☰
ಚೆನ್ನೈ ಸೂಪರ್ ಕಿಂಗ್ಸ್ ತಂಡದ ನಾಯಕತ್ವ ಬದಲಾವಣೆಯ ಬಗ್ಗೆ ಎಂ.ಎಸ್.ಧೋನಿ ಮೌನ ಮುರಿದಿದ್ದಾರೆ. ಋತುರಾಜ್ ಗಾಯಕ್ವಾಡ್ ಅವರ ಶಾಂತ ಸ್ವಭಾವ ಮತ್ತು ಸಾಮರ್ಥ್ಯದ ಬಗ್ಗೆ ತಂಡಕ್ಕೆ ನಂಬಿಕೆಯಿದೆ ಎಂದು ಅವರು ಹೇಳಿದ್ದಾರೆ.
ನವದೆಹಲಿ: ಚೆನ್ನೈ ಸೂಪರ್ ಕಿಂಗ್ಸ್ (ಸಿಎಸ್‌ಕೆ) ತಂಡವನ್ನು ಮುನ್ನಡೆಸಲು ಋತುರಾಜ್ ಗಾಯಕ್ವಾಡ್ ಅವರನ್ನು ಆಯ್ಕೆ ಮಾಡಿದ ಬಗ್ಗೆ ಮಾಜಿ ಭಾರತೀಯ ನಾಯಕ ಎಂ ಎಸ್ ಧೋನಿ ಕೊನೆಗೂ ಮೌನ ಮುರಿದಿದ್ದಾರೆ. ಋತುರಾಜ್ ಬಹಳ ಸಮಯದಿಂದ ತಂಡದ ಭಾಗವಾಗಿದ್ದಾರೆ, ಅವರು ಶಾಂತ ಮತ್ತು ಸಮಾಧಾನ ಚಿತ್ತದವರಾಗಿದ್ದಾರೆ. ತಂಡದ ಆಡಳಿತ ಮಂಡಳಿಗೆ ಅವರ ಸಾಮರ್ಥ್ಯದ ಬಗ್ಗೆ ನಂಬಿಕೆ ಇದೆ ಎಂದು ಕ್ಯಾಪ್ಟನ್ ಕೂಲ್ ಹೇಳಿದ್ದಾರೆ.
ತಂಡದ ಭವಿಷ್ಯದ ಅಗತ್ಯಗಳ ಬಗ್ಗೆ ವಿಶಾಲ ದೃಷ್ಟಿಯಿಂದ ನೋಡಬೇಕು. ಆಗಾಗ ನಿಮ್ಮ ಮುಖ್ಯ ತಂಡದ ಭಾಗವಾಗಿರುವ ಮತ್ತು ನಿಮಗಾಗಿ ಉತ್ತಮವಾಗಿ ಆಡುವ ಆಟಗಾರರನ್ನು ನೀವು ದೀರ್ಘಕಾಲದವರೆಗೆ ನಂಬಬಹುದು ಎಂದು ಅನುಭವಿ ವಿಕೆಟ್ ಕೀಪರ್ ಬ್ಯಾಟ್ಸ್‌ಮನ್ ಹೇಳಿದ್ದಾರೆ. "ನೀವು ದೀರ್ಘಕಾಲೀನ ಚಿತ್ರಣವನ್ನು ನೋಡಬೇಕು. ಆಗಾಗ ನಿಮ್ಮ ಮುಖ್ಯ ತಂಡದ ಭಾಗವಾಗಿರುವ ಮತ್ತು ನಿಮಗಾಗಿ ಉತ್ತಮವಾಗಿ ಆಡುವ ಆಟಗಾರರನ್ನು ನೀವು ದೀರ್ಘಕಾಲದವರೆಗೆ ನಂಬಬಹುದು.
ಬೌಲರ್‌ಗಳು, ಅದರಲ್ಲೂ ವಿಶೇಷವಾಗಿ ವೇಗದ ಬೌಲರ್‌ಗಳಿಗೆ ಯಾವಾಗಲೂ ಗಾಯಗಳಾಗುವ ಸಾಧ್ಯತೆ ಇರುತ್ತದೆ. ಋತುರಾಜ್ ಬಹಳ ಸಮಯದಿಂದ ನಮ್ಮೊಂದಿಗಿದ್ದಾರೆ. ಅವರು ನಮಗಾಗಿ ಉತ್ತಮವಾಗಿ ಆಡಿದ್ದಾರೆ. ಅವರ ಸ್ವಭಾವ ತುಂಬಾ ಚೆನ್ನಾಗಿದೆ. ಅವರು ತುಂಬಾ ಶಾಂತ, ತುಂಬಾ ಸಮಾಧಾನ ಚಿತ್ತದ ವ್ಯಕ್ತಿ. ಅವರಿಗೂ ಮತ್ತು ಫ್ಲೆಮಿಂಗ್‌ಗೂ ಬಹಳ ಚೆನ್ನಾಗಿ ಹೊಂದಾಣಿಕೆಯಾಗುತ್ತದೆ. ಆದ್ದರಿಂದ ನಾವು ಅವರನ್ನು ನಾಯಕತ್ವಕ್ಕೆ ಪರಿಗಣಿಸಿದ್ದೇವೆ. ಋತುರಾಜ್ ನಮಗೆ ಉತ್ತಮವಾಗಿ ಆಡುತ್ತಾರೆ ಎಂದು ನಮಗೆ ಖಚಿತವಿತ್ತು," ಎಂದು ಧೋನಿ ಜಿಯೋ ಹಾಟ್‌ಸ್ಟಾರ್‌ಗೆ ತಿಳಿಸಿದರು.
ಗಾಯಕ್ವಾಡ್ ಸಿಎಸ್‌ಕೆ ತಂಡವನ್ನು ಮುನ್ನಡೆಸಲಿದ್ದಾರೆ ಎಂದು ಕಳೆದ ವರ್ಷವೇ ಅವರಿಗೆ ತಿಳಿಸಲಾಗಿತ್ತು ಎಂದು ಧೋನಿ ಹೇಳಿದರು. "ಕಳೆದ ವರ್ಷ ಐಪಿಎಲ್ ನಂತರ, ನಾನು ತಕ್ಷಣವೇ ಅವರಿಗೆ ಹೇಳಿದೆ, '90 ಪ್ರತಿಶತದಷ್ಟು ನೀವೇ ಮುಂದಿನ ಸೀಸನ್‌ನಲ್ಲಿ ನಾಯಕತ್ವ ವಹಿಸಿಕೊಳ್ಳುತ್ತೀರಿ, ಆದ್ದರಿಂದ ಮಾನಸಿಕವಾಗಿ ನಿಮ್ಮನ್ನು ಸಿದ್ಧಪಡಿಸಿಕೊಳ್ಳಲು ಪ್ರಾರಂಭಿಸಿ'. ಪಂದ್ಯಾವಳಿ ಪ್ರಾರಂಭವಾಗುವ ಮೊದಲು, ನಾನು ಅವರಿಗೆ, 'ನಾನು ನಿಮಗೆ ಸಲಹೆ ನೀಡಿದರೆ, ನೀವು ಅದನ್ನು ಪಾಲಿಸಲೇಬೇಕು ಎಂದೇನಿಲ್ಲ. ನಾನು ಸಾಧ್ಯವಾದಷ್ಟು ದೂರವಿರಲು ಪ್ರಯತ್ನಿಸುತ್ತೇನೆ' ಎಂದು ಹೇಳಿದ್ದೆ. ಸೀಸನ್‌ನಲ್ಲಿ, ಹಿನ್ನೆಲೆಯಲ್ಲಿ ನಾನೇ ನಿರ್ಧಾರಗಳನ್ನು ತೆಗೆದುಕೊಳ್ಳುತ್ತಿದ್ದೇನೆ ಎಂದು ಅನೇಕ ಜನರು ಊಹಿಸಿದರು. ಆದರೆ ಸತ್ಯವೇನೆಂದರೆ 99 ಪ್ರತಿಶತ ನಿರ್ಧಾರಗಳನ್ನು ಅವರೇ ತೆಗೆದುಕೊಳ್ಳುತ್ತಿದ್ದರು. ಪ್ರಮುಖ ನಿರ್ಧಾರಗಳು, ಬೌಲಿಂಗ್ ಬದಲಾವಣೆಗಳು, ಫೀಲ್ಡ್ ಪ್ಲೇಸ್‌ಮೆಂಟ್ - ಎಲ್ಲವೂ ಅವರದ್ದೇ ಆಗಿದ್ದವು. ನಾನು ಅವರಿಗೆ ಸಹಾಯ ಮಾಡುತ್ತಿದ್ದೆ ಅಷ್ಟೇ. ಅವರು ಆಟಗಾರರನ್ನು ನಿಭಾಯಿಸುವಲ್ಲಿ ಅದ್ಭುತ ಕೆಲಸ ಮಾಡಿದ್ದಾರೆ," ಎಂದು ಅವರು ಹೇಳಿದರು.
ಋತುರಾಜ್ ಗಾಯಕ್ವಾಡ್ 2024 ರಲ್ಲಿ ಸಿಎಸ್‌ಕೆ ನಾಯಕರಾಗಿ ತಮ್ಮ ಐಪಿಎಲ್ ಪಯಣವನ್ನು ಪ್ರಾರಂಭಿಸಿದರು. ಧೋನಿ 14 ಸೀಸನ್‌ಗಳವರೆಗೆ ನಾಯಕತ್ವ ವಹಿಸಿಕೊಂಡ ನಂತರ ಅವರಿಗೆ ನಾಯಕತ್ವದ ಜವಾಬ್ದಾರಿಯನ್ನು ಋತುರಾಜ್ ಗಾಯಕ್ವಾಡ್‌ಗೆ ಹಸ್ತಾಂತರಿಸಿದರು.
ಇದನ್ನೂ ಓದಿ: ಕೊಹ್ಲಿ ಶತಕಕ್ಕೆ ಹಾತೊರೆಯುತ್ತಾರೆ: ಅಚ್ಚರಿ ಹೇಳಿಕೆ ಕೊಟ್ಟ ಎಂ ಎಸ್ ಧೋನಿ!
ಐದು ಬಾರಿ ಚಾಂಪಿಯನ್ ಆಗಿರುವ ಸಿಎಸ್‌ಕೆ ಕಳೆದ ವರ್ಷ ರಾಯಲ್ ಚಾಲೆಂಜರ್ಸ್ ಬೆಂಗಳೂರು ವಿರುದ್ಧ ಸೋತ ನಂತರ ಗುಂಪು ಹಂತದಿಂದ ಹೊರಬಿದ್ದಿತ್ತು. ಆದರೆ ಈ ವರ್ಷ ತಂಡವು ತನ್ನ ತವರಿನಲ್ಲಿ ತನ್ನ ಬದ್ಧ ವೈರಿ ಮತ್ತು ಐದು ಬಾರಿಯ ಚಾಂಪಿಯನ್ ಮುಂಬೈ ಇಂಡಿಯನ್ಸ್ ವಿರುದ್ಧ ನಾಲ್ಕು ವಿಕೆಟ್‌ಗಳಿಂದ ಗೆದ್ದು ಅದ್ಭುತವಾಗಿ ಸೀಸನ್ ಆರಂಭಿಸಿದೆ.
ನಾಯಕ ಋತುರಾಜ್ ಗಾಯಕ್ವಾಡ್ ಅವರ ಸ್ಪೋಟಕ 53 ರನ್ ಸೂಪರ್ ಕಿಂಗ್ಸ್‌ನ ಯಶಸ್ವಿ ರನ್ ಚೇಸ್‌ಗೆ ಟೋನ್ ಸೆಟ್ ಮಾಡಿತು. ಇದು ಐಪಿಎಲ್‌ನಲ್ಲಿ ಅವರ ವೇಗದ ಅರ್ಧಶತಕವಾಗಿದೆ.
