ನೋಡನೋಡುತ್ತಿದ್ದಂತೆ ರಿಂಕು ಕೆನ್ನೆಗೆ ಬಾರಿಸಿದ ಕುಲ್ದೀಪ್ ಯಾದವ್; ಅಚ್ಚರಿ ಅಪ್‌ಡೇಟ್ ಕೊಟ್ಟ ಕೆಕೆಆರ್!

ಡೆಲ್ಲಿ ಕ್ಯಾಪಿಟಲ್ಸ್ ವಿರುದ್ಧ ಕೋಲ್ಕತಾ ನೈಟ್ ರೈಡರ್ಸ್ 14 ರನ್‌ಗಳ ಜಯ ಸಾಧಿಸಿದ ಬಳಿಕ ಕುಲ್ದೀಪ್ ಯಾದವ್, ರಿಂಕು ಸಿಂಗ್‌ಗೆ ಕಪಾಳಮೋಕ್ಷ ಮಾಡಿರುವ ವಿಡಿಯೋ ವೈರಲ್ ಆಗಿದೆ. ಈ ಘಟನೆಯ ಬಗ್ಗೆ ಕೆಕೆಆರ್ ಸ್ಪಷ್ಟನೆ ನೀಡಿದೆ.

ನವದೆಹಲಿ: 18ನೇ ಆವೃತ್ತಿಯ ಇಂಡಿಯನ್ ಪ್ರೀಮಿಯರ್ ಲೀಗ್ ಟೂರ್ನಿಯಲ್ಲಿ ಡೆಲ್ಲಿ ಕ್ಯಾಪಿಟಲ್ಸ್ ಎದುರು ಹಾಲಿ ಚಾಂಪಿಯನ್ ಕೋಲ್ಕತಾ ನೈಟ್ ರೈಡರ್ಸ್‌ 14 ರನ್‌ಗಳ ರೋಚಕ ಜಯ ಸಾಧಿಸಿದೆ. ಇನ್ನು ಈ ಪಂದ್ಯದ ಬಳಿಕ ಡೆಲ್ಲಿ ಕ್ಯಾಪಿಟಲ್ಸ್ ತಂಡದ ಅನುಭವಿ ಸ್ಪಿನ್ನರ್, ಕೆಕೆಆರ್ ಸ್ಪೋಟಕ ಬ್ಯಾಟರ್ ರಿಂಕು ಸಿಂಗ್‌ಗೆ ಕಪಾಳಮೋಕ್ಷ ಮಾಡಿದ್ದಾರೆ. ಈ ವಿಡಿಯೋ ವೈರಲ್ ಆಗುತ್ತಿದ್ದಂತೆಯೇ ಕೆಕೆಆರ್ ಫ್ರಾಂಚೈಸಿ ತೇಪೆ ಹಚ್ಚುವ ಕೆಲಸ ಮಾಡಿದೆ. ಸಾಮಾಜಿಕ ಮಾಧ್ಯಮದಲ್ಲಿ ವೈರಲ್ ಆದ ವೀಡಿಯೊದಲ್ಲಿ ಕುಲ್ದೀಪ್ ರಿಂಕುವನ್ನು ಎರಡು ಬಾರಿ ಹೊಡೆಯುವುದನ್ನು ಕಾಣಬಹುದು. 

ಮಂಗಳವಾರ ಇಲ್ಲಿನ ಅರುಣ್ ಜೇಟ್ಲಿ ಕ್ರೀಡಾಂಗಣದಲ್ಲಿ ದೆಹಲಿ ಮತ್ತು ಕೋಲ್ಕತ್ತಾ ನಡುವಿನ ಪಂದ್ಯದ ನಂತರ, ರಿಂಕು ಮತ್ತು ಕುಲ್ದೀಪ್ ಒಂದೆರಡು ಆಟಗಾರರೊಂದಿಗೆ ಮಾತನಾಡುತ್ತಾ ಮತ್ತು ನಗುತ್ತಿರುವುದು ಕಂಡುಬಂದಿತು. ಇದ್ದಕ್ಕಿದ್ದಂತೆ, ಕುಲ್ದೀಪ್ ಯಾದವ್, ಸ್ಪೋಟಕ ಬ್ಯಾಟರ್ ರಿಂಕುವನ್ನು ಎರಡು ಬಾರಿ ಕೆನ್ನೆಗೆ ಬಾರಿಸುತ್ತಾರೆ. ಆಗ ನಗುನಗುತ್ತಾ ಮಾತಾಡುತ್ತಿದ್ದ ರಿಂಕು ಸಿಂಗ್ ಅವರ ಮುಖ ಬಾಡಿದಂತೆ ಭಾಸವಾಗುತ್ತದೆ. ಉತ್ತರ ಪ್ರದೇಶ ತಂಡದ ಆಟಗಾರರ ನಡುವಿನ ಭಿನ್ನಾಭಿಪ್ರಾಯದ ಬಗ್ಗೆ ಕೆಕೆಆರ್ ಊಹಾಪೋಹಗಳನ್ನು ತೆರೆ ಎಳೆಯುವ ಪ್ರಯತ್ನ ಮಾಡಿದೆ.

ಇಬ್ಬರು ಉತ್ತರ ಪ್ರದೇಶ ತಾರೆಗಳ ನಡುವೆ ಭಿನ್ನಾಭಿಪ್ರಾಯವಿದೆ ಎಂದು ಅಭಿಮಾನಿಗಳಲ್ಲಿ ಊಹಾಪೋಹಗಳು ಕಾಡ್ಗಿಚ್ಚಿನಂತೆ ಹೊರಹೊಮ್ಮಲು ಪ್ರಾರಂಭಿಸಿದವು. ಕೋಲ್ಕತ್ತಾ ನೈಟ್ ರೈಡರ್ಸ್ ಬುಧವಾರ ಇನ್‌ಸ್ಟಾಗ್ರಾಮ್‌ನಲ್ಲಿ ವೀಡಿಯೊವನ್ನು ಬಿಡುಗಡೆ ಮಾಡಿ "ಮಾಧ್ಯಮ (ಸನ್ಸನಿ) vs (ದೋಸ್ತೋಂ ಕೆ ಬೀಚ್ ಕಾ) ರಿಯಾಲಿಟಿ! ಗೆಹ್ರಿ ದೋಸ್ತಿ ಫೀಟ್. ನಮ್ಮ ಪ್ರತಿಭಾವಂತ ಉತ್ತರ ಪ್ರದೇಶ ಹುಡುಗರು" ಎಂದು ಶೀರ್ಷಿಕೆ ನೀಡಿದೆ.

ವೀಡಿಯೊದಲ್ಲಿ, ರಿಂಕು ಮತ್ತು ಕುಲ್ದೀಪ್, ಪರಸ್ಪರ ತಮ್ಮ ಹೆಗಲ ಮೇಲೆ ಹೆಗಲು ಹಾಕಿಕೊಂಡು, 'ಪ್ರೀತಿ' ಎಂಬ ಸನ್ನೆಯನ್ನು ಮಾಡಿದರು ಮತ್ತು ಸಂತೋಷದಿಂದ ಪರಸ್ಪರ "ಕೈಸೆ ಹೋತಾ ಹೈ?" (ನೀವು ಅದನ್ನು ಹೇಗೆ ಮಾಡುತ್ತೀರಿ) ಎಂದು ಕೇಳಿದರು. ಪ್ರಸಿದ್ಧ 'ಶೋಲೆ' ಹಾಡು 'ಯೇ ದೋಸ್ತಿ ಹಮ್ ನಹಿ ತೋಡೆಂಗೆ' ಹಿನ್ನೆಲೆಯಲ್ಲಿ ಕೇಳಿ ಬರುತ್ತದೆ. 

ಡೆಲ್ಲಿ ಕ್ಯಾಪಿಟಲ್ಸ್ ಎದುರು ಕೋಲ್ಕತಾ ನೈಟ್ ರೈಡರ್ಸ್ ಎದುರು ಗೆದ್ದಿದ್ದು ಹೇಗೆ?

ಡೆಲ್ಲಿ ಕ್ಯಾಪಿಟಲ್ಸ್ ಎದುರು ಕೊನೆಗೂ ಅಜಿಂಕ್ಯ ರಹಾನೆ ನೇತೃತ್ವದ ಕೋಲ್ಕತಾ ನೈಟ್ ರೈಡರ್ಸ್‌ ರೋಚಕ ಜಯ ಸಾಧಿಸುವಲ್ಲಿ ಯಶಸ್ವಿಯಾಗಿದೆ. ಕೆಕೆಆರ್ ಗೆಲುವಿನಲ್ಲಿ ರಿಂಕು ಸಿಂಗ್ ಪ್ರಮುಖ ಪಾತ್ರವಹಿಸಿದರು. ಡೆಲ್ಲಿ ಎದುರು ರಿಂಕು ಸಿಂಗ್ 25 ಎಸೆತಗಳನ್ನು ಎದುರಿಸಿ ಮೂರು ಬೌಂಡರಿ ಹಾಗೂ ಒಂದು ಆಕರ್ಷಕ ಸಿಕ್ಸರ್ ನೆರವಿನಿಂದ ಅಮೂಲ್ಯ 36 ರನ್ ಕಲೆಹಾಕಿದರು. ಪರಿಣಾಮ ಕೆಕೆಆರ್ ನಿಗದಿತ 20 ಓವರ್‌ಗಳಲ್ಲಿ 9 ವಿಕೆಟ್ ಕಳೆದುಕೊಂಡು 204 ರನ್ ಕಲೆಹಾಕಿತು.

ಇನ್ನು ಗುರಿ ಬೆನ್ನತ್ತಿದ ಡೆಲ್ಲಿ ಕ್ಯಾಪಿಟಲ್ಸ್ ತಂಡವು ಉತ್ತಮ ಆರಂಭ ಪಡೆಯಲು ವಿಫಲವಾಯಿತು. ಇನ್‌ಫಾರ್ಮ್ ಬ್ಯಾಟರ್ ಅಭಿಷೇಕ್ ಪೊರೆಲ್ ಒಂದಂಕಿ ಮೊತ್ತಕ್ಕೆ ವಿಕೆಟ್ ಒಪ್ಪಿಸಿದರು. ಕರುಣ್ ನಾಯರ್ ಹಾಗೂ ಕೆ ಎಲ್ ರಾಹುಲ್ ಕೂಡಾ ಜವಾಬ್ದಾರಿಯುತ ಬ್ಯಾಟಿಂಗ್ ನಡೆಸಲು ವಿಫಲವಾದರು. ಒಂದು ಕಡೆ ನಿರಂತರವಾಗಿ ವಿಕೆಟ್ ಬೀಳುತ್ತಿದ್ದರೂ, ಮತ್ತೊಂದು ತುದಿಯಲ್ಲಿ ಫಾಫ್ ಡು ಪ್ಲೆಸಿಸ್ ಆಕರ್ಷಕ ಅರ್ಧಶತಕ ಸಿಡಿಸಿದರು. ಫಾಫ್‌ಗೆ ನಾಯಕ ಅಕ್ಷರ್ ಪಟೇಲ್‌ ಕೂಡಾ ಉತ್ತಮ ಸಾಥ್ ನೀಡಿದರು. ಹೀಗಿದ್ದೂ ಡೆಲ್ಲಿ, ಕೆಕೆಆರ್ ಎದುರು ಅಲ್ಪ ಅಂತರದಲ್ಲಿ ಮುಗ್ಗರಿಸಿತು.