ಮಯಾಂಕ್ ಕೆರಿಯರ್ ಬದಲಿಸುತ್ತಾ ಜೆರ್ಸಿ ನಂ. 7..? ದಕ್ಷಿಣ ವಲಯಕ್ಕೆ 2 ಟ್ರೋಫಿ ಗೆಲ್ಲಿಸಿಕೊಟ್ಟ ಅಗರ್‌ವಾಲ್‌

ಟೀಂ ಇಂಡಿಯಾದಿಂದ ಡ್ರಾಪ್ ಆಗಿರುವ ಮಯಾಂಕ್, ಸದ್ಯ ಅದ್ಭುತ ಫಾರ್ಮ್​ನಲ್ಲಿದ್ದಾರೆ. ನಂಬರ್ 7 ಜೆರ್ಸಿ ಸದ್ಯ ಅವರ ಕೆರಿಯರ್​ ಅನ್ನೇ ಬದಲಿಸಿದೆ.

ಬೆಂಗಳೂರು(ಆ.06) ಮಯಾಂಕ್ ಅಗರ್ವಾಲ್, ಕರ್ನಾಟಕದ ಓಪನಿಂಗ್ ಬ್ಯಾಟರ್ ಸದ್ಯ ಟೀಂ ಇಂಡಿಯಾದಿಂದ ಡ್ರಾಪ್ ಆಗಿದ್ದಾರೆ. ಭಾರತ ಪರ 21 ಟೆಸ್ಟ್​ ಮತ್ತು ಐದು ಒನ್​ಡೇ ಮ್ಯಾಚ್​ಗಳನ್ನಾಡಿರುವ 32 ವರ್ಷದ ಅಗರ್ವಾಲ್, ಕಳಪೆ ಫಾರ್ಮ್​ನಿಂದಾಗಿ ಟೀಮ್​ನಲ್ಲಿ ಸ್ಥಾನ ಪಡೆಯಲು ವಿಫಲರಾಗಿದ್ದಾರೆ. ಐಪಿಎಲ್​ನಲ್ಲೂ ಅವರಾಟ ಅಷ್ಟಕಷ್ಟೆ. ಆದ್ರೆ  ಡೊಮೆಸ್ಟಿಕ್ ಕ್ರಿಕೆಟ್​ನಲ್ಲಿ ಮಾತ್ರ ಮಯಾಂಕ್ ಅದ್ಭುತ ಆಟವಾಡ್ತಿದ್ದಾರೆ. ಸೌತ್ ಝೋನ್​​ ಟೀಮ್​​​ಗೆ ಎರಡು ಟ್ರೋಫಿ ಗೆಲ್ಲಿಸಿಕೊಟ್ಟಿದ್ದಾರೆ.

ಹೌದು, ಮಯಾಂಕ್ ಅಗರ್‌ವಾಲ್‌ ನಾಯಕತ್ವದಲ್ಲಿ ದಕ್ಷಿಣ ವಲಯ ತಂಡ ದೇವ್​ಧರ್ ಟ್ರೋಫಿ ಏಕದಿನ ಟೂರ್ನಿ ಗೆದ್ದುಕೊಂಡಿದೆ. ಪಶ್ಚಿಮ ವಲಯ ತಂಡವನ್ನ ಸೋಲಿಸಿ ಮಯಾಂಕ್ ಬಳಗ ಟ್ರೋಫಿ ಎತ್ತಿ ಹಿಡಿಯಿತು. 6 ಪಂದ್ಯಗಳಿಂದ 4 ಹಾಫ್ ಸೆಂಚುರಿ ಬಾರಿಸಿದ ಅಗರ್ವಾಲ್, ಫೈನಲ್​ನಲ್ಲೂ ತಂಡಕ್ಕೆ ಆಸರೆಯಾಗಿದ್ದರು. ನಾಯಕನಾಗಿ ಮತ್ತು ಆಟಗಾರನಾಗಿ ಸಕ್ಸಸ್ ಆಗಿದ್ದಾರೆ. ಇನ್ನು ದೇವ್​ಧರ್ ಟ್ರೋಫಿಗೂ ಮುನ್ನ ನಡೆದ ದುಲೀಪ್ ಟ್ರೋಫಿಯನ್ನು ದಕ್ಷಿಣ ವಲಯ ಗೆದ್ದುಕೊಂಡಿತ್ತು. ಆ ತಂಡಕ್ಕೆ ಮಯಾಂಕ್ ಉಪನಾಯಕ. 4 ಇನ್ನಿಂಗ್ಸ್​ನಲ್ಲಿ ಎರಡು ಅರ್ಧಶತಕ ಹೊಡೆದಿದ್ದ ಅಗರ್ವಾಲ್, ಅಲ್ಲೂ ಸೌತ್ ಝೋನ್ ಟೀಮ್​​​ಗೆ ನೆರವಾಗಿದ್ದರು.

