ್ಯರೇ. ಅವರೆಲ್ಲಾ 90ರ ದಶಕದಲ್ಲಿ ರಿಟೈರ್ಡ್ ಆದವರು. ಅವರಿಗೆ IPLನಲ್ಲೂ ಕೆಲಸವಿಲ್ಲ. ಕಾಮೆಂಟ್ರಿಗೂ ಕರೆಯುವುದಿಲ್ಲ.
ಸಂಬಳ ಹೆಚ್ಚಿಸಿ.. ಆಯ್ಕೆ ಸಮಿತಿ ಸ್ಟ್ರೆಂಥ್ ಹೆಚ್ಚಿಸಿ..!
ಯೆಸ್, ಚೀಫ್ ಸೆಲೆಕ್ಟರ್ ಸ್ಥಾನಕ್ಕೆ ವೀರೇಂದ್ರ ಸೆಹ್ವಾಗ್ ಆಸಕ್ತಿ ಹೊಂದಿದ್ದರು. ಆದ್ರೆ ಕಡಿಮೆ ಸ್ಯಾಲರಿ ನೋಡಿ ಸೈಲೆಂಟ್ ಆದ್ರು. ಕೋಚ್, ಮೆಂಟರ್, ಕಾಮೆಂಟ್ರಿ ಹೀಗೆ ವಿವಿಧ ಕೆಲಸ ಮಾಡಿಕೊಂಡು ಕೋಟಿ ಗಟ್ಟಲೆ ಹಣ ಗಳಿಸೋರಿಗೆ ಒಂದು ಕೋಟಿ ಕೊಡ್ತಿನಿ ಬನ್ನಿ ಅಂದ್ರೆ ಬರಲ್ಲ. ಆಗ ಸಿಗುವವರೇ ಅನಾನುಭವಿ ಮಾಜಿ ಪ್ಲೇಯರ್ಸ್. ಆಯ್ಕೆ ಸಮಿತಿ ಸ್ಟ್ರಾಂಗ್ ಆಗಬೇಕಾ..? ಹಾಗಾದ್ರೆ ಮೊದಲು ಸೆಲೆಕ್ಟರ್ಸ್ ಸಂಬಳ ಹೆಚ್ಚಿಸಿ. ಆಗ ಮಾತ್ರ ಉತ್ತಮ ಆಯ್ಕೆ ಸಮಿತಿ ರಚಿಸಲು ಸಾಧ್ಯ. ಉತ್ತಮ ತಂಡ ಕಟ್ಟಲು ಸಾಧ್ಯ. ವರ್ಷದಲ್ಲಿ 10-15 ದಿನ ಕೆಲಸ ಮಾಡೋರಿಗೆ ಯಾಕಿಷ್ಟು ಸಂಬಳ ಅಂತ ಸುಮ್ಮನಿದ್ರೆ ಬಿಸಿಸಿಐಗೆ ಸಿಗೋದು ಡಮ್ಮಿ ಪ್ಲೇಯರ್ಸ್. ಆಗ ಭಾರತೀಯ ಕ್ರಿಕೆಟ್ ಮತ್ತಷ್ಟು ದುರ್ಬಲವಾಗಲಿದೆ.
ಕ್ರಿಕೆಟ್ ಮತ್ತು ಕ್ರೀಡಾ ಜಗತ್ತಿನ (Sports News in Kannada) ಕ್ಷಣಕ್ಷಣದ ಕನ್ನಡ ಸುದ್ದಿ ಅಪ್ಡೇಟ್ಗಳಿಗಾಗಿ ಏಷ್ಯಾನೆಟ್ ಸುವರ್ಣ ನ್ಯೂಸ್ ಫಾಲೋ ಮಾಡಿ. IPL Live ಸೇರಿದಂತೆ ಟೀಂ ಇಂಡಿಯಾದ ಬ್ರೇಕಿಂಗ್ ಸುದ್ದಿ (Cricket News in Kannada), ವಿಶೇಷ ವರದಿಗಳು ಮತ್ತು ನೇರ ಪ್ರಸಾರಗಳೊಂದಿಗೆ ಸಂಪೂರ್ಣ ಮಾಹಿತಿ ನಿಮ್ಮ ಒಂದೇ ಕ್ಲಿಕ್ನಲ್ಲಿ ಲಭ್ಯ. ಏಷ್ಯಾನೆಟ್ ಸುವರ್ಣ ನ್ಯೂಸ್ ಅಧಿಕೃತ ಆ್ಯಪ್ ಡೌನ್ಲೋಡ್ ಮಾಡಿ ಹಾಗೂ ಎಲ್ಲಾ ಅಪ್ಡೇಟ್ ಗಳನ್ನು ಪಡೆಯಿರಿ.