ನಂಬರ್ 16.. 7 ಆಗಿದ್ದೇಗೆ..?  1+6= 7

ಮಯಾಂಕ್ ಅಗರ್ವಾಲ್ ಈ ಮುಂಚೆ ತಮ್ಮ ಜೆರ್ಸಿ ಹಿಂಬದಿ ನಂಬರ್ 16 ಅಂತ ಹಾಕಿಸಿಕೊಂಡಿದ್ದರು. ಜೆರ್ಸಿ ನಂಬರ್ 16 ಹಾಕಿಕೊಂಡು ಅವರು ಟೀಂ ಇಂಡಿಯಾ ಪರ ನಾಲ್ಕು ಶತಕ ಬಾರಿಸಿದ್ದಾರೆ. ಐಪಿಎಲ್​ನಲ್ಲೂ ಸೆಂಚುರಿ ಸಿಡಿಸಿದ್ದಾರೆ. ಆದ್ರೆ ಈ ಸೀಸನ್ ಡೊಮೆಸ್ಟಿಕ್​ನಲ್ಲಿ ಮಾತ್ರ ಅವರ ಜೆರ್ಸಿ ನಂಬರ್ 7. ಹೌದು, 16 ನಂಬರ್ ತೆಗೆದುಹಾಕಿರುವ ಮಯಾಂಕ್, 7ನೇ ನಂಬರ್ ಜೆರ್ಸಿ ಹಾಕಿಕೊಂಡು ಆಡ್ತಿದ್ದಾರೆ. ಈ ನಂ. 7 ಜೆರ್ಸಿಯನ್ನ ಅವರು ಹಾಕಿಕೊಂಡಿದ್ದೇ ತಡ. ಎರಡೆರಡು ಟ್ರೋಫಿ ಗೆದ್ದಿದ್ದಾರೆ. ಹೀಗಾಗಿ ನಂಬರ್ 7 ಜೆರ್ಸಿ ಅವರ ಪಾಲಿಗೆ ಲಕ್ಕಿಯಾಗಿದೆ.  1+6 ಕೂಡಿದರೆ 7 ಬರುತ್ತೆ. ಈ ಏಳನ್ನೇ ಅವರು ಜೆರ್ಸಿ ಹಿಂಬದಿ ಹಾಕಿಕೊಂಡಿರೋದು.

ನಂ. 7 ಜೆರ್ಸಿಯನ್ನ ಭಾರತ ಪರ ಆಡುವಾಗ ಹಾಕುವಂತಿಲ್ಲ..!

ನಂಬರ್ 7 ಜೆರ್ಸಿ ಎಂಎಸ್ ಧೋನಿ ಅವರದ್ದು ಅಂತ ನಾವ್ ಹೇಳಬೇಕಿಲ್ಲ. ಈ ನಂಬರ್ 7 ಜೆರ್ಸಿ ಹಾಕಿಕೊಂಡು ಮಹಿ, ಭಾರತಕ್ಕೆ ಮೂರು ಐಸಿಸಿ ಟ್ರೋಫಿ ಮತ್ತು ಸಿಎಸ್​ಕೆಗೆ ಐದು ಐಪಿಎಲ್ ಕಪ್ ಗೆಲ್ಲಿಸಿಕೊಟ್ಟಿದ್ದಾರೆ. ಈ ಲೆಜೆಂಡ್ ಪ್ಲೇಯರ್​ ಜೆರ್ಸಿಯನ್ನ ಬಿಸಿಸಿಐ ರಿಟೈರ್ಡ್​ ಮಾಡಿಸಿದೆ. ಅಂದ್ರೆ ಭಾರತ ಪರ ಆಡುವಾಗ ನಂ. 7 ಜೆರ್ಸಿಯನ್ನ ಯಾರೂ ಹಾಕಬಾರದು ಎಂದು ಹೇಳಿದೆ. ಆದ್ರೆ ಡೊಮೆಸ್ಟಿಕ್​ನಲ್ಲಿ ಮಾತ್ರ ನಂ.7 ಜೆರ್ಸಿ ಹಾಕಬಹುದು. ಹೀಗಾಗಿಯೇ ಮಯಾಂಕ್, ಧೋನಿ ಜೆರ್ಸಿ ನಂಬರ್ ಹಾಕಿಕೊಂಡಿರೋದು. ಸೌತ್ ಝೋನ್​ಗೆ ಎರಡು ಟ್ರೋಫಿ ಗೆಲ್ಲಿಸಿಕೊಟ್ಟಿರೋದು.

ಟೀಂ ಇಂಡಿಯಾದಿಂದ ಡ್ರಾಪ್ ಆಗಿರುವ ಮಯಾಂಕ್, ಸದ್ಯ ಅದ್ಭುತ ಫಾರ್ಮ್​ನಲ್ಲಿದ್ದಾರೆ. ನಂಬರ್ 7 ಜೆರ್ಸಿ ಸದ್ಯ ಅವರ ಕೆರಿಯರ್​ ಅನ್ನೇ ಬದಲಿಸಿದೆ. ಮತ್ತೆ ಅವರು ಟೀಮ್ ಇಂಡಿಯಾಗೆ ಕಮ್​ಬ್ಯಾಕ್ ಮಾಡ್ತಾರಾ..? ಜೆರ್ಸಿ ನಂಬರ್ 7 ಅವರ ಅದೃಷ್ಟವನ್ನ ಬದಲಿಸುತ್ತಾ..? ನೋಡ್ಬೇಕು